ଯିଶାୟ 24

ପ୍ରାଭୁ ଅତେଦିଶୁମ୍‌ରାଃ ବିଚାର୍‌ ରିକାୟା

1 ନେଲେପେ, ପ୍ରାଭୁ ଅତେ ଦିଶୁମ୍‌କେ ସିଃସଏଃ ଓଡ଼ୋଃ ଜିୟନ୍‌ ରିକା ନାଗେନ୍ତେ ସେନଃତାନା। ଓଡ଼ୋଃ ଏନା ଉଲ୍‌ଟାଅକେଦ୍‌ତେ ଏନାରେ ତାଇନଃତାନ୍‌ ହଡ଼କକେ ଛିତିବିତିକଆ। 2 ଏନାରେ ଜେ’ଲେକା ହଡ଼କଆଃ, ଏନ୍‌ଲେକା ଯାଜାକ୍‌ରାଃ, ମାଲିକ୍‌ରାଃ ଓଡ଼ୋଃ ଦାସିରାଃ, ମାଲ୍‌କେନ୍‌ରାଃ ଓଡ଼ୋଃ କାମ୍‌ଡ଼ିରାଃ, କିରିଙ୍ଗ୍‌ନିଃରାଃ ଓଡ଼ୋଃ ଆଖ୍‌ରିଙ୍ଗ୍‌ନିଃରାଃ, ଗୁସିୟାଁରାଃ ଓଡ଼ୋଃ ମୁନିମ୍‌ରାଃ, କାନ୍‌ତାର୍‌ ଇଦିନିଃରାଃ ଓଡ଼ୋଃ କାନ୍‌ତାର୍‌ ଏମ୍‌ନିଃରାଃ, ନେ ସବେନ୍‌କଆଃ ଦାସା ମିଦ୍‌ଗି ହବାଅଃଆ। 3 ଅତେଦିଶୁମ୍‌ ପୁରାଃଗି ସିଃସଏଃ ଓଡ଼ୋଃ ଜିୟନଃଆ, ଚିଆଃଚି ପ୍ରାଭୁ ନେ କାଜି କାଜିତାନା।

4 ଅତେ ରହଡ଼୍‌କେଦ୍‌ତେ ଗସକେନଃ ତାନା, ଗଟା ଅତେଦିଶୁମ୍‌ ମାଡ଼ିତେ ହାରାଅଃତାନା ଓଡ଼ୋଃ ଅତେଦିଶୁମ୍‌ରେନ୍‌ ମାପ୍‌ରାଙ୍ଗ୍‌ ହଡ଼କ ଜିଅନ୍‌ ଇଦିୟଃତାନା। 5 ହଡ଼କ ହରାତେ ଅତେ ଦିଶୁମ୍‌ ପାପ୍‌ରେ ଉୟୁଃକାନା। ଚିୟାଃଚି ଇନ୍‌କୁ ଆନ୍‌ଚୁକ କାକ ମାନାତିଙ୍ଗ୍‌ କେଦା। ନିୟାମ୍‌କ କାକ ମାନାତିଙ୍ଗ୍‌କେଦା ଓଡ଼ୋଃ ଜାନାଅ ଜାନାଅରେୟାଃ ରାଜିନାମାକେ ଟଟାଃକାଦାକ। 6 ଏନ୍‌ ସାର୍‌ପାଅ ହରାତେ ଅତେଦିଶୁମ୍‌ ଜିୟନଃତାନା ଓଡ଼ୋଃ ଅତେଦିଶୁମ୍‌ରେନ୍‌ ହଡ଼କ ସାଜାଇ ନାମେତାନାକ। ଅତେରେନ୍‌ ହଡ଼କ ଅଣ୍ଡର୍‌ ଗଜାକାନା ଓଡ଼ୋଃ ହୁଡିଙ୍ଗ୍‌ ଲେକା ହଡ଼କ ସାରେଜାକାନାକ। 7 ନାୱା ଦାଖ୍‌ରାସି ଆଞ୍ଜେଦଃ ତାନା ଓଡ଼ୋଃ ଏନ୍‌ ଦାଖ୍‌ନାଡ଼ି ରହଡ଼୍‌କାନା। ରାସ୍‌କାତେ ତାଇନ୍‌ ହଡ଼କ ଦୁକୁରେ ମେନାକଆ। 8 ଓଡ଼ୋଃ ଡୁବିତାବ୍‌ଲାରାଃ ରାସ୍‌କାନ୍‌ ସାଡ଼ି ହକାଅଃତାନା ଓଡ଼ୋଃ ରାସ୍‌କାଅଃତାନ୍‌ ହଡ଼କଆଃ ଲାବ୍‌ଜା ଟୁଣ୍ଡୁଅଃତାନା, ବାନାମ୍‌ ସାଡ଼ିରାଃ ରାସ୍‌କାନ୍‌ ସାଡ଼ି ହକାଅଃତାନା। 9 ଇନ୍‌କୁ ଦୁରାଙ୍ଗ୍‌ତାନ୍‌ଲଃ ଓଡ଼ୋଃ ଇଲିଆର୍‌ଖି କାକ ନୁଏଁୟା। ଇଲିଆର୍‌ଖି ନୁଁ ତାନ୍‌ ହଡ଼କ ନାଗେନ୍ତେ ଇଲିଆର୍‌ଖି ମେହେର୍‌ ଆଟ୍‌କାର୍‌କଆଃ। 10 ସିଃସଏଃ ନାଗାର୍‌ ହାଦୁଡ଼ାକାନା, ଜେତା ହଡ଼ ଭିତାର୍‌ତେ ବଲ କାକ ଦାଡ଼ିୟା, ଚିୟାଃଚି ବଲଃ ଦୁହାର୍‌ ହାଣ୍ଡେଦ୍‌ କାନା। 11 ଇଲିଆର୍‌ଖି ନାଗେନ୍ତେ ହରା ଗେନାରେ କାଉରି ରିକାଅଃତାନା, ସବେନ୍‌ ରାସ୍‌କାରେୟାଃ କାଜିକ ନୁବାଃ ଲେକା ହବାକାନା। ରାସ୍‌କାରେୟାଃ କାଜି ଦିଶୁମ୍‌ ଏତେ ସାଙ୍ଗିନ୍‌କାନା। 12 ଏନ୍‌ ନାଗାର୍‌ ହାଦୁଡ଼୍‌କେଦ୍‌ତେ ମେନାଃ ଓଡ଼ୋଃ ଏନାରେୟାଃ ବଲଃ ଦୁହାର୍‌ରାଃ ଭିତ୍‌ ସବେନ୍‌ ହାଦୁଡ଼ାକାନା। 13 ଅଲିଭ୍‌ ଦାରୁଏତେ ଜ ରୁକୁତାନ୍‌ ଇମ୍‌ତା ଓଡ଼ୋଃ ଦାଖ୍‌ନାଡ଼ି ଏତେ ଦାଖ୍‌ ଜ ଗଦ୍‌ ରେୟାଃ ଟୁଣ୍ଡୁରେ ଚିଲ୍‌କା ହୁଡିଙ୍ଗ୍‌ ଲେକା ସାରେଜାକାନ୍‌ ତେୟାଃ ହୁଣ୍ଡିୟଃଆ, ଏନ୍‌ଲେକା ଅତେଦିଶୁମ୍‌ରେନ୍‌ ସବେନ୍‌ କିଲିକଏତେ ଚିମିନ୍‌କ ସାରେଜାକାନ୍‌ କକେ ହୁଣ୍ଡିକଆ।

14 ଅକନ୍‌ ହୁଡିଙ୍ଗ୍‌ ଲେକା ତାଇନାଃକ ଇନ୍‌କୁ ପୁରାଃ ରାସ୍‌କାଅଃଆକ। ଓଡ଼ୋଃ ଇନ୍‌କୁ ପାଶ୍ଚିମ୍‌ ସାଃଏତେ ପ୍ରାଭୁଆଃ ମାନାରାଙ୍ଗ୍‌ ରିକାତାନ୍‌ଲଃ କାଉରିୟାକ। 15 ଏନାମେନ୍ତେ ପୁରାବ୍‌ ସାଃରେ ପ୍ରାଭୁଆଃ ମାଇନାନ୍‌ ରିକାଏପେ, ଦରେୟା ରେୟାଃ ଟାପୁରେ ଇସ୍ରାଏଲ୍‌ରେନ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ନୁତୁମ୍‌ତେ ପୁରାଃଗି ମାନାରାଙ୍ଗ୍‌ ରିକାଏପେ। 16 ଧାର୍‌ମାନ୍‌ ହଡ଼ରାଃ ମାନାରାଙ୍ଗ୍‌ ହବାଅଃକା, ନେ ଦୁରାଙ୍ଗ୍‌ ଆଲେ ଅତେଦିଶୁମ୍‌ରେୟାଃ ଟୁଣ୍ଡୁଏତେ ଆୟୁମେତାନାଲେ।

ମେନ୍‌ଦ ଆଇଙ୍ଗ୍‌ କାଜିକେଦାଇଙ୍ଗ୍‌, "ଆଇଙ୍ଗ୍‌ଦ ଜିୟନଃ ତାନାଇଙ୍ଗ୍‌, ଜିୟନଃ ତାନାଇଙ୍ଗ୍‌ ! ଆଇଙ୍ଗ୍‌ଦ ସାର୍‌ପାଅ କାନାଇଙ୍ଗ୍‌।" ବିଶ୍ୱାସ୍‌ରେ ହସଡ଼ ରିକାତାନ୍‌କ, ବିଶ୍ୱାସ୍‌ରେ ହସଡ଼ ଲେକାକ କାମିକାଦା, ପୁରାଃଗି ବିଶ୍ୱାସ୍‌ରେ ହସଡ଼ କାମିକ ରିକାକାଦା। 17 ହେ ଅତେଦିଶୁମ୍‌ରେ ତାଇନ୍‌ତାନ୍‌ ହଡ଼କ, ଆପେ ନାଗେନ୍ତେ ବର, ଡଡା ଓଡ଼ୋଃ ଫାଁସ୍‌ରି ବାଇସେକାଡ଼୍‌କାନା। 18 ଓଡ଼ୋଃ ନେ’ଲେକା ହବାଅଃଆ, ଜେତାଏ ବରରେୟାଃ ସାଡ଼ିତେ ସାଙ୍ଗିନ୍‌ତେ ନିରାଃଏ, ଇନିଃ ଡଡାରେ ଉୟୁଗଃଆ। ଓଡ଼ୋଃ ଜେତାଏ ଏନ୍‌ ଡଡାଏତେ ବିରିଦ୍‌ୟାନ୍‌ଲଃ ଅଡଙ୍ଗ୍‌ ରେଦ, ଇନିଃ ଫାଁସ୍‌ରିରେ ଉୟୁଗଃଆ। ଚିୟାଃଚି ରିମିଲ୍‌ରେୟାଃ ଦୁହାର୍‌କ ନିଜାକାନା ଅତେଦିଶୁମ୍‌ରାଃ ନିହିଁଗାଡ଼ା ଏକ୍‌ଲାଅ କାନା। 19 ଅତେଦିଶୁମ୍ ଟୁକ୍‌ଡ଼ା ଟୁକ୍‌ଡ଼ା ହବାଅଃତାନା, ହାଦୁଡ଼ଃତାନା, ଓଡ଼ୋଃ ପୁରାଃଗି ଏକ୍‌ଲାଅଃତାନା। 20 ଅତେଦିଶୁମ୍‌ ବୁଲଃତାନ୍‌ ହଡ଼ଲେକା ଡାଗ୍‌ମାଗାଅଃ ତାନାଃ ଓଡ଼ୋଃ ଆନ୍ଧିହୟରେ ଅଟାଙ୍ଗ୍‌ଅଃତାନ୍‌ ଝୁପୁଡ଼ି ଅଡ଼ାଃ ଲେକା ଅଟାଙ୍ଗ୍‌ଅଃ ତାନା। ଇନିୟାଃ ପାପ୍‌ରାଃ ବାହାରମ୍‌ ଆୟାଃ ଚେତାନ୍‌ରେ ପୁରାଃଗି ଲାଦିୟାକାନା, ଏନାମେନ୍ତେ ଇନିଃ ଉୟୁଗଃ ରେଦ ଓଡ଼ୋଃ କାଏ ବିରିଦ୍‌ ଦାଡ଼ିୟା।

21 ଏନ୍‌ ହୁଲାଙ୍ଗ୍‌ ପ୍ରାଭୁ ରିମିଲ୍‌ ଚେତାନ୍‌ରେ ତାଇନ୍‌ତାନ୍ ପେଡ଼େୟାନ୍‌ ଫାଉଦ୍‌କକେ ଓଡ଼ୋଃ ଅତେରେ ତାଇନ୍‌ତାନ୍‌ ରାଜାକକେ ସାଜାଇ ଏମାକଆଏ। 22 ଜେହେଲ୍‌ ଭିତାର୍‌ରେ ତାଇନ୍‌ତାନ୍‌ ଜେହେଲାକାନ୍‌ ହଡ଼କ ଲେକା ଇନ୍‌କୁ ମିଦ୍‌ତାଃରେ ହାଣ୍ଡେଦଃଆକ। ଇନ୍‌କୁ ଜେହେଲ୍‌ରେକ ତାଇନାଃ ଓଡ଼ୋଃ ପୁରାଃ ଦିପିଲି ତାୟମ୍‌ତେ ଇନ୍‌କୁକେ ସାଜାଇ ଏମଃଆ। 23 ଇମ୍‌ତା ଚାଣ୍ଡୁଃ ନୁବାଃକଆଃ ଓଡ଼ୋଃ ସିଙ୍ଗି ମାର୍ସାଲ୍‌ କା ଏମେୟା। ଚିୟାଃଚି ସବେନାଃତେ ପେଡ଼େୟାନ୍‌ ପ୍ରାଭୁ ସିୟୋନ୍‌ ବୁରୁ ଚେତାନ୍‌ ଯୀରୁଶାଲେମ୍‌ରେ ଆୟାଃ ପୁର୍‌ଖା ହାଡ଼ାମ୍‌ ହଡ଼କଆଃ ନେପେଲ୍‌ରେ ପୁରାଃ ମାରାଙ୍ଗ୍‌ ମାନାରାଙ୍ଗ୍‌ତେ ରାଇଜ୍‌ ରିକାୟା।