1 Menzile abotane mengendɛle Nana Nyamenle; na ɔguale ɔ nzo aze ɔdiele me ɛzunlɛ. 2 Ɔyele me ɔvile arɛlebɔlɛ kuma ne anu, na ɔmaanle menvile mɛtɛlɛmɛtɛlɛ ne anu. Ɔziele me azɛlɛ kpalɛ zo, na ɔmaanle me gyakɛ abo zɔle ndinli. 3 Yehile me edwɛne fofolɛ mɔɔ mendo a, Nana Nyamenle nganvolɛ edwɛne ne. Dɔɔnwo ne ala banwu ye na bɛazulo ye, na bɛava bɛ rɛle bɛawula Awulae nu. 4 Nyilalɛ ɛha bɛdabɛ mɔɔ bɛfa Nana Nyamenle bɛyɛ bɛ arɛlekyekyevolɛ; na eza bɛnva bɛ nwo bɛmbɔnlebɔnle awozosonvolɛma anwo la.

5 O Awulae, me Nyamenle, wɔyɛ nwanwane ninyɛne dɔɔnwo wɔmaa yɛ; awie biala ɛnle ɛkɛ ne mɔɔ tɛla wɔ a! Wɔyɛ damɛnlangoate ngyehyɛlɛ dɔɔnwo wɔmaa yɛ; menrɛhola ɔ muala anwo daselɛ di, ɔluakɛ ɔzonle kɛ ɛnweazo ɛnwea!

6 Tɛ azubɔlɛndeɛ nee ahyɛlɛndeɛ a ɛkpondɛ a; tɛ nyɛmoa ɛyelalɛ ahyɛlɛdeɛ, anzɛɛ azubɔlɛ mɔɔ bɛdua zo bɛava ɛtane bɛahyɛ la a sɔ ɛ nye a. Emomu, me nzo yɛɛ wɔbuke kɛ menva mendie wɔ a. 7 Ɛhye ati membuale kɛ, "Mame ɛne; kɛmɔ ngapezoma ne mɔ amuala hanle ye me nwo la. 8 O me Nyamenle, mekulo kɛ menwɔyɛ wɔ ɛhulolɛdeɛ! Ɔluakɛ wɔ mɛla ne de me nu dahuu."

9 Wɔ wɔ diedima ne anyunlu, O Nana Nyamenle, mebɔ ye nolo kɛ wɔmɔ a le Ngoanedievolɛ ne a. Ɛdawɔ noko ɛze kɛ menrɛgyakyi ye nolobɔlɛ ɛlɛ. 10 Metɛfale ngoanelielɛ edwɛkɛ ne metɛfeale; dahuu mebɔ wɔ nɔhalɛlilɛ ne nee wɔ moalɛ ne anwo nolo. Metɛfale wɔ ɛhulolɛ ne nee wɔ nɔhalɛlilɛ kpundii ne metɛfeale wɔ Ayiaku Kpole ne.

11 Nana Nyamenle, meze kɛ ɛnrɛgyakyi kɛ ɛkɛze me anwunvɔne. Wɔ ɛhulolɛ ne nee wɔ nɔhalɛlilɛ ne bamaa dahuu meadɛnla ngoane nu. 12 Ngyegyelɛ ngome ɛbɔ me nwo mgbɔlɛka ɛyia; bɛzonle somaa mɔɔ mengola bɛ tia a! Me ɛtane ɛbo me nwo zo; mengola nwolɛ ɛhwee yɛ bieko. Bɛzonle bɛtɛla me ti enrinli bɔbɔ; ɛhye ati akee me akɛnrazilɛ ɛminli bɔkɔɔ.

13 Die me, O Nana Nyamenle! Boa me kɛkala. 14 Maa bɛdabɛ mɔɔ bɛbɔ mɔdenle kɛ bɛku me la bɛ munzule ɛbɔ bɛ ti zo; maa bɛ adwenle ɛha ɛbɔ nu. Maa bɛdabɛ mɔɔ bɛlɛdi fɛlɛko wɔ me amaneɛnwunlɛ ne ati la, ɛho ɛhɔ bɛ nzi, na bɛ nyunlu nyiane ɛgua aze. 15 Maa bɛdabɛ mɔɔ bɛsi me amgbu la, asa ɛha bɛ gye nu.

16 Maa bɛdabɛ mɔɔ bɛba ɛ nwo la amuala ɛli fɛlɛko na bɛ nye ɛlie. Maa bɛdabɛ mɔɔ bɛ nye sɔ wɔ ngoanelielɛ gyima ne la, dahuu ɛva moyɛlɛ ɛha ye kɛ, "Nana Nyamenle tumi le kpole amgba!"

17 Me tumi nee me anwosesebɛ ɛwie, O Awulae; noko akee wɔmɔ ɛ rɛle ɛtɛfile me. Wɔmɔ a le me ngoanedievolɛ nee me Nyamenle a; ka ɛ nwo baboa me!