1 Degbeŋgyoo yɛna ma keŋmaŋee na ma nyeekelɛɛ,

amɔte yaa maa yee?

Degbeŋgyoo te me yeuwɔ kagyoo,

amɔte ne gyaela waa ŋmaase maŋ.

2 Akpaa akpanyanyaŋtena de kaa wuu me dɔɔ,

nyi baa wɔlɛɛ maŋ nɛ,

me kɔlara na baŋ bɛɛ kɔla maŋ,

ne gyaela baa sarakee na baa lee yala.

3 Doo nyi yoonɔɔtena te kaa tɔ maŋ do koraŋ nɛ,

me wɔe be gyae ke lɔ maŋ ya,

nyi yoo da koro me dɔɔ nɛ,

keŋ gba te me wɔe ne fɛɛ maŋ.

4 Kolo dokoloŋ te mɛɛ sola Degbeŋgyoo,

keŋ kaageŋ gbɛɛ te me silana,

nyi maa som Degbeŋgyoo dɛɛ,

ma kekyaa man pou,

na maa kɛɛ Gbeŋgyoo gyakoloŋ nombia,

na maa kɛo e wɔ ɔsom deni dinaa keŋ man.

5 Nawolo nyi ma wose de kyaŋ maŋ na,

waa mo maŋ see wɔ ɔsom deni dinaa keŋ man wosefɛɛreŋ man,

waa mo maŋ weese wɔ ɔsom deni fereŋkyeŋ keŋ wuluŋ man,

na waa gate maŋ gyakaa kpanaŋ dɔɔ adido.

6 Dekɔŋ mena na ma nyee gyae ka koro maŋ,

kela me kɔlara baŋ pou bɔɔ kilisi maŋ nɛ,

maa mo kenyaŋee yeesa yɛɛ kedeesa ɔ kanyaŋ deni fereŋkyeŋ keŋ man.

Maa kpee nɔɔneŋ lese Degbeŋgyoo yele.

7 Degbeŋgyoo, akpaa me baake neŋ na nyii maŋ,

wii me waraŋase na n ke kpa maŋ.

8 Mee nyii me konɔɔ man nyi, <<Kɛɛ ɔ siaman.>>

Degbeŋgyoo, n siaman te maa kɛɛ.

9 Naa mo n sia weese maŋ ya,

naa mo baŋ gegi n tobaale ya,

nyaŋ yɛna ŋon n ne kyɔ maŋ.

Naa bɛɛ maŋ yaa n ka lese n sia yela maŋ ya,

ma nyeelɛɛre Wurubuarɛ.

10 Nyi me kya na me naa de bɛɛ maŋ nɛ,

Degbeŋgyoo waa lɛɛ maŋ.

11 Degbeŋgyoo, wola maŋ n gbɛɛ,

na n ka mo maŋ ta gbɛɛ teeŋ dɔɔ,

lee baŋ bɛɛ ŋere maŋ do nɛ dɔɔ.

12 Naa fa me kɔlara gbɛɛ baa yɛɛ maŋ ba kegyaebii ya,

nawolo nyi akɛrɛɛ adansɛɛtena ta koro seŋ tia maŋ,

bɛɛ mo akɛrɛɛ nombia gyakaa me dɔɔ.

13 Me dana lookegyakaa nideli nyi,

maa naa Degbeŋgyoo deeli,

deni balaŋ tɛɛle dɔɔ.

14 Kɛɛ Degbeŋgyoo siaman,

seŋ keŋkeŋ na n ke nyiŋ konɔɔ,

na n ke kɛɛ Degbeŋgyoo siaman.