1 Mɔna baŋ be doo wosekekyaŋ man be gyae baa naa detiŋtɛɛ bela ya. Gyaŋgba keŋ na ɔ yɔkɔse Sebulɔn tɛɛle na Nafitali tɛɛle, mɔna wee daale waa kaa do Galelia keŋ yɛɛ ŋɔɔla tɛɛlese ŋan kyaa ɛpo gbɛɛ Yɔɔdan diŋgyiŋ nɛ obuo.

2 Balaŋ baŋ be dɔŋ detiŋtɛɛ man nɛ,

te naa keŋmaŋee dinaa daale,

keŋmaŋee te ŋmaŋee fa,

baŋ be kyaa detiŋtɛɛ tuum tɛɛle man nɛ.

3 N te yele tɛɛle keŋ te wuku,

te n yela be nyaŋeewɔ nideli,

bɛɛ nyaŋee n siaman,

ŋgba weenɛɛ kekɛrɛɛtɛɛ kenyaŋee nɛ,

ŋgba mena keŋ yoonɔɔtena ne nyaŋee

yooman abɔɔ kekpala man nɛ.

4 Ŋgba mena keŋ n be yɛɛ Midianetena ke yala yoo man nɛ,

n wɔlɛɛ,

kasolɔ keŋ na ŋere wɔ nɛ,

na nyeele keŋ gyakaa ba degbaŋgbaŋ dɔɔ nɛ,

na baŋ bɛɛ ŋere wɔ do nɛ gbutu.

5 Yoonɔɔte kamasɛ nkyokota keŋ ɔ ba doo gyu yoo,

na ba kegbase ŋan pou fatabo be kpatee ŋa nɛ,

kaboena nyi baa too ŋa,

kaboena nyi baa mo ŋa do boalaŋ.

6 Nawolo nyi be ta lola bu fa daa,

ba te fa daa bu baale,

ɔ gyoori gyakaa ɔ degbaŋgbaŋ dɔɔ.

Baa baake e nyi,

Gyakoloŋ Nombia, Kolosirefa, Wurubuarɛ Dekpataakpere,

Kya Kekpaakekpaa, Wosefɛɛreŋ Gyoo

7 Ɔ gyooridedii gyae ke fɛlɛɛ te ɔ wosefɛɛreŋ

be dana ɔto ya.

Waa di ɔ gyoori Dawide gyoorogbeli dɔɔ,

na gyoorobiiri keŋ man,

waa mo nombia kedina kegbɛɛ dɔɔ na katenee

desina ke baŋ,

lee debaŋ kenaŋ kelii kekpaakekpaa,

Degbeŋgyoo Dekpataakpere kegyae nideli keŋ,

ne gyaela ke yɛɛ kei.

8 Degbeŋgyoo ta do tiila tia Yakɔbe,

ke gyae ke kɔŋ Iseraetena dɔɔ.

9 Balaŋ baŋ pou baa gyeŋ ke,

Ɛferayimtena na baŋ be kyaa Samariya,

baŋ bɛɛ mo wose kegate,

na agaŋtaŋ konɔɔ yako nyi, 10 <<Birikisise ŋan te yale,

mɔna dɛɛ mo boya ŋan bɔɔ kpae nɛ bese baŋ ke,

ba te kɛrɛɛ fiigi daase ŋan lɔ,

mɔna dɛɛ mo sida daase see ŋe nawɔɔ man.>>

11 Mɔna Degbeŋgyoo ta do Resin kɔlara doŋ,

te ɔ yela be kɔlara korowɔ be dɔɔ.

12 Aramtena baŋ bɔɔ lee weese dɛɛlee na Filisitena baŋ bɔɔ lee weese dɛɛyalae nɛ,

te di Iserae dɔɔ.

Mɔ lee kɛŋa pou wɔle nɛ, ɔ te tinaata ɔ baŋ yela ya,

ɔ nyiŋmaa sɛɛ doo adido.

13 Mɔna balaŋ baŋ ta bese kɔŋ ŋon ɔ be tuku wɔ nɛ gyaŋ,

yaa baa kɛo Degbeŋgyoo Dekpataakpere ŋon ya.

14 Mena dɔɔ Degbeŋgyoo waa mo wee dokoloŋ kara Iserae nyee na ɔ gyuŋ,

ɔkɛɛ na moro pou.

15 Kegyiise na obuo balaŋ yɛna nyee keŋ,

te gbalara baŋ be kawola yɛɛ akɛrɛɛ nɛ yɛna gyuŋ keŋ.

16 Baŋ be dɔŋ balaŋ kɛwɔ siaman ta mo wɔ yooso,

te baŋ be silana wɔ nɛ ta yo gbɛɛ.

17 Mena dɔɔ tewulɛɛ nombia be gyae ka gyoo Degbeŋgyoo sia,

yaa waa wii yoyolobiise na liala ya.

nawolo nyi ɔkamasɛ bee yee Wurubuarɛ ya te be dana akpanyanyaŋ,

te nɔɔ kamasɛ ne kolosi kehuhoori nombia bo.

Kɛŋa pou wɔle koraŋ nɛ ɔ baŋ te fɛɛ e ya,

ɔ nyiŋmaa sɛɛ doo adido.

18 Ampaŋ ba akpanyanyaŋ nombia ne kpaa ŋgba boalaŋ nɛ,

kɛɛ kpa kpaŋkpaŋkorolose na kpalamse,

kɛɛ kpa laa dinaana,

na ke nyɔɔse tuum ta gyem gyu adido.

19 Degbeŋgyoo Dekpataakpere ŋon baŋ,

te kpa tɛɛle keŋ,

te balaŋ baŋ baa yɛɛ ŋgba keŋ bɛɛ mo do boalaŋ nɛ,

bɔɔ gyae baa wii dɔŋa ya.

20 Bɛɛ ŋmaa weenɛɛ dunoluŋ dɔɔ

mɔna bɛɛ yeŋ tanam,

bee dii demena dɔɔ,

mɔna bɔɔ ne baa ya.

2 Ɔkamasɛ waa tao ŋon gbagba bu.

21 Manase waa tao Ɛferayim, na Eferayim mɔ ke tao Manase,

be bala baa koro seŋ tia Yuda.

Mɔ kɛŋa pou wɔle na ɔ te tina ɔ baŋ keŋ yela ya,

ɔ nyiŋmaa sɛɛ doo adido.