1 ହେ ଇସ୍ରାଏଲ୍ ନୁତୁମଃତାନ୍‌ ଯାକୁବ୍‌ଆଃ କିଲି

ଓଡ଼ୋଃ ଯିହୁଦାରାଃ ସେତେଙ୍ଗ୍‌ ଦାଆଃଏତେ ଅଡଙ୍ଗ୍‌କାନ୍‌ ଯାକୁବ୍‌ଆଃ କିଲି, ଆପେ ନେ କାଜି ଆୟୁମେପେ,

ଆପେ ପ୍ରାଭୁଆଃ ନୁତୁମ୍‌ତେ କିରିୟାତାନାପେ

ଓଡ଼ୋଃ ଇସ୍ରାଏଲ୍‌ରେନ୍ ପାର୍‌ମେଶ୍ୱାର୍‌ଆଃ ନୁତୁମ୍‌ତେ ସୁନୁସାର୍‌ତାନାପେ।

ମେନ୍‌ଦ ଏନା ସାର୍‌ତିତେ ଚାଏ ଧାର୍‌ମାନ୍‌ତେଦ କାପେ ରିକାତାନା।

2 ଆପେ ସବେନ୍‌କ ଆପାନ୍‌କେ ପାବିତାର୍ ନାଗାର୍‌ରେନ୍ ହଡ଼କ ମେନ୍ତେପେ କାଜିନ୍‌ତାନା

ଓଡ଼ୋଃ ଇସ୍ରାଏଲ୍‌ରେନ୍‌ ପାର୍‌ମେଶ୍ୱାର୍‌ଆଃ ଚେତାନ୍‌ରେ ଆସ୍ରା ତାନାପେ,

ଅକେୟାଃ ନୁତୁମ୍‌ଚି ସବେନାଃତେ ପେଡ଼େୟାନ୍‌ ପ୍ରାଭୁ ପାର୍‌ମେଶ୍ୱାର୍ ତାନାଃ।

3 ଆଇଙ୍ଗ୍‌ ସିଦା ଦିପିଲି ରେୟାଃ କାଜିକ ନାଙ୍କ ପାରିୟାରେ ଉଦୁବ୍‌ କାଦାଇଙ୍ଗ୍‌,

ହେଗି ଏନା ଆଇଁୟାଃ ମଚାଏତେ ଅଡଙ୍ଗ୍‌କାନା ଓଡ଼ୋଃ ଉଦୁବ୍‌ କାଦାଇଙ୍ଗ୍‌।

ଆଇଙ୍ଗ୍‌ ଏନା ରିକା କାଦାଇଙ୍ଗ୍‌ ଓଡ଼ୋଃ ଆଚ୍‌କାତେ ଏନ୍‌ ସବେନାଃ ହବାକାନା।

4 ଆଇଙ୍ଗ୍‌ ସାରିକାଦ୍‌ ତାଇକେନାଇଙ୍ଗ୍‌ ଯେ ଆପେ କାଜି କା ମାନାତିଙ୍ଗ୍‌ ହଡ଼କ ତାନ୍‌ପେ,

ଆପେୟାଃ ହଟଃ ମେଡ଼େଦ୍‌ ଲେକା କେଟେଦ୍ ଓଡ଼ୋଃ ମଲଙ୍ଗ୍‌ ତାପେୟାଃ ପିତ୍ତାଲ୍‌ ଲେକା ମେନାଃ।

5 ଏନାମେନ୍ତେ ନେ'ସବେନାଃ ଆପେକେ ନାଙ୍କ ପାରିୟାରେ ଉଦୁବାକାଦ୍‌ପେ ତାଇକେନାଇଙ୍ଗ୍‌।

ଏନା ହବାଅଃ ସିଦାରେ ଆପେକେ କାଜିକାଦ୍‌ପେ ତାଇକେନାଇଙ୍ଗ୍‌,

କା'ରେଦ ଆପେ କାଜିକାତେ ତେୟାଃପେ, ଆଲେୟାଃ ମାହାପୁରୁ ନେଆଁ ରିକାକାଦାଏ, ଆଲେୟାଃ ଖୋଦାକାନ୍‌

ଓଡ଼ୋଃ ଛାଞ୍ଚ୍‌ରେ ବାଇକାନ୍‌ ମୁରୁତ୍‌ ନେଆଁ ରିକା ନାଙ୍ଗ୍‌ ଆଚୁକାଦାଏ।

6 ଆପେ ନେ'ସବେନାଃ ଆୟୁମାକାଦାପେ,

ନାହାଁଃଦ ଏନ୍‌ ସବେନାଃ ହବାକାନ୍‌ତେୟାଃ ନେଲାକାଦାପେ,

ଏନ୍‌ରେହ ଚିୟାଃ ଆପେ ଏନାକେ କାପେ ଉଦୁବେୟା ? ନାହାଁଃଏତେ ଆଇଙ୍ଗ୍‌ ଆପେକେ,

ଆପେ କା ସାରିକାଦ୍‌ ନାୱା କାଜିକ ଓଡ଼ୋଃ ଉକୁଆକାନ୍‌ କାଜିକ ଉଦୁବାପେୟାଇଙ୍ଗ୍‌।

7 ଏନ୍ ସବେନାଃ ସିଦାରେ କା ତାଇନ୍, ମେନ୍‌ଦ ନାହାଁଃ ଏନ୍ ସବେନାଃ ଉନୁଦୁବଃ ତାନା।

ତିସିଙ୍ଗ୍‌ ଏତେ ସିଦାରେ ଆପେ ଏନା କାପେ ଆୟୁମ୍‌,

କା'ରେଦ ଆପେ କାଜିତେୟାଃପେ, "ଆଲେ ଏନ୍‌ ସବେନାଃ ସିଦାରେ ସାରିକାଦ୍‌ ତାଇକେନାଲେ।"

8 ସାର୍‌ତିଗି, ଆପେ କାପେ ଆୟୁମ୍‌ ଚି କାପେ ସାରି,

ଚାଏ ସିଦାରେ ଆପେୟାଃ ଲୁତୁର୍‌ରେ କା ଆୟୁମାକାନ୍‌ ତାଇକେନା।

ଚିଆଃଚି ଆପେ କା ପାତିୟାର୍‌ରଃ ଲେକାନ୍‌ ହଡ଼କ ତାନ୍‌ପେ ଏନା ଆଇଙ୍ଗ୍‌ ବୁଗିଲେକା ସାରିକାଦାଇଙ୍ଗ୍‌।

ଆପେ ଜାନାମ୍‌ ଏତେଗି ଗୁହ୍ନାଁ ରିକାକାଦ୍‌ ହଡ଼କ ତାନ୍‌ପେ ଏନା ସାରିୟାକାନା।

9 ଆଇଙ୍ଗ୍‌ ଚିଲ୍‌କା ଆପେକେ କାଇଙ୍ଗ୍ ଜିୟନ୍‌ ପେୟା,

ଏନାମେନ୍ତେ ଆଇଙ୍ଗ୍‌ ଆଇଁୟାଃ ନୁତୁମ୍‌ ନାଗେନ୍ତେ ଆପ୍‌ନାଃ ଖିସ୍‌କେ ବିଲାମେ ତାନାଇଙ୍ଗ୍‌

ଓଡ଼ୋଃ ଆଇଁୟାଃ ମାଇନାନ୍ ହବାଅଃ ନାଗେନ୍ତେ ଆପାନ୍‌କେ ରୋକାଅ ତାନାଇଙ୍ଗ୍‌।

10 ନେଲେପେ, ଆଇଙ୍ଗ୍‌ ଆପେକେ ଫାର୍‌ଚି କାଦ୍‌ପେୟା,

ଏନା ରୁପାକେ ଫାର୍‌ଚି ରିକାଏ ଲେକା କାହାଗି।

ମେନ୍‌ଦ ଆଇଙ୍ଗ୍‌ ଆପେକେ ଦୁକୁରେୟାଃ ସେଙ୍ଗେଲ୍ ହୁଆଙ୍ଗ୍‌ଏତେ ସାଲାକାଦ୍‌ପେୟାଇଙ୍ଗ୍‌।

11 ଚିୟାଃଚି ନେଆଁଦ ଆଇଁୟାଃ ନାଙ୍ଗ୍‌,

ଆଇଁୟାଃ ନାଗେନ୍ତେ ଏସ୍‌କାର୍‌ ରିକା କାଦାଇଙ୍ଗ୍‌।

ଚିୟାଃଚି ଆଇଁୟାଃ ନୁତୁମ୍‌ ଚିନାଃମେନ୍ତେ ସତ୍‌ରା ହବାଅଃଆ ?

ଆଇଁୟାଃ ମାନାରାଙ୍ଗ୍‌ ଏଟାଃନିଃକେ କାଇଙ୍ଗ୍ ଏମାଇୟା।

12 ପ୍ରାଭୁ କାଜିତାନାଏ,

"ହେ ଯାକୁବ୍‌ଆଃ କିଲି, ଆଇଁୟାଃ କେଡ଼ାକାନ୍‌ ଇସ୍ରାଏଲ୍‌ କିଲି, ଆଇଁୟାଃ କାଜି ଆୟୁମେମେ।

ଆଇଙ୍ଗ୍‌ ଇନିଃଗି ତାନିଙ୍ଗ୍‌, ଆଇଙ୍ଗ୍‌ଗି ମୁନୁ ଓଡ଼ୋଃ ଟୁଣ୍ଡୁ।

13 ଆଇଙ୍ଗ୍‌ ଆଇଁୟାଃ ତିଃଇତେ ଅତେରେୟାଃ ନିହିଁଗାଡା ବାଇୟା କାଦାଇଙ୍ଗ୍‌

ଓଡ଼ୋଃ ଆଇଁୟାଃ ଜମ୍ ତିଃଇ ସିର୍ମାରେୟାଃ ସବେନାଃକେ ପାସ୍‌ରାଅ କାଦା।

ଆଇଙ୍ଗ୍‌ ଅତେ ଓଡ଼ୋଃ ସିର୍ମାକେ କେଡ଼ାଲେରେ,

ଏନା ହିଜୁଃଆ ଓଡ଼ୋଃ ମିଦ୍‌ତାଃରେ ହୁଣ୍ଡିୟଃତାନା।

14 "ଆପେ ସବେନ୍‌କ ମିଦ୍‌ତାଃରେ ହୁଣ୍ଡିକେଦ୍‌ତେ ହିଜୁଃପେ ଓଡ଼ୋଃ ଆୟୁମେପେ,

ଏନ୍ ସବେନ୍‌ ମାହାପୁରୁକ ଏତେ ଅକଏ ନେ ସବେନ୍‌ ବିଷାଏକେ ଉଦୁବାକାଦା ?

ପ୍ରାଭୁ ଦୁଲାଡ଼୍‌କାଇନିଃ, କଲ୍‌ଦିୟ ବିରୁଧ୍‌ରେ ଆଇଁୟାଃ ମନ୍‌ରାଃ ଇଛା ସାନାଙ୍ଗ୍‌ ପୁରା ରିକାୟାଏ

ଓଡ଼ୋଃ ଆୟାଃ ସୁପୁ ବାବିଲୋନ୍‌ ବିରୁଧ୍‌ରେ ବିରିଦାଃ।

15 ଆଇଙ୍ଗ୍‌, ଆଇଙ୍ଗ୍‌ଗି ନେଆଁ କାଜି କାଦାଇଙ୍ଗ୍‌। ହେଗି, ଆଇଙ୍ଗ୍‌ ଇନିଃକେ କେଡ଼ାକାଜାଇଙ୍ଗ୍‌।

ଆଇଙ୍ଗ୍‌ ଇନିଃକେ ଆଉୱା କାଜାଇଙ୍ଗ୍‌ ଓଡ଼ୋଃ ଇନିଃ ଏନ୍ କାମିକେ ପୁରାଏୟା।

16 "ଆଇଁୟାଃତାଃ ହିଜୁଃପେ ଓଡ଼ୋଃ ଆଇଁୟାଃ କାଜି ଆୟୁମେପେ।

ଆଇଙ୍ଗ୍‌ ସିଦାଏତେ ଜେତାନ୍ କାଜି ଉକୁକେଦ୍‌ତେ କାଇଙ୍ଗ୍ କାଜି

ଓଡ଼ୋଃ ଏନା ହବାଅଃତାନ୍ ଇମ୍‌ତାଏତେଗି ଆଇଙ୍ଗ୍‌ ଏନ୍ତାଃରେ ମେନାଇଙ୍ଗ୍‌ୟାଁ।"

ନାହାଁଃଦ ପ୍ରାଭୁ ପାର୍‌ମେଶ୍ୱାର୍ ଆଇଙ୍ଗ୍‌କେ ଓଡ଼ୋଃ ଆୟାଃ ଆତ୍ମାକେ କୁଲାକାଇଜା।

17 ପ୍ରାଭୁ ଆପେୟାଃ ବାଞ୍ଚାଅନିଃ, ଇସ୍ରାଏଲ୍‌ରାଃ

ପାବିତାର୍‌ ପାର୍‌ମେଶ୍ୱାର୍‌, ନେ କାଜି କାଜିତାନା,

"ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌, ଆପେୟାଃ ପାର୍‌ମେଶ୍ୱାର୍,

ଆପେ ନାଗେନ୍ତେ ଅକଆଃ ବୁଗିନାଃ ତାନାଃ, ଏନା ଆଇଙ୍ଗ୍‌ ଆପେକେ ଇତୁପେ ତାନାଇଙ୍ଗ୍‌

ଓଡ଼ୋଃ ଆପେୟାଃ ସେସେନ୍ ହରାରେ ଆୟାର୍‌ତେ ଇଦିପେ ତାନାଇଙ୍ଗ୍‌।

18 "ମେନ୍‌ଦ, ଆପେ ଆଇଁୟାଃ ଆନାଚୁକେ ମାନାତିଙ୍ଗ୍‌କାଦ୍‌ ରେଦ,

ଆପେୟାଃ ଜୀଉସୁକୁ ଗାଡ଼ାରେୟାଃ ଦାଆଃ ଲେକା ଲିଙ୍ଗିୟଃତେୟାଃ

ଓଡ଼ୋଃ ଆପେୟାଃ ଧାର୍‌ମାନ୍‌ ଦରେୟାରାଃ ଆଲ୍‌ପୁଙ୍ଗ୍‌ ଲେକା ହବାଅଃତେୟାଃ।

19 ଆପେୟାଃ କିଲିକ ଗିତିଲ୍ ଲେକା ଓଡ଼ୋଃ ଆପ୍‌ନାଃ ହନ୍‌ଗାଁଣାକ ଅଟାଙ୍ଗ୍‌ଅଃତାନ୍‌ ଧୁଡ଼ି ଲେକା ପସାଇଦିୟଃ ତେୟାଃକ।

ଆଇଁୟାଃ ସାମ୍‌ନାଙ୍ଗ୍‌ଏତେ ଇନ୍‌କୁଆଃ ନୁତୁମ୍‌ ଚିଉଲାହ କା ସାଙ୍ଗିନଃ ତେୟାଃ ଚାଏ କା ଜିୟନଃ ତେୟାଃ।"

20 ଆପେ ବାବିଲୋନ୍‌ ବାଗିକେଦ୍‌ତେ ନିର୍‌ପେ, କଲ୍‌ଦିୟରେନ୍‌ ହଡ଼କତାଃ ଏତେ ସାଙ୍ଗିନଃପେ।

ପୁରାଃ କାଉରିତାନ୍‌ଲଃ ଦୁରାଙ୍ଗ୍‌କେଦ୍‌ତେ ନେଆଁ ଉଦୁବେପେ,

ଅତେଦିଶୁମ୍ ରେୟାଃ ଟୁଣ୍ଡୁ ଜାକେଦ୍ କାଉରିତାନ୍‌ଲଃ ନେ କାଜି କାଜିପେ, "ପ୍ରାଭୁ ଆୟାଃ ଦାସି ଯାକୁବ୍‌କେ ରାଡ଼ା କାଇଜା।"

21 ଇନିଃ ଚିମ୍‌ତା ଗିତିଲ୍ ପିଡ଼ି ଥାଲା ଥାଲାତେ ସେସେନ୍ ଇଦିକେଦ୍‌କଆ,

ଇମ୍‌ତା ଇନ୍‌କୁ କାକ ତେତାଙ୍ଗ୍‌ୟାନା,

ଇନିଃ ଇନ୍‌କୁଆଃ ନାଗେନ୍ତେ ସେରେଙ୍ଗ୍‌ ଏତେ ଦାଆଃ ଲିଙ୍ଗି କେଦାଏ,

ଇନିଃ ସେରେଙ୍ଗ୍‌କେ ରାପୁଦ୍‌କେଦା ଓଡ଼ୋଃ ଏନାଏତେ ଦାଆଃ ଅଡଙ୍ଗ୍‌କେଦା।

22 ପ୍ରାଭୁ କାଜିତାନାଏ, "ଏତ୍‌କାନ୍‌ ହଡ଼କଆଃ ଜେତାନ୍‌ ଜୀଉସୁକୁ ବାନଆଃ।"