1 ଆମ୍ ଆପାନ୍‌ତେ କା ନକ୍‌ସାନ୍‌କାନ୍‌ ରେହ ଏଟାଃକକେ ଆମ୍‌ ନକ୍‌ସାନ୍‌ ରିକାକ ତାନାମ୍‌, ଏନାମେନ୍ତେ ଆମ୍‌ ସାର୍‌ପାଅଃମେଁ। ଆମାଃଲଃ ଜେତାଏ ବିଶ୍ୱାସ୍‌ରେ ବେଦା ରିକାକାଦ୍‌ ରେହଁ, ଆମ୍‌ କା ପାତିୟାର୍‌ରଃ ଲେକା ହବାଅଃ ହରାତେ, ଆମ୍‌ ସାର୍‌ପାଅଃମେଁ। ଆମାଃ ସବେନ୍‌ ବିଷାଏ ହାଦୁଡ଼ାକାନ୍‌ ରେହଁ ଆମ୍‌ ଜିୟନ୍‌ନିଃ ହୁଇନାଃ। ଆମାଃ କା ପାତିୟାର୍‌ରଃ ଟୁଣ୍ଡୁକାନ୍‌ ରେହଁ, ଆମାଃଲଃ କା ପାତିୟାର୍‌ରଃ ଲେକା ହବାଅଃଆ।

2 ହେ ପ୍ରାଭୁ ଆଲେୟାଃ ଚେତାନ୍‌ରେ ଦାୟା ରିକାଏମେ, ଆଲେ ଆମ୍‌କେ ତାଙ୍ଗିକାଦ୍‌ମେୟାଁଲେ। ସବେନ୍‌ ସେତାଃରେ ଆମ୍ ଆଲେୟାଃ ତିଃଇରାଃ ପେଡ଼େୟାନ୍‌ନିଃ ହବାଅଃମେଁ। ଦୁକୁ ଇମ୍‌ତା ଆମ୍‌ ଆଲେୟାଃ ଜୀଉବାଞ୍ଚାଅନିଃ ହବାଅଃମେଁ। 3 ଆମାଃ ରିମିଲ୍‌ ରେୟାଃ ସାଡ଼ିରେ ବାଇରିକ ନିରାଃ, ଆମ୍‌ ତିଙ୍ଗୁନ୍‌ରେ ଏଟାଃ ଏଟାଃ ଦିଶୁମ୍‌ରେନ୍‌ କିଲିକ ନେତେହେନ୍ତେ ରିକାନାଃ। 4 ଓଡ଼ୋଃ ଡୁଣ୍ଡୁଲି ଚିଲ୍‌କା ଦାଣାଁ ହୁଣ୍ଡି ରିକାଃଏ, ଏନ୍‌ଲେକା ଆପେ ଏନ୍‌ ସବେନ୍‌ କିଲିରେନ୍‌ ହଡ଼କତାଃଏତେ ରେଃକ୍‌ ଜିନିଷ୍‌କ ଦାଣାଁ ହୁଣ୍ଡିୟଃଆ ଓଡ଼ୋଃ ସନ୍‌ସରେଦ୍‌କ ଚିଲ୍‌କା ମିଦ୍‌ତାଃରେ ହୁଣ୍ଡିନାଃକ, ଏନ୍‌ଲେକା ହଡ଼କ ଏନ୍‌ ରେଃକ୍‌ ଜିନିଷ୍‌ ଚେତାନ୍‌ରେ ଆକ୍‌ତେୟାର୍‌ ରିକାୟାକ।

5 ପ୍ରାଭୁ ପୁରାଃ ମାରାଙ୍ଗ୍‌ ତାନିଃ, ଚିୟାଃଚି ଇନିଃ ସିର୍ମାରେ ତାଇନ୍‌ତାନା। ଇନିଃ ସିୟୋନ୍‌କେ ନ୍ୟାୟ ବିଚାର୍‌ ରିକାକାଦା ଓଡ଼ୋଃ ଧାର୍‌ମାନ୍‌ତେ ପେରେୟାକାଦା। 6 ଓଡ଼ୋଃ ଆମାଃ ଦିପିଲିରେ ଏନା କେଟେଃକେଦ୍‌ତେ ତାଇନାଃ, ଜୀଉବାଞ୍ଚାଅ, ସେଣାଁନ୍‌ ଓଡ଼ୋଃ ସେଣାଁରାଃ ପେଡ଼େଃ ପୁରାଃଗି ହବାଅଃଆ, ପ୍ରାଭୁଆଃ ବିଷାଏରେୟାଃ ବର ଏନ୍‌ ଖୁର୍ଜି ଭାଣ୍ଡାର୍‌ରାଃ କୁଞ୍ଚି ହବାଅଃଆ।

7 ନେଲେପେ, ଇନ୍‌କୁଆଃ ପେଡ଼େୟାନ୍‌ ହଡ଼କ ରାଚାରେ କାଉରି ତାନାକ, ଜୀଉସୁକୁ ଆଉ ସାନାଙ୍ଗ୍‌ତାନ୍‌ କାଜି ଇଦିସେଟେର୍‌ ହଡ଼କ ପୁରାଃଗି ରାଆଃ ତାନାକ। 8 ପୁରାଃ ମାରାଙ୍ଗ୍‌ ହରା ସିଃସଏଃ କାନା, ସେସେନ୍‌ ହଡ଼କ ଜେତାଏ ବାନ୍‌କଆ, ଇନ୍‌କୁ ରାଜିନାମାକେ କାକ ମାନାତିଙ୍ଗ୍‌ କାଦା, ଇନ୍‌କୁ ନାଗାର୍‌କେ ହିଲାଙ୍ଗ୍‌ କେଦାକ, ଇନ୍‌କୁ ଆକଆଃ ହଡ଼କକେ କାକ ମାଇନ୍‌ କେଦ୍‌କଆ। 9 ଦିଶୁମ୍ ଏୟମ୍‌ତାନ୍‌ଲଃ ଗସକାନା, ଲିବାନୋନ୍‌ ଗିହୁଃ କେଦ୍‌ତେ ରହଡ଼୍‌ କାନା, ଶାରୋନ୍‌ରାଃ ବୁଗିନ୍‌ ଅତେ ବିର୍‌ ଲେକା ହବାକାନା, ଏନ୍ତେ ବାଶନ୍‌ ଓଡ଼ୋଃ କାର୍ମେଲ୍‌ ବୁରୁରାଃ ସାକାମ୍‌କ ଦାରୁଏତେ ଗାସାର୍‌ଅଃ ତାନା।

10 ପ୍ରାଭୁ କାଜିତାନାଏ, "ନାହାଁଃଦ ଆଇଙ୍ଗ୍‌ ବିରିଦାଇଙ୍ଗ୍‌, ନାହାଁଃଦ ଆଇଙ୍ଗ୍‌ ଚିମିନ୍‌ ମାଇନାନ୍‌ ଓଡ଼ୋଃ ପେଡ଼େୟାନ୍‌ନିଃ ତାନିଙ୍ଗ୍‌, ଏନା ଉଦୁବେୟାଇଙ୍ଗ୍‌। 11 ଆପେୟାଃ ଉହାଟ୍‌କ ହେଡ଼େ ଲେକା ସାମା ତାନାଃ ଓଡ଼ୋଃ ଅକ୍‌ନାଃ ଆପେ ରିକାତାନ୍‌ତେୟାଃ ଜେତାନ୍‌ କାମିରେ କା ହିଜୁଃଆ। ଆଇଁୟାଃ ଆତ୍ମା ସେଙ୍ଗେଲ୍‌ ଲେକାନାଃ ତାନାଃ, ଏନା ଆପେକେ ଅଣ୍ଡର୍‌ପେୟା। 12 ଓଡ଼ୋଃ ସବେନ୍‌ କିଲିକ ସେଙ୍ଗେଲ୍‌ତେ ଅଣ୍ଡର୍‌କାନ୍‌ ତରେକ୍‌ ଲେକା ହବାଅଃଆକ ଓଡ଼ୋଃ ମାଆଃକାନ୍‌ ଜାନୁମ୍‌ ଦାରୁ ସେଙ୍ଗେଲ୍‌ରେ ଅଣ୍ଡର୍‌କାନ୍‌ ଲେକା ହବାଅଃଆକ। 13 ଅକ ହଡ଼କ ସାଙ୍ଗିନ୍‌ରେ ତାଇନ୍‌ତାନାକ, ଆଇଙ୍ଗ୍‌ ଚିନାଃ ରିକାକାଦା ଆୟୁମେପେ। ହେ ହେପାଦ୍‌ରେ ତାଇନ୍‌ତାନ୍‌ ହଡ଼କ,ଆଇଁୟାଃ ପେଡ଼େଃକେ ପାହାମେପେ।"

14 ସିୟୋନ୍‌ରେନ୍‌ ପାପି ହଡ଼କ ଓଡ଼ୋଃ କା ଧାର୍‌ମାନ୍‌ ହଡ଼କ ବରତେ ପେରେୟାଃକାନା। ଇନ୍‌କୁ କାଜିତାନା, "ଆଲେଲଃ ଅକଏ ନେ ସବେନାଃକେ ଅଣ୍ଡର୍‌ ରିକାଏତାନ୍‌ ସେଙ୍ଗେଲ୍‍ଲଃ ତାଇନ୍‌ ଦାଡ଼ିୟାଃ ? ଆଲେଲଃ ଅକଏ ସେଙ୍ଗେଲ୍‌ରାଃ ଲଅଃତେ ତାଇନ୍‌ ଦାଡ଼ିୟାଃ ?" 15 ଅକଏ ଧାର୍‌ମାନ୍‌ ରେୟାଃ ନ୍ୟାୟ ହରାରେ ସେସେନ୍‌ ରିକାଏ ଓଡ଼ୋଃ ବୁଗିନ୍‌ କାଜି ଜାଗାର୍‌ ରିକାୟା, ଅକଏ ଲାଲାଚ୍‌ କାଜିକ ଏତେ ସାଙ୍ଗିନ୍‌ରେ ତାଇନାଃ ଓଡ଼ୋଃ ଲାଞ୍ଚ୍‌ ଘୁସ୍‌ ତିଃଇରେ କାଏ ତେଲା, ମାଆଃ ଗଗଏଃ ରେୟାଃ କାଜିକ ଏତେ ଆୟାଃ ଲୁତୁର୍‌କେ ସାଙ୍ଗିନ୍‌ ରିକାଏ ଓଡ଼ୋଃ ଏତ୍‌କାନ୍‌ କାଜିକାମିକ ନେନେଲ୍‌ ଏତେ ଆୟାଃ ମେଦ୍‌କେ ଜାପିଦ୍‌ ରିକାଏ, 16 ଏନ୍‌ ହଡ଼ ପୁରାଃଗି ସାଲାଙ୍ଗି ଚେତାନ୍‌ରେ ତାଇନା, କେଟେୟାନ୍‌ ସେରେଙ୍ଗ୍‌ ଓଡ଼ୋଃ ବୁରୁବେଡ଼ାରାଃ ଗୁମାଟ୍‌ ଆୟାଃ ଆସ୍ରାରେୟାଃ ଠାୟାଦ୍ ହୁଇନାଃ। ଆୟାଃ ଜଜମାଃ ଇନିଃକେ ଏମଃଆ ଓଡ଼ୋଃ ଦାଆଃରାଃ କାମି ଘାଟି କା ହୁଇନାଃ।

17 ଆପେୟାଃ ମେଦ୍‌ ରାଜାକେ ଇନିୟାଃ ପୁରାଃ ସୁଗାଡ଼ାନ୍‌ତେ ନେଲିୟା ଓଡ଼ୋଃ ପୁରାଃ ସାଙ୍ଗିନ୍‌ତେ ନିତିର୍‌କାନ୍‌ ଦିଶୁମ୍‌ ନେଲେୟା। 18 ଆପେୟାଃ ମନ୍‌ ସେନଃ ଦିପିଲି ରେୟାଃ ବର କାଜିକେ ପାହାମ୍‌ କେଦ୍‌ତେ କାଜିୟା, "ଏନ୍‌ ମାରାଙ୍ଗ୍‌ ସାହେବ୍‌ କତାଃରିୟା ? ଏନ୍‌ କାର୍‌ ଇଦିନିଃ କତାଃରିୟାଃ ? ଗାଡ଼୍‌ ନେନେଲ୍‌ତାନ୍‌ ହଡ଼ କତାଃରିୟାଃ ? 19 ଅକନ୍‌ ହଡ଼କଆଃ କାଜି ଆଟ୍‌କାର୍‌ ଉରୁମ୍‌ ନାଗେନ୍ତେ କେଟେଃଦ୍‌ ତାନା, ଅକନ୍‌କଆଃ ଜାଗାର୍‌ କା ସାରିକାନ୍‌ ଓଡ଼ୋଃ କା ଆଟ୍‌କାର୍‌ଉରୁମ୍‌ ଲେକ୍‌ନାଃ ତାନାଃ, ଏନ୍‌ଲେକାନ୍‌ ହଡ଼କକେ ଓଡ଼ୋଃ ଚିଉଲାହ କାପେ ନେଲ୍‌କଆ। 20 ସିୟୋନ୍‌ କେ ନେଲିପେ, ଅକ୍‌ତାଃରେ ଚି ଧାରାମ୍‌ ରେୟାଃ ପାରାବ୍‌ ମାନାତିଙ୍ଗ୍‌ ରିକାନାଃ। ଆପେୟାଃ ମେଦ୍‌ ଯୀରୁଶାଲେମ୍‌କେ ମିଆଦ୍‌ ସୁକୁତେ ପେରେୟାକାନ୍‌ ଠାୟାଦ୍‌ ଓଡ଼ୋଃ କେଟେଦ୍‌ତେ ବାଇୟାକାନ୍‌ କୁମ୍ବା ଲେକା ନେଲେୟାପେ, ଏନାରେୟାଃ ଖିଲାକ ଚିଉଲାହ କା ଉଟୁବଃଆ ଚାଏ ଏନାରେୟାଃ ତନଲ୍‌ ବାହେର୍‌ କା ଟଟାଗଃଆ। 21 ଆବୁଆଃ ପ୍ରାଭୁ ଏନ୍ତାଃରେ ପୁରାଃ ପେଡ଼େୟାନ୍‌ନିଃ ଲେକା ଆବୁଲଃ ତାଇନାଏ। ଏନା ଚାକାର୍‌ ଗାଡା ଓଡ଼ୋଃ ଲିଙ୍ଗିୟଃତାନ୍‌ ଠାୟାଦ୍‌ ଲେକା ହବାଅଃଆ। ଏନ୍‌ ଗାଡ଼ାରେ ଜେତାନ୍‌ ପାତ୍‌ୱାର୍‌ଲଃ ଚାଲାଅ ଲାଉକା କା ହିଜୁଆଃ ଚାଏ ଲିଜାଃ ଟାଣିକାନ୍‌ ଜେତାନ୍‌ ଲାଉକା କା ହିଜୁଃଆ, ଚାଏ ବରୱାନ୍‌ ଜାହାଜ୍‌କ କା ପାରମଃଆ। 22 ଚିୟାଃଚି ଆବୁଆଃ ବିଚାର୍‌ନିଃ ପ୍ରାଭୁ ତାନିଃ। ଇନିଃ ଆବୁକେ ଆନ୍‌ଚୁ ଏମଃନିଃ ତାନିଃ। ପ୍ରାଭୁ ଆବୁଆଃ ରାଜା, ଇନିଃ ଆବୁକେ ବାଞ୍ଚାଅବୁଆ। 23 ହେ ବାଇରିକ, ଆପେୟାଃ ଲାଉକା ରେୟାଃ ସବେନ୍‌ ବାହେର୍‌ ଟଟାଃକେଦ୍‌ତେ ଝୁଲାକାନା। ଏନ୍‌ ସବେନାଃ ଆୟାଃ ଠାୟାଦ୍‌ରେ କେଟେଦ୍‌ତେ କା ଦହ ଦାଡ଼ିତାନା ଚାଏ ଏନ୍‌ ପାଲ୍‌କେ କାଏ ରାଡ଼ା ଦାଡ଼ିତାନା, ଇମ୍‌ତା ପୁରାଃଗି ରେଜାକାନ୍ ଜିନିଷ୍‌କକେ ହାଟିଙ୍ଗ୍‌ ରିକାଅଃଆ। ନେ'ଲେକାଚି ମିଆଦ୍‌ କାଟା ବାନଃ ହଡ଼ ହଁ ଏନାକେ ରେଃକ୍‌ ଇଦିୟା। 24 ଆଇଙ୍ଗ୍‌ ନାରାଦୁରା କାନାଇଙ୍ଗ୍‌ ମେନ୍ତେ ସିୟୋନ୍‌ରେ ତାଇନଃତାନ୍‌ ହଡ଼କଏତେ ଜେତାଏ କାକ ଦାଡ଼ିୟା," ଓଡ଼ୋଃ ଏନ୍ତାଃରେ ତାଇନ୍‌ତାନ୍‌ ହଡ଼କଆଃ ପାପ୍‌କ ଛାମା ରିକାଅଃଆ।