1 Mu kwezi kwa Abibu, muzohore muhimbaza Pasika y’Uhoraho Imana yanyu, kuko muri ukwo kwezi kwa Abibu ari ho Uhoraho yabakuye muri Egiputa, hakiri mw’ijoro. 2 Muzoshikanire ibimazi vya Pasika Uhoraho Imana yanyu mukuye mu bitungwa no mu mikuku vyanyu, mubimushikanire muri ca kibanza Uhoraho azoba yaratoranije ngo habe Izina ryiwe. 3 Ntimuzorye imikate irimwo umwambiro, ariko muzomare imisi indwi murya imikate itarimwo umwambiro, ni yo mikate y’imibabaro, kuko mwavuye muri Egiputa mwihuta, kugira ngo mu buzima bwanyu muzokwame mwibuka igihe mwaviriye muri Egiputa. 4 Ntihaze hagire umwambiro uba mu vyo mutunze mu gihugu canyu muri iyo misi ndwi. Ntihaze hagire inyama z’ibimazi vyanyu zirara ngo zishike mu gitondo.

5 Ntimuze mupfe igisagara mushikaniyemwo ibimazi vya Pasika mu bisagara Uhoraho Imana yanyu yabahaye, 6 kiretse muri ca kibanza Uhoraho Imana yanyu azoba yaritoranirije ngo habe izina ryiwe. Aho ni ho muzoshikanira ibimazi vya Pasika ku mugoroba, izuba rirenze, mwibuka umusi mwaviriyeko muri Egiputa. 7 Muze muteke inyama z’ico gitungwa muzirire muri ico kibanza Uhoraho Imana yanyu azoba yaratoranije, bukeye muheze musubire mu mahema yanyu. 8 Muzomare imisi itandatu murya imikate itarimwo umwambiro, ku musi ugira indwi na ho muzogire ikoraniro imbere y’Uhoraho Imana yanyu, kandi ntimuze mugire igikorwa muwukorako.

9 Muzoharure amayinga indwi uhereye ku musi mwatanguriyeko kugenya ingano mukoresheje urukero mu gihe co kwimbura, 10 muheze muhimbaze umusi mukuru w’amayinga mu guha icubahiro Uhoraho Imana yanyu, mumushikanire amashikanwa avuye ku mitima ikunze kubera imigisha azoba yarabahaye. 11 Muzoheze munezerererwe imbere y’Uhoraho Imana yanyu muri muri ca kibanza azoba yaratoranije kugira habe Izina ryiwe, mwe n’abana banyu, abakozi banyu b’abahungu n’abakobwa, Abalewi bazoba baba muri mwebwe, abanyamahanga, n’impfuvyi n’abapfakazi bazoba bari muri mwebwe. 12 Muzokwame mwibuka ko mwabaye abagurano muri Egiputa, maze muheze mukurikize neza aya mategeko yose.

13 Muze mwame muhimbaza imisi mikuru y’insago, mumare imisi indwi muyihimbaza, mumaze kwegeranya ivyimburwa ku bivuye ku mbuga zo gukubitirako ingano no ku mivinyu yanyu. 14 Muzonezerererwe iyo misi mikuru, mwe n’abana banyu, abakozi banyu b’abahungu n’abakobwa, Abalewi, abanyamahanga, impfuvyi n’abapfakazi bazoba baba mu bisagara vyanyu. 15 Muze mumare imisi indwi muhimbaza iyo misi mikuru mwibuka Uhoraho Imana yanyu, mumuhimbariza mu kibanza Uhoraho azoba yitoranirije. Kuko Uhoraho Imana yanyu azoba yabahezagiriye indimiro zanyu, agahezagira n’ibikorwa vyose vy’amaboko yanyu.

16 Abagabo bose bo muri mwebwe bazoze imbere y’Uhoraho Imana yanyu gatatu ku mwaka, mu kibanza Uhoraho azoba yaratoranije. Aho na ho hazoba ari ku musi mukuru w’imikate itarimwo umwambiro, mu misi mikuru y’amayinga, no mu misi mikuru y’insago. Ntihaze hagire umuntu azoja imbere y’Uhoraho ata co atwaye. 17 Umwe wese azogende atwaye ishikanwa rihwanye n’uko Uhoraho Imana yanyu azoba yaramuhezagiye.

18 Muze mutore abacamanza n’abatware mu miryango yose no mu bisagara vyose Uhoraho Imana yanyu abahaye, baze bacire abantu imanza zibereye. 19 Ntimuze muce izigoramye canke ngo mugire nkunzi. Ntimuzorye ibiturire, kuko bihuma amaso abanyabwenge, bikagoramika amajambo y’intungane. 20 Muze mukurikire kugira ubutungane, kandi ubutungane bw’ukuri, kugira ngo mubone kubaho no kwegukira igihugu Uhoraho Imana yanyu abahaye.

21 Ntihaze hagire inkingi n’imwe ya Ashera muzoshinga i ruhande y’aho muzoba mwubatse igicaniro c’Uhoraho Imana yanyu. 22 Ntimuze mushinge n’amabuye, kuko ivyo ari igisesema k’Uhoraho Imana yanyu.