1 O Nana Nyamenle, me ahonle ɛyɛ anwomoalɛ; meyɛ anwomoalɛ kɛ mebayeyɛ wɔ! Mebado edwɛne meaye wɔ ayɛlɛ! Me ɛkɛla, dwazo! 2 Sanwunle nee getae, bɛdwazo! Mebadunwue alehyenlɛ ne. 3 Mebava moyɛlɛ meamaa wɔ, wɔ menli avinli, O Awulae; mebado nganvolɛ edwɛne meamaa wɔ wɔ maanle maanle avinli. 4 Ɔluakɛ wɔ ɛhulolɛ kpundii ne le totohyia bo anwuma debie biala anwo zo, na wɔ nɔhalɛlilɛ noko dwu Nyamenle ne ako abo nehane. 5 Kpogya ɛ nwo zo, wɔ anwomanyunlu debie biala anwo zo, O Nana Nyamenle. Maa wɔ anyunlunyia ne ɛbo aleɛabo amuala anwo zo!

6 Amaa ɔlua zo bɛalie wɔ kulovolɛma ngoane; fa ɛ sa ɛnlomboɛ ne pepɛ die me, na tie me nzɛlɛlɛ. 7 Nana Nyamenle ɛbɔ ɛwɔkɛ ɛvi ye nwuanzanwuanzaleka ne kɛ: wɔ konimlilɛ nu, mebahyɛ Hyikɛm anu nwiɔ, na meahyɛ Sɛko Bɔnza ne meamaa me menli. 8 Geleade le me deɛ; Manasɛ noko le me deɛ; Yifelaem me ti zo abotile, Dwuda le me belemgbunli maanle. 9 Mowabe le me kyɛnze mɔɔ mewowo me sa wɔ nu a; Yidɔm anwo zo yɛɛ mefuandi me gyakɛ abo mgbɔlaboa megua a; mefa mekile kɛ medame a melɛ ye a. Wɔ Filisitiama anwo zo, meteɛdea nu wɔ konimlilɛ nu.

10 Nwane a baye me ara suakpole ne, mɔɔ bɛbɔ bane bɛbɔ nwolɛ bɛyia la azo a? Nwane a bali me nyunlu nee me ahɔ Yidɔm a?

11 O Nana Nyamenle, asoo ɛtɛkpole yɛ ɔ? Ɛnrɛli yɛ ɛlɔne ne anyunlu ɛnrɛvinde ɛnrɛmaa bɛnrɛhɔ konle ɔ, O Nana Nyamenle? 12 O boa yɛ maa yɛvi yɛ kpɔvolɛma asa anu; ɔluakɛ sonla dasanli ye moalɛ ɛdeɛ le gyɛne! 13 Wɔ melɛ ala mɔɔ Nana Nyamenle wɔ yɛ afoa la, yɛbaho yɛadɔ zolɛ; ɔluakɛ yemɔ yɛɛ ɔbahomo yɛ kpɔvolɛma anwo zo a.