ଜୀଉସୁକୁରାଃ ରାଇଜ୍
1 ଏନ୍ତେ ଯିଶିରାଃ ବୁଟା ଏତେ ମିଆଦ୍ ନାଗ୍ଜା ଅଡଙ୍ଗ୍ଅଃଆ। ଏନାରାଃ ରେହେଦ୍ ଏତେ ମିଆଦ୍ କତ ଅଡଙ୍ଗ୍ଅଃଆ ଓଡ଼ୋଃ ଏନାରେ ଜ ହବାଅଃଆ।
2 ଓଡ଼ୋଃ ପ୍ରାଭୁଆଃ ଆତ୍ମା, ସେଣାଁ
ଓଡ଼ୋଃ ବୁଗିନ୍ ଉହାଟ୍ ରିକାତାନ୍ ଆତ୍ମା,
ଇନିତୁରାଃ ଓଡ଼ୋଃ ପେଡ଼େଃ ରେୟାଃ ଆତ୍ମା, ଆଟ୍କାର୍ଉରୁମ୍
ଓଡ଼ୋଃ ପ୍ରାଭୁକେ ବରରେୟାଃ ଆତ୍ମା ଇନିଃତାଃରେ ତାଇନାଃ।
3 ପ୍ରାଭୁକେ ବରଭାକ୍ତି ରିକାତାନ୍ଲଃ ଇନିଃ ରାସ୍କାତେ ତାଇନାଃ,
ଇନିଃ ଆୟାଃ ମେଦ୍ରେ ଅକଆଃ ନେଲେତାନ୍ ଲେକା ବିଚାର୍ କାଏ ରିକାୟା
ଓଡ଼ୋଃ ଲୁତୁର୍ତେ ଅକଆଃ ଆୟୁମେୟା ଏନ୍ଲେକାତେ ଇନିଃ ବିଚାର୍ କାଏ ରିକାଏୟା।
4 ମେନ୍ଦ ଇନିଃ ଧାର୍ମାନ୍ ରେୟାଃ ନ୍ୟାୟତେ ନାରାଦୁରା ହଡ଼କଆଃ ବିଚାର୍ ରିକାଏୟା
ଓଡ଼ୋଃ ଅତେଦିଶୁମ୍ରେନ୍ ସବେନ୍ ଲେବେଃ ହଡ଼କଆଃ ହରାତେ ନ୍ୟାୟରେ ବିଚାର୍ ରିକାୟା।
ଇନିଃ ଆୟାଃ ମଚାରାଃ ସାହେଁଦ୍ତେ ଅତେରେନ୍ ହଡ଼କକେ ସାଜାଇ ଏମାକଆ।
ଆୟାଃ ଲାଚଡ଼ାରାଃ ଜାଗାର୍ତେ ସବେନ୍ ଏତ୍କାନ୍ ହଡ଼କକେ ଜିୟନ୍କଆ।
5 ଧାର୍ମାନ୍ ଓଡ଼ୋଃ ପାତିୟାର୍ରେନ୍
ଆୟାଃ ମାୟାଙ୍ଗ୍ରାଃ ତନଲ୍ ଫିତା ହବାଅଃଆ।
6 ଇମ୍ତା ତୁୟୁ ମିଣ୍ଡିହନ୍ଲଃ ମିଦ୍ତାଃରେ ତାଇନା।
କୁଲା ମେରମ୍ହନ୍ଲଃ ମିଦ୍ତାଃରେ ଦୁଡ଼ୁମାଃ।
କିରିକାନ୍ ବାଛାହନ୍, ଜାୱାନ୍ ଟେଡ଼ଃ ଓଡ଼ୋଃ ଅଡ଼ାଃରେନ୍ ଜାଁତୁକ ମିଦ୍ତାଃରେ ତାଇନାଃକ,
ଓଡ଼ୋଃ ମିଆଦ୍ ସିଟିଆ ହନ୍ ଇନ୍କୁକେ ଯାତ୍ନାଅକଆ।
7 ଗାଈ, ଭାଲୁଲଃ ଆତିଙ୍ଗ୍ୟାଁଃଏ,
ଇନ୍କିନାଃ ହନ୍କ ମିଦ୍ତାଃରେ ଦୁଡ଼ୁମାଃକ।
ଟେଡ଼ଃ ଉରିଃକ୍ ଲେକା ବୁସୁଃ ଜମେୟାଏ।
8 ତଆ ନୁଁ’ତାନ୍ ବାଲେଃ ହନ୍ ବିଙ୍ଗ୍ରାଃ ଉଣ୍ଡୁଃ ହେପାଦ୍ରେ ଏନେଜାଃ।
ଓଡ଼ୋଃ ହୁଡିଙ୍ଗ୍ ସିଟିଆ ହନ୍ ବିଷାନ୍ ବିଙ୍ଗ୍ରାଃ ଉଣ୍ଡୁଃରେ ତିଃଇ ଦହଏୟା।
9 ଇନ୍କୁ ଆଇଁୟାଃ ପାବିତାର୍ ବୁରୁରାଃ ଜେତା ଠାୟାଦ୍ରେ ଜେତାନ୍ ନକ୍ସାନ୍
ଚାଏ ଜିୟନ୍ କାମିକ କାକ ରିକାୟା।
ଚିୟାଃଚି ଦରେୟା ଚିଲ୍କା ଦାଆଃତେ ପେରେଜାକାନା,
ଏନ୍ଲେକା ଅତେଦିଶୁମ୍ ପ୍ରାଭୁଆଃ ସେଣାଁତେ ପେରେଜଃଆ।
ତନଲ୍ ଦାସିଏତେ ହଡ଼କଆଃ ହିଜୁଃରୁହାଡ଼୍
10 ଏନ୍ ହୁଲାଙ୍ଗ୍ ଯିଶିରାଃ ବୁଟା ଗଟା ଦିଶୁମ୍ରେନ୍ କିଲିକ ନାଗେନ୍ତେ, ମିଆଦ୍ ଝାଣ୍ଡା ଲେକା ହବାଅଃଆଏ। ଓଡ଼ୋଃ ହଡ଼କ ଇନିୟାଃ ଝାଣ୍ଡା ଲାତାର୍ରେ ହୁଣ୍ଡିନାଃକ ଓଡ଼ୋଃ ଇନିୟାଃ ତାଇନଃ ଠାୟାଦ୍ ମାଇନାନ୍ରେୟାଃ ଠାୟାଦ୍ ହବାଅଃଆ। 11 ଏନ୍ ହୁଲାଙ୍ଗ୍ ପ୍ରାଭୁ ଆଡଃମିସା ଆୟାଃ ତିଃଇ ଜିଲିଙ୍ଗ୍ କେଦ୍ତେ ଆସେରିୟା, ମିସାର୍, ପାଥ୍ରୋସ୍, କୁଶ୍, ଏଲମ୍, ସିନିୟର୍, ହମାତ୍ ଓଡ଼ୋଃ ଦରେୟାରାଃ ଟାପୁଏତେ ଆୟାଃ ହଡ଼କଏତେ ସାରେଜାକାନ୍ ହଡ଼କକେ ଆଡଃମିସା ରୁହାଡ଼୍ ଆଉକଆଏ। 12 ଇନିଃ ହଡ଼କ ନାଗେନ୍ତେ ମିଆଦ୍ ଝାଣ୍ଡା ରିମେୟାଏ ଓଡ଼ୋଃ ଇସ୍ରାଏଲ୍ରେନ୍ ସାସାତି ନାମେତାନ୍ ହଡ଼କକେ ହୁଣ୍ଡିକଆ ଓଡ଼ୋଃ ଯିହୁଦାରେନ୍ ଛିତିବିତିକାନ୍ କିଲିକକେ ଅତେଦିଶୁମ୍ରେୟାଃ ଚାରିଓସାଃ ଏତେ ମିଦ୍ତାଃରେ ଆଉ ହୁଣ୍ଡିକଆ। 13 ଇଫ୍ରାଇମ୍ରାଃ ହିସିଙ୍ଗା ସାଙ୍ଗିନଃଆ ଓଡ଼ୋଃ ଯିହୁଦାକେ ସିଗିଦ୍ ରିକାତାନ୍ ହଡ଼କ ଜିୟନଃଆ। ଇଫ୍ରାଇମ୍ ଯିହୁଦାକେ ହିସିଙ୍ଗା କାଏ ରିକାଇୟା ଓଡ଼ୋଃ ଯିହୁଦା ଇଫ୍ରାଇମ୍କେ ସିଗିଦ୍ କାଏ ରିକାଇୟା। 14 ଇନ୍କୁ ସିଙ୍ଗିହାସୁରଃ ସାଃରେ ତାଇନ୍ତାନ୍ ପାଲେଷ୍ଟାଇନ୍ ହଡ଼କଲଃ ଲାଡ଼ାଇୟାକ ଓଡ଼ୋଃ ଇନ୍କୁ ମିଦ୍ତାଃରେ ହୁଣ୍ଡିକେଦ୍ତେ ସିଙ୍ଗିତୁରଃସାଃରେ ତାଇନ୍ତାନ୍ ହଡ଼କଆଃ ଖୁର୍ଜିକେ ରେଃକ୍ ଇଦିୟାକ। ଇନ୍କୁ ଇଦୋମ୍ ଓଡ଼ୋଃ ମୋୟାବ୍ ଦିଶୁମ୍କେ ଆକ୍ତେୟାର୍ ରିକାୟାକ। ଅମ୍ମୋନ୍ରେନ୍ ହଡ଼କ ଇନ୍କୁଆଃ କାଜିକ ମାନାତିଙ୍ଗ୍ ରିକାୟା। 15 ପ୍ରାଭୁ ମିସାର୍ ଦରେୟାରାଃ ଇକିର୍ ଦାଆଃକେ ଆଞ୍ଜେଦ୍ ରିକାଏୟା ଓଡ଼ୋଃ ଇଉଫ୍ରେଟିସ୍ ଗାଡ଼ାରାଃ ଦାଆଃ ଚେତାନ୍ରେ ଆୟାଃ ତିଃଇକେ ପାସ୍ରାଅ କେଦ୍ଲଃ ଲଲ ହୟ କୁଲେୟା। ଇନିଃ ନେଆଁକେ ଏୟା ହିସାରେ ହାଟିଙ୍ଗ୍ କେଦ୍ତେ ସେତେଙ୍ଗ୍ ଦାଆଃ ଲିଙ୍ଗିୟାଏ ଓଡ଼ୋଃ ହଡ଼କ ରହଡ଼ାକାନ୍ ଅତେରେ ସେନ୍ ପାରମଃଆକ। 16 ଇସ୍ରାଏଲ୍ ହଡ଼କ ମିସାର୍ ଦିଶୁମ୍ଏତେ ଅଡଙ୍ଗ୍ କେଦ୍ତେ ହିଜୁଃ ଇମ୍ତା ଜେ’ଲେକା ହବାକାନ୍ ତାଇକେନା, ଏନ୍ଲେକାଗି ଇନିୟାଃ ସାରେୟାକାନ୍ ହଡ଼କ ନାଗେନ୍ତେ, ମେନ୍ଦ ଆସେରିୟା ଦିଶୁମ୍ରେନ୍ ହଡ଼କ ନାଗେନ୍ତେ ମିଆଦ୍ ଚାକାର୍ ହରା ବାଇୟଃଆ।
/images/a/lTDTr17sdXbuk0Q46fQTo)
/images/a/WG5FS9VaSWVnVmV3VI8yP)