1 Me Wurubuarɛ na me Gyoo, maa gyina neŋ adido,

maa lese n yele kekpaakekpaa.

2 Maa lese n yele wee kamasɛ,

na maa kɛlɛɛ neŋ kekpaakekpaa.

3 Degbeŋgyoo kerɛɛ te ɔ kaboena nyi baa lese ɔ yele,

ŋolo be tale gyeŋ wɔ ɔkeereŋ man ya.

4 Kalola kegyakaare daale ne kɛlɛɛ n tomse fa kalola kegyakaare wɔle,

bɛɛ gyɔ n nombia dinaana ŋan n be yɛɛ nɛ dekpeŋkpeŋ.

5 Bee kolosi lee nyɔ obuo na n gyoorobiiri wose man,

te maŋ maa gyoo n gyakoloŋ nombia ŋan n ne yɛɛ nɛ man.

6 Bee kolosi lee n gyakoloŋ nombia ŋan n ne yɛɛ nɛ wose man,

te maŋ maa gyɔ n tomse dinaana ŋan dekpeŋkpeŋ.

7 Bee kolosi lee n deeli burum keyɛɛ wose man,

te bɛɛ nyaŋee kpee n katenee nɔɔneŋ.

8 Degbeŋgyoo na boele balaŋ te ɔ ne wii wɔ,

ɔ bɛɛ gyeŋ baŋ bileŋbileŋ ya, te ɔ dana wɔe nideli.

9 Degbeŋgyoo dei fa balaŋ pou,

ɔ ne wii abɔɔ wa ayɛŋ pou waraŋase.

10 Degbeŋgyoo, abɔɔ nya ayɛŋ pou na lese n yele,

n balaŋ baŋ bee di anokoare nɛ pou baa kɛlɛɛ neŋ.

11 Bɛɛ yako gyoorobiiri keŋ doo n gyooridedii wose man nɛ nombia,

te bee kolosi lee n doŋ wose man,

12 na balaŋ pou kenyiŋ gyeŋ abɔɔ dinaana ŋan n ne yɛɛ,

na n gyooridedii gyoorobiiri kyeote keŋ.

13 N gyooridedii yɛɛ gyooridedii kekpaakekpaa,

te n gyoorikedi gyae kedoo fa kalola kegyakaarese pou.

Degbeŋgyoo ne di anokoare ɔ keyakosee pou man,

te ɔ ne di anokoare ŋan pou ɔ ne yɛɛ nɛ man.

14 Degbeŋgyoo ne lɔɔ kyaŋ baŋ pou bɛɛ yale nɛ,

te ɔ ne gyina baŋ pou bɔɔ yɔkɔse wɔ nɛ.

15 Sia pou ne kɛɛ neŋ,

te n ne fa wɔ be weenɛɛ ka debaŋ man.

16 N ne gyuusu n nyiŋmaa,

te n ne yele baŋ pou be kyaa nyeedoŋ man nɛ ne nyiŋ keŋ bɛɛ gyae.

17 Degbeŋgyoo tenɛɛ ɔ gbɛɛneŋ pou man,

te ɔ ne di anokoare ŋan pou ɔ ne yɛɛ nɛ man.

18 Degbeŋgyoo benaana baŋ pou bɛɛ baake e,

baŋ pou bɛɛ baake e anokoare man nɛ.

19 Ɔ ne yɛɛ baŋ bee yee e nɛ kegyaebii fa wɔ,

ɔ ne nyii be kewii na ɔ te lɛɛ ba nyee.

20 Degbeŋgyoo sia gyakaa baŋ pou bɛɛ gyae e nɛ dɔɔ,

mɔna waa wɔlɛɛ akpanyanyaŋtena pou.

21 Maa gyuusu me nɔɔ kolosi lese Degbeŋgyoo yele.

Baŋ pou ɔ be yɛɛ wɔ nɛ baa lese ɔ yele fereŋkyeŋ keŋ yele,

kekpaakekpaa.