1 O Awulae, ɛvolɛ pemgbenlamgbe mɔɔ ɛraze ɛhɔ la, wɔmɔ yɛɛ wɔyɛ yɛ nriandifeabelɛ a. 2 Kolaa na bɛabɔ awoka, anzɛɛ kolaa na wɔabɔ ewiade amuala, ɔvi ngoane mɔɔ ɔnlɛ awieleɛ kɔkpula ngoane mɔɔ ɔnlɛ awieleɛ la, ɛnee wɔmɔ ɛle Nyamenle.

3 Wɔmɔ ɛkeha menli ɛkɔ ɛzɛkyelɛ nu, na ɛse kɛ: "Bɛzia bɛ nzi bɛhɔ bɛ ɛva ne anu!" 4 Ɛvolɛ apenle le ɛ nye zo kɛ anoma mɔɔ ɛraze ɛhɔ, anzɛɛ aledwolɛ mɔɔ ɛraze ɛpɛ nu hwi la. 5 Wɔmɔ ɛkpoɔkpoa menli ɛgua bɛ lɔ: bɛle kɛ ɛlalɛ mɔɔ yɛka ye nɔɔzo la. Bɛle kɛ ndile mɔɔ ɛdwazo nwolomɔ mangyee la. 6 Nwonlomɔ ne ɛnee bɛdwazo kɛnlaanwu bɛgyigyi ɛkɛ ne, ɔkadwu nɔsolɛ la ɛnee bɛnwosonwoso. 7 O Awulae, yɛlɛwu wɔ wɔ ɛyavalɛ ne abo; wɔ ndeanlɛ ne akee ɛbo yɛ nwo zo. 8 Yɛ ɛtane ɔ nee yɛ amumuyɛ kpokpoti ɛvinde ɛ nyunlu; ɛtane mɔɔ yɛyɛ ye fealera nu la anwo ɛdanlɛ ɛkpa ɛgua wɔ ɛ nyunlu. 9 Yɛ mekɛ zo ɛde wɔ wɔ ɛyavalɛ ne abo; yɛ ɛvolɛ pɛ nu se kɛ ɛnyelɛ mɔɔ bɛbɔ ye kpolɛkpolɛ la.

10 Yɛ ngoane mekɛ wɔ azɛlɛ ye azo le ɛvolɛ abulasuu ala, bie a ɛnee ɔlua anwosesebɛ ti yedwu abulatwɛ; na ɛhye bɔbɔ, nuhua ɛvɛlɛ nee nuhua amaneɛnwunlɛ, ɔngyɛ ɛnee bɛpɛ nu bɛze, ɛnee yɛdu kɛ anloma la yɛhɔ teatea mɔɔ bɛnnwu yɛ bo zo bieko a. 11 Nwane yɛɛ ɛzɔ wɔ ɛya tumi ne ɛnlomboɛ ɛnlea ɛlɛ, na yenlea ɛ nwo ɛzulolɛ mɔɔ ɔyɛ wɔ ɛyavalɛ nu a?

12 Ɔlua zɔhane ati, kilehile yɛ maa yɛdia yɛ mekɛ ne, amaa yɛanyia nrɛlɛbɛ nwo adwenle wɔ yɛ ahonle nu.

13 O Nana Nyamenle, kɔkpula kenle nzu yɛɛ ɛkɛzia ɛ nzi ɛkɛra a? Nwu wɔ sonvolɛma anwunvɔne, O Awulae! 14 Maa wɔ ɛhulolɛ kpundii ne ɛmaa yɛ ahonle ɛdɔ azule nu nwonlomɔ biala; amaa yɛ nye alie, na yɛali fɛlɛko wɔ yɛ tɛnlabelɛ nu. 15 Maa yɛ nye ɛlie wɔ melɛ mɔɔ wɔ yɛ nyunlu kɛmɔ yɛnwunle nyane wɔ mekɛ bie mɔɔ ɛze ɛhɔ, anzɛɛ kɛ ɛvolɛ dodo mɔɔ yɛnwunle yɛ nyunlu la. 16 Maa ɛ sa anloa gyima ne mɔ ɛla ali wɔ wɔ sonvolɛma anyunlu; maa ɛ bo zo amra ɛnwu wɔ anyunlunyia tumi ne. 17 Maa Awulae yɛ Nyamenle anwunvɔnezelɛ ne ɛrɛla yɛ nwo zo; maa yɛ sa anloa gyima ɛhɔ ye boɛ ɛmaa yɛ. Nɔhalɛ nu, maa yɛho yɛdɔ zo wɔ debie biala mɔɔ yɛyɛ la anu.