1 Degbeŋgyoo, nyii ma kefane,

tei me kewii baake,

lee nya anokoare kedi, na n katenee dɔɔ,

kpa maŋ.

2 Naa bu n tobaale fɔɔ ya,

nawolo nyi ŋolo be kyaa keŋ ɔ tenɛɛ n siaman ya.

3 Kɔlare ŋon te kuu gyakaa me dɔɔ,

ɔ te gyɔ maŋ lɔ tɛɛle man kpaaŋ,

ɔ te yele me doo detiŋtɛɛ man,

ŋgba baŋ bɔɔ wulaa yekee nɛ.

4 Mena dɔɔ ma wose te yɔkɔse maŋ,

te yele ma te yala koyololo.

5 Mɛɛ tɔɔse gyaŋgba gyaŋgba,

mɛɛ gyoo n tomse ŋan pou man,

mɛɛ gyoo n nyiŋmaa man tomse pou man.

6 Me te gyina me nyiŋmaase tee neŋ,

n ne gyɔ maŋ loo ŋgba tɛɛle dowolosa ne kɛɛna ɔga gbɛɛ nɛ.

7 Degbeŋgyoo, kpa maŋ bileŋ,

ma wose te kyaŋ maŋ nideli.

Naa mo n sia weese maŋ ya,

na mena ya na, maa yɛɛ ŋgba baŋ bɔɔ tisi gyoo yebɔɔ man nɛ.

8 Tɔɔse maŋ lee n kegyae keŋ taŋ ɔto ya nɛ nombia nebo kamasɛ,

nawolo nyi me ta mo ma wose lɔ n dɔɔ.

Wola maŋ gbɛɛ keŋ maa mo,

nawolo nyi me ta mo ma nyeedoŋ do n nyiŋmaa man.

9 Degbeŋgyoo, lɛɛ maŋ lee me kɔlara nyiŋmaa man,

nawolo nyi me ta mo ma wose kaa weese n gyaŋ.

10 Wola maŋ maa yɛɛ n kegyaebii,

nawolo nyi nyaŋ yɛna me Wurubuarɛ,

yela n feliŋ kpaakpaa ŋon,

ka mo maŋ ta tɛɛle tatarataa dɔɔ.

11 Degbeŋgyoo, lee n yele dɔɔ lɛɛ ma nyee,

lee n katenee dɔɔ, lese maŋ lee ma wose kekyaŋ man.

12 Lee n kegyae keŋ taŋ ɔto ya dɔɔ, lese me kɔlara pou,

munu baŋ pou bɛɛ kɔla maŋ nɛ,

nawolo nyi me yɛɛ n tobaale e.