1 Meyeyɛ wɔ, O Nana Nyamenle; ɔboalekɛ wɔmɔ yɛɛ wɔlie me ngoane a. Wɔammaa me kpɔvolɛma anli me nwo zo konim. 2 O Nana Nyamenle, me Nyamenle, menzunle menvɛlɛle wɔ; na ɛdawɔ noko ɛmaanle me nwo zale. 3 O Nana Nyamenle, wɔmɔ a wɔva me ɛkɛla wɔvi Ɛbolɔ wɔra a; wɔmɔ yɛɛ wɔlie me ngoane, mɔɔ wɔammaa meangɔ ewule kuma nu a.

4 Bɛdo ayɛlɛyelɛ edwɛne bɛmaa Nana Nyamenle, O bɛmɛ mɔɔ bɛle ye anwodelɛma a! Bɛhakye mɔɔ Nwuanzanwuanza Kokye ne ɛyɛ la; na bɛva moyɛlɛ bɛmaa ye duma ne. 5 Ɔluakɛ ye ɛyavalɛ mekɛ le ezinra bie; ye atiakunlukpalɛ ne ɛnlɛ ye awieleɛ. Ɛzunlɛ wɔ aledwolɛ nu ɛdeɛ, noko akee fɛlɛkolile wɔ ɛkɛ alehyenlɛ nu.

6 Mekɛ mɔɔ mede ye boɛ la, menzele kɛ, "Ɛhwee ɛnrɛhola me." 7 Nana Nyamenle, wɔ anwunvɔnezelɛ ɛmaa megyinla kpundii kɛ boka. Saa ɛye ɛ nyunlu ɛfea me a, ɛnee ɛzulolɛ kpole ɛha me. 8 Wɔmɔ a menzunle menvɛlɛle wɔ a, O Nana Nyamenle; wɔmɔ a membodole menzɛlɛle wɔ kɛ: 9 "Saa mewu a, duzu nvasoɛ yɛɛ ɛkɛnyia ye wɔ me mogya nwo a? Saa mekɔ ewule kuma nu a, duzu a ɛbanyia ye a? Asoo ndɛtɛlɛ bahola aye wɔ ayɛlɛ ɔ? Asoo bɛbahola bɛali wɔ nɔhalɛ ne anwo daselɛ bɛahile menli ɔ? 10 Tie me, O Nana Nyamenle, na nwu me anwunvɔne! Boa me, O Awulae!" 11 Wɔmaa me nyane ɛhakyi me fɛlɛkolilɛ; wɔye me amaneɛnwunlɛ wɔvi ɛkɛ, na wɔmaa anyelielɛ ɛyi me tɛkɛɛ. 12 Ɛhye ati menrɛmua me nloa ɛlɛ. Mebaye wɔ ayɛlɛ wɔ edwɛnedolɛ nu. O Nana Nyamenle, wɔmɔ a ɛle me Nyamenle a, mebayɛ wɔ mo dahuu.