Salmos 78

Kɛ Nana Nyamenle zile nee ye menli Yizilayɛ lile la

1 O me menli, bɛyɛ ɛnzolɛ bɛdie me ngilehilɛ; bɛmaa bɛ nzo ɛrɛla edwɛkɛ mɔɔ melɛka la azo! 2 Melua mrɛlɛbulɛ nu mebadendɛ; mebahilehile tete awozinli nu edwɛkɛ muala abo, 3 ninyɛne mɔɔ yɛnwu ye, na yɛde nwolɛ edwɛkɛ, mɔɔ egya mɔ hanle hilele yɛ la. 4 Yɛnrɛva yɛnrɛvea bɛ mra ne mɔ; na emomu yɛbaha yɛahile bɛdabɛ mɔɔ bɛli yɛ nzi la, amaa bɛanwu Nana Nyamenle anyunlunyia ninyɛne ne mɔ, ɔ nee ye anwosesebɛ ne ɔ nee ye nwanwanendeɛ mɔɔ yeyɛ la. 5 Ɔlile ɔ nwo daselɛ wɔ Gyekɔbo mɔ anu, na ɔhyehyɛle mɛla ɔmaanle Yizilayɛma; ɔzele yɛ ze mɔ ndinli zo kɛ bɛva bɛhilehile bɛ mra ne mɔ; 6 amaa ɛlɔnwɔne fofolɛ mɔɔ bara la anwu bɛ, ngakula mɔɔ bɛtɛwole bɛ bɔbɔ la, na bɛadwazo bɛaha bɛahile bɛdabɛ noko bɛ mra. 7 Ɔlua zɛhae adenle ye azo, bɛdabɛ noko bɛbava bɛ anyelazo bɛawula Nana Nyamenle anu, ammaa bɛ rɛle anvi Nana Nyamenle ye gyima mɔɔ yeyɛ la, na emomu bɛali ye mɛla ne mɔ azo dahuu. 8 Bɛnrɛyɛ kɛ bɛ ze mɔ, menli anzosesebɛvoma ɔ nee bɛdabɛ mɔɔ bɛhonle bɛtiale maanle, menli mɔɔ bɛ ahonle angyinla ye kpundii, na bɛanlie Awulae Nana Nyamenle bɛanli la.

9 Yifilaemma mɔɔ dedɛ bɛ konle adu la ziale bɛ nzi, na bɛnriandinle wɔ konle mekɛ ne anu. 10 Bɛanli Nana Nyamenle ngyehyɛlɛ ne mɔɔ ɔ nee bɛ yɛle la azo; na bɛkpole kɛ bɛkɛli ye mɛla ne azo. 11 Bɛ rɛle vile mɔɔ yeyɛ la amuala, ɔ nee nwanwanendeɛ mɔɔ ɔlale bɛ ali ɔhilele bɛ la amuala. 12 Wɔ bɛ ze mɔ anyunlu yɛɛ ɔyɛle nwanwanendeɛ ne mɔ a, wɔ Yigyibiti azɛlɛ zo, wɔ Zowan ɛsɛlɛ zo. 13 Ɔkpakyele nyevile ne anu nwiɔ, na ɔmaanle bɛluale nu bɛzenle; ɔmaanle azule ne mɔ yɛle kɛ mbane nwiɔ wɔ foa nee foa. 14 Wɔ alehyenlɛ nu, ɔvale amungu ɔlile bɛ nyunlu; na wɔ aledwolɛ nu, ɔzɔle senle kɛ tɛkɛ la ɔlile bɛ nyunlu. 15 Wɔ ɛsɛlɛ ne azo, ɔkpukekpukele awolɛ nu; ɔmaanle nzule vi nuhua rale; na bɛnlonle bɛmaanle ɔbole bɛ nwo zo, kɛ asɛɛ nzule ne vi azɛlɛ bo la. 16 Ɔmaanle azudenle vi awolɛ ne anu vindele; na ɔmaanle nzule zenle kɛ azule mɔɔ se la. 17 Noko akee bɛyɛle ɛtane dɔɔnwo bɛtiale Nana Nyamenle bɔbɔ; na wɔ fiemgbole ne azo, bɛhonle bɛtiale Anwuma Bedevinlinli ne. 18 Bɛzɔle Nana Nyamenle bɛnleanle wɔ bɛ ahonle nu, wɔ ɛbizalɛ mɔɔ bɛbizale aleɛ bɛvile ye ɛkɛ la. 19 Bɛdendɛle bɛtiale Nana Nyamenle na bɛhanle kɛ: "Asoo Nana Nyamenle kɛhola kɛdo yɛ ɛkponle wɔ fiemgbole ɛhye azo ɔ? 20 Ɔbɔle bolɛ ɔmaanle nzule vi nu vindele, na ɔyɛle azudenle ɔdenrɛle ɔzenle. Ɔkɛhola ɔkɛmaa yɛ aleɛ; anzɛɛ ɔkɛhola ɔkɛva fɛlɛ noko ɔkɛmaa ye menli ɔ?" 21 Zɔhane ati mekɛ mɔɔ Nana Nyamenle dele ɛhye la, ɔvale ɛya totohyia; ɔdele senle ɔguale Gyekɔbo anwo zo, na ye ɛyavalɛ ne dwazole rale Yizilayɛ anwo zo. 22 Ɔluakɛ bɛannyia diedi wɔ Nana Nyamenle anu, eza bɛanlie ye ngoanelielɛ tumi ne bɛanli. 23 Ɔdendɛle ɔhilele anwomanyunlu, na ɔbukele anwuma maanle nlenkɛ ne mɔ. 24 Ɔdɔle mana ɔguale bɛ nwo zo kɛ bɛli, na ɔmaanle bɛ anwuma maanle ne anu aleɛ. 25 Akee sonla lile anwumabɔvolɛma ne mɔ aleɛ ne bie; na Nana Nyamenle maanle bɛ debie biala mɔɔ bɛhyianle nwo la.

26 Ɔmaanle sɛnzɛne aduduleɛ anwoma dule wɔ anwuma maanle ne anu; na ɔluale ye tumi nu ɔmaanle nyiakɛ anwoma ne razenle. 27 Ɔmaanle fɛlɛ dɔle guale aze kɛ munlutu la, yɛɛ nloma noko rale kɛ ɛnweazo ɛnwea. 28 Ɔmaanle ninyɛne ɛhye mɔ tetele guale bɛ azua ne mɔ azo, ɔ nee bɛ aako ne mɔ kpokpoti anu. 29 Ɔti bɛlile na bɛ ko yile; ɔluakɛ Nana Nyamenle maanle bɛ mɔɔ bɛbizale ye biala la. 30 Noko akee bɛ kunlu andwo, bɔbɔ wɔ mekɛ mɔɔ aleɛ ne wɔ bɛ nloa nu la. 31 Zɔhane ati Nana Nyamenle ye ɛya ne dwazole bɛ nwo zo; na ɔhunle bɛ nuhua anwosesebɛvolɛma ne mɔ, ɔ nee bɛ mgbanyima mɔɔ gyigyi bɛ ti la kpokpoti. 32 Wɔ ɛhye mɔ bɔbɔ amuala anzi, bɛhɔle zolɛ bɛyɛle ɛtane; wɔ Nana Nyamenle nwanwanendeɛ ne mɔ anzi bɛanlie ye bɛanli. 33 Ɔti ɔmaanle bɛ mekɛ pɛle nuhua, kɛ ɛnwomenle mɔɔ bɛgu la; yɛɛ bɛ ngoane noko hɔle munzule kpole nu.

34 Mɔɔ ɔhunle bɛ nuhua bie mɔ la, bɛdabɛ mɔɔ bɛhale la kpole ɔ bo zo; bɛnlunle bɛ nwo na bɛkpondɛle Nana Nyamenle anyebololɛ nu. 35 Bɛhakyele kɛ Nana Nyamenle a le bɛ sinzavolɛ a, yɛɛ Nyamenle Bedevinli ne mɔɔ wɔ anwuma la a le bɛ ngoanedievolɛ a. 36 Noko akee bɛvale bɛ nloa mgbane a bɛyele ye ayɛlɛ a; edwɛkɛ biala ɛnle ɛkɛ mɔɔ bɛhanle mɔɔ nɔhalɛ kɔpɛlɛ ko bɔbɔ wɔ nu a. 37 Bɛ ahonle anzi pi ammaa ye; bɛanli nɔhalɛ bɛammaa ye ngyehyɛlɛ ne mɔ. 38 Noko akee, yemɔ ɔle anwunvɔnesevolɛ la, ɔvale bɛ ɛtane ɔhyɛle bɛ, na yeanzɛkye bɛ; yeanli ye ɛya nzi; ɔziele ɔ nwo nane dii wɔ ye ɛyavalɛ ne anu. 39 Ɔhakyele kɛ bɛle menli mɔɔ bɛbawu bɛazɛkye ala; bɛle kɛ anwoma mɔɔ bɔ pɛ nu, na ɔnzia ɔmba bieko la.

40 Bɛdwazole bɛtiale ye fane dɔɔnwo ne ala wɔ fiemgbole ne azo; bɛmaanle ɔlile nyane somaa wɔ ɛsɛlɛ ne azo! 41 Bɛzɔle Nana Nyamenle bɛnleanle bieko ɔ nee bieko, na bɛhanle Yizilayɛ Nyamenle Nwuanzanwuanza ne ɛya. 42 Bɛ rɛle vile yi tumi kpole ne, ɔ nee kenle ne mɔɔ ɔliele bɛ ngoane ɔvile bɛ kpɔvolɛma asa anu la, 43 mekɛ mɔɔ ɔyɛle ye sɛkɛlɛndeɛ dɔɔnwo ne mɔ wɔ Yigyibiti, ɔ nee ye nwanwanendeɛ ne mɔ mɔɔ ɔyɛle bɛ wɔ Zowan ɛsɛlɛ ne azo la. 44 Ɔmaanle bɛ azule ne mɔ hakyile mogya, ɔlua zo bɛangola bɛanlo nzule bɛanvi bɛ azundenle ne mɔ anu. 45 Ɔdele nrɛzenra kpolane ɔguale bɛ nwo zo ɔmaanle bɛhunle bɛ; na ɔzoanle ahɛlɛne ɔmaanle bɛrazɛkyele bɛ.

46 Ɔmaanle aabɛ kpolane razɛkyele bɛ aleɛ ɔ nee bɛ mbakama ne mɔ; ɔzɛkyele bɛ ɛya ne mɔ kpokpoti. 47 Ɔmaanle asukɔntweaba rale razɛkyele bɛ nwanye tola ne mɔ; ɔmaanle azule sesanle, ɔ bo zo azɛlɛ ne hetele na ɔzɛkyele bɛ sekamɔ mbaka ne mɔ. 48 Ɔmaanle asukɔntweaba rahunle bɛ nlankɛ ne mɔ, na ɛsɛlɛmanye rahuhunle bɛ nyɛmoa ne mɔ. 49 Ɔmaanle adenle ɔmaanle ye ɛya totohyia ne rale bɛ nwo zo, na anwumabɔvolɛma mɔɔ sɛkye deɛ la rale razɛkyele ninyɛne ɔmaanle nyane, arɛlebɔlɛ nee anwubɛnyunlu rale. 50 Ɔmaanle ye ɛya nwo adenle, yeanlie bɛ yeanvi ewule sa nu. Emomu ɔgyakyile bɛ ɔwulale ewule ewule gyɛne gyɛne sa nu. 51 Ɔhunle belamunli mralɛ mɔɔ wɔ Yigyibiti la amuala, bɛ anwosesebɛ nu anwonyia wɔ Ham azɛlɛ zo.

52 Akee ɔlile ye menli ne mɔ anyunlu kɛ Boaneneavolɛ la, na ɔwowale bɛ wɔ fiemgbole ne azo kɛ mboane kpolane la. 53 Ɔlile bɛ nyunlu ɔmaanle bɛrale file zo mɔɔ bɛanzulo bieko a; na ɔmaanle nyevile nlomanle ye kpɔvolɛma amuala. 54 Ɔvale bɛ ɔrale ye azɛlɛ nwuanzanwuanza ne azo; wɔ awoka ne mɔɔ ɔhonle ɔliele ɔmaanle bɛ la azo. 55 Ɔvoanle maanle maanle ɔvile azɛlɛ ne azo; ɔhyɛle ɔmaanle bɛ bɛvale bɛyɛle bɛ agyapadeɛ, na Yizilayɛ abusua eku eku ne mɔ vale azɛlɛ ne dɛnlanle zolɛ.

56 Noko akee bɛzɔle bɛnleanle, na bɛdwazole bɛtiale Anwuma Nyamenle Bedevinli ne; na bɛanli ye ngyehyɛlɛ ne mɔ azo. 57 Bɛhakyile bɛ nzi bɛzile ye, na bɛyɛle ninyɛne mgbane mgbane kɛmɔ bɛ ze mɔ yɛle ala la. Bɛhyeɛhyeale ninyɛne kɛ kyɛnze mɔɔ ɛnyenya la. 58 Bɛwudule ye ahonle wɔ bɛ awozonle ɛzonlenlɛ ɛleka ne mɔ; na bɛmaanle ɔhwenle bɛ ninyɛne ne mɔ mɔɔ bɛ ze mɔ sonle bɛ la anwo nungule.

59 Mekɛ mɔɔ Nana Nyamenle dele la, ɔvale ɛya totohyia; ɔti ɔkpole Yizilayɛ bɔkɔɔ. 60 Ɔdule ɔvile ye tɛnlabelɛ ne mɔɔ wɔ Hyaelo, ye sua ne mɔɔ ɔdɛnlanle zo wɔ menli ne mɔ avinli la azo. 61 Ɔmaanle ye kpɔvolɛma asa hanle Ngyehyɛlɛ Ɛlɛka ne, mɔɔ le ye tumi ne nee ye anyunlunyia ne anwo sɛkɛleneɛ la. 62 Ɔmaanle ɔdaye ye menli wule wɔ nrɛlande nloa wɔ bɛ kpɔvolɛma asa anu; na ɔvale ye agyapadeɛ ne anwo ɛya. 63 Ɔmaanle senle zɛkyele bɛ mgbavolɛ mgbavolɛ; na bɛ mbɛlɛra ne mɔ annyia atɔfolɛ edwɛne ando. 64 Bɛ azɛlɛvolɛ wuwule wɔ nrɛlande nloa; na bɛ ahunlavolɛ ne mɔ anzu ammaa bɛ. 65 Nzinlii Awulae dwazole kɛ asɛɛ ɔvi nla nu la; ɔyɛle kɛ sonla katakyie mɔɔ ɛnlo nza ɛbo la. 66 Ɔbɔle ye kpɔvolɛma ne mɔ ɔzandele; na ɔvale bɛ ɔhɔle anyiemgba mɔɔ ɔnlɛ awieleɛ la anu. 67 Ɔkpole Dwosefi abo zo amra bɔkɔɔ; yɛɛ yeanva Yifilaem abusua eku ne bɔbɔ. 68 Emomu, ɔnleanle nu ɔyele Dwuda abusua eku ne, ɔ nee Boka Zayɔn mɔɔ ye ahonle wɔ ye nu la. 69 Ɛkɛ ne yɛɛ ɔzile ye Asɔne Sua Kpole ne, kɛ ye anwuma maanle tɛnlabelɛ ne la a. Ɔmaanle ɔgyinlanle kpundii kɛ azɛlɛ ye mɔɔ ɔdaye yebɔ, mɔɔ ɔnlɛ ye awieleɛ la. 70 Ɔnleanle nu ɔyele ye sonvolɛ, Devidi; ɔyele ye ɔvile mboane bane nu; 71 ɛleka ne mɔɔ ɔnleanle ye ayɛmoa nwo zo la, kɛ ɔrayɛ mboaneneavolɛ wɔ Gyekɔbo abo zo amra anwo zo, wɔ Yizilayɛ mɔɔ le ye agyapadeɛ la. 72 Devidi yeyele ye ahonle nu nleanle bɛ gyɛlɛɛnye, na ɔvale ye nrɛlɛbɛ ɛsalɛ ne ɔwowale bɛ.