1 Degbeŋgyoo waa kpa neŋ n wose kekyaŋ wee,

Yakɔbe Wurubuarɛ ŋon yele dee gyee neŋ.

2 Waa kpila ŋolo lee ɔ deni fereŋkyeŋ keŋ man kaa kyɔ neŋ,

waa lee Siyɔn bula dɔɔ kaa do neŋ doŋ.

3 Waa tɔɔse n kedeesase pou,

na waa lɛɛ n katoo kedeesase.

4 Waa yɛɛ n konɔɔ man kegyaebii fa neŋ,

waa yela ŋan pou n ne gyae nyi n ke yɛɛ nɛ ke de fa neŋ.

5 Dɛɛ fae yeesa nyaŋee lee n keyoodi dɔɔ,

na dee gyina da felagese adido de Wurubuarɛ yele man.

Degbeŋgyoo waa yɛɛ n kebɔɔsese pou fa neŋ.

6 Nɛnɛɛ me ta gyem nyi,

Degbeŋgyoo ne faana walaŋ ŋon bɔɔ tiu e nuŋ nɛ keyoodi.

Ɔ ne kpa e lee wa adido fereŋkyeŋ keŋ man,

na ɔ keyoodi doŋ dinaa keŋ.

7 Baale na mo ba wose lɔ anebiliŋiŋse dɔɔ, te baale mɔ dɛɛkyɔŋse dɔɔ,

mɔna daa na mo da wose bo lɔ Degbeŋgyoo de Wurubuarɛ yele dɔɔ.

8 Baa buŋii ba doona dɔɔ na baa lee yala,

mɔna daa dɛɛ koro na dɛɛ seŋ keŋkeŋ.

9 Degbeŋgyoo, yela gyoo keyoodi!

De baake neŋ na kpa daa!