1 Ao Wurubuarɛ, tei ma kefane,

naa besena n wɔle tee me kasola ya.

2 Nyii maŋ na n ke kpa maŋ.

Ma nyeeman nombia ta bese kasolɔ me dɔɔ,

3 me kɔlara te yele gyakoloŋ ta gyoo maŋ,

lee mena keŋ akpanyanyaŋtena ne ŋmaase maŋ nɛ dɔɔ,

nawolo nyi bɛɛ mo kaale kaa lɔ me dɔɔ,

be ta gyeŋ baŋ do maŋ te bɛɛ kɔla maŋ.

4 Me wɔe ne lɔ maŋ nideli,

te yeŋ ne ŋmaase maŋ.

5 Gyakoloŋ na keseree ta gyoo maŋ,

ma wose te tekerii maŋ.

6 Me yakowɔ nyiaa, <<Ao, nyi meŋ dana beŋkelɛɛ ŋgba duwuluŋ nɛ,

nafɔ maa furufu gyu yenaŋ daale ke fɛɛfo.

7 Maa furufu gyu lemlem,

na me kaa kyaa depampaa man.

8 Maa barase gyu ke gyae dayoe,

keŋ dana lem lee feliŋ doŋte na ɔga kefae man.>>

9 Degbeŋgyoo, yela kekolosi ka gyoo akpanyanyaŋtena, wɔlɛɛ ba kebake man,

nawolo nyi mɛɛ naa be nombiakumɛɛ, na be kale kegyae donɔɔ dinaa keŋ man.

10 Nelim na ka weese na, be gyakaa ka akyaŋse dɔɔ bee gyu bɛɛ kɔŋ,

nombiakumɛɛ na kayeyɛɛ doo ke man.

11 Donɔɔ keyɛlɛɛ nombia te wulu donɔɔ dinaa keŋ man,

balaŋ kaŋeredo na akɛrɛɛ bɛɛ taŋ ka abɔnterese man ya.

12 Nyi kɔlare ŋolo deŋ na teena maŋ na,

nafɔ maa nyiŋ konɔɔ,

nyi kɔlare ŋolo deŋ ne tia maŋ na,

nafɔ maa yeu ka yo.

13 Mɔna nyaŋ deniwalaŋ ŋgba maŋ nɛ,

me dɔɔ na me gyoo ŋon dee gyu dɛɛ kɔŋ,

14 ŋon nafɔ nɔɔdokoloŋ doo da nsana,

Wurubuarɛ dɛɛ nɛ,

te daa na e ne tɛɛ,

baŋ bɛɛ som man nɛ.

15 Yela yeŋ kaa futaa me kɔlara,

yela baa tisi gyu woyadɛɛ na be sia fonɛɛ,

nawolo nyi nombiakumɛɛ te wulu be man.

16 Mɔ maŋ dɔɔ, me baake Wurubuarɛ,

te Degbeŋgyoo lɛɛ ma nyee.

17 Nebo na weeseteŋteŋ na ke balinɔɔ,

mee mutii wii,

te ɔ nyii ma woya.

18 Nyi balaŋ burum da koro seŋ tia maŋ koraŋ nɛ,

ɔ ne lɛɛ maŋ keŋ kolokum bɛɛ yɛɛ maŋ ya.

19 Wurubuarɛ ŋon ɔ ne di gyoori leenaŋ beneŋ beneŋ,

te ɔ bɛɛ kyɛɛkee ya nɛ,

waa nyii wɔ na waa yɔkɔse wɔ,

nawolo nyi Wurubuarɛ keyee be doo be man ya.

20 Me dɔɔ ne yoo ɔ gyoona,

ɔ te yala ɔ nɔɔkebakesee keŋ dɔɔ.

21 Ɔ kekolosi dana yeliŋ ŋgba doosi nɛ,

mɔna yoo nombia doo ɔ konɔɔ man,

ɔ nɔɔwoya woɛ kela nuŋ,

mɔna ŋe yɛɛ yoosilase ŋan bɔɔ wɔm lese.

22 Mo n kasolɔ lɔ Degbeŋgyoo dɔɔ,

ŋon ne gyaela waa kɛɛ n dɔɔ,

ɔ be gyae waa yela

ŋon ɔ tenɛɛ nɛ ke wosi ya.

23 Mɔna nyaŋ Wurubuarɛ, nyaŋ ka mo akpanyanyaŋtena,

do yebɔɔ man na baa dala,

awudiina na akɛrɛɛtena,

be gyae baa di ba weeya yaale ya.

Mɔna maŋ dɔɔ, maa mo ma wose lɔ n dɔɔ.