1 ଚିୟାଃଚି ପ୍ରାଭୁ ଯାକୁବ୍‌ଆଃ କିଲିକେ ଦାୟା ରିକାଇୟା ଓଡ଼ୋଃ ଇସ୍ରାଏଲ୍‌ ହଡ଼କକେ ଆଡଃମିସା ସାଲାକଆଏ। ଇନିଃ ଇନ୍‌କୁକେ ଆକଆଃ ଆପ୍‌ନାଃ ଦିଶୁମ୍‌ରେ ତାଇନଃ ନାଗେନ୍ତେ ଆଚୁକଆ। ଏନାତେ ଏଟାଃ ଦିଶୁମ୍‌ରେନ୍‌ ହଡ଼କ ଇନ୍‌କୁଲଃ ହିଜୁଃଆକ ଓଡ଼ୋଃ ଇନ୍‌କୁ ଯାକୁବ୍‌ଆଃ କିଲିକଲଃ ମେସାକେଦ୍‌ତେ ତାଇନାଃକ। 2 ଓଡ଼ୋଃ ପୁରାଃ କିଲିରେନ୍‌ ହଡ଼କ ଇନ୍‌କୁକେ ଇଦିକେଦ୍‌ତେ, ଆକଆଃ ଆପ୍‌ନାଃ ଠାୟାଦ୍‌ତେ ସେଟେର୍‌କଆକ। ଓଡ଼ୋଃ ପ୍ରାଭୁଆଃ ଦିଶୁମ୍‌ରେ ଇସ୍ରାଏଲ୍‌ରେନ୍‌ କିଲିକ ଇନ୍‌କୁକେ ଆକଆଃ ଦାସିଲେକା ଆକ୍‌ତେୟାର୍‌ ରିକାକଆକ। ଓଡ଼ୋଃ ଇନ୍‌କୁ ଅକନ୍‌କଆଃ ତଲାକାନ୍‌ ଦାସି ଲେକା ତାଇକେନାକ, ଇନ୍‌କୁକେ ତଲ୍‌କେଦ୍‌ତେ ଇଦିକଆକ ଓଡ଼ୋଃ ଅକନ୍‌କ ଇନ୍‌କୁକେ ଆକ୍‌ତେୟାର୍‌କାଦ୍‌କ ତାଇକେନା, ଇନ୍‌କୁଆଃ ଚେତାନ୍‌ରେ ରାଇଜ୍‌ ରିକାୟାକ।

3 ଓଡ଼ୋଃ ପ୍ରାଭୁ ଅକ ହୁଲାଙ୍ଗ୍‌ ଆପେକେ ଆପେୟାଃ ଦୁକୁ, ସାସାତି ଓଡ଼ୋଃ ଦାସି କାମିରାଃ କେଟେଦ୍‌ ସୁନୁସାର୍‌ କାମିଏତେ ରାଡ଼ାପେୟା, 4 ଏନ୍‌ ହୁଲାଙ୍ଗ୍‌ ଆପେ ବାବିଲୋନ୍‌ ରାଜାକେ ଲାନ୍ଦାଇତାନ୍‌ଲଃ ନେ ଜନ୍‌କା କାଜି ଇଦିକେଦ୍‌ତେ କାଜିପେ,

ନେଲେପେ, ନିସ୍‌ଠୁର୍‌ ରାଜାରାଃ ଟୁଣ୍ଡୁ ଦିପିଲି ଚିଲ୍‌କା ସେଟେରାକାନା ! ଆୟାଃ ଖିସ୍‌ ଚିଲ୍‌କା ହକାକାନା ! 5 ଅକନ୍‌କକେଚି ପ୍ରାଭୁ ଖିସ୍‌ତେ ରାକାମ୍‌ ରାକାମ୍‌ କିଲିକକେ ଲାଗାତାର୍‌ ଦାଲ୍‌କେଦ୍‌କଆଏ ଓଡ଼ୋଃ ଏଟାଃ ଏଟାଃ ଦିଶୁମ୍‌ରେନ୍‌ ହଡ଼କକେ ଏତ୍‌କାନ୍‌ ପେଡ଼େଃତେ ଲାଗାତାର୍‌ ସିଗିଦ୍‌ କେଦ୍‌କଆକ, 6 ପ୍ରାଭୁ ଏନ୍‌ ଏତ୍‌କାନ୍‌ ହଡ଼କଆଃ ସଟାକେ ଟହେଜ୍‌କାଦା ଓଡ଼ୋଃ ରାଇଜ୍‌ ରିକାତାନ୍‌ ଏତ୍‌କାନ୍‌ ହଡ଼କଆଃ ପେଡ଼େଃକେ ଟୁଣ୍ଡୁକାଦା। 7 ସବେନ୍‌ ଅତେଦିଶୁମ୍‌ ରୁଡ଼ୁକାନା ଓଡ଼ୋଃ ଜୀଉସୁକୁରେ ମେନାଃ। ଇନ୍‌କୁ ସବେନ୍‌କ ରାସ୍‌କାତେ ଦୁରାଙ୍ଗ୍‌ ତାନାକ। 8 ନେ'ଲେକାଚି ଦେବ୍‌ଦାରୁ ଓଡ଼ୋଃ ଲିବାନୋନ୍‌ରାଃ ସବେନ୍‌ ଏରସ୍‌ ଦାରୁ ଆମାଃ ବିଷାଏରେ ରାସ୍‌କାକେଦ୍‌ତେ କାଜିତାନା, "ଆମାଃ ଜିୟନ୍‌ ହବାୟାନ୍‌ ହରାତେ ଜେତା ଦାରୁ ମାଆଃ ହଡ଼ ଆଲେତାଃରେ କାକ ହିଜୁଃୟାନା।"

9 "ଆମାଃ ହିଜୁଃ ଦିପିଲିକେ ଦାରମ୍‌ ନାଙ୍ଗ୍‌ ଗନଏଃଗାଡ଼ା ସେକାଡ଼ଃ ତାନା। ଏନା ଆମାଃ ନାଙ୍ଗ୍‌ ଗଏଃକାନ୍‌ ହଡ଼କକେ ଓଡ଼ୋଃ ଅତେଦିଶୁମ୍‌ରେନ୍‌ ଆଗୁଆଇକକେ ଏୟନ୍‌ ରିକାଃଏ। ଅକନ୍‌କ ହଡ଼କଆଃ ରାଜା ତାଇକେନାକ, ଇନ୍‌କୁଆଃ ରାଜ୍‌ଗାଦି ଏତେ ଏନାଃ ଇନ୍‌କୁକେ ତିଙ୍ଗୁ କାଦ୍‌କଆ। 10 ଇନ୍‌କୁ ସବେନ୍‌କ କାଜିରୁହାଡ଼୍‌ମେୟାଁକ, ‘ଚିନାଃ ଆମ୍‌ହଁ ଆଲେ ଲେକା ନାରାଦୁରା ହବାକାନାମ୍‌ ? ଚିନାଃ ଆମ୍‌ ହଁ ଆଲେଲଃ ମିଦ୍‌ସାମାନ୍‌ ହବାକାନାମ୍‌ ? 11 ଆମାଃ ସାରାଙ୍ଗି ସାଡ଼ିଲଃ ଆମାଃ ସବେନ୍‌ ପେଡ଼େଃ ପାତାଲ୍‌ ଜାକେଦ୍‌ ଆଡ଼୍‌ଗୁକାନା, ତିଜୁକ ଆମାଃ ଲାତାର୍‌ରେ ଡିସ୍‌ନା ବିଲାକାନ୍‌ ଲେକା ମେନାକଆ ଓଡ଼ୋଃ ଲେଣ୍ଡାଦ୍‌କ ଆମାଃ ଉୟୁତେୟାଃ ଲେକା ହବାକାନାକ।’"

12 ହେ ଲୁସିଫର୍‌ ! ସେତାଃ ମାସ୍କାଲ୍‌ରେନ୍‌ ଇପିଲ୍‌ ! ଆମ୍‌ ଚିନାଃ ସିର୍ମାଏତେ ଲାତାର୍‌ କାମ୍‌ ଉୟୁଗାକାନା ! ସିଦା ଆମ୍‌ କିଲିକକେ ଆକ୍‌ତେୟାର୍‌କାଦ୍‌କ ତାଇକେନାମ୍‌, ନାହାଁଃ ଚିଲ୍‌କାତେ ଅତେରେ ଉୟୁଃକାନାମ୍‌। 13 ଆମ୍‌ ଆମାଃ ମନ୍‌ସୁରୁଦ୍‌ରେ ଉଡ଼ୁଃତାନ୍‌ଲଃ କାଜି ତାଇକେନାମ୍‌, ଆଇଙ୍ଗ୍‌ ସିର୍ମାତେ ରାକାବାଇଙ୍ଗ୍‌, ଓଡ଼ୋଃ ପାର୍‌ମେଶ୍ୱାର୍‌ଆଃ ଇପିଲ୍‌କଆଃ ଚେତାନ୍‌ରେ ଆଇଁୟାଃ ରାଜ୍‌ଗାଦି ବାଇୟାଇଙ୍ଗ୍‌। ଆଇଙ୍ଗ୍‌ ଉତ୍ତାର୍‌ସାଃରେ ତାଇକାନ୍‌ ନାପାମଃ ବୁରୁରେ ତାଇନାଇଙ୍ଗ୍‌। 14 ଆଇଙ୍ଗ୍‌ ରିମିଲ୍‌ରେୟାଃ ଚୁଟିଏତେ ଆଡଃଗି ଚେତାନ୍‌ତେ ରାକାବ୍‌ୟାନ୍‌ଲଃ, ଆପାନ୍‌କେ ପୁରାଃ ସାଲାଙ୍ଗିଉତାର୍‌ନିଃ ଲେକା ବାଇନାଇଙ୍ଗ୍‌। 15 ମେନ୍‌ଦ ଆମ୍‌କେ ପାତାଲ୍‌ତେ, ପୁରାଃ ଇକିର୍‌ ହୁଆଙ୍ଗ୍‌ଗାଡ଼ାତେ ଆଉୱାକାନାମ୍‌।

16 ଅକନ୍‌କ ଆମ୍‌କେ ନେଲ୍‌ମାଃକ, ଇନ୍‌କୁ ବୁଗିଲେକା ନେଲ୍‌କେଦ୍‌ତେ ଆମାଃ ବିଷାଏରେ ଉଡ଼ୁଃତାନ୍‌ଲଃ କାଜିୟାକ, ଅକଏ ଅତେକେ ଏକ୍‌ଲାଅକେଦା, ସବେନ୍‌ ରାଇଜ୍‌କେ ଟାଲ୍‌ମାଲାଅକେଦା; 17 ଅକଏ ଅତେଦିଶୁମ୍‌କେ ବିର୍‌ ଲେକା ବାଇକେଦାଏ ଓଡ଼ୋଃ ଏନାରାଃ ସବେନ୍‌ ନାଗାର୍‌କେ ଜିୟନ୍‌କେଦା, ଅକଏ ଆୟାଃ ତଲାକାନ୍‌ ଦାସିକକେ ଅଡ଼ାଃତେ ରୁହାଡ଼୍‌ ନାଙ୍ଗ୍‌ କାଏ ବାଗିକେଦ୍‌କଆ, ଇନିଃ ଚିନାଃ ନେ ହଡ଼ ତାନିଃ ?

18 ସବେନ୍‌ କିଲିରେନ୍‌ ରାଜାକ, ଇନ୍‌କୁଆଃ ସବେନ୍‌କ ହଁଗି ମାଇନ୍‌ତେ ଆପ୍‌ନାଃ ଆପ୍‌ନାଃ ତପାଗାଡ଼ାରେ ତପାକାନାକ। 19 ମେନ୍‌ଦ ହୁରାଙ୍ଗ୍‌କାନ୍‌ କତ ଲେକା ଆମ୍‌ ତପାଗାଡ଼ାଏତେ ହୁରାଙ୍ଗ୍‌ କାନାମେ, ତାରାଉଡ଼ିତେ ମାଆଃକାନ୍‌, ସେରେଙ୍ଗ୍‌ ଗାଡା ଥାଲାରେ ହୁରାଙ୍ଗ୍‌କାନ୍‌ ହଡ଼କଆଃ ମାଡ଼ାତେ ଆମ୍‌ ହାରୁବାକାନାମ୍‌, ଓଡ଼ୋଃ କାଟାଲଃ ତିକାଅଃତାନ୍‌ ମାଡ଼ା ଲେକା ହବାକାନାମେ। 20 ଆମ୍‌ ଇନ୍‌କୁ ଲେକା କାମ୍‌ ତପାଅଃଆ, ଚିୟାଃଚି ଆମ୍‌ ଆମାଃ ଦିଶୁମ୍‌କେ ଜିୟନ୍‌ ରିକାକାଦାମେ ଓଡ଼ୋଃ ଆମାଃ ହଡ଼କକେ ମାଆଃ କାଦ୍‌କଆମ୍‌। ଏତ୍‌କାନ୍‌ କାମି ରିକାକାଦ୍‌ କିଲିକଆଃ ନୁତୁମ୍‌ ଓଡ଼ୋଃ ଚିଉଲାହ କା ଆୟୁମଃଆ। 21 ଇନିୟାଃ ହନ୍‌କ ଅତେଦିଶୁମ୍‌କେ ଜେ'ଲେକା ଆକ୍‌ତେୟାର୍‌ କାକ ରିକାୟା ଓଡ଼ୋଃ ଅତେଦିଶୁମ୍‌କେ ନାଗାର୍‌ରେ କାକ ପେରେଜେୟା, ଏନାମେନ୍ତେ ଇନ୍‌କୁଆଃ ପୁର୍‌ଖା ଆପୁକଆଃ ପାପ୍‌କାମି ହରାତେ ଆୟାଃ ହନ୍‌କ ନାଙ୍ଗ୍‌ ମାଆଃ ଗଗଏଃରେୟାଃ ଠାୟାଦ୍‌ ବାଇୟେପେ।

22 ସବେନାଃଏତେ ପେଡ଼େୟାନ୍‌ ପ୍ରାଭୁ କାଜିତାନାଏ, "ଆଇଙ୍ଗ୍‌ ଇନ୍‌କୁଆଃ ବିରୁଧ୍‌ରେ ବିରିଦାଇଙ୍ଗ୍‌" ପ୍ରାଭୁ କାଜିତାନାଏ, "ଆଇଙ୍ଗ୍‌ ବାବିଲୋନ୍‌ ଏତେ ଇନିୟାଃ ନୁତୁମ୍‌ ଓଡ଼ୋଃ ସାରେଜାକାନ୍‌ ହଡ଼କକେ, ହନ୍‌କକେ ଓଡ଼ୋଃ ଜାଇହନ୍‌କକେ ଜିୟନ୍‌କୱାଇଙ୍ଗ୍‌।" 23 ଆଡଃଗି ପେଡ଼େୟାନ୍‌ ପ୍ରାଭୁ କାଜିତାନାଏ, "ଆଇଙ୍ଗ୍‌ ଏନ୍‌ ବାବିଲୋନ୍‌କେ ଦାଆଃତେ ପେରେଜେୟାଇଙ୍ଗ୍‌ ଓଡ଼ୋଃ ଏନ୍ତାଃରେ ପେଚାକଆଃ ତାଇନଃ ଠାୟାଦ୍‌ ହବାଅଃଆ। ଆଇଙ୍ଗ୍‌ ବାବିଲୋନ୍‌କେ ଜିୟନ୍‌ ରିକା ଜନଃତେ ଜଅଃ ସାଫା ତାଃଇଙ୍ଗ୍‌।"

24 ପେଡ଼େୟାନ୍‌ ପ୍ରାଭୁ କିରିୟାକେଦ୍‌ତେ କାଜିକାଦା, "ଆଇଙ୍ଗ୍‌ ଅକଆଃ ମନ୍‌ରେ ଉହାଟ୍‌ କାଦାଇଙ୍ଗ୍‌, ଏନା ସାର୍‌ତିଗି ହବାଅଃଆ, ଆଇଙ୍ଗ୍‌ ଅକଆଃ ରିକା ନାଗେନ୍ତେ ଠାନାଅକାଦାଇଙ୍ଗ୍‌, ଏନା ସାର୍‌ତିଗି ରିକାୟାଇଙ୍ଗ୍‌।" 25 ଆଇଙ୍ଗ୍‌ ଆଇଁୟାଃ ଦିଶୁମ୍‌ରେ ଆସେରିୟାକେ ହାଦୁଡ଼୍‌ ରିକାୟାଇଙ୍ଗ୍‌। ଆଇଁୟାଃ ବୁରୁ ଚେତାନ୍‌ରେ ଇନିଃକେ କାଟାଲଃ ତିକାଇୟାଇଙ୍ଗ୍‌। ଏନ୍ତେ ଆଇଁୟାଃ ହଡ଼କତାଃଏତେ ଆୟାଃ ଆଡ଼୍‌ନା ଓଡ଼ୋଃ ଇନ୍‌କୁଆଃ ତାରାନ୍‌ଏତେ ଆୟାଃ ବାହାରମ୍‌ ସାଙ୍ଗିନ୍‌ ରିକାଅଃଆ। 26 ସବେନ୍‌ ଅତେଦିଶୁମ୍‌ ନାଗେନ୍ତେ ନେ ଉହାଟ୍‌ ରିକାକାନା। ସବେନ୍‌ କିଲିକଆଃ ଚେତାନ୍‌ରେ ନେ ତିଃଇ ଜିଲିଙ୍ଗ୍‌କାନା। 27 ଚିୟାଃଚି ପେଡ଼େୟାନ୍‌ ପ୍ରାଭୁ ଅକଆଃ ମନ୍‌ରେ ଉହାଟ୍‌କାଦା, ଏନାକେ ଅକଏ ହକା ଦାଡ଼ିୟା ? ଇନିୟାଃ ତିଃଇ ଜିଲିଙ୍ଗ୍‌କାନା, ଏନାକେ ଅକଏ ଦୟାତେ ରୁହାଡ଼୍‌ ଦାଡ଼ିୟା ?

28 ରାଜା ଆହାସ୍‌ରାଃ ଗନଏଃ ହବାଅଃ ଦିପିଲି ଇମ୍‌ତା ନେ ଆୟାର୍‌କାଜି କାଜିକାନ୍‌ ତାଇକେନା,

29 ହେ ପାଲେଷ୍ଟାଇନ୍‌ ହଡ଼କ, ଅକ ସଟା ଆପେକେ ସାଜାଇ ଏମାକାଦ୍‌ପେୟା, ଏନା ଟହେଜ୍‌ୟାନା ମେନ୍ତେ ଆଲପେ ରାସ୍‌କାଅଃଆ। ଚିଆଃଚି ଏନ୍‌ ବିଙ୍ଗ୍‌ରାଃ କିଲିଏତେ ଆଡଃମିଆଦ୍‌ ପୁରାଃ ମାହୁଁରାତେ ପେରେଜାକାନ୍‌ ବିଙ୍ଗ୍‌ ଅଡଙ୍ଗ୍‌ଅଃଆଏ। ଇନିୟାଃ କିଲିଏତେ ମିଆଦ୍‌ ସେଙ୍ଗେଲ୍‌ ଲେକା ଆଫିର୍‌ତାନ୍‌ ବିଙ୍ଗ୍‌ ହବାଅଃଆଏ। 30 ସିଦାତେଦ ନାରାଦୁରା ମୁତ୍‌କୁଲ୍‌ ହଡ଼କ ଆସୁଲଃଆ ଓଡ଼ୋଃ ରେଙ୍ଗେଃ ରାବାଙ୍ଗ୍‌ ହଡ଼କ ବେଗାର୍‌ ବରତେ ଦୁଡ଼ୁମାଃକ। ମେନ୍‌ଦ ହେ ପାଲେଷ୍ଟାଇନ୍‌ ହଡ଼କ ଆଇଙ୍ଗ୍‌ ଆପେକେ ଜିୟନ୍‌ ରିକା ନାଙ୍ଗ୍‌ ରିଙ୍ଗା କୁଲେୟାଇଙ୍ଗ୍‌, ଏନା ଆପେୟାଃ ସାରେଜାକାନ୍‌ ହଡ଼କକେ ପୁରାଗି ଜିୟନ୍‌ ରିକାକଆ।

31 ହେ ନାଗାର୍‌ରାଃ ଦୁହାର୍‌କ, ହାଏ, ହାଏ ରିକାଏପେ ! ହେ ନାଗାର୍‌କ ରାଆଃଏପେ। ହେ ପାଲେଷ୍ଟାଇନ୍‌ ହଡ଼କ ଆପେ ସବେନ୍‌କ ପୁରାଃଗି ବରତେ ଥାର୍‌ଥାରାଅଃପେ। ଉତ୍ତାର୍‌ ସାଃଏତେ ରିମିଲ୍‌ ଲେକା ସୁକୁଲ୍‌ ହିଜୁଃତାନା। ଏନ୍‌ ସିପାଇକ ଥାଲାରେ ଜେତାଏ ବରତାନ୍‌ ହଡ଼କ ବାଙ୍ଗ୍‌କଆ।

32 ଏନ୍‌ କିଲିରେନ୍‌ କାଜି ଇଦିସେଟେର୍‌ ହଡ଼କକେ ଚିନାଃ କାଜିରୁହାଡ଼ଃଆ ? ଇନ୍‌କୁକେ କାଜିୟଃଆ, "ପ୍ରାଭୁ ସିୟୋନ୍‌ରାଃ ନିହିଁଗାଡ଼ା ବାଇୟାକାଦାଏ ଓଡ଼ୋଃ ଇନିୟାଃ ନାରାଦୁରା ହଡ଼କ ଏନାରେ ଆସ୍ରା ଇଦିୟାକ।"