1 Bɛva moyɛlɛ bɛmaa Nana Nyamenle, na bɛzu bɛvɛlɛ ye; bɛla ye nyɛleɛ ne mɔ ali wɔ maanle maanle avinli. 2 Bɛdo edwɛne bɛmaa ye, bɛdo ayɛlɛyelɛ edwɛne bɛmaa Awulae; bɛbɔ nwanwane gyima ne mɔ mɔɔ yeyɛ la nolo. 3 Anyunlunyia ɛha ye duma nwuanzanwuanza ne, bɛmaa bɛdabɛ mɔɔ bɛkpondɛ Nana Nyamenle abo zo la, ɛli fɛlɛko wɔ bɛ ahonle nu.

4 Bɛkpondɛ Nana Nyamenle ɔ nee ye anwosesebɛ ne; bɛzonle ye dahuu.

5 Bɛmɛ, Ebileham, ye sonvolɛ, abo zo amra; bɛmɛ, Gyekɔbo, sonla ne mɔɔ ɔyele ye la, abo zo amra; 6 bɛhakye nwanwanendeɛ ne mɔ mɔɔ Nana Nyamenle yɛle, ɔ nee ndɛnebualɛ ne mɔ mɔɔ ɔvale ɔmaanle la. 7 Awulae le yɛ Nyamenle, ye ndɛnebualɛ ne mɔ wɔ ɛkɛ maa ewiade amuala. 8 Ye adwenle wɔ ye ngyehyɛlɛ ne mɔ azo dahuu; ye ɛwɔkɛ ne mɔ noko wɔ ɛkɛ ne dahuu maa ɛlɔnwɔne kpokpoti. 9 Ɔdi ngyehyɛlɛ ne mɔɔ ɔ nee Egya Ebileham yɛle, ɔ nee ye ɛwɔkɛ mɔɔ ɔbɔle Ayezeke la azo. 10 Awulae zile ye pi wɔ mɛla nu maanle Gyekɔbo, ɔvale ɔmaanle Yizilayɛma, kɛ ɔle ngyehyɛlɛ mɔɔ ɔnlɛ awieleɛ la. 11 Ɔhanle kɛ, "Bɛmɛ yɛɛ mebava Keena azɛlɛ ne meamaa bɛ a; na ɔbayɛ bɛ agyapadeɛ." 12 Mekɛ ne anu, ɛnee Nana Nyamenle ye menli ne mɔ anwo anzo; ɛnee bɛle nyɛvolɛ wɔ Keena azɛlɛ ne azo, na awie biala ambu bɛ nwo mgbonda. 13 Bɛluoluale nuhua bɛvi maanle ko azo bɛhɔle maanle ko azo; bɛvi belemgbunli maanle ko anu bɛhɔle fofolɛ nu. 14 Noko akee Nana Nyamenle ammaa adenle yeammaa awie biala ansisi bɛ. Amaa yeazinza bɛ la, ɔbɔle arelemgbunli ne mɔ kɔkɔ; 15 na ɔzele kɛ; "Bɛmmafa bɛ sa bɛka me azonvolɛ ne mɔ mɔɔ meyila bɛ la; bɛmmayɛ me ngapezoma ne mɔ ɛtane biala."

16 Awulae maanle ɛhɔne rale bɛ azɛlɛ ne azo, na ɔzɛkyele bonwole muala ɔmaanle bɛ aleɛ yɛle gyɛne. 17 Ɛnee yezoa sonla yemaa yelumua bɛ nyunlu dɛbadɛba, Dwosefi, mɔɔ bɛdɔnenle ye kɛ kanranli la. 18 Bɛguale ɔ gyakɛ amu nwiɔ nwɔnzɔnwɔnzɔ, na bɛvale bulalɛ ngɛba bɛdole ɔ kɔme, 19 kɔkpula kɛ mɔɔ ɔhanle la yɛle zɔhane la. Nana Nyamenle anloa edwɛkɛ maanle ye nɔhalɛ ne lale ali wienyi. 20 Akee belemgbunli ne zoanle maanle bɛhɔyele ye bɛvile efiade; maanle maanle neazovolɛ ne gyakyile ye maanle ɔvale ɔ nwo ɔlile. 21 Ɔyɛle ye ye Arane ne azo neazovolɛ, na ɔvale azɛlɛ ne azo ninyɛne kpokpoti ɔwulale ɔ sa. 22 Ɔmaanle ye tumi wɔ belemgbunli ne ye suakunlu mgbanyima ne mɔ anwo zo, na ɔhilehilele ye folɛtuvoma ne mɔ deɛ mɔɔ ɔwɔ kɛ bɛyɛ la.

23 Akee Yizilayɛma rale Yigyibiti, na Gyekɔbo rayɛle ɛyɛvolɛ wɔ Ham azɛlɛ zo. 24 Awulae maanle Yizilayɛma wole dɔɔnwo, na ɔmaanle bɛ nwo yɛle ɛsesebɛ dɛlale bɛ kpɔvolɛma ne mɔ. 25 Awulae hakyile Yigyibitima adwenle ɔmaanle bɛtiale ɔdaye ye menli Yizilayɛma; bɛhyile bɛ, na bɛvale bɛ bɛwulale akɛlɛyɛlɛ bo.

26 Akee ɔzoanle ye sonvolɛ Mosisi, yɛɛ Aalɔn, mɔɔ ɔzale nuhua ɔyele ye la. 27 Bɛyɛle ninyɛne ɛzulolɛ ɛzulolɛ dɔɔnwo, bɛyɛle nwanwanendeɛ mgbole mgbole wɔ Yigyibiti azɛlɛ zo. 28 Nana Nyamenle maanle awozinli kabii rale ravale azɛlɛ ne, noko akee Yigyibitima anli ye mɛla ne mɔ azo. 29 Ɔhakyile bɛ azule ne mɔ ɔmaanle bɛyɛle mogya, na ɔmaanle nuhua fɛlɛ kpokpoti wuwule. 30 Ɔmaanle ahɛlɛne vale bɛ maanle ne; bɔbɔ arelemgbunli ne mɔ dabelɛ ne mɔ amuala yiyile fefetee. 31 Nana Nyamenle luale Mosisi anwo zo dendɛle, na nrɛzenra kpolane nee ngɛkɛba ngakyile ngakyile ravale bɛ. 32 Ɔmaanle asukɔntweaba dɔle, na anwuma kpakyekpakyele memeamemea wɔ maanle ne anu amuala. 33 Ɔzɛkyele bɛ nwanye nee dɔma mbaka kpokpoti, na ɔbubule mbaka mɔɔ wɔ maanle ne anu la amuala. 34 Ɔdendɛle, na aabɛ kpolane rale, aabɛ ngakula ngyikyi ngyikyi mɔɔ ɛtia a ɛnnwu bɛ nloa a. 35 Bɛlile nya nya mɔɔ wɔ azɛlɛ ne azo la amuala; bɛzɛkyele mbakama nee aleɛ mɔɔ wɔ azɛlɛ ne azo la kpokpoti. 36 Akee ɔhunle belamunli mralɛ mɔɔ wɔ azɛlɛ ne azo la amuala, abusua eku eku mɔɔ wɔ Yigyibiti la bɛ mra mɔɔ lumua. 37 Ɔlile Yizilayɛma anyunlu ɔmaanle bɛvile Yigyibiti; bɛ muala bɛvale dwɛtɛ fufule nee nvutuke wɔ bɛ nwo. Bɛ muala bɛnyianle anwosesebɛ; bɛ nuhua biala anwo ando ye. 38 Yigyibitima anye liele wɔ melɛ mɔɔ bɛhɔle la, ɔluakɛ ɛnee bɛ nwo yɛ ɛzulolɛ somaa.

39 Nana Nyamenle maanle amungu hedale bɛ nwo zo, na ɔyele senle nɔɔzo mɔɔ bamaa bɛ wienyi a. 40 Bɛzɛlɛle bɛliele fɛlɛ, na ɔmaanle nloma dule rale; ɔmaanle bɛ aleɛ ɔvile anwuma maanle nu lɔ bɛlile bɛ ko yile. 41 Ɔkpukele bolɛ nu, na nzule vi nuhua rale; ɔzenle ɔvale fienemgbole ne azo kɛ azudenle la; 42 ɔluakɛ ɔhakyele ye ɛwɔkɛ nwuanzanwuanza ne mɔɔ ɔbɔle ye sonvolɛ, Ebileham la.

43 Zɔhane ati ɔlile ye menli ne mɔ anyunlu, ɔ nee bɛ rale Azɛlɛ ne mɔɔ bɛvale bɛbɔle bɛ Ɛwɔkɛ la azo, bɛlua edwɛnedolɛ nee anyelielɛ nu. 44 Ɔvale maanle maanle gyɛne bɛ azɛlɛ ne mɔ ɔmaanle bɛ, na ɔmaanle bɛvale bɛ anwonyiandeɛ mɔɔ bɛkpondɛ la bɛyɛle bɛ deɛ, 45 amaa ɔlua ɛhye azo bɛazie ye mɛla ne mɔ, na bɛali ye ngyehyɛlɛ ne mɔ azo. Bɛye Awulae ayɛlɛ!