ଯିଶାୟ 2

ଜାନାଅ ସୁକୁ

1 ଆମୋସ୍‌ରାଃ ହନ୍ତେକଡ଼ା ଯିଶାୟ, ଯିହୁଦା ଓଡ଼ୋଃ ଯୀରୁଶାଲେମ୍‌ ବିଷାଏରେ ଦାର୍‌ଶାନ୍‌ ନାମ୍‌କେଦାଏ, ଏନାରାଃ କାନାଜି :

2 ଟୁଣ୍ଡୁ ଦିପିଲିରେ

ପ୍ରାଭୁଆଃ ତାଇନଃ ମାନ୍ଦିର୍‌ଅଡ଼ାଃ ରେୟାଃ ବୁରୁ

ଏଟାଃ ସବେନ୍‌ ବୁରୁଏତେ

ମାରାଙ୍ଗ୍‌ ବୁରୁ ଲେକା ହବାଅଃଆ। ଓଡ଼ୋଃ ନେଆଁ ସବେନ୍‌ ବୁରୁଏତେ ସାଲାଙ୍ଗି ହବାଅଃଆ।

ଓଡ଼ୋଃ ସବେନ୍‌ କିଲିରେନ୍‌ ହଡ଼କ ଏନ୍‌ ଠାୟାଦ୍‌ତେ ଲିଙ୍ଗିତାନ୍‌ ଦାଆଃ ଲେକା ଆତୁକେଦ୍‌ତେ ହିଜୁଃଆକ।

3 ପୁରାଃ କିଲିରେନ୍‌ ହଡ଼କ ସେସେନ୍‌ତାନ୍‌ଲଃ ନେଆଁ କାଜିୟାକ,

"ଦଲାବୁ ପ୍ରାଭୁଆଃ ବୁରୁତେ,

ଯାକୁବ୍‌ଆଃ ପାର୍‌ମେଶ୍ୱାର୍‌ଆଃ ମାନ୍ଦିର୍‌ଅଡ଼ାଃତେ ସେନାବୁ।

ଆବୁ ଜେ’ଲେକା ଆୟାଃ ହରାରେ ସେନେୟାବୁ,

ଏନାମେନ୍ତେ ଇନିଃ ଆବୁକେ ଆୟାଃ ହରା ବିଷାଏରେ ଇତୁବୁଆ।

ଚିୟାଃଚି ସିୟୋନ୍‌ ଏତେ ଆନ୍‌ଚୁ

ଓଡ଼ୋଃ ଯୀରୁଶାଲେମ୍‌ ଏତେ ପ୍ରାଭୁଆଃ କାଜି ଅଡଙ୍ଗ୍‌ଅଃଆ।"

4 ଇନିଃ କିଲି କିଲିକଆଃ ଥାଲାରେ ବିଚାର୍‌ ରିକାଏୟା

ଓଡ଼ୋଃ ପୁରାଃ କିଲିକଆଃ ଏପେଗେର୍‌ କାଜିକ ବାପାଇ ରିକାଏୟା।

ଏନାରେ ଇନ୍‌କୁ ଆକଆଃ ତାରାଉଡ଼ିକେ ଟହେଜ୍‌ କେଦ୍‌ତେ ନାଏଁହାଲ୍‌ରାଃ ପାହାଲ୍‌

ଓଡ଼ୋଃ ବାର୍ଛାକେ ଟହେଜ୍‌ କେଦ୍‌ତେ ଦାତ୍‌ରମ୍‌ ବାଇୟା।

ମିଆଦ୍‌ କିଲି ଏଟାଃ ଆଡଃମିଆଦ୍‌ କିଲିରାଃ ବିରୁଧ୍‌ରେ ତାରାଉଡ଼ି କାକ ସାବେୟା

ଚାଏ ଇନ୍‌କୁ ଲାଡ଼ାଇତେୟାଃ କାକ ଇତୁଆଃ।

5 ହେ ଯାକୁବ୍‌ କିଲିରେନ୍‌ ହଡ଼କ ହିଜୁଃପେ, ଆବୁ ପ୍ରାଭୁ ପାର୍‌ମେଶ୍ୱାର୍‌ଆଃ ମାସ୍କାଲ୍‌ ହରାରେ ସେସେନାବୁ।

ପ୍ରାଭୁଆଃ ଦିପିଲି

6 ଆମ୍‌ ଆମାଃ ହଡ଼କକେ ଓଡ଼ୋଃ ଯାକୁବ୍‌ କିଲିକେ ବାଗିକିୟାମ୍‌, ଚିୟାଃଚି ଇନ୍‌କୁ ପୁରାବ୍‌ ଦିଶୁମ୍‌ରାଃ ଏତ୍‌କାନ୍‌ ଚାଇଲ୍‌ ଚାଲାନ୍‌ତେ ପେରେୟାକାନାକ। ଇନ୍‌କୁ ପାଲେଷ୍ଟାଇନ୍‌ ହଡ଼କଆଃ ଲେକା ଦେଅଁଣା ରିକାଃକ ଓଡ଼ୋଃ ଏଟାଃ ଦିଶୁମ୍‌ରେନ୍‌ ହଡ଼କଆଃ ରିତିରିୱାଜ୍‌ ମାନାତିଙ୍ଗ୍‌ ରିକାଃକ। 7 ଇନ୍‌କୁଆଃ ଦିଶୁମ୍ ରୁପା ଓଡ଼ୋଃ ସୋନାତେ ପେରେୟାକାନା ଓଡ଼ୋଃ ଇନ୍‌କୁଆଃ ଖୁର୍ଜି ରେୟାଃ ଟୁଣ୍ଡୁ ବାନଃଆ। ଇନ୍‌କୁଆଃ ଦିଶୁମ୍‌ ସାଦମ୍‌ ଓଡ଼ୋଃ ସାଦମ୍‌ଗାଡ଼ିତେ ପେରେୟାକାନା, 8 ଇନ୍‌କୁଆଃ ଦିଶୁମ୍‌ ମୁରୁତ୍‌ତେ ପେରେଃକାନା। ଇନ୍‌କୁ ଆକଆଃ ତିଃଇତେ ବାଇୟାକାନ୍‌ ଜିନିଷ୍‌କକେ ଜହାର୍‌ ରିକାଃକ ଓଡ଼ୋଃ ଏନ୍‌ସବେନାଃ ସାର୍‌ସାର୍‌ତେ ବାଇୟାକାନା।

9 ହଡ଼କ ଇନିଃକେ ଜହାରାଃକ ଓଡ଼ୋଃ ମାରାଙ୍ଗ୍‌ ହଡ଼କ ଇନିୟାଃ ଆୟାର୍‌ରେ ଆପ୍‌ନାଃ ବହଃ ତିରୁବ୍‌ ରିକାଃକ। ଏନାମେନ୍ତେ ହେ, ପ୍ରାଭୁ ଆମ୍‌ ଇନ୍‌କୁକେ ଆଲମ୍‌ ଛାମାକଆ।

10 ଆପେ ପ୍ରାଭୁଆଃ ବରତେ ଓଡ଼ୋଃ ଆୟାଃ ମାଇନାନ୍‌ ରେୟାଃ ମାସ୍କାଲ୍‌ଏତେ ନିର୍‌ୟାନ୍‌ଲଃ ସେରେଙ୍ଗ୍‌ ଲାପାଙ୍ଗା ଭିତାର୍‌ରେ ବଲପେ ଓଡ଼ୋଃ ଅତେରେ ହାଁସା ଉର୍‌କେଦ୍‌ତେ ଉକୁଃପେ। 11 ହଡ଼ରାଃ ମାରାଙ୍ଗ୍‌ୟେଁନ୍‌ ଓଡ଼ୋଃ ହିସିଙ୍ଗା ସାଙ୍ଗିନ୍‌ ରିକାଅଃଆ। ଏନ୍‌ ହୁଲାଙ୍ଗ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ଏସ୍‌କାର୍‌ ମାଇନାନ୍‌ ହବାଅଃଆ। 12 ଚିୟାଃଚି ଫାଉଦ୍‌କଆଃ ପ୍ରାଭୁ ମିଆଦ୍‌ ହୁଲାଙ୍ଗ୍‌କେ ଠାହାରାଅକାଦା, ସବେନ୍‌ ହିସିଙ୍ଗା ଓଡ଼ୋଃ ଘାମାଣ୍ଡ୍‌ ରିକାତାନ୍‌କଆଃ ନାଗେନ୍ତେ ଓଡ଼ୋଃ ଆପାନ୍‌କେ ମାରାଙ୍ଗ୍‌ ଆଟ୍‌କାରେନ୍‌ ତାନ୍‌କଆଃ ବିରୁଧ୍‌ରେ ଓଡ଼ୋଃ ଇନ୍‌କୁ ଆପ୍‌ନାଃ ମନ୍‌କେ ଲେବେଃ ରିକାଏୟାକ। 13 ଲିବାନୋନ୍‌ରାଃ ସାଲାଙ୍ଗି ଦାରୁ ଓଡ଼ୋଃ ବୁଗିନ୍‌ ଏରସ୍‌ ଦାରୁକ ଓଡ଼ୋଃ ବାଶନ୍‌ରେୟାଃ ସବେନ୍‌ ଅଲୋନ୍‌ ଦାରୁରାଃ ବିରୁଧ୍‌ରେ, 14 ଓଡ଼ୋଃ ସବେନ୍‌ ମାପ୍‌ରାଙ୍ଗ୍‌ ବୁରୁ ଓଡ଼ୋଃ ଗୁଟୁକରାଃ ବିରୁଧ୍‌ରେ, 15 ମାପ୍‌ରାଙ୍ଗ୍‌ ସାଲାଙ୍ଗି ଗାଡ଼୍‌ ଓଡ଼ୋଃ ସବେନ୍‌ କେଟେଃକେଦ୍‌ତେ ତାଇନ୍‌ତାନ୍‌ ପାଚ୍‌ରିରାଃ ବିରୁଧ୍‌ରେ, 16 ତର୍ଶିଶ୍‌ରେୟାଃ ସବେନ୍‌ ଦାଆଃଜାହାଜ୍‌ରାଃ ବିରୁଧ୍‌ରେ ଓଡ଼ୋଃ ତିଃଇତେ ବାଇକାନ୍‌ ସୁଗାଡ଼ାନ୍‌ଗି ନେଲଃତାନ୍‌ ଜିନିଷ୍‌ରାଃ ବିରୁଧ୍‌ରେ ହବାଅଃ ଦିପିଲି ହିଜୁଃଆ। 17 ହଡ଼ରାଃ ଫୁଟାନି ଜାଗାର୍‌କ ଟୁଣ୍ଡୁଃଆ ଓଡ଼ୋଃ ହଡ଼ରାଃ ହିସିଙ୍ଗା କାଜିକ ଜିଅନଃଆ। ଏନ୍‌ ହୁଲାଙ୍ଗ୍‌ ପ୍ରାଭୁଆଃ ଏସ୍‌କାର୍‌ ମାଇନାନ୍‌ ହବାଅଃଆ। 18 ଓଡ଼ୋଃ ସବେନ୍‌ ମୁରୁତ୍‌କ ଜିୟନଃଆକ।

19 ଚିମ୍‌ତାଙ୍ଗ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ପେଡ଼େଃତେ ଅତେଦିଶୁମ୍‌ ଏକ୍‌ଲାଅଃଆ, ଇମ୍‌ତାଙ୍ଗ୍‌ ଆୟାଃ ବରତେ ଓଡ଼ୋଃ ମାନାରାଙ୍ଗ୍‌ରେୟାଃ ମାସ୍କାଲ୍‌ତେ ହଡ଼କ ସେରେଙ୍ଗ୍‌ରେୟାଃ ଲାପାଙ୍ଗାରେ ଓଡ଼ୋଃ ଅତେରେ ହାଁସା ଉର୍‌କେଦ୍‌ତେ ଉକୁନାଃକ। 20 ଏନ୍‌ ହୁଲାଙ୍ଗ୍‌, ଜହାର୍‌ ନାଗେନ୍ତେ ହଡ଼କ ବାଇୟାକାଦ୍‌ ସୋନା ଓଡ଼ୋଃ ରୁପାରେନ୍‌ ମୁରୁତ୍‌କକେ, ହୁନି ଓଡ଼ୋଃ ଭାଦ୍‌ଲିକଆଃ ଆୟାର୍‌ରେ ହୁଦ୍‌ମାକଆକ। 21 ଚିମ୍‌ତାଙ୍ଗ୍‌ ପ୍ରାଭୁ ପାର୍‌ମେଶ୍ୱାର୍‌ ଅତେଦିଶୁମ୍‌କେ ଏକ୍‌ଲାଅ ନାଗେନ୍ତେ ବିରିଦା, ଇମ୍‌ତାଙ୍ଗ୍‌ ଆୟାଃ ବରୱାନ୍‌ ଓଡ଼ୋଃ ମାନାରାଙ୍ଗ୍‌ରେୟାଃ ମାସ୍କାଲ୍‌ତେ ସେରେଙ୍ଗ୍‌ ଲାପାଙ୍ଗାକରେ ଓଡ଼ୋଃ ବୁରୁରେୟାଃ ଫାଡ଼ାଃ ଠାୟାଦ୍‌କରେ ବଲଆକ।

22 ଏନାମେନ୍ତେ ଆପେ ହଡ଼ରାଃ ଆସ୍ରାରେ ଆଲପେ ତାଇନାଃ, ହଡ଼ରାଃ ସାହେଁଦ୍‌ ଆୟାଃ ମୁହୁଁରେ ମେନାଃ, ଚିୟାଃଚି ଇନିୟାଃ ଜେତାନ୍‌ ଗନଙ୍ଗ୍‌ ବାନଃଆ ?