Salmos 106

Nana Nyamenle ye Anwunvɔnezelɛ mɔɔ ɔlɛ ye wɔ ye ɛtanevolɛma anwo la

1 Bɛye Awulae ayɛlɛ! Bɛva moyɛlɛ bɛmaa Awulae, ɔluakɛ ɔ ti akunlu le kpalɛ; ye ɛhulolɛ kpundii ne wɔ ɛkɛ ne dahuu. 2 Nwane yɛɛ kɛhola kɛha Nana Nyamenle nyɛleɛ mgbole mgbole ne mɔ mɔɔ yeyɛ la a? Anzɛɛ nwane a kɛhola kɛye ye ayɛlɛ molozo a?

3 Nyilalɛ ɛha bɛdabɛ mɔɔ bɛdi ye mɛla ne mɔ azo, na bɛbɔ tenlene ɛbɛla mekɛ muala la.

4 O Nana Nyamenle, kakye me wɔ mekɛ mɔɔ ɛkɛdo wɔ anwunvɔnezelɛ ne ɛkɛkponde wɔ menli ne mɔ anwo la; fa me boka bɛ nwo mekɛ mɔɔ ɛkɛlie bɛ ngoane la. 5 Maa menwu menli mɔɔ ɛdawɔ wɔkpa nu wɔye bɛ la bɛ boɛyɛlɛ, amaa bɛ fɛlɛkolilɛ ne bie adwu medame noko me nwo zo, na meanyia anyunlunyia ne mɔɔ wɔ menli banyia ye la bie.

6 Yɛdayɛ nee yɛ ze mɔ kpokpoti ɛyɛ ɛtane; yɛbɔ munzule, yɛyɛ ninyɛne atisesebɛ nu. 7 Mekɛ mɔɔ yɛ ze mɔ wɔ Yigyibiti azɛlɛ zo la, bɛandwenle Nana Nyamenle ye nwanwane ninyɛne ne mɔ anwo. Bɛangakye ye ɛhulolɛ kpundii ne mɔɔ mekɛ dɔɔnwo ne ala ɔhilele ɔhilele bɛ la; na emomu bɛdwazole bɛtiale Anwuma Nyamenle Bedevinli ne wɔ Nyevile Kɔkɔlɛ ne anloa. 8 Noko akee ɔliele bɛ ngoane, kɛmɔ ɔbɔle bɛ ɛwɔkɛ la, amaa yeala ye tumi totohyia ne ali. 9 Ɔdendɛle ɔhilele Nyevile Kɔkɔlɛ ne, na ɔhakyile azɛlɛ resee; na akee ɔvale bɛ ɔluale kuma ne anu ɔpɛle bɛ kɛ asɛɛ bɛlua fiemgbole zo la. 10 Ɛhye ati ɔyele bɛ ɔvile bɛdabɛ mɔɔ bɛkyi bɛ la asa anu; ɔliele bɛ ngoane ɔvile bɛ kpɔvolɛma ne mɔ tumi bo. 11 Ɔmaanle nyevile azɛlɛkye ne mɔ nlomanle kpɔvolɛma ne mɔ; bɛ nuhua kokye bɔbɔ anga.

12 Akee ye menli ne mɔ liele ye ɛwɔkɛ ne mɔ mɔɔ ɔbɔle bɛ la lile, na bɛdole ayɛlɛyelɛ edwɛne bɛmaanle ye.

13 Noko akee yeangyɛ biala, bɛ rɛle vile ye nyɛleɛ ne mɔ, bɛangendɛ ye folɛdulɛ ne; bɛyɛle mɔɔ bɛdabɛ bɛ kunlu dwo nwolɛ la. 14 Bɛ nye bolole ninyɛne dɔɔnwo wɔ fiemgbole ne azo, na bɛzɔle Awulae Nana Nyamenle bɛnleanle. 15 Ɛhye ati ɔvale mɔɔ bɛbizale la amuala ɔmaanle bɛ, na eza noko ɔdele ewule ɔguale bɛ nwo zo: 16 Mekɛ zɔhane wɔ fiemgbole ne azo, bɛhwenle Mosisi ɔ nee Aalɔn, Nana Nyamenle ye sonvolɛ nwuanzanwuanzanli ne anwo nungule. 17 Akee azɛlɛ kpakyele nwiɔ, na ɔmenle Deetan, na ɔhedale Abaelam nee ye abusua kpokpoti anwo zo. 18 Senle dele guale bɛ nwo zo, na ɔyelale amumuyɛvoma ne mɔ dwɛɛ. 19 Bɛvale baka bɛzele ɛnlankɛ ralɛ wɔ Saenae, na bɛholole nvutuke bɛguale nwolɛ na bɛzonlenle ye. 20 Bɛvale Nana Nyamenle ye anyunlunyia ne bɛhakyile ɛnlankɛ mɔɔ di ndile, mɔɔ bɛze ye abaaba la ɛdeɛ. 21 Bɛ rɛle vile Nyamenle mɔɔ le bɛ Ngoanedievolɛ, mɔɔ yɛle nwanwanendeɛ mgbole mgbole wɔ Yigyibiti azɛlɛ zo la. 22 Bɛnlea nwanwanendeɛ mɔɔ ɔyɛle ye wɔ Ham azɛlɛ zo a! Bɛnlea ninyɛne ɛzulolɛ ɛzulolɛ mɔɔ ɔyɛle ye wɔ Nyevile Kɔkɔlɛ ne anloa a! 23 Zɔhane ati Awulae hanle kɛ ɔbazɛkye bɛ. Ɛhye ati Mosisi, mɔɔ ɔdaye ɔyele ye la, dwazole gyinlanle bɛ nee Nyamenle avinli; ɔzile ye ɛya totohyia ne mɔɔ yeva la aze, ammaa yeanzɛkye bɛ.

24 Akee bɛkpole Azɛlɛ Kpalɛ ne bɔbɔ, wɔ mekɛ mɔɔ bɛ diedi vile ye ɛwɔkɛ ne anu la. 25 Bɛdendɛle bɛ nzo abo wɔ bɛ kpɔda ne mɔ abo; na bɛangulo bɔbɔ kɛ bɛkɛdie Nana Nyamenle ane. 26 Zɔhane ati ɔhanle ndane ɔguale bɛ nwo zo, kɛ ɔbamaa bɛawuwu wɔ fiemgbole ne azo, 27 na yeakpo bɛ bɔkɔɔ wɔ maanle maanle nyunlu yeabɔ bɛ bo zo amra asande wɔ ɛsɛlɛ ne azo. 28 Akee bɛvale bɛ nwo bɛhɔbɔnenle Piyɔ awozosonvolɛma ne mɔ anwo na bɛzonlenle Baale; bɛlile aleɛ ne mɔɔ bɛfa bɛmaa bɛ awozonle ne mɔ la bie. 29 Bɛ nyɛleɛ ɛhye mɔ yɛle Awulae ɛya; ɔti ɔdele ewule ɔguale bɛ nwo zo. 30 Fenɛhase dwazole deanle bɛdabɛ mɔɔ ɔlua bɛ ɛtane ti a ɛhye zile la, na ewule ne abo pɛle ndɛndɛ zo ala. 31 Ɔlua ɛhye ati a bɛfɛlɛ ye tenlenenli la; na ɔvi ɛlɔnwɔne nwo zo kɔdwu ɛlɔnwɔne nwo zo, bɛbahakye ye melɛ mɔɔ ɔnle awieleɛ.

32 Menli ne mɔ hanle Awulae ɛya wɔ Mɛleba mbula ne mɔ anwo; na ɔlua ɛhye ati, Mosisi nwunle nwolɛ amaneɛ. 33 Bɛmaanle ɔnwunle ɔ kunlu nyane somaa, ɔlua zo ɔhehanle edwɛkɛ mɔɔ anrɛɛ ɔnle kɛ ɔka a. 34 Bɛanzɛkye menli ne mɔ, kɛmɔ Nana Nyamenle zele bɛ la. 35 Emomu, bɛ nee maanle maanle ne mɔ lile afonla bɛvale bɛ gyakɛ wɔ bɛ awozozonlenlɛ ne anu. 36 Bɛzonlenle bɛ awozonle ne mɔ bie, na ɛhye a yɛle dwɔwɔlɛ maanle bɛ a. 37 Bɛvale bɛ mra mrenyia nee mraalɛ bɛbɔle azu bɛmaanle Keena awozonle ne mɔ. 38 Bɛhanle ngakula ngyikyi ngyikyi mɔɔ bɛnze nwolɛ bie la mogya bɛguale; na ɛhye maanle evinli hanle azɛlɛ ne ɔlua mogya ne ati. 39 Bɛ nyɛleɛ ne guale bɛdabɛ bɛ nwo evinli; na bɛanli nɔhalɛ bɛammaa Nana Nyamenle. 40 Ɛhye ati Nana Nyamenle ɛya dwazole wɔ ye menli ne mɔ anwo zo, na ɔmaanle ɔkpole ye agyapadeɛ. 41 Ɔvale bɛ ɔwulale maanle maanle ne mɔ asa, na bɛ kpɔvolɛma lile bɛ nwo zo konim. 42 Bɛ kpɔvolɛma ne mɔ homonle bɛ nwo zo, na bɛvale bɛ bɛrawulale bɛ tumi bo.

43 Mekɛ dɔɔnwo ne ala yɛɛ Awulae honle liele ye menli a. Noko akee bɛdwazole bɛtiale ye, na bɛ ninyɛndane ne mɔ yɛle molozo. 44 Ɛhye mɔ bɔbɔ anzi, Awulae zele bɛ anwunvɔne, wɔ mekɛ mɔɔ ɔdele bɛ ɛzunlɛ la. 45 Ɔhakyele kɛ bɛmɛ ti yɛɛ ɔbɔle ɛwɔkɛ ne a. Yemɔti ɔgole ɔ sa wɔ ye ɛhulolɛ kpundii ne mɔɔ ɛbu ɛgua zolɛ la anwo. 46 Ɔmaanle bɛzele bɛ anwunvɔne, bɛdabɛ mɔɔ bɛ nee bɛ hɔle ɛzonlenlɛ bo la amuala.

47 Ko die yɛ, O Awulae yɛ Nyamenle, na kuohua yɛ nloa fi maanle maanle mɔɔ bɛva yɛ bɛhɔ bɛ ɛzonlenlɛ bo la asa anu; amaa yeava moyɛlɛ yeamaa wɔ duma nwuanzanwuanza ne, ɔ nee wɔ anyunlunyia ne, wɔ ayɛlɛyelɛ nu.

48 Nyilalɛ ɛha Nana Nyamenle, Yizilayɛ Nyamenle ne! Ɔvi ɛnɛ kɔdwu mekɛ mɔɔ ɔnlɛ awieleɛ, bɛye ye ayɛlɛ! Bɛmaa menli kpokpoti ɛha ye kɛ: Ɔyɛ Ɛkɛ! Bɛye Awulae ayɛlɛ!