1 Degbeŋgyoo, mɛɛ baake neŋ, yɛɛ bileŋ kɔŋ me gyaŋ,

akpaa me baake neŋ na nyii maŋ.

2 Yela ma kefane kelii n siaman ŋgba oliifi nɛ,

nyi me gyina me nyiŋmaase na, dɛɛ yɛɛ ŋgba balinɔɔ kedeesa nɛ.

3 Degbeŋgyoo, do me nɔɔ dokɔŋ,

na n ke gyee me nɔɔsebia.

4 Naa yele me konɔɔ ke gyu dukum keyɛɛ man,

na maa yɛɛ akpanyanyaŋ nombia,

mo kpuna nombiakumɛɛ yɛɛra ya,

naa yele maa di be weenɛɛ gyoŋ nyiŋan ŋan ya.

5 Nyi walaŋ ŋon ɔ tenɛɛ de gyɔ maŋ na, ke yɛɛ deeli te ɔ yɛɛwɔ fa maŋ,

nyi ɔ kalena maŋ na, ke yɛɛ nuŋ te ɔ kyɛɛkeewɔ woli ma nyee.

Ma nyee be gyae ke bɛɛ ke ya,

nawolo nyi ma kefane gyae ke tia nombiakumɛɛ yɛɛra ayɛɛsa.

6 Baa fuŋ be kegyiise lee bula nyeedɔɔ kaa lɔ,

na akpanyanyaŋtena ka gyeŋ nyi me nɔɔwoya yɛɛ anokoare.

7 Baa yako nyiaa, <<Mena keŋ bɛɛ fara tɛɛle purikii ke nɛ,

mena te be yelaa de ŋɔɔ yaaseewɔ yebɔɔ nɔɔman.

8 Mɔna Degbeŋgyoo Doŋ Pou Nyee, me sia gyakaa n dɔɔ,

nyaŋ te mee yeu kaagyoo, naa yele maa yeŋ ya.

9 Gyee maŋ lee kɔtase ŋan nombiakumɛɛ yɛɛra be nyɔɔ,

lee kɔtase ŋan bɔɔ nyɔɔ maŋ nɛ man.

10 Yela akpanyanyaŋtena ka gyoo baŋ gbagba kɔtase man,

na maŋ ke gbaa ŋa laŋ wosefɛɛreŋ man.