Salmos 73

Amumuyɛvoma bɛ Ngɔzo ɔ nee bɛ Awieleɛ

1 Nɔhalɛ nu, Nana Nyamenle ati akunlu le kpalɛ maa Yizilayɛ; ɔle kpalɛ ɔmaa bɛdabɛ mɔɔ bɛ ahonle nu te la. 2 Na mame ɛdeɛ, asɛɛ me gyakɛ ɛhoati bɔbɔ! Ɔhale ekyii na meatele meadɔ aze. 3 Ɔluakɛ me nye bolole bɛdabɛ mɔɔ bɛbu bɛ nwo la, wɔ mekɛ mɔɔ menwunle kɛ atisesebɛvoma ɛyɛ boɛ la. 4 Nɔhalɛ nu, bɛmɛ bɛnli nyane wɔ ɛbɛlabɔlɛ nu; bɛte kpɔkɛ, yɛɛ bɛlɛ anwosesebɛ wɔ bɛ nwo nane nu. 5 Bɛnle ɛmianlɛ nu kɛmɔ bɛ gɔnwo mɔ wɔ ye la; bɛnnwu amaneɛ kɛmɔ bɛ gɔnwo mɔ nwu ye la. 6 Ɛhye ati amemaabɛnwozo le bɛ ndweabane mɔɔ la bɛ kɔme nu a; yɛɛ basabasayɛlɛ ɛwula bɛ tɛladeɛ. 7 Ninyɛndane ngome a vi bɛ ahonle ne mɔ anu finde a; yɛɛ amumuyɛ ngyehyɛleɛ ngome ɛyi bɛ adwenle kpa. 8 Bɛsi awie mɔ gyɛne amgbu, na akee bɛsuzu adwenle ɛtane bɛmaa bɛ gɔnwo mɔ; bɛfa nzisi bɛnwunlonwunla bɛ gɔnwo mɔ nrɛlɛbɛ nu ala. 9 Bɛtendɛ bɛtia anwuma, na azɛlɛ ye ɛdeɛ, yemɔ bɛmbu ye bie hweledede.

10 Zɔhane ati menli ye bɛ ayɛlɛ; ɔluakɛ bɛnnwu ɛtane biala wɔ bɛ nwo. 11 Bɛ edwɛkɛ mɔɔ bɛka la a le kɛ: "Kɛ ɔkɛyɛ na Nana Nyamenle anwu ye ɛ? Anzɛɛ adwenle bie wɔ Nyamenle Bedevinli ne ati anu ɔ?" 12 Ɛhɛe! Ɛhye mɔ a le atiakunlutanevolɛma ne mɔ. Dahuu bɛ nwo tɔ bɛ, yɛɛ bɛ anwonyia noko yɛ mbɔnwo mbɔnwo.

13 Ɛnee akee duzu nvasoɛ yɛɛ menyianle ye wɔ nɔhalɛlilɛ nwo a? Duzu debie kpalɛ yɛɛ menyianle ye wɔ pɛpɛlilɛ nwo a? 14 Alehyenlɛ biala medi nyane, na bɛtietia me nwo zo. 15 Saa menganle kɛ, "Menwɔha zɛhae bɔbɔ" a, anrɛɛ me angabɛnzo mralɛ bule me kɛ menli nɔhalɛ. 16 Noko akee mɔɔ mendwenlenle, kɛ ɔkɛyɛ na meahola meade ɛhye mɔ abo la, ɔyɛle me kɛ ɔle ateetee gyima bie la. 17 Na mɔɔ mengɔle Nana Nyamenle Asɔne Sua ne anu la, akee menwunle ɛhye mɔ amuala awieleɛ. 18 Nɔhalɛ nu, wɔmɔ ɛfa bɛ ɛsie nzenzemile nu; ɛmaa bɛtele bɛgua ɛzɛkyelɛ nu. 19 Bɛsɛkye wɔ mekɛ ekyii bie anu; ɔngyɛ ɛnee bɛ bo zo ɛminli bɔkɔɔ. 20 Bɛle kɛ ɛlalɛ mɔɔ yɛka ye nla nu la; yɛdwazo a ɛnee yɛ rɛle ɛvi; yɛnva yɛnyɛ ɛhwee.

21 Mekɛ mɔɔ me ɛkɛla lile nyane, na me ahonle nu wowɔle me la, 22 menyɛle koasea kɛ menze nwolɛ bie la; menyɛle kɛ ɛbɔ nu nane wɔ ɛ nyunlu. 23 Suzuamgba ala mɔɔ mewɔ ɛ sa nu dahuu la, wɔmɔ yɛɛ ɛ nee me lua a. 24 Wɔmɔ yɛɛ ɛfa wɔ folɛdulɛ ɛwowa me, na akee ɛdie me ɛkɔ anyunlunyia nu a. 25 Nwane bieko yɛɛ melɛ ye wɔ anwuma maanle ne anu boka ɛ nwo a? Debie biala ɛnle azɛlɛ ye azo mɔɔ mekulo boka ɛ nwo a. 26 Me sonlabaka ne nee me ahonle ne bakpa, noko akee Nana Nyamenle a le me ɛkɛla ne anwosesebɛmaavo, ɔ nee me afoa nu deɛ wɔ mekɛ mɔɔ ɔnlɛ awieleɛ a.

27 Bɛdabɛ mɔɔ bɛde bɛ nwo bɛhɔ moamoa la abo zo baminli; yɛɛ bɛdabɛ noko mɔɔ bɛnli nɔhalɛ la, ɛpɛ bɛ mekɛ zo.

28 Na mame ɛdeɛ, ɔle kpalɛ ɔmaa me kɛ menwɔhwe menwɔbikye Nana Nyamenle. Meva Awulae Nyamenle ne meyɛ me nriandifeabelɛ, amaa meabɔ wɔ nwanwane gyima ne anwo ɛlawule.