1 Walaŋ ŋon ɔ kyaa Adidote ŋon dekyae man nɛ,

waa fɛɛfo Dekpataakpere ŋon wuluŋ tɛɛ.

2 Maa yako Degbeŋgyoo nyiaa, <<Nyaŋ yɛna me keyeu kagyoo na me gyeere,

me Wurubuarɛ ŋon mɛɛ mo ma wose lɔ ɔ dɔɔ.>>

3 Ampaŋ waa lɛɛ neŋ,

lee kɔtase nyɔɔre kɔta man,

na yeŋ kawee kamasɛ man.

4 Waa mo ɔ wona wuu n dɔɔ,

na n ke yeu kagyoo ɔ beŋkelɛɛ tɛɛ,

wa anokoare kedi yɛna n yoo nyeele pampasaŋ keŋ ne gyee neŋ.

5 N be gyae n ke yee ŋan ne ŋmaase balaŋ nelim,

yaa baŋdaŋ nyeela ŋan ne furufu tɛɛkena,

6 yaa yeŋ kawee keŋ dɔŋ detiŋtɛɛ man,

yaa kayeyɛɛ keŋ ne wɔlɛɛ abɔɔ weese teŋteŋ nɛ ya.

7 Kakpoŋ baa yala n yenaŋ,

na kakpoŋse kufu (10) ke yala n dunoluŋ yenaŋ,

mɔna ŋa be gyae ka benaa neŋ ya.

8 Nyaŋ ka mo n sia bo kɛɛ,

na n kena mena keŋ baa tɔ akpanyanyaŋtena kom.

9 Akpaa n yako nyi, <Degbeŋgyoo te mee yeu kagyoo,>

te n mo Adidote ŋon yɛɛ n dekyae nɛ,

10 dukum be gyae ke kɔŋ n dɔɔ ya,

te nombiikum be gyae ka benaa n kanyaŋ deni ya.

11 Nawolo nyi waa lese ɔ kpilara dona neŋ,

nyi baa gyee neŋ n gbɛɛneŋ pou man.

12 Baa gyina neŋ adido be nyiŋmaase man,

keŋ nyi n be gyae n ka mo n nae gyɔna boe ya.

13 Nyaŋ ka betee dinaate na wurale dɔɔ,

nyaŋ ke sakatee dinaate dinaa na doma.

14 Degbeŋgyoo kpa, keŋ ɔ ne gyae maŋ dɔɔ maa lɛɛ e.

Maa gyee e nawolo nyi ɔ gyeŋ ma yele.

15 Waa baake maŋ, na maa kpa e,

maa kpuna e ɔ wose kekyaŋ man,

maa lɛɛ e na maa mo obuo fa e.

16 Maa yela waa kyaa kyare,

na maa yela waa naa ma nyeekelɛɛ.>>