ଦମାସ୍କସ୍ ନାଗେନ୍ତେ ଆୟାର୍କାଜି
1 ଦମାସ୍କସ୍ ବିଷାଏରେୟାଃ ଆୟାର୍କାଜି, "ନେଲେପେ, ଦମାସ୍କସ୍ ନାଗାର୍ ଓଡ଼ୋଃ ନାଗାର୍ ଲେକା କା ତାଇନାଃ, ଏନା ହାଦୁଡ଼୍ କେଦ୍ତେ ଭିତ୍ରାଃ ଢିପା ଲେକା ହବାଅଃଆ। 2 ଅରୋୟର୍ ନାଗାର୍କ ବିର୍ ଲେକା ହବାକେଦ୍ତେ ଏନା ଗୋଟ୍ରେନ୍ ଜାଁତୁକଆଃ ତାଇନଃ ଠାୟାଦ୍ ହବାଅଃଆ। ଗୋଟ୍ରେନ୍ ଜାଁତୁକ ଏନ୍ତାଃରେ ଆସ୍ରା ଇଦିୟାକ ଓଡ଼ୋଃ ଜେତାଏ ଇନ୍କୁକେ କାକ ବତଙ୍ଗ୍କଆ। 3 ଇଫ୍ରାଇମ୍ ଏତେ ଗୁମାଟ୍କ ଓଡ଼ୋଃ ଦମାସ୍କସ୍ ଏତେ ରାଇଜ୍ ରେୟାଃ ଆକ୍ତେୟାର୍ ହାସୁର୍ ରିକାଅଆଃ। ଅରାମ୍ ଦିଶୁମ୍ରେନ୍ ସାରେୟାକାନ୍ ହଡ଼କ, ଇସ୍ରାଏଲ୍ ରେନ୍ ମାଇନାନ୍ ହଡ଼କ ଲେକା ହବାଅଃଆ। ନେ କାଜି, ସବେନାଃତେ ପେଡ଼େୟାନ୍ ପ୍ରାଭୁ କାଜିତାନା।"
4 ଏନ୍ ହୁଲାଙ୍ଗ୍ ଯାକୁବ୍ଆଃ ମାଇନାନ୍ ହାସୁର୍ ରିକାଅଃଆ ଓଡ଼ୋଃ ଇନିୟାଃ ହଡ଼୍ମରେୟାଃ ପେଡ଼େଃ ନାରାଦୁରା ହବାଅଃଆ। 5 ଇରଃନିଃ ବିଲିକାନ୍ ଗେଲେ ଇର୍କେଦ୍ତେ ଆୟାଃ ତିଃଇଲଃ ହୁଣ୍ଡିତାନ୍ ଲେକାଗି ହବାଅଃଆ, ଚାଏ ରଫାୟିମ୍ରାଃ ଅତେରେ ଗେଲେ ହୁଣ୍ଡିତାନ୍ ଇମ୍ତା ଜେ’ଲେକା ହବାଅଃଆ ଏନ୍ଲେକାଗି ହବାଅଃଆ। 6 ଏନ୍ରେହ ଅଲିଭ୍ ଦାରୁରେୟାଃ ଜ ହୁଣ୍ଡିତାନ୍ ତାୟମ୍ତେ, ଏନାରାଃ ସାଲାଙ୍ଗି କତକରେ ବାରିୟା ଆପିୟା ଜ’କ ଓଡ଼ୋଃ ଜ’ତାନ୍ ଦାରୁରାଃ ବାହାରି କତକରେ ଉପୁନିୟା ମଣେଁୟା ଜ’କ ବାଗିକେନଃଆ, ଏନ୍ଲେକାଗି କାଟିଃଲେକା ଚିମିନ୍ ସାରେୟାକାନ୍କ ତାଇନାଃ। ନେଆଁ ପ୍ରାଭୁ, ଇସ୍ରାଏଲ୍ରେନ୍ ପାର୍ମେଶ୍ୱାର୍ କାଜିତାନାଏ।
7 ଏନ୍ ହୁଲାଙ୍ଗ୍ ହଡ଼କ ଆପ୍ନାଃ ବାବାଇନିଃ ସାଃତେ ନେଲେୟାକ, ଓଡ଼ୋଃ ଇନ୍କୁଆଃ ମେଦ୍ ଇସ୍ରାଏଲ୍ରେନ୍ ପାବିତାର୍ ପାର୍ମେଶ୍ୱାର୍ ସାଃତେ ରୁହାଡ଼ାଃକ। 8 ଇନ୍କୁ ଆକଆଃ ତିଃଇତେ ବାଇୟାକାଦ୍ ବେଦିକେ କାକ ନେଲେୟା, ଚାଏ ଆକଆଃ ସାର୍ସାର୍ତେ ବାଇୟାକାନ୍ ଆଶେରା ମୁରୁତ୍କେ, ଓଡ଼ୋଃ ଧୁଆନ୍ ବେଦିକେ ମାଇନ୍ କାକ ରିକାୟା।
9 ଏନ୍ ହୁଲାଙ୍ଗ୍ ଇସ୍ରାଏଲ୍ ହନ୍କଆଃ ବରତେ, ଇନ୍କୁଆଃ କେଟେୟାନ୍ ନାଗାର୍କ ଚୁପାଦ୍ ଲେକା, ବୁରୁ ଚୁଟିରେ ତାଇନ୍ ବାଗିୟାକାନ୍ ଠାୟାଦ୍ ଲେକା ହବାଅଃଆ।
10 ଚିଆଃଚି ଆପେ ଆପେୟାଃ ପାରିତ୍ରାଣ୍ ଏମଃନିଃ, ପାର୍ମେଶ୍ୱାର୍କେ ରିଡ଼ିଙ୍ଗ୍କାଇଜାପେ, ଅକଏଚି ଆପେୟାଃ କେଟେୟାନ୍ ସେରେଙ୍ଗ୍ ଲେକା ଆସ୍ରା ଏମଃନିଃ ତାନିଃ, ଇନିଃକେ ଆପେ କାପେ ପାହାମ୍କିୟା। ଏନାମେନ୍ତେ ହବାସାକାଅଃଆ ଆପେ ବୁଗିନ୍ ଜ ଏମ୍ତାନ୍ ଓଡ଼ୋଃ ଏଟାଃ ବାହାରି କାଲ୍ମିକାଦ୍ ଚାରା ରଏ ରେୟ, 11 ଚାଏ ଏନାକେ ରଏ ହୁଲାଙ୍ଗ୍ଗି ହାରା ରିକାଏ ରେୟ, ଓଡ଼ୋଃ ରଏ ହୁଲାଙ୍ଗ୍ରାଃ ସେତାଃରେଗି ଏନା ବାହା ହବାଅଃ ରେୟ, କା ସାହାତିଙ୍ଗ୍ ଦୁକୁ ଓଡ଼ୋଃ ହାସୁ ଇମ୍ତା ଏନାରାଃ ଜ ଗସକେଦ୍ତେ ଉୟୁଃକଆଃ।
12 ପୁରାଃ କିଲିରେନ୍ ହଡ଼କଆଃ କାଉରି ଆୟୁମଃତାନା। ଦରେୟାରାଃ ସାଡ଼ିକ ଲେକା ଇନ୍କୁ କାଉରିତାନାକ। ପୁରାଃ କିଲିରେନ୍ ହଡ଼କଆଃ ପୁରାଃ କାଉରି ଆୟୁମଃତାନା। ଟୁଡା ଦାଆଃ ହିଜୁଃତାନ୍ ଲେକା ଇନ୍କୁ ହିଜୁଃତାନାକ। 13 ଇନ୍କୁ ଲିଙ୍ଗିୟଃତାନ୍ ଦାଆଃରାଃ ସାଡ଼ି ଆୟୁମଃ ଲେକା କାଉରି ରେୟଗି। ପାର୍ମେଶ୍ୱାର୍ ଇନ୍କୁକେ ଚିମ୍ତା ଧାମ୍କାଅକଆଏ, ଇମ୍ତା ଇନ୍କୁ ବୁରୁ ଚେତାନ୍ରେ ହୟତେ ପେଟେଃ ଲେକା ଓଡ଼ୋଃ ହୁର୍ଲାସି ହୟରେ ଧୁଡ଼ି ଅଟାଙ୍ଗ୍ଅଃ ଲେକା ପୁରାଃ ସାଙ୍ଗିନ୍ତେ ଅଟାଙ୍ଗ୍କଆଃକ। 14 ସିଙ୍ଗି ହାସୁର୍ ଇମ୍ତା ଇମ୍ତାଗି ସାଙ୍କାଟ୍ ସେଟେରାଃ, ଓଡ଼ୋଃ ସେତାଃ ହବାଅଃ ସିଦାରେ ଇନ୍କୁ କାକ ତାଇନାଃ। ଆଇଁୟାଃ ଜିନିଷ୍କକେ ଅକନ୍କ ରେଃକ୍ ଇଦିୟାଃକ ଏନାଗି ଇନ୍କୁଆଃ ସାଜାଇ, ଓଡ଼ୋଃ ଆଇଙ୍ଗ୍କେ ଅକନ୍କ କୁମ୍ବୁଡ଼ୁ ରିକାଃକ, ନେଆଁଗି ଇନ୍କୁଆଃ ଆକ୍ତେୟାର୍ ରେୟାଃ ହିସା ତାନାଃ।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)