1 ଏନ୍ତେ ହିଜିକିୟ ରାଜା ନେ ସବେନାଃ ଆୟୁମ୍‌ କେଦ୍‌ତେ ଆୟାଃ ଲିଜାଃକେ ଚେଚାଃ କେଦା ଓଡ଼ୋଃ ବାସ୍ତା ଲିଜାଃ ତୁସିଙ୍ଗ୍‌ କେଦ୍‌ତେ ପ୍ରାଭୁଆଃ ମାନ୍ଦିର୍‌ ଅଡ଼ାଃତେ ସେନଃୟାନା। 2 ଏନ୍ତେ ଇନିଃ ରାଜ୍‌ମାହାଲ୍‌ରେନ୍‌ ହାକିମ୍‌କେ ଇଲିୟାକିମ୍‍, ଶିବ୍‌ନ ନୁତୁମ୍‌ ଅନଲ୍‌ନିଃ ଓଡ଼ୋଃ ଯାଜାକ୍‌କଆଃ ପୁର୍‌ଖା ହାଡ଼ାମ୍‌କ ବାସ୍ତା ଲିଜାଃ ତୁସିଙ୍ଗ୍‌ କେଦ୍‌ତେ, ଆମୋସ୍‌ରାଃ ହନ୍ତେକଡ଼ା ଯିଶାୟ ନାବୀ ତାଃତେ କୁଲ୍‌କେଦ୍‌କଆ। 3 ଏନ୍ତେ ଇନ୍‌କୁ ଇନିଃକେ କାଜିକିୟା, "ହିଜିକିୟ ନେ'ଲେକା କାଜିକାଦା, ତିସିଙ୍ଗ୍‌ ଦୁକୁ, ହାସୁ ଓଡ଼ୋଃ ସାର୍‌ପାଅ ରେୟାଃ ଦିପିଲି ତାନାଃ, ଚିୟାଃଚି ହନ୍‌ଜାନାମ୍‌ ରେୟାଃ ଦୁକୁ ଦିପିଲି ସେଟେରାକାନା, ମେନ୍‌ଦ ଇନ୍‌କୁତାଃରେ ହନ୍‌ ଜାନାମ୍‌ ରେୟାଃ ପେଡ଼େଃ ବାନଃଆ। 4 ଜୀନିଦ୍‌ ପାର୍‌ମେଶ୍ୱାର୍‌ଆଃ ବିରୁଧ୍‌ରେ ହିଲାଙ୍ଗ୍‌ କାଜିକ କାଜି ନାଗେନ୍ତେ ଅକ ମାରାଙ୍ଗ୍‌ ହାକିମ୍‌ ରବ୍‌ଶାକି ଆୟାଃ ରାଜାରାଃ କାଜି ହରାତେ କୁଲାକାନ୍‌ ତାଇକେନା। ଇନିୟାଃ ସବେନ୍‌କାଜି ଆମାଃ ପ୍ରାଭୁ ପାର୍‌ମେଶ୍ୱାର୍‌ ଆୟୁମାକାଦାଏ। ହବାସାକାଅଆଃ, ଏନା ପ୍ରାଭୁ ଆୟୁମ୍‌କେଦ୍‌ତେ ଆମ୍‌କେ ଚେତାଅମେୟା। ଏନାମେନ୍ତେ ନାହାଁଃଦ ଆସେରିୟାରେନ୍ ଅକନ୍‌କ ସାରେଜାକାନା, ଇନ୍‌କୁ ନାଗେନ୍ତେ ବିନ୍ତିପେ।"

5 ଚିମ୍‌ତା ହିଜିକିୟ ରାଜାରାଃ ଦାସିକ ଯିଶାୟରାଃ ହେପାଦ୍‌ତେ ସେନ୍‌କେନା, 6 ଯିଶାୟ ଇନ୍‌କୁକେ କାଜିକେଦ୍‌କଆଏ, ଆପେୟାଃ ଗୁସିୟାଁକେ କାଜିପେ, "ପ୍ରାଭୁ ନେ କାଜି କାଜିତାନା, ଆସେରିୟାରେନ୍‌ ରାଜାରାଃ ଆକ୍‌ତେୟାର୍‌ରେ ତାଇନ୍‌ତାନ୍‌ ଦାସିକ ଅକ କାଜିକ କାଜିକେଦ୍‌ତେ ଆଇଁୟାଃ ନିନ୍ଦା ରିକାକାଦାକ, ଏନ୍‌ ସବେନାଃ ଆୟୁମ୍‌କେଦ୍‌ତେ ଆପେ ଆଲପେ ବରୟା। 7 ଆୟୁମେପେ, ଆଇଙ୍ଗ୍‌ ଇନିୟାଃ ମନ୍‌ସୁରୁଦ୍‌ରେ ନେ' ଲେକାନ୍‌ ଆତ୍ମା ଏମାଇୟାଇଙ୍ଗ୍‌, ଇନିଃ ଜେତା କାଜି ଆୟୁମ୍‌ତାନ୍‌ଲଃ ଆୟାଃ ଦିଶୁମ୍‌ତେ ସେନଃ ରୁହାଡ଼ା ଓଡ଼ୋଃ ଏନ୍ତାଃରେ ଆଇଙ୍ଗ୍‌ ଇନିଃକେ ତାରାଉଡ଼ିଲଃ ମାଆଃ ଗଜିଆଇଙ୍ଗ୍‌।"

8 ଚିମ୍‌ତା ମାରାଙ୍ଗ୍‌ ହାକିମ୍‌ ରବ୍‌ଶାକି ଆୟୁମ୍‌କେଦାଏ ଯେ, ଆସେରିୟାରେନ୍‌ ରାଜା ଲାଖିଶ୍‍ ଏତେ ନିର୍‌ୟାନା, ଇମ୍‌ତା ଇନିଃ ରୁହାଡ଼୍‌ୟାନାଏ ଓଡ଼ୋଃ ରାଜାକେ ଲିବ୍‌ନା ବିରୁଧ୍‌ରେ ଲାଡ଼ାଇତାନ୍‌ତେୟାଃ ନେଲ୍‌କିୟାଏ। 9 ଏନ୍‌ ଦିପିଲିରେ ସନ୍‌ହେରିବ୍‌ ଆୟୁମ୍‌କେଦାଏ ଯେ, କୁଶ୍‌ ଦିଶୁମ୍‌ରେନ୍‌ ରାଜା ତିର୍ହକ ଇନିୟାଃ ବିରୁଧ୍‌ରେ ଲାଡ଼ାଇ ନାଗେନ୍ତେ ହିଜୁଃତାନାଏ। ନେ କାଜି ଆୟୁମ୍‌କେଦ୍‌ତେ ଇନିଃ କାଜି ସେଟେର୍‌ତାନ୍‌କଆଃ ହରାତେ ହିଜିକିୟତାଃ କାଜିକୁଲ୍‌କେଦା, 10 ଆପେ ସବେନ୍‌କ ଯିହୁଦା ରେନ୍‌ ରାଜା ହିଜିକିୟକେ ନେ କାଜି ଉଦୁବାଇପେ, "ଆମ୍‌ ଅକ ପାର୍‌ମେଶ୍ୱାର୍‌ତାଃରେ ଆସ୍ରାତାନା, ଇନିଃ ନେ କାଜି କାଜିକେଦ୍‌ତେ ଆମ୍‌କେ ଆଲକାଏ ବେଦାମେକା ଯେ, ଯୀରୁଶାଲେମ୍‌ ଆସେରିୟା ରାଜାରାଃ ଆକ୍‌ତେୟାର୍‌ରେ କା ହବାଅଃଆ। 11 ଆସେରିୟା ରେନ୍‌ ରାଜାକ ଚିଲ୍‌କା ସବେନ୍‌ ଦିଶୁମ୍‌କେ ପୁରା ଜିୟନ୍‌କାଦା, ଏନା ଆମ୍‌ ସାର୍‌ତିଗି ଆୟୁମ୍‌କାଦାମ୍‌। ତାବ୍‌ଦ ଆମ୍‌ ଚିନାଃ ବାଞ୍ଚାଅ ନାମେୟାଁମ୍‌ ? 12 ଆଇଁୟାଃ ପୁର୍‌ଖା ଆପୁକ ଅକନ୍‌ କିଲିକକେ ଗୋଶନ୍‌, ହାରାନ୍‌, ରେତ୍‌ସଫ୍‌ରେ ତାଇନ୍‌ତାନ୍‌ ସବେନ୍‌ ହଡ଼କକେ ଓଡ଼ୋଃ ତଲଃସର୍‌ ନାଗାର୍‌ରେ ତାଇନ୍‌ତାନ୍‌ ଏଦାନ୍‌ ହଡ଼କକେ ଜିୟନ୍‌ କେଦ୍‌କଆ, ଇନ୍‌କୁଆଃ ମାହାପୁରୁକ ଚିନାଃ ଇନ୍‌କୁକେ ବାଞ୍ଚାଅ ଦାଡ଼ିକେନାକ ? 13 ହମାତ୍‌ ରେନ୍‌, ଅର୍ପଦ୍‌ ରେନ୍‌, ସଫର୍ବୟିମ୍‌ ନାଗାର୍‌ରେନ୍‌, ହେନା ସାହାର୍‌ ଓଡ଼ୋଃ ଇଭା ସାହାର୍‌ରେନ୍‌ ସବେନ୍‌ ରାଜାକ କତାଃରେ ମେନାକଆ ?"

14 ଏନ୍ତେ ହିଜିକିୟ କାଜି ଇଦିସେଟେର୍‌ତାନ୍‌ ହଡ଼କତାଃ ଏତେ ଅନଲ୍‌ ଚିଠା ଇଦିକେଦ୍‌ତେ ଏନା ପାଢ଼ାଅ କେଦାଏ। ଏନ୍ତେ ଇନିଃ ପ୍ରାଭୁଆଃ ଅଡ଼ାଃତେ ସେନ୍‌ୟାନ୍‌ଲଃ ଏନ୍‌ ଚିଠାକେ ଅଟାଃ କେଦ୍‌ତେ ଦହକେଦା। 15 ଓଡ଼ୋଃ ହିଜିକିୟ ପ୍ରାଭୁତାଃରେ ବିନ୍ତିକେଦ୍‌ତେ କାଜିକେଦାଏ, 16 "ହେ ସବେନାଃତେ ପେଡ଼େୟାନ୍‌ ପ୍ରାଭୁ, ଇସ୍ରାଏଲ୍‌ରେନ୍‌ ପାର୍‌ମେଶ୍ୱାର୍‌ ଆମ୍‌ କିରୁବ୍‌ ଦୁଁତ୍‌କଆଃ ଥାଲାରେ ରାଜ୍‌ଗାଦିରେ ଦୁବାକାନାମ୍‌, ଆମ୍‌ଗି ଅତେଦିଶୁମ୍‌ରେୟାଃ ସବେନ୍‌ ରାଇଜ୍‌ରେନ୍‌ ମିଆଦ୍‌ଗି ପାର୍‌ମେଶ୍ୱାର୍‌ ତାନ୍‌ମେ। ଆମ୍‌ଗି ଅତେ ଓଡ଼ୋଃ ସିର୍ମା ବାଇୟାକାଦାମ୍‌। 17 ହେ ପ୍ରାଭୁ, ଲୁତୁର୍‌ ଏମ୍‌କେଦ୍‌ତେ ଆୟୁମେମେ, ହେ ପ୍ରାଭୁ ଆମାଃ ମେଦ୍‌ତେ ନେଲେମେ। ଜୀନିଦ୍‌ ପାର୍‌ମେଶ୍ୱାର୍‌କେ ଲାନ୍ଦାଇ ନାଗେନ୍ତେ ସନ୍‌ହେରିବ୍‌ ଅକନ୍‌ ସବେନ୍ କାଜି କୁଲ୍‌କାଦାଏ, ଏନ୍‌ ସବେନାଃ ଆୟୁମେମେ। 18 ହେ ପ୍ରାଭୁ, ନେ କାଜି ସାର୍‌ତି ତାନାଃ, ଯେ ଆସେରିୟା ରେନ୍‌ ରାଜାକ ନେ ସବେନ୍‌ ହଡ଼କକେ ଓଡ଼ୋଃ ଇନ୍‌କୁଆଃ ଦିଶୁମ୍‌କେ ଜିୟନ୍‌ ରିକାକାଦା। 19 ଇନ୍‌କୁ ଆକଆଃ ମାହାପୁରୁକକେ ସେଙ୍ଗେଲ୍‌ରେ ହୁରାଙ୍ଗ୍‌ କେଦ୍‌ତେ ଜିୟନ୍‌ କାଦ୍‌କଆ। ଚିୟାଃଚି ଇନ୍‌କୁ ପାର୍‌ମେଶ୍ୱାର୍‌ ନାହାଁଲାକ। ଇନ୍‌କୁ ହଡ଼ରାଃ ତିଃଇତେ ବାଇୟାକାନ୍‌ ସାହାନ୍‌ ଓଡ଼ୋଃ ଦିରିକ ଏସ୍‌କାର୍‌ ତାନ୍‌କ। 20 ହେ ପ୍ରାଭୁ ଆଲେୟାଃ ପାର୍‌ମେଶ୍ୱାର୍‌, ନାହାଁଃଦ ଆଲେକେ ଆମ୍‌ ଇନିୟାଃ ତିଃଇ ଏତେ ବାଞ୍ଚାଅଲେମେ। ଏନ୍‌ରେଦ, ଆମ୍‌ ଏସ୍‌କାର୍‌ ପ୍ରାଭୁ ତାନ୍‌ମେ, ଏନା ଗଟା ଦିଶୁମ୍‌ ସାରି ଦାଡ଼ିୟାଃକ।"

21 ଏନ୍ତେ ଆମୋସ୍‌ରାଃ ହନ୍ତେକଡ଼ା ଯିଶାୟ ହିଜିକିୟତାଃ କାଜି କୁଲ୍‌କେଦା, ପ୍ରାଭୁ ଇସ୍ରାଏଲ୍‌ରେନ୍‌ ପାର୍‌ମେଶ୍ୱାର୍‌ ନେ କାଜି କାଜିତାନାଏ, ଆସେରିୟାରେନ୍‌ ରାଜା ସନ୍‌ହେରିବ୍‌ ନାଗେନ୍ତେ ଆମ୍‌ ବିନ୍ତି ରିକାକାଦ୍ ହରାତେ, 22 ପ୍ରାଭୁ ଇନିୟାଃ ବିରୁଧ୍‌ରେ ନେ କାଜି କାଜିତାନାଏ। ସିୟୋନ୍‌ରେନ୍‌ ଡିଣ୍ଡାକୁଡ଼ି ଆମ୍‌କେ ହିଲାଙ୍ଗ୍‌ ଓଡ଼ୋଃ ହିସିଙ୍ଗା ତାନାଏ ଓଡ଼ୋଃ ଆମ୍‌ ନିର୍‌ ତାୟମ୍‌ତେ ଯୀରୁଶାଲେମ୍‌ରେନ୍‌ କୁଡ଼ି ବହଃ ହିଲାଅତାନାଏ। 23 ଆମ୍‌ ଅକଏକେ ଲାନ୍ଦା ଓଡ଼ୋଃ ନିନ୍ଦାଇତାନାମ୍‌ ? ଆମ୍‌ ଅକଏ ବିରୁଧ୍‌ରେ ପୁରାଃଗି କାଜିକ କାଜିକାଦାମ୍‌ ଓଡ଼ୋଃ ମାଇନାନ୍‌ କାମ୍‌ ରିକାକାଦା ? ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌ଆଃ ବିରୁଧ୍‌ରେ 24 ଆପେ ଆପେୟାଃ ଦାସିକଲଃ ପ୍ରାଭୁକେ ହିଲାଙ୍ଗ୍‌ କାଇୟାଃ ଓଡ଼ୋଃ କାଜିକାଦା, ଆଇଙ୍ଗ୍‌ ପୁରାଃ ସାଦମ୍‌ଗାଡ଼ିକ ଇଦିକେଦ୍‌ତେ ବୁରୁ ରେୟାଃ ଚେତାନ୍‌ତେ ଓଡ଼ୋଃ ଲିବାନୋନ୍‌ ବୁରୁ ରେୟାଃ ସାଲାଙ୍ଗି ଠାୟାଦ୍‌ତେ ଇଦିୟା। ଆଇଙ୍ଗ୍‌ ଏନ୍ତାଃରେ ତାଇନ୍‌ତାନ୍‌ ସବେନ୍‌ ଏରସ୍‌ ଦାରୁ ଓଡ଼ୋଃ ଦେବ୍‌ଦାରୁକେ ମାଆଃ ରିକାଏୟାଇଙ୍ଗ୍‌। ଓଡ଼ୋଃ ଆଇଙ୍ଗ୍‌ ଇନିୟାଃ ସାଙ୍ଗିନ୍‌ ରେୟାଃ ସାଲାଙ୍ଗି ଠାୟାଦ୍‌ ଓଡ଼ୋଃ ଏନାରେୟାଃ ଜଅ ତେ ପେରେୟାକାନ୍‌ ବୁରୁରାଃ ପିଡ଼ି ଭିତାର୍‌ତେ ସେନାଃ। 25 ଆଇଙ୍ଗ୍‌ ଏଟାଃ ଦିଶୁମ୍‌ରେ କୁଆଁ ଉର୍‌କେଦ୍‌ତେ ଦାଆଃ ନୁଁ କାଦାଇଙ୍ଗ୍‌ ଓଡ଼ୋଃ ଆଇଙ୍ଗ୍‌ ଆଇଁୟାଃ କାଟା ଲାତାର୍‌ରେ ମିସାର୍‌ ଦିଶୁମ୍‌ରେୟାଃ ସବେନ୍‌ ଗାଡାରାଃ ଦାଆଃ ଆଞ୍ଜେଦ୍‌ କାଦାଇଙ୍ଗ୍‌।

26 ମେନ୍‌ଦ ଚିଲ୍‌କା ଆଇଙ୍ଗ୍‌ ସିଦା ଦିପିଲି ଏତେ ଏନ୍‌ସବେନାଃ ଉହାଟ୍‌ ରିକାକାଦ୍‌ ତାଇକେନା, ଚିୟାଃ ଆପେ କାପେ ଆୟୁମ୍‌କାଦା, ଆଇଙ୍ଗ୍‌ ପୁରାଃ ସିଦା ଦିପିଲି ଏତେ ଏନ୍‌ସବେନାଃ ଠାହାରାଅକାଦ୍‌ ତାଇକେନା ? ନାହାଁଃଦ ଏନ୍‌ସବେନାଃ ପୁରାକାଦା, ଏନାମେନ୍ତେ ଆପେ ସବେନ୍‌କ କେସେଦ୍‌ ବିୟୁର୍‌କାନ୍‌ ନାଗାର୍‌କକେ ଜିୟନ୍‌ ହାସୁର୍‌ କେଦ୍‌ତେ କେଚ୍‌ରା ଢିପା ଲେକା ବାଇକେଦା। 27 ଏନାମେନ୍ତେ ଏନ୍‌ ନାଗାର୍‌ରେନ୍‌ ହଡ଼କ ପେଡ଼େଃ ବାନଃ ଲେକା ହବାୟାନାକ, ଇନ୍‌କୁ ଆକ୍‌ଚାକାଅ ଓଡ଼ୋଃ ଗିହୁଃୟାନାକ। ଇନ୍‌କୁ ପିଡ଼ିରେୟାଃ ତାସାଦ୍‌, ନାୱା ସାଗେନ୍‌କାନ୍‌ ସାକାମ୍‌, ଅଡ଼ାଃରେୟାଃ ମୁତୁଲ୍‌ରେ ପାସ୍‌ରାଅକାନ୍‌ ନାଡ଼ି ତାସାଦ୍‌ ଓଡ଼ୋଃ କା ବିଲିକାନ୍‌ ଗେଲେ ଲେକା ହବାୟାନାକ।

28 "ଆପେ କତାଃରେ ତାଇନ୍‌ତାନା, ଚିମ୍‌ତା ହିଜୁଃ ତାନାପେ ଓଡ଼ୋଃ ସେନଃ ତାନାପେ, ଆପେ ଚିଲ୍‌କା ଆଇଙ୍ଗ୍‌କେ ପୁରାଃଗି ଖିସ୍‌ ରିକାତାନା ଏନା ସାରିତାନାଇଙ୍ଗ୍‌। 29 ଆପେ ଆଇଁୟାଃ ଚେତାନ୍‌ରେ ପୁରାଃଗି ଖିସ୍‌କାଦ୍‌ ହରାତେ ଓଡ଼ୋଃ ଆପେୟାଃ ଖିସ୍‌ ରେୟା ଜାଗାର୍‌ ଆଇଙ୍ଗ୍‌ ଆୟୁମାକାଦ୍‌ ହରାତେ, ଆଇଙ୍ଗ୍‌ ଆପେୟାଃ ମୁହୁଁରେ ହୁକ୍‌ ଓଡ଼ୋଃ ମଚାରେ ଲାଗାମ୍‌ ଏମେୟା ଓଡ଼ୋଃ ଆପେ ଅକ ହରାରେ ହିଜୁଃୟାନା, ଏନ୍‌ ହରାରେଗି ସେନଃ ରୁହାଡ଼୍‌ ନାଗେନ୍ତେ ଆଚୁପେୟା।"

30 ଏନାମେନ୍ତେ ଯିଶାୟ ହିଜିକିୟକେ କାଜିକିୟା, "ଆମାଃ ନାଗେନ୍ତେ ମିଆଦ୍ ଚିହ୍ନା ଏମଃଆ, ଆପେ ସବେନ୍‌କ ନେ ବାରାଷ୍‌ ଅତେରେ ଆପ୍‌ନାଃତେ ହବାକାନ୍‌ ଜ ଓଡ଼ୋଃ ଏଟାଃ ବାରାଷ୍‌ ଆପ୍‌ନାଃତେ ଅମନ୍‌କାନ୍‌ ଜ ଜମେୟାଁପେ। ମେନ୍‌ଦ ଆପି ବାରାଷ୍‌ ହବାଅଃ ଇମ୍‌ତା ହିତା ହେର୍‌ କେଦ୍‌ତେ ଏନାରାଃ ଜ ଇରେୟାପେ ଓଡ଼ୋଃ ଦାଖ୍‌ବାକ୍‌ଡ଼ି ବାଇକେଦ୍‌ତେ ଏନାରାଃ ହଁ ଜ ଜମେୟାଁପେ। 31 ଯିହୁଦା କିଲିରେନ୍‌ ସାରେୟାଃକାନ୍‌ ହଡ଼କ ଆଡଃମିସା ଅତେରେୟାଃ ରେହେଦ୍‌ ଲେକା ପେଡ଼େୟାନ୍‌ ରିକାନାଃ ଓଡ଼ୋଃ ଦାରୁ ଚେତାନ୍‌ରେ ଜ ହବାକାନ୍‌ ଲେକା ଇନ୍‌କୁ ଜଅ ତେ ପୁରାଃ ଜଅ ଇଦିୟଃଆ। 32 ଚିୟାଃଚି ଯୀରୁଶାଲେମ୍‌ ଏତେ ସାରେୟାଃକାନ୍‌ ହଡ଼କ ଏତେ ମିଆଦ୍ ଝୁଣ୍ଡ୍‌ ଓଡ଼ୋଃ ବାଞ୍ଚାଅକାନ୍‌ ହଡ଼କ ସିୟୋନ୍‌ ରେୟାଃ ବୁରୁ ଏତେ ମିଆଦ୍‌ ଝୁଣ୍ଡ୍‌ ଅଡଙ୍ଗଃଆ। ପେଡ଼େଃତେ ପେରେୟାକାନ୍‌ ପ୍ରାଭୁଆଃ ଚିହୁଲ୍‌ ନେ କାଜିକେ ପୁରା ରିକାୟା।

33 "ଏନାମେନ୍ତେ ପ୍ରାଭୁ ଆସେରିୟା ରାଜାରାଃ ବିରୁଧ୍‌ରେ ନେ ସବେନ୍‌ କାଜିକ କାଜିତାନା, ‘ଇନିଃ ନେ ନାଗାର୍‌ ଭିତାର୍‌ତେ କାଏ ବଲ ଦାଡ଼ିୟାଃ, ଚାଏ ଏନ୍ତାଃରେ ମିଆଦ୍‌ ଚିଆରି ହଁଗି କାଏ ତୁଇଙ୍ଗ୍‌ ରିକାୟା, ଚାଏ ଏନ୍‌ ନାଗାର୍‌ ଆୟାର୍‌ରେ ଢାଲ୍‌ ସାବ୍‌କେଦ୍‌ତେ ହଁଗି କାଏ ହିଜୁଆଃ ଚାଏ ଏନାରାଃ ବିରୁଧ୍‌ରେ ବାନ୍ଦା କାଏ ବାଇୟାଃ। 34 ପ୍ରାଭୁ କାଜିତାନା, ଇନିଃ ଅକନ୍‌ ହରାରେ ହିଜୁଃୟାନାଏ, ଏନ୍‌ ହରାରେ ସେନଃ ରୁହାଡ଼ା ଓଡ଼ୋଃ ନେ ନାଗାର୍‌ତେ କାଏ ହିଜୁଆଃ। 35 ଆଇଁୟାଃ ଆପାନ୍‌ ନାଗେନ୍ତେ ଓଡ଼ୋଃ ଆଇଁୟାଃ ଦାସି ଦାଉଦ୍‌ ନାଗେନ୍ତେ ନେ ନାଗାର୍‌କେ ବାଞ୍ଚାଅ ନାଙ୍ଗ୍‌ ବାନାର୍‌ସା ଏମାକାଜାଇଙ୍ଗ୍‌।’"

36 ଏନ୍ତେ ପ୍ରାଭୁଆଃ ଦୁଁତ୍‌ ଆସେରିୟା ରେନ୍‌ ସିପାଇକଆଃ କୁମ୍ବାତେ ସେନ୍‌କେଦ୍‌ତେ ୧୮୫,୦୦୦ ହଡ଼କକେ ମାଆଃ ଗଏଃକେଦ୍‌କଆ। ଏଟାଃ ହୁଲାଙ୍ଗ୍‌ ହଡ଼କ ସେତାଃ ଇଦାନ୍‌ରେ ବିରିଦ୍‌ୟାନ୍ତେ, ଗୟାକାନ୍‌ ହଡ଼କଆ ହଡ଼୍‌ମ ନେଲ୍‌କେଦା। 37 ଏନ୍ତେ ଆସେରିୟା ରେନ୍‌ ରାଜା ସନ୍‌ହେରିବ୍‌ ସେନଃୟାନାଏ ଓଡ଼ୋଃ ଇନିଃ ନୀନିବ୍‌ରେ ତାଇନ୍‌ୟାନା। 38 ଏନ୍‌ ତାୟମ୍‌ତେ ଇନିଃ ଆୟାଃ ନିଷ୍ରୋକ୍‌ ନୁତୁମ୍‌ ମାହାପୁରୁ କେ ସେୱା ରିକାତାନ୍‌ ଇମ୍‌ତା ଅଦ୍ରମ୍ମେଲକ୍‌ ଓଡ଼ୋଃ ଶରେତ୍‌ସର୍‌ ନୁତୁମ୍‌ ଆୟାଃ ବାରାନ୍‌ ହନ୍‌କିନ୍‌ ଇନିଃକେ ତାରାଉଡ଼ିତେ ମାଆଃ କିୟାଃ। ଏନ୍ତେ ଇନ୍‌କିନ୍‌ ଆରାରାଟ୍‌ ଦିଶୁମ୍‌ତେ ନିର୍‌ୟାନାକିନ୍‌। ଓଡ଼ୋଃ ସନ୍‌ହେରିବ୍‌ ରେନ୍‌ ଏଟାଃ ହନ୍‌କଡ଼ା ଏସାର୍‌ହାଦ୍ଦୋନ୍‌ ଇନିୟାଃ ରାଜ୍‌ଗାଦିରେ ଦୁବ୍‌ୟାନାଏ ଓଡ଼ୋଃ ରାଇଜ୍‌ ଚାଲାଅ କେଦାଏ।