1 ଆହା, ଏଟାଃ ଦିଶୁମ୍‌ରେନ୍‌ ହଡ଼କ ଜେ'ଲେକା ଆମାଃ ଆୟାର୍‌ରେ ଥାର୍‌ଥାରାଅଃଆକ, ଏନାମେନ୍ତେ ଆମାଃ ବାଇରିକକେ ଆମାଃ ନୁତୁମ୍‌ ଉଦୁବାକ ନାଗେନ୍ତେ, 2 ସେଙ୍ଗେଲ୍‌ରେ ଝାଟା ଚିଲ୍‌କା ଅଣ୍ଡର୍‌କଆଃ ଓଡ଼ୋଃ ଦାଆଃ ଚିଲ୍‌କା ଡାପ୍‌କାଅଃଆ, ଆମ୍ ସିର୍ମାରେୟାଃ ସବେନାଃ ହାଦୁଡ଼୍‌ କେଦ୍‌ତେ କିଲିକଆଃ ଆୟାର୍‌ରେ ଆଡ଼୍‌ଗୁକେଦ୍‌ତେ ହିଜୁଃ ରେଦମ୍‌ ବୁରୁକ ଆମାଃ ଆୟାର୍‌ରେ ଏକ୍‌ଲାଅଃତେୟାଃକ। 3 ଚିମ୍‌ତା ଆମ୍ ଆଲେୟାଃ ବରୱାନ୍‌ କାମିକ ରିକାକେଦାମ୍‌, ଇମ୍‌ତା ଆମ୍‌ ଆଡ଼୍‌ଗୁୟାନାମ୍‌ ଏନ୍ତେ ବୁରୁକ ଆମାଃ ଆୟାର୍‌ରେ ଥାର୍‌ଥାରାଅୟାନା। 4 ଚିୟାଃଚି ପୁରାଃ ସିଦା ଦିପିଲିଏତେ ଆମ୍‌କେ ବାଗିକେଦ୍‌ତେ ଜେତାଏ ଓଡ଼ୋଃ ଏଟାଃ ପାର୍‌ମେଶ୍ୱାର୍‌ ବାଙ୍ଗାଇୟା ଚାଏ କା ନେଲାକାନା ଓଡ଼ୋଃ ଲୁତୁର୍‌ତେହ ଇନିୟାଃ ମାନାରାଙ୍ଗ୍ କାଜି କା ଆୟୁମାକାନା। ଅକଏଚି ଇନିଃତାଃରେ ଆସ୍ରା ଦହକେଦ୍‌ତେ ଇନିୟାଃ ନାଗେନ୍ତେ କାମି ରିକାୟା। 5 ଅକଏକ ରାସ୍‌କାତେ ଧାରାମ୍ ହରାରେ ସେସେନାଃ, ଅକନ୍‌କ ଆକଆଃ ସେନଃ ହରାରେ ଆମ୍‌କେ ପାହାମେ ତାନା। ଇନ୍‌କୁଲଃ ଆମ୍ ସାଙ୍ଗାତିରେ ତାଇନ୍‌ ତାନା। ଆଲେ ପାପ୍ ରିକାକେଦା ଓଡ଼ୋଃ ପୁରା ମାହା ଜାକେଦ୍ ପାପ୍‌ରେଲେ ତାଇନ୍ ହରାତେ, ଆମ୍ ଆଲେୟା ଚେତାନ୍‌ରେ ଖିସ୍ ଦହକେଦା, ଚିୟାଃ ଆଲେ ବାଞ୍ଚାଅ ନାମ୍ ଦାଡ଼ିୟାଲେ ? 6 ଚିୟାଃଚି ଆଲେଦ ସବେନ୍‌କ ସତ୍‌ରା କାନାଲେ ଓଡ଼ୋଃ ଆଲେୟା ଧାର୍‌ମାନ୍‌ରେୟାଃ କାମିକ ସତ୍‌ରା ଲିଜାଃ ଲେକା ହବାକାନା। ଆଲେ ସବେନ୍‌କ ସାକାମ୍ ଲେକା ଗସ କାନା ଓଡ଼ୋଃ ଆଲେୟା ପାପ୍‌ ଆଲେକେ ହୟ ଲେକା ଅଟାଙ୍ଗ୍‌ ଇଦିୟାଏ। 7 ଆମାଃ ନୁତୁମ୍‌ତେ ଜେତାଏ କାକ ବିନ୍ତି ତାନା। ଜେତାଏ ଆମାଃତାଃଏତେ ଦେଙ୍ଗା ନାମ୍ ନାଗେନ୍ତେ କାକ ସାନାଙ୍ଗ୍‌ତାନା। ଚିୟାଃଚି ଆଲେୟା ପାପ୍‌ ହରାତେ ଆମ୍ ଆମାଃ ମେଦ୍‌ମୁହାଁଡ଼୍‌ ଦାନାଙ୍ଗ୍‌ କାଦା ଓଡ଼ୋଃ ଆଲେୟାଃ ପାପ୍ ହରାତେ ଆମ୍ ଆଲେକେ ଜିୟନଃ ନାଗେନ୍ତେ ବାଗିକାଦ୍‌ ଲେୟା।

8 ମେନ୍‌ଦ ହେ ପ୍ରାଭୁ, ଆମ୍ ଆଲେୟାଃ ଆପୁ ତାନ୍‌ମେ। ଆଲେଦ ହାଁସା ତାନ୍‌ଲେ, ଆମ୍ ଆଲେୟାଃ ବାବାଇନିଃ କୁମ୍ଭାର୍‌ ତାନ୍‌ମେ। ଆଲେ ସବେନ୍ ଆମାଃ ତିଃଇତେ ବାଇୟାକାନ୍‌କ ତାନ୍‌ଲେ। 9 ହେ ପ୍ରାଭୁ, ପୁରାଃଗି ଆଲମ୍ ଖିସ୍‌ନାଃ, ଚାଏ ଜାନାଅ ଜାକେଦ୍‌ ଆଲେୟାଃ ପାପ୍‌ କାଜିକେ ମନ୍‌ରେ ଆଲମ୍‌ ଦହୟା। ବିନ୍ତିମେ ତାନାଲେ, ନେଲେମେ, ଆଲେ ସବେନ୍‌କଦ ଆମାଃ ହଡ଼କ ତାନ୍‌ଲେ। 10 ଆମାଃ ପାବିତାର୍‌ ନାଗାର୍ ସବେନାଃ ବିର୍‌ ଲେକା ହବାକାନା। ସିୟୋନ୍‌ ହଁ ବିର୍‌ ଲେକା ହବାକାନା ଓଡ଼ୋଃ ଯୀରୁଶାଲେମ୍‌ ହଁଗି ହାଦୁଡ଼ାକାନା। 11 ଆଲେୟାଃ ପୁର୍‌ଖା ଆପୁକ ଅକ ଠାୟାଦ୍‌ରେ ଆମାଃ ମାଇନାନ୍‌ ରିକାକେଦାକ, ଆଲେୟାଃ ଏନ୍ ପାବିତାର୍ ଓଡ଼ୋଃ ସୁଗାଡ଼ାନ୍‌ ନାଗାର୍ ସେଙ୍ଗେଲ୍‌ତେ ଅଣ୍ଡର୍‌କାନା ଓଡ଼ୋଃ ଆଲେକେ ସୁକୁରାସ୍‌କା ଏମ୍‌ତାନ୍‌ ଏନ୍ ସବେନାଃତେୟାଃ ଜିୟନ୍‌କାନା। 12 ହେ ପ୍ରାଭୁ, ନେ'ସବେନାଃ ହବାକାନ୍‌ ରେହ ଚିୟାଃ ଆମ୍ ଆପାନ୍‌କେ ଚୁପ୍‌ଚାପ୍‌ ଦହୟା ? ଆମ୍ ପୁରାଃଗି ହାପାକେଦ୍‌ତେ ତାଇନାଃ ଓଡ଼ୋଃ ଆଲେକେ ସାସାତି ଏମାଲେୟାମ୍‌ ?