1 Samuel 5

6 Mtuwa Mlungu kawajegera makomangu nentu na kuwatiriziya wantu wa Ashidodi. Kawakomanga, ata na wantu yawaweriti wapakwegera nawa, kwa kuwajegera ulweri wa malipu. 7 Wenikaya wa Ashidodi pawawoniti mirandu yayiwapatiti, walonga, "Mlungu gwa Israeli Katukomanga nentu twenga pamuhera na mlungu gwetu Dagoni. Lisandiku lya Lipatanu lya Mtuwa Mlungu hapeni liwezi kulikala kwa twenga" 8 Watumiti walagilagi na kuwajojonira walonguziya woseri wamuhanu wa Wafilisti na kuwakosiya, "Hatutendi hashi na Lisandiku ali lya Mlungu gwa Israeli?" Wakulu wawu wankula, "Lisandiku ali lya Mlungu gwa Israeli mlijegeri Gati." Su walijegera aku. 9 Kumbiti pa kulijega aku Gati, Mtuwa Mlungu kagukomanga mji agu, pakajega lyoga likulu kumjini na kawakomanga wapalu wa mji agu wantemba kwa wazewi, kwa kuwajegera malipu. 10 Su, walijega Lisandiku ali lya Mlungu kumji gwa Ekroni. Kumbiti Lisandiku ali lya Mlungu palisokiti aku, wantu wa mji agu washowanganiti, "Watujegera Lisandiku lya Mlungu gwa Israeli su kutulaga twenga twawoseri." 11 Shakapanu walagalira ulagilagi na kujojonira wakulu wa Wafiristi na kuwagambira, "Mliwuziyi Lisandiku lya Mlungu gwa Israeli pahala pakuyi, su nalitulaga twenga pamuhera na wantu wetu."Watenditi hangu toziya kuweriti na lyoga likulu koseri, toziya Mlungu kawakomangiti nentu.