1 ପ୍ରାଭୁ କାଜିତାନାଏ,

"ଇନିଃ ଆଇଁୟାଃ ଦାସି ତାନିଃ, ଇନିଃକେ ପେଡ଼େଃ ଏମାକାଜାଇଙ୍ଗ୍‌।

ଅକଏକେ ସାଲାକାଜାଇଙ୍ଗ୍‌ ଇନିଃତାଃରେ ଆଇଁୟାଃ ମନ୍‌ ରାସ୍‌କା କାନା,

ଇନିଃତାଃରେ ଆଇଁୟାଃ ଆତ୍ମା ଦୁଲାକାଦା,

ଇନିଃ ସବେନ୍‌ ଦିଶୁମ୍‌ରେନ୍‌ କିଲିକଆଃ ନ୍ୟାୟ ବିଚାର୍ ରିକାୟା।

2 ଇନିଃ କାଏ କାଉରିୟା ଚାଏ ମାରାଙ୍ଗ୍‌ ମଚା କାଏ ରିକାୟା,

ଚାଏ ମାରାଙ୍ଗ୍ ଚାକାର୍‌ ହରାରେ ଇନିଃ ଆୟାଃ କାଜିକେ କାଏ ଉଦୁବେୟା।

3 ଇନିଃ ସାଉଁଣି ତାସାଦ୍‌ କାଏ ଟହେଜେୟା,

ଧାପ୍‌ ଧାପାଅଃତାନ୍‌ ଦିମିକେ କାଏ ଇଣିଁଁଜେୟା,

ଇନିଃ ସାର୍‌ତିରେ ନ୍ୟାୟ ବିଚାର୍ ରିକାୟା।

4 ଇନିଃ ଅତେରେ ନ୍ୟାୟ ବିଚାର୍ କାଏ ବାଇ ଜାକେଦ୍ ଚିଉଲାହ କାଏ ଲାଗାଅଃଆ

ଚାଏ ପେଡ଼େଃ ବାନଃ ଲେକା କାଏ ହବାନାଃ।

ଓଡ଼ୋଃ ଟାପୁରେନ୍‌ ହଡ଼କ ଇନିୟାଃ ଆନ୍‌ଚୁକେ ତାଙ୍ଗିକେଦ୍‌ତେ ତାଇନାଃକ।"

5 ପାର୍‌ମେଶ୍ୱାର୍ ସିର୍ମାରେୟାଃ ସବେନାଃକେ ବାଇକେଦ୍‌ତେ ପାସ୍‌ରାଅ କେଦା,

ଇନିଃ ଅତେକେ ଓଡ଼ୋଃ ଏନାରେ ଅମନ୍‌ ତେୟାଃ ସବେନାଃକେ ଆଟେଦ୍‌କେଦା,

ଏନାରେ ତାଇନ୍ ହଡ଼କକେ ସାହେଁଦ୍‌ ଓଡ଼ୋଃ

ଏନାରେ ସେସେନ୍‌ତାନ୍ ସବେନ୍‌କକେ ଜୀଉ ଏମାଦ୍‌କଆ,

ଓଡ଼ୋଃ ନାହାଁଃଦ ଏନ୍ ପ୍ରାଭୁ ପାର୍‌ମେଶ୍ୱାର୍ ନେ କାଜି କାଜିତାନା,

6 "ଆଇଙ୍ଗ୍‌ ପ୍ରାଭୁ ତାନିଙ୍ଗ୍, ଧାର୍‌ମାନ୍‌ତେ ଆମ୍‌କେ କେଡ଼ାକାଦ୍‌ ମେୟାଇଙ୍ଗ୍‌,

ଆମାଃ ତିଃଇ ସାବ୍‌କେଦ୍‌ତେ ବାଞ୍ଚାଅ ମେୟାଇଙ୍ଗ୍‌,

ଆମାଃ ହରାତେ ସବେନ୍‌ ହଡ଼କ ନାଗେନ୍ତେ ରାଜିନାମା ବାଇୟାଇଙ୍ଗ୍‌

ଓଡ଼ୋଃ ଆମ୍‌କେ କିଲିକ ନାଗେନ୍ତେ ମାସ୍କାଲ୍ ବାଇମେୟାଇଙ୍ଗ୍‌।

7 ଜେ’ଲେକାଚି ଅକନ୍‌କ ନୁବାଃରାଃ ଜେହେଲ୍‌ରେ ମେନାକଆ ଇନ୍‌କୁକେ ରାଡ଼ା ଆଉ ନାଗେନ୍ତେ

ଓଡ଼ୋଃ କା ନେଲ୍ ଦାଡ଼ିତାନ୍ ହଡ଼କ ନେଲ୍ ଦାଡ଼ିୟା ମେନ୍ତେ ଆମ୍‌କେ ସାଲାକାଦ୍ ମେୟାଇଙ୍ଗ୍‌।

8 "ଆଇଙ୍ଗ୍‌ ଏସ୍‌କାର୍ ପ୍ରାଭୁ ତାନିଙ୍ଗ୍,

ଏନାଗି ଆଇଁୟାଃ ନୁତୁମ୍, ଓଡ଼ୋଃ ଆଇଁୟାଃ ମାନାରାଙ୍ଗ୍‌ ଏଟାଃ ମାହାପୁରୁକକେ କାଇଙ୍ଗ୍ ଏମାକତାନା,

ଚାଏ ତିଃଇତେ ବାଇୟାକାନ୍ ମୁରୁତ୍‌କକେ ଆଇଁୟାଃ ମାଇନାନ୍‌ କାଇଙ୍ଗ୍ ଏମାଃ।

9 ନେଲେପେ, ସିଦା ବିଷାଏକ ପୁରାୟାନା,

ନାହାଁଃଦ ନାୱା କାଜିକ ଉଦୁବଃଆ,

ଏନାକ ହବାଅଃ ସିଦାରେ, ଆପେକେ ଉଦୁବାପେ ତାନାଇଙ୍ଗ୍‌।"

10 ହେ ଦରେୟାରେ ସେନ୍‌ତାନ୍‌ ହଡ଼କ

ଓଡ଼ୋଃ ଦରେୟାରାଃ ଥାଲାରେ ତାଇନ୍‌ତାନ୍‌କ

ଆପେ ସବେନ୍‌କ ପ୍ରାଭୁଆଃ ନାଗେନ୍ତେ ନାୱା ଦୁରାଙ୍ଗ୍ ଦୁରାଙ୍ଗ୍‌ୟେଁପେ

ଓଡ଼ୋଃ ଅତେଦିଶୁମ୍‌ରେୟାଃ ଟୁଣ୍ଡୁ ଜାକେଦ୍ ମାଇନାନ୍ ଦୁରାଙ୍ଗ୍ ଦୁରାଙ୍ଗେପେ।

11 ବିର୍‌ ଓଡ଼ୋଃ ଏନ୍ତାଃରେ ତାଇନ୍‌ତାନ୍ ସବେନ୍ ନାଗାର୍‌କ

ଓଡ଼ୋଃ କେଦାର୍‌ରେ ତାଇନ୍‌ତାନ୍ ସବେନ୍ ହାତୁକ କାଉରି କେଦ୍‌ତେ କାଜିପେ,

ସେଲା ସାହାର୍‌ରେ ତାଇନ୍‌ତାନ୍‌କ କାଉରି କେଦ୍‌ତେ ଦୁରାଙ୍ଗ୍‌ୟେଁପେ।

ବୁରୁ ଚୁଟି ଏତେ ରାସ୍‌କାତେ ପୁରାଃଗି କାଉରିପେ।

12 ପ୍ରାଭୁଆଃ ମାନାରାଙ୍ଗ୍‌ ରିକାଏକାକ

ଓଡ଼ୋଃ ଟାପୁକରେ ତାଇନ୍‌ତାନ୍‌ ସବେନ୍‌କ ପ୍ରାଭୁଆଃ ମାଇନାନ୍‌ ରିକାଏକାକ।

13 ପ୍ରାଭୁ ପେଡ଼େୟାନ୍‌ ସିପାଇ ଲେକା ଆୟାର୍‌ତେ ହିଜୁଃଆ,

ଇନିଃ ଲାଡ଼ାଇନିଃ ଲେକା ଆପାନ୍‌କେ ଚିହୁଲ୍‌ ରିକାନ୍‌ ତାନ୍‌ଲଃ ଉସ୍‌କୁର୍‌ ରିକାଏୟା,

ଇନିଃ ପୁରାଃଗି କାଉରି ତାନ୍‌ଲଃ ସବେନ୍‌କକେ ଲାଡ଼ାଇ ନାଗେନ୍ତେ ହାକାଅ କଆ,

ଓଡ଼ୋଃ ବାଇରିକତାଃ ଏତେ ଜିତାଅଃଆ।

14 ପାର୍‌ମେଶ୍ୱାର୍‌ କାଜିତାନାଏ,

ଆଇଙ୍ଗ୍‌ ପୁରାଃ ଦିପିଲି ଜାକେଦ୍ ହାପାକେଦ୍‌ତେ ମେନାଇୟାଁ,

ଆଇଙ୍ଗ୍‌ ଆସ୍‌ତିର୍‌ କେଦ୍‌ତେ ଆପାନ୍‌କେ ହକା କାନାଇଙ୍ଗ୍‌,

ମେନ୍‌ଦ ନାହାଁଃ ଆଇଙ୍ଗ୍‌ ହନ୍‌ ଜାନାମ୍‌ ରିକାତାନ୍ କୁଡ଼ିରାଃ ଦୁକୁତେ କାଉରିତାନ୍‌ ଲେକା ମାରାଙ୍ଗ୍ ସାହେଁଦ୍‌ ଇଦିତାନାଇଙ୍ଗ୍‌।

15 ବୁରୁ ଓଡ଼ୋଃ ମାରାଙ୍ଗ୍ ବୁରୁକକେ ଜିୟନ୍‌ ରିକାୟା,

ଏନାରେୟାଃ ଦାରୁକ ଓଡ଼ୋଃ ତାସାଦ୍ ସବେନାଃକେ ରହଡ଼୍‌ ରିକାୟା।

ସବେନ୍ ନାହିଁକକେ ଆଞ୍ଜେଦ୍‌ କେଦ୍‌ତେ ଟାପୁ ବାଇୟାଇଙ୍ଗ୍‌

ଓଡ଼ୋଃ ଦାଆଃତେ ପେରେୟାକାନ୍‌ ଠାୟାଦ୍‌କେ ଆଞ୍ଜେଦ୍‌ ରିକାୟାଇଙ୍ଗ୍‌।

16 ଆଇଙ୍ଗ୍‌ କା ନେଲ୍ ଦାଡ଼ିତାନ୍‌କକେ କା ସାରିକାଦ୍‌ ହରାଏତେ ଆଉକୱାଇଙ୍ଗ୍‌,

ଅକନ୍‌ ହରାରେ ଇନ୍‌କୁ ଚିଉଲାହ କାକ ସେସେନ୍‌କାନା।

ଇନ୍‌କୁଆଃ ନୁବାଃ ତେୟାଃକେ ମାସ୍କାଲ୍‌ରେ ଆଉ ରୁହାଡ଼େୟାଇଙ୍ଗ୍‌

ଓଡ଼ୋଃ ଏଙ୍କବେଙ୍କ ହରାକେ ସିଧା ବାଇୟାଇଙ୍ଗ୍‌,

ନେ’ଲେକା କାମିକ ରିକାକେଦ୍‌ତେ ଚିଉଲାହ ଇନ୍‌କୁକେ କାଇଙ୍ଗ୍ ବାଗିକଆ।

17 ଅକନ୍‌ ହଡ଼କ ଦିରିରେନ୍ ଖୋଦାକାନ୍‌ ମୁରୁତ୍‌ରେ ଆସ୍ରାତାନାକ

ଓଡ଼ୋଃ ଛାଞ୍ଚ୍‌ରେ ବାଇୟାକାନ୍ ମୁରୁତ୍‌କକେ ପାର୍‌ମେଶ୍ୱାର୍‌ ମେନ୍ତେ କାଜିତାନାକ,

"ଆମ୍ ଆଲେୟାଃ ମାହାପୁରୁ ତାନ୍‌ମେ," ଇନ୍‌କୁ ଦୟା ରୁହାଡ଼୍‌କେଦ୍‌ତେ ପୁରାଃଗି ଗିହୁଗଃଆ।

18 ପ୍ରାଭୁ କାଜିତାନାଏ,

ହେ କା ଆୟୁମ୍‌ ଦାଡ଼ିତାନ୍ ହଡ଼କ, ଆୟୁମେପେ,

ହେ କା ନେଲ୍ ଦାଡ଼ିତାନ୍ ହଡ଼କ, ଆରିଦେପେ, ଚିଲ୍‌କା ବୁଗି ଲେକାତେ ନେଲ୍ ଦାଡ଼ିୟାପେ।

19 ଚିଆଃ କା ନେଲ୍ ଦାଡ଼ିନିଃ ଆଇଁୟାଃ ଦାସି ନାହାଁଲିଃ ?

ଚାଏ କା ଆୟୁମ୍‌ ଦାଡ଼ିନିଃ ଆଇଁୟାଃ କୁଲାକାନ୍ କାଜି ଇଦିସେଟେର୍‌ନିଃ ନାହାଁଲିଃ ?

ଆଇଁୟାଃଲଃ ମିସାତେ ତାଇନ୍‌ ହଡ଼ ଲେକାନିଃ ଅକଏ

ଓଡ଼ୋଃ ପ୍ରାଭୁଆଃ ଦାସି ଲେକା କା ନେଲ୍‌ ଦାଡ଼ିନିଃ ଅକଏ ତାନିଃ ?

20 ହେ ଇସ୍ରାଏଲ୍ ଆପେ ପୁରାଃ ବିଷାଏକ ନେଲ୍ ଦାଡ଼ିତାନାପେ,

ମେନ୍‌ଦ କାପେ ଆଟ୍‌କାର୍‌ଉରୁମେ ତାନା।

ଇନିୟାଃ ଲୁତୁର୍ ନିଜାକାନା

ମେନ୍‌ଦ ଇନିଃ କାଏ ଆୟୁମ୍‌ ଦାଡ଼ିତାନା।

21 ପ୍ରାଭୁ ଆପ୍‌ନାଃ ଧାର୍‌ମାନ୍‌ ନାଗେନ୍ତେ ଆନ୍‌ଚୁକେ ମାରାଙ୍ଗ୍‌

ଓଡ଼ୋଃ ମାନାରାଙ୍ଗ୍‌ ରିକାନାଙ୍ଗ୍‌ ରାସ୍‌କାୟାନା।

22 ମେନ୍‌ଦ ନେ ହଡ଼କ ରେଃକ୍‌ ୟାନାକ,

ଏନ୍ତେ ସବେନ୍‌କ ଗାଡା ଲାତାର୍‌ରେ ଉୟୁଃକେଦ୍‌ତେ ଫାସାଅକାନାକ

ଓଡ଼ୋଃ ଜେହେଲ୍‌ରେ ହାଣ୍ଡେଦାକାନାକ।

ଇନ୍‌କୁଆଃ ସାନାବ୍‌ ହବାକାନା, ଓଡ଼ୋଃ ଜେତାଏ ଇନ୍‌କୁକେ ବାଞ୍ଚାଅ ନାଗେନ୍ତେ ବାନ୍‌କଆ।

ଇନ୍‌କୁ ତଲାକାନା ଓଡ଼ୋଃ ଜେତାଏ ହଁ ଇନ୍‌କୁକେ ରାଡ଼ା ଆଉକପେ ମେନ୍ତେ କାଜିନିଃ ବାଙ୍କଆ।

23 ଅକଏ ନେ କାଜିରେ ଲୁତୁର୍ ଏମେୟା

ଓଡ଼ୋଃ ଆୟୁମ୍‌ କେଦ୍‌ତେ ହିଜୁଃ ଦିପିଲି ନାଗେନ୍ତେ ଆଟ୍‌କାର୍‌ଉରୁମ୍‌ ରିକାୟା, ଆପେ ଥାଲାରେ ନେ’ଲେକା ଅକନ୍‌ ହଡ଼ ମେନାଇୟା ?

24 ଅକଏ ଯାକୁବ୍‌କେ ରେଃକ୍‌କିଃ ଲେକା ଓଡ଼ୋଃ ଇସ୍ରାଏଲ୍‌କେ ରେରେଃକ୍‌କଆଃ ତିଃଇରେ ଅକଏ ଜିମାକିୟା ?

ଚିୟାଃ ପ୍ରାଭୁ ନେ କାମି କାଏ ରିକାକାଦା, ଅକେୟାଃ ବିରୁଧ୍‌ରେ ଚି ଆବୁ ପାପ୍‌କାମିକ ରିକାକାଦାବୁ।

ଓଡ଼ୋଃ ଇନିୟାଃ ହରାରେ ସେସେନ୍ ନାଗେନ୍ତେ ହଡ଼କ କାକ ସାନାଙ୍ଗ୍‌ କେଦା

ଓଡ଼ୋଃ ଇନ୍‌କୁ ଏନ୍ ଆନ୍‌ଚୁ ରେୟାଃ କାଜିକେ କାକ ମାନାତିଙ୍ଗ୍‌କେଦା,

ଏନ୍ ପ୍ରାଭୁ ଚି ନେ କାମି କାଏ ରିକାକାଦା ?

25 ଏନାମେନ୍ତେ ଇନିଃ ଇନିୟାଃ ଚେତାନ୍‌ରେ ଆୟାଃ ପୁରାଃ ଖିସ୍‌ରାଃ ସେଙ୍ଗେଲ୍‌

ଓଡ଼ୋଃ ଲାଡ଼ାଇରାଃ ପେଡ଼େଃ ଉଦୁବ୍‌କେଦାଏ। ଏନ୍ତେଦ ଚାରିଓସାଃ ସେଙ୍ଗେଲ୍ ଜୁଲ୍‌ୟାନା,

ମେନ୍‌ଦ ଇନିଃ ସାରି କାଏ ଦାଡ଼ିକେଦା ଓଡ଼ୋଃ ସେଙ୍ଗେଲ୍ ଇନିଃକେ ଅଣ୍ଡର୍‌କିୟା,

ଏନ୍‌ରେହ ଇନିଃ ଏନାତେ କା ଚେତାଅ ୟାନା।