1 Duzu ati a maanle maanle fa akpame tia bɛ Arane a? Kɛmɔti a menli kɔ zo fa bɛ adwenlenzuzulɛ ɛtane ɛtane, mɔɔ nvasoɛ biala ɛnle zo la ɛ? 2 Aleɛabo arelemgbunli dwazo gyinla, na bɛ tumivolɛma fa adwenle ɛtane tia Nana Nyamenle, ɔ nee ɔdaye ye belemgbunli mɔɔ yeye ye la. 3 Bɛ amaneɛ a le kɛ: "Bɛmaa yɛlie yɛ nwo yɛvi bɛ maamulɛ bo; bɛmaa yɛye yɛ nwo yɛvi bɛ akɛlɛyɛlɛ ne abo."

4 Na Awulae de ye belemgbunli ebia ne azo, wɔ anwuma belemgbunli maanle ne anu ɔsele bɛ ala; na ɔsi bɛ amgbu wɔ bɛ adwenle ngyehyɛleɛ ɛtane ne mɔ anwo. 5 Akee ɔbɔ bɛ kɔkɔ ɛsesebɛ wɔ ɛyavalɛ nu; na ɔfa ɛzulolɛ totohyia ɔwula bɛ nu.

6 Ɔluakɛ Awulae mumua ne se: "Wɔ Zayɔn, me boka nwuanzanwuanza ne azo, yɛɛ mezie me Belemgbunli ne mɔɔ medame mumua ne meye ye la a."

7 Akee belemgbunli ne noko ɛvua ɛha kɛ: "Mebala Nana Nyamenle ngyehyɛlɛ ne kpokpoti ali. Ɔluakɛ Awulae ɛze me kɛ: ‘Wɔmɔ a ɛle me Ra kotokokye ne a; ɛnɛ demua ye, meyɛ ɛ ze bɔkɔɔ. 8 Biza, na mebava maanle maanle kpokpoti meawula ɛ sa nu; na azɛlɛ ye kpokpoti bayɛ wɔ deɛ. 9 Ɛbazie bɛ kɛ ɛdawɔ ɛ kunlu mralɛ ala la; ɛbabubu bɛ dwɔkɔdwɔkɔ kɛ ɛbubu ɛyɛba ala la.’"

10 Bɛyɛ ɛnzolɛ bɛdie kɔkɔbɔlɛ ɛhye, bɛmɛ aleɛabo arelemgbunli; bɛva ɛhye bɛyɛ ɛzukoalɛdeɛ, bɛmɛ ewiade tumivolɛma; 11 Bɛva ɛzulolɛ bɛzonle Nana Nyamenle. 12 Bɛmaa bɛ nwo ɛyɛ ndɛ, bɛva anwowozolɛ bɛrabɔ bɛ ti aze wɔ ɔ nyunlu; na anrɛɛ yemɔ ye ɛyavalɛ ne bayɛ kpole, na bɛ bo zo aminli bɔkɔɔ arɛlevilɛ nu ala. Nyilalɛ ɛha bɛdabɛ mɔɔ bɛfa bɛ rɛle bɛwula ye nu la; Awulae mumua ne bamaa bɛali fɛlɛko.