1 Ɛ lese Degbeŋgyoo yele.

Dei nyi dee kpee yele kalese nɔɔneŋ fa de Wurubuarɛ,

ke dei te kaboena nyi dɛɛ lese ɔ yele.

2 Degbeŋgyoo ne baŋ Yerusalɛm,

ɔ ne yilaa Iseraetena yoogbeŋa baŋ.

3 Ɔ ne kyɔ baŋ nombia ne takaa wɔ nɛ,

na ɔ te bake be gyamɛɛ.

4 Ɔ na wola kyolobiise yaanɔɔle,

te ɔ doo be popou yela.

5 Degbeŋgyoo kerɛɛ te ɔ doŋ dokoso be kyaa ya,

ɔ nombia man kenyii be taŋ ɔto ya.

6 Degbeŋgyoo ne gyina baŋ bɔɔ yɔkɔse wɔ nɛ,

mɔna ɔ ne fuŋ akpanyanyaŋtena lɔ tɛɛle man.

7 Ɛ kpee karaŋ kefa nɔɔneŋ fa Degbeŋgyoo,

ɛ mo adolɛɛ kpee nɔɔneŋ fa de Wurubuarɛ.

8 Ŋon moona debuŋta wuu ŋɔma dɔɔ,

ɔ ne yele ɔga ne ŋɛɛ woli tɛɛle,

ɔ ne yele ŋalese ne tuu bulasebia dɔɔ.

9 Ɔ ne fa wonembia weenɛɛ,

ɔ ne fa kwaakwaadabi bia baŋ bee wii nɛ weenɛɛ.

10 Dɛɛkyɔŋ doŋ bɛɛ gyoo ɔ sia ya,

yoote nawɔɔ ɔsaa bɛɛ gyoo ɔ sia ya.

11 Mɔna baŋ bee yee Degbeŋgyoo nɛ nombia na gyoona ɔ sia,

baŋ bɛɛ mo be loo gyakaa ɔ kegyae kekpaakekpaa keŋ dɔɔ nɛ.

12 Yerusalɛm, kɛlɛɛ Degbeŋgyoo,

Siyɔn, lese n Wurubuarɛ yele.

13 Ɔ ne yele n denaanɔɔ nyeela ne yɛɛ doŋ,

ɔ ne hiraa n balaŋ baŋ be doo n man.

14 Ɔ ne yele wosefɛɛreŋ ne kyaa n wuluse man,

ɔ na mo aboŋ kpaakpaa fa neŋ n ne dii baa.

15 Ɔ ne kpila ɔ nɔɔwoya kɔŋ tɛɛle dɔɔ,

ɔ nombia dana ɔsaa.

16 Ɔ ne fɛlɛɛ senoo ŋgba dukurufa mpuu nɛ,

na ɔ te ŋmatee obosuo ŋgba tɔŋ nɛ.

17 Ɔ ne fuŋii wa akpeleŋkpeleŋbia lɔ ŋgba boyabia nɛ.

Amɔte ne gyaela waa tale seŋ ɔ waare man?

18 Ɔ kpila ɔ nombia kaa yalakee ŋa,

ɔ ne yele ɔ feliŋ ne gyɔɔ na loŋse te waale.

19 Ɔ ta lese ɔ nombia wola Yakɔbe,

wɔ mmaraase na ɔ kawolase wola Iserae.

20 Ɔ te yɛɛ kei fa tɛɛlese ŋaale ya,

bɔɔ gyeŋ wɔ mmaraase ya.

Ɛ lese Degbeŋgyoo yele.