ଯିଶାୟ 20

ମିସାର୍‌ ଓଡ଼ୋଃ କୁଶ୍‌ ଦିଶୁମ୍‌ ବିରୁଧ୍‌ରେ ଆୟାର୍‌କାଜି

1 ଅକନ୍‌ ବାରାଷ୍‌ ଆସେରିୟା ଦିଶୁମ୍‌ରେନ୍‌ ରାଜା ସାର୍‌ଗନ୍‌ ଆୟାଃ ସିପାଇକଆଃ ଗମ୍‌କେକେ ଅସ୍‌ଦୋଦ୍‌ ନାଗାର୍‌ ବିରୁଧ୍‌ରେ କୁଲ୍‌କିୟା ଓଡ଼ୋଃ ଲାଡ଼ାଇକେଦ୍‌ତେ ଏନାକେ ଆକ୍‌ତେୟାର୍‌ କେଦା, 2 ପ୍ରାଭୁ ଏନ୍‌ ଦିପିଲିରେ ଆମୋସ୍‌ରାଃ ହନ୍ତେକଡ଼ା ଯିଶାୟ ହରାତେ କାଜି କୁଲ୍‌କେଦା, "ଜୁ, ସେନଃମେ, ଆମାଃ ହଡ଼୍‌ମଏତେ ବାସ୍ତା ଲିଜାଃ ରାଡ଼ାଏମେ, ଓଡ଼ୋଃ ଆମାଃ କାଟାଏତେ ଖାର୍‌ପା ହଲେଜେମେ।" ଯିଶାୟ ଏନ୍‌ଲେକାଗି ରିକାକେଦା, ଇନିଃ ସାମା ହଡ଼୍‌ମ ଓଡ଼ୋଃ ସାମା କାଟାତେ ହନର୍‌ବାଡ଼ା କେଦା। 3 ଏନ୍ତେ ପ୍ରାଭୁ କାଜିକେଦା, "ଆଇଁୟାଃ ଦାସି ଯିଶାୟ, ଆପି ବାରାଷ୍‌ ଜାକେଦ୍ ସାମା ହଡ଼୍‌ମ ଓଡ଼ୋଃ ସାମା କାଟାତେ ହନର୍‌ବାଡ଼ାକାଦା। ଚିୟାଃଚି ଇନିଃ ମିସାର୍‌ ଓଡ଼ୋଃ କୁଶ୍‌ ଦିଶୁମ୍‌ ନାଗେନ୍ତେ ମିଆଦ୍ ଚିହ୍ନା ଓଡ଼ୋଃ ଆକ୍‌ଦାନ୍ଦାଅ ଲେକା ହବାକାନାଏ। 4 ଏନ୍‌ ଲେକାଗି ଆସେରିୟା ରେନ୍‌ ରାଜା ପୁରାଃ ଦିପିଲିଏତେ ମିସାର୍‌ରେନ୍‌ ତଲାକାନ୍‌ ଦାସିକକେ ଓଡ଼ୋଃ କୁଶ୍‌ ଦିଶୁମ୍‌ରେନ୍‌ ତଲାକାନ୍‌ ହଡ଼କକେ ସାମା ହଡ଼୍‌ମ ଓଡ଼ୋଃ ସାମା କାଟାତେ ଓଡ଼ୋଃ ମିସାର୍‌କେ ଗିହୁଃ ଇଚି ରିକା ନାଗେନ୍ତେ ସାମା ହଡ଼୍‌ମଗି ଇନ୍‌କୁକେ ଇଦିକଆ। 5 ଇମ୍‌ତା ଅକନ୍‌କ କୁଶ୍‌ ଦିଶୁମ୍‌ ଚେତାନ୍‌ରେ ଆସ୍ରା ରିକା ତାଇକେନାକ ଓଡ଼ୋଃ ମିସାର୍‌ ଦିଶୁମ୍‌ ନାଗେନ୍ତେ ଆପାନ୍‌କେ ମାରାଙ୍ଗ୍‌ୟେଁନ୍‌ ମେନ୍ତେ କାଜିନ୍‌ ତାଇକେନାକ ଇନ୍‌କୁ ବରଏୟାକ ଓଡ଼ୋଃ ଗିହୁଗଃଆକ। 6 ଏନ୍‌ ହୁଲାଙ୍ଗ୍‌ ଦରେୟାସାଃ ଗେନାରେ ତାଇନ୍‌ତାନ୍‌ ହଡ଼କ କାଜିୟା, ‘ନେଲେପେ, ଆବୁ ଅକନ୍‌କଆଃ ଚେତାନ୍‌ରେ ଆସ୍ରା ରିକା ତାଇକେନାବୁ ଓଡ଼ୋଃ ଆସେରିୟା ରାଜାରାଃ ତିଃଇଏତେ ବାଞ୍ଚାଅ ନାମେ ନାଗେନ୍ତେ ଅକଏତାଃରେ ଦେଙ୍ଗା ନାମ୍‌ ନାଗେନ୍ତେ ନିରାକାନ୍‌ ତାଇକେନାବୁ, ଇନିୟାଃ ଦାସା ଚିଲ୍‌କା ହବାକାନା ! ଏନ୍‌ରେଦ, ଚିଲ୍‌କାତେ ଆବୁ ବାଞ୍ଚାଅଃ ନାମେୟାଁବୁ ?’"