1 Me yakowɔ nyiaa, <Maa kɛɛ ma keta man nideli,

nyi mɔɔ mo me laakem kolosi dukum ya,

Maa do me nɔɔ dokɔŋ,

debaŋ keŋ me kyaa akpanyanyaŋtena man nɛ.>

2 Mena dɔɔ me wuu me nɔɔ,

keŋ ma te kolosi nombii kpaakpaa daale ya,

mɔna mɛɛ bese nyii weeleŋ kpu.

3 Me wɔe ne lɔ maŋ bo.

Nyi ma gyoo ke man nɛ, na me wɔe gyakaa ne lɔ maŋ bo,

keŋte me gyuusu me nɔɔ kolosi nyiaa,

4 Degbeŋgyoo, wola maŋ ma nyeedoŋ ɔto,

na ma weeya yaanɔɔle,

yela maa gyeŋ mena keŋ ma weeya ne yeu.

5 N te kɔɔkee ma weeya yɛɛ ŋgba nyiŋmaa tale man nɛ,

ma weeya te yɛɛ kolo ke n siaman ya.

Walaŋ kamasɛ wɔɛ ŋgba weesɛɛ nɛ,

mo kpuna baŋ ne yɛɛ wɔ nyi be te nyiŋ ba wose nɛ.

6 Kɛɛ, ke yɛɛ ampaŋ nyi walaŋ kamasɛ dɔŋ bo ŋgba wɔŋtaa nɛ,

bee gelee abɔɔ burum bo see yakaa,

mɔna bɔɔ gyeŋ ŋon waa kaa mo ŋa wee daale ya.

7 <Mɔna nɛnɛɛ Degbeŋgyoo, woŋ yaa mɛɛ kɛɛ gbɛɛ?

Me ta mo me loo gyakaa n dɔɔ.

8 Lɛɛ maŋ lee me nombiakumɛɛ pou man,

naa yele ayiŋtena ke kulu maŋ ya.

9 Me wuu me nɔɔ, keŋ me te gyuusu me nɔɔ ya,

nawolo nyi nyaŋ yɛna ŋon n be yɛɛ kei.

10 Lese n dambila keŋ lee me dɔɔ,

n ketuku keŋ ta yee maŋ.

11 Akpaa n kalena ŋolo te n wɔŋ ɔ deŋele lee ɔ dukum dɔɔ nɛ,

n ne wɔlɛɛ ɔ dedii ŋgba paapaa nɛ,

ke yɛɛ ampaŋ nyi walaŋ kamasɛ yɛɛ ŋgba weesɛɛ nɛ.

12 <<Degbeŋgyoo, nyii ma kefane,

na n ke tei me kewii baake,

naa tɔ n deŋela lee me kewii baake dɔɔ ya,

Me kyaa n gyaŋ bo ŋgba ŋɔɔle nɛ,

me yɛɛ ŋɔɔle e ŋgba me naanaɔ pou nɛ.

13 Lese n sia lee me dɔɔ, na ma wose ke fɛɛ maŋ kyomii,

pɛna maa lee kɛbo, keŋ bɔɔ naa maŋ bela ya.>>