1 Nyaŋ wɔlɛɛre,

ŋon ba te wɔlɛɛ neŋ ya, laako!

Nyaŋ ŋon n na lese balaŋ fa,

te be ta lese neŋ fa ya nɛ, laako!

Akpaa n tina kewɔlɛɛ yela nɛ,

baa wɔlɛɛ neŋ,

Akpaa n tina kalesefa yela nɛ,

baa lese neŋ fa.

2 Degbeŋgyoo, boele daa,

nawolo nyi dɛɛ kɛo neŋ.

Yɛɛ de doŋ nebo kamasɛ,

da nyeekelɛɛ kayeyɛɛ man.

3 N faedo na balaŋ ne yekii,

n koro na tɛɛlese ne yaasee.

4 Be te yilaa n yooman abɔɔ ŋgba akpataanabia kee yilaa nɛ,

balaŋ ne wuu abɔɔ dɔɔ ŋgba akpataana dikpii nɛ.

5 Be te gyina Degbeŋgyoo, nawolo nyi ɔ kyaa adido adido,

ɔ nombia kedi kegbɛɛ dɔɔ na ɔ katenee gyae ke wuu Siyɔn.

6 Waa yɛɛ mokɔɔkasee doŋte ɛ debaŋ man,

nyeekelɛɛ na nyansa na nombia kagyeŋ gyae ka bo fa wɔ,

Degbeŋgyoo keyee yɛna ba wosekenyiŋ.

7 Kɛɛ, be baalabia ne wii keŋkeŋ abɔnterese man,

wosefɛɛreŋ kpilara ne wii moomoomoo.

8 Ba te bɛɛ gbɛɛneŋ dinaana ŋan,

gbɛɛtɛɛra bɛɛ tɛɛ gbɛɛneŋ ŋan dɔɔ ya.

Nɔɔkebakesee keŋ te wɔlɛɛ,

ba te bɛɛ adansɛɛ ŋan,

bɔɔ ne bu walaŋ na walaŋ ya.

9 Tɛɛle keŋ ta wolo te ka te wɔlɛɛ,

Lebanɔn sia ta yem te ke ta boto,

Saron yɛɛ ŋgba depampaa nɛ,

te Basan na Kamɛle te kpiisi faareŋse.

10 Degbeŋgyoo kpa nyiaa, <<Nɛnɛɛ maa koro,>>

<<Nɛnɛɛ maa gyina ma wose adido,

nɛnɛɛ maa gate ma wose adido.

11 Ɛ te kyaŋ wura fulu,

ɛ lola kaase,

ɛ weesɛɛ yɛna boalaŋ keŋ gyae ke kpa ŋon.

12 Balaŋ baŋ baa kpa bese tɔŋ,

baa do wɔ boalaŋ ŋgba sɔɔse ŋan bɔɔ kɛrɛɛ see nɛ.>>

13 Ɛmɛɛ baŋ ɛ kyaa lemlem, ɛ nyii kpene keŋ mɔɔ yɛɛ,

ɛmɛɛ baŋ ɛ benaa, ɛ gyene me wɔɔle.

14 Gyakoloŋ ta gyoo dukumyɛɛra baŋ be kyaa Siyɔn,

keseree ta gyoo baŋ bɔɔ ne yee Wurubuarɛ ya nɛ.

<<De man woŋti ne gyaela waa tale seŋ boalaŋ degyapaa keŋ nɔɔman?

De man woŋti ne gyaela waa tale kyaa boalaŋ keŋ kɛɛ kpaa kekpaakekpaa nɛ gyaŋ?>>

15 Baŋ ba keta man tenɛɛ,

te bee kolosi keŋ ke doona kegbɛɛ,

te bɛɛ bɛɛ kolo kenyiŋ lee gbɛɛkum man,

te bɛɛ bɛɛ kolo kayolɛɛ,

baŋ bɛɛ tɔ ba deŋela lee balaŋ kako nombia man,

te bee wuu be sia nyi bɔɔ kɛɛ dukum ya nɛ,

16 baŋ yɛna baŋ baa kyaa botɔɔ keŋ korɛɛ,

be keyeu kagyoo gyae ke yɛɛ bula dekagya keŋ.

Baa fa wɔ weenɛɛ,

te loŋ be gyae ke paŋ wɔ ya.

17 Ɛ sia gyae ke naa gyoo ŋon ɔ gyoorobiiri man,

te ɛ ke kɛɛ tɛɛle keŋ fɛlɛɛ gyu lemlem.

18 Nyaŋ ka gyueŋ gyaŋgba gyakoloŋ nombia ŋan man nyiaa,

<<Nde ŋon ɔ ne kala abɔɔ nɛ?

Nde ŋon ɔ ne lɛɛ totose nɛ?

Nde ŋon ɔ ne kala dekagyase ŋan nɛ?>>

19 Ɛ ba tekaa naa agaŋtaŋtena benaŋ bela ya,

balaŋ baŋ bɛɛ lɔkɔtee,

baŋ bee kolosi dei keŋ ŋolo bee nyii ke man ya.

20 Ɛ kɛɛ Siyɔn, de nɔɔkedi donɔɔ dinaa keŋ,

ɛ sia gyae kena Yerusalɛm,

wosefɛɛreŋ dekyae, kanyaŋ deni keŋ bɔɔ gyae baa lese ke ya,

bɔɔ gyae baa kulii ke tuulase,

yaa baa kɛrɛɛ ka ŋmeeseŋ ya.

21 Botɔɔ te Degbeŋgyoo waa yɛɛ de doŋte.

Botɔɔ gyae ke yɛɛ ŋgba booneŋ dinaana na boŋobiise dekyae,

bɔɔ gyae baa saa agbelese ŋe dɔɔ ya,

pantuuse be gyae baa ta ŋe dɔɔ ya.

22 Nawolo nyi Degbeŋgyoo yɛna de nombiadiiri,

Degbeŋgyoo ne faana daa mmaraase,

Degbeŋgyoo yɛna de gyoo,

ŋon yɛna ŋon waa lɛɛ da nyee.

23 N ŋmeeseŋ man te yɔkɔse,

be tale kyaŋ degbele daase ŋan keŋkeŋ ya,

bɛɛ tale fɛlɛɛ kanyaŋ keŋ man ya,

kenaŋ na baa kpala yooman abɔɔ burum ŋan,

ɔtakase koraŋ waa ŋmaa abɔɔ.

24 Ŋolo be kyaa Siyɔn keŋ waa yako nyi, <<Mɛɛ wee,>> ya,

te baa mo baŋ be kyaa botɔɔ nɛ dukum kyɛɛ wɔ.