Salmos 70

Nzɛlɛlɛ mɔɔ bɛfa bɛsɛlɛ moalɛ bɛfi Gyegyeravolɛma asa anu la

1 Maa ɛ nye ɛlie, O Nana Nyamenle, kɛ ɛkɛdie me! Bɛla ndɛndɛ baboa me, O Awulae! 2 Maa bɛdabɛ mɔɔ bɛkpondɛ kɛ bɛku me la adwenle ɛyɛ sesakaa, na bɛ kpɔvolɛma ɛli bɛ nwo zo konim. Maa bɛdabɛ mɔɔ ɔlua me nyanelilɛ ti bɛlɛdi fɛlɛko la, ɛzia bɛ nzi wɔ anyiemgba nu! 3 Maa bɛdabɛ mɔɔ besi me amgbu la, bɛ adwenlenzuzulɛ ɛtane ne ɛbu ɛzia bɛ. Bɛmɛ mɔɔ dahuu bɛse kɛ "Aha, Aha! a". 4 Maa menli mɔɔ kpondɛ ɛ bo zo la ɛnyia anyelielɛ na bɛli fɛlɛko. Maa bɛdabɛ mɔɔ bɛ nye sɔ wɔ ngoanelielɛ ne la, dahuu ɛha ye kɛ, "Nyamenle le Tumivolɛ!" 5 Mele ehyianli, yɛɛ me nwo ɛhyele me. Bɛla ndɛndɛ, O Nana Nyamenle, na balie me. Wɔmɔ yɛɛ ɛle me boavolɛ nee me ngoanedievolɛ a, O Awulae! Bɛla ndɛndɛ baboa me. Mmakyɛ fee zɛ, O Awulae!