ବାଇରିକକେ ପ୍ରାଭୁଆଃ ସାଜାଇ
1 ହେ ଦିଶୁମ୍ରେନ୍ ହଡ଼କ, ହେପାଦ୍ତେ ହିଜୁଃକେଦ୍ତେ ଆୟୁମେପେ, ହେ କିଲିକ ବୁଗିଲେକା ଆୟୁମେପେ। ସବେନ୍ ଅତେଦିଶୁମ୍ ଓଡ଼ୋଃ ଏନାରେ ତାଇନ୍ତାନ୍ ହଡ଼କ ଆୟୁମେପେ, ଅତେରେ ଓଡ଼ୋଃ ଏନାରେ ତାଇନ୍ତାନ୍ ଜିନିଷ୍କ ଆୟୁମେପେ। 2 ପ୍ରାଭୁ ସବେନ୍ କିଲିକ ଚେତାନ୍ରେ ଖିସ୍କାନା। ଇନ୍କୁଆଃ ସିପାଇକଆଃ ଚେତାନ୍ରେ ପୁରାଃ ଖିସ୍ ମେନାଃ। ଇନ୍କୁକେ ପୁରାଗି ଜିୟନ୍କଆ ଓଡ଼ୋଃ ମାଆଃଗଏଃ ନାଗେନ୍ତେ ଜିମାକଆ। 3 ଇନ୍କୁଆଃ ମାଆଃ ଗଜାକାନ୍ ହଡ଼କ ବାହାରିରେ ହୁରାଙ୍ଗ୍ଅଃଆକ। ଇନ୍କୁଆଃ ମାଡ଼ା ଏତେ ସିତ୍ରୁ ସହାନ୍ ଅଡଙ୍ଗ୍ଅଃଆ ଓଡ଼ୋଃ ବୁରୁ ସବେନାଃ ମାୟୋମ୍ତେ ଲିଙ୍ଗିୟଃଆ। 4 ସିର୍ମାରେନ୍ ସିଙ୍ଗି, ଚାଣ୍ଡୁଃ ଓଡ଼ୋଃ ଇପିଲ୍କ ଜିୟନଃଆକ ଓଡ଼ୋଃ ରିମିଲ୍ ଅନଲ୍ ଚିଠା ଲାଟୁମେ ଲେକା କୁଡ଼ାଅଃଆ। ଦାଖ୍ନାଡ଼ି ଏତେ ରହଡ଼୍ ସାକାମ୍ ଓଡ଼ୋଃ ଲଆ ଦାରୁଏତେ ରହଡ଼ାକାନ୍ ଜ ଉୟୁଗଃ ଲେକା ସବେନ୍କ ଉୟୁଗଃଆ।
5 ଚିୟାଃଚି ଆଇଁୟାଃ ତାରାଉଡ଼ି ସିର୍ମା ଠାୟାଦ୍ରେ ବାଇୟାକାଦାଇଙ୍ଗ୍। ନେଲେପେ, ବିଚାର୍ ରିକା ନାଗେନ୍ତେ ଏନା ଇଦୋମ୍ ଓଡ଼ୋଃ ଆଇଁୟାଃ ସାର୍ପାଅକାନ୍ ହଡ଼କ ଚେତାନ୍ରେ ଜିୟନ୍ ନାଗେନ୍ତେ ହିଜୁଃଆ। 6 ପ୍ରାଭୁଆଃ ତାରାଉଡ଼ି ମିଣ୍ଡିକଆଃ ମାୟୋମ୍ତେ ଓଡ଼ୋଃ ଇତିଲ୍ତେ ଲାଟ୍ପାଟାଅ କାନା। ଚିୟାଃଚି ପ୍ରାଭୁ ବସ୍ରା ନାଗାର୍ରେ ମିଆଦ୍ ଦାଣେଁ ବେଦି ବାଇୟା ଓଡ଼ୋଃ ଇଦୋମ୍ ପିଡ଼ିରେ ମିଆଦ୍ ମାରାଙ୍ଗ୍ ମାପାଃତୁପୁଇଙ୍ଗ୍ ହବାଅଃଆ। 7 ଓଡ଼ୋଃ ଇନ୍କୁଲଃ ବିର୍ରେନ୍ ଉରିକ୍, ବାଛା, କେଡାକଲଃ ମାରାଙ୍ଗ୍ ପେଡ଼େୟାନ୍ କେଡାକ ହିଜୁଃଆ। ଇନ୍କୁଆଃ ଦିଶୁମ୍ ମାୟୋମ୍ତେ ଓଡ଼ୋଃ ଧୁଡ଼ି ପୁରା ଇତିଲ୍ତେ ପେରେଜଃଆ। 8 ଚିୟାଃଚି ନେଆଁଦ ପ୍ରାଭୁଆଃ ସାଜାଇ ଏମ୍ରେୟାଃ ଦିପିଲି ଓଡ଼ୋଃ ସିୟୋନ୍ ରେନ୍ ବାଇରିକକେ ସାଜାଇ ଏମଃ ନାଗେନ୍ତେ ମିଦ୍ ବାରାଷ୍ ଦହାକାନା।
9 ଇଦୋମ୍ ରେୟାଃ ଗାଡାକ ଆଲ୍କାତ୍ରାରେ ଓଡ଼ୋଃ ଏନାରେୟାଃ ଧୁଡ଼ି ଜୁଲଃତାନ୍ ଗାନ୍ଧାକ୍ ଲେକା ହବାଅଃଆ, ଏନାରେୟାଃ ଅତେ ଜୁଲଃତାନ୍ ଆଲ୍କାତ୍ରା ଲେକା ହବାଅଃଆ। 10 ଏନା ଚିଉଲାହ କା ଇଣିଁଜଃଆ, ନିଦା ସିଙ୍ଗି ଜୁଲଃତାନ୍ ତାଇନାଃ। ଏନାରାଃ ସୁକୁଲ୍ ଜାନାଅଗି ସୁକୁଲଃଆ। ପିଢ଼ି ପିଢ଼ି ଜାକେଦ୍ ନେଆଁ ବିର୍ ଲେକା ତାଇନାଃ। ଓଡ଼ୋଃ ଚିଉଲାହ ଜେତାଏ ଏନ୍ ହରାରେ କାକ ସେନ୍ପାରମ୍ ଦାଡ଼ିୟା। 11 ଗିଦି ଓଡ଼ୋଃ ସାହି ହୁନି ଏନା ଆକ୍ତେୟାର୍ ରିକାୟା, ଏନ୍ତାଃରେ ପେଚା ଓଡ଼ୋଃ କାଉଆ ହଗି ଡେରାଏୟାକ। ଓଡ଼ୋଃ ପାର୍ମେଶ୍ୱାର୍ ଏନ୍ ଇଦୋମ୍ ନାଗେନ୍ତେ କା ହବା ଲାଗାତିୟାଁଃ ମିଆଦ୍ ସଙ୍ଗ୍ ରିକାତାନ୍ ବାଏହାର୍ ଓଡ଼ୋଃ ଜିୟନ୍ ରେୟାଃ ଉଲୁଙ୍ଗ୍ ବାଇୟାଏ। 12 ଏନ୍ତାଃରେ ଜେତା ରାଜା ରାଇଜ୍ ରିକା ନାଗେନ୍ତେ କାକ ତାଇନାଃ, ମେନ୍ଦ ଜେତାଏ ଏନ୍ତାଃରେ କାକ ତାଇନାଃ ଓଡ଼ୋଃ ଏନ୍ ରାଇଜ୍କେ ଚାଲାଅତାନ୍ ସବେନ୍ ଆଗୁଆଇକ ଜିୟନଃଆ। 13 ଇଦୋମ୍ ରେୟାଃ ଏନ୍ ମାହାଲ୍ ଅଡ଼ାଃକରେ ଜାନୁମ୍ ତାସାଦ୍, ଗାଡ଼୍କରେ ଜାନୁମ୍ ରେୟାଃ ନାଡ଼ି ଓଡ଼ୋଃ ବାବ୍ତା ରିକା ନାଡ଼ିକ ହାରା ଇଦିୟଃଆ। ଏନ୍ତାଃରେ ତୁୟୁକ ଡେରାଏୟା ଓଡ଼ୋଃ ପେଚା ଅଡ଼େକଆଃ ଆତିଙ୍ଗ୍ ଠାୟାଦ୍ ହବାଅଃଆ। 14 ବିର୍ଜାଁତୁକ ତୁୟୁକଲଃ ମିଦ୍ତାଃରେ ତାଇନାଃକ। ବିର୍ରେନ୍ ମେରମ୍ ବଙ୍ଗା ଆୟାଃ ସାଙ୍ଗିକକେ କେଡ଼ାକଆ, ନୁବାଃରେନ୍ ପେତେନ୍ ଏନ୍ତାଃରେ ରୁଡ଼ୁକେଦ୍ତେ ବୁଗି ଲେକା ତାଇନାଃକ। 15 ଏନ୍ତାଃରେ ପେଚା ଆୟାଃ ଜାରମ୍ ଏମେୟା ଓଡ଼ୋଃ ହନ୍କକେ ରୁତୁଡ଼୍କଆ ଓଡ଼ୋଃ ଇନିଃ ଆୟାଃ ଆପ୍ରବ୍ ଲାତାର୍ରେ ଦହକେଦ୍ତେ ଯାତାନ୍କଆ। ଗିଦିକ ହଁଗି ଏନ୍ତାଃରେ ଆପାନ୍ ଆପାନ୍ ଜୁଡ଼ି କଲଃ ମିସାତେ ତାଇନାଃକ।
16 ପ୍ରାଭୁଆଃ ପୁଥିଏତେ ଦାଣାଁ କେଦ୍ତେ ପାଢ଼ାଏପେ, ନେ ସବେନ୍କ ଏନ୍ତାଃରେ ମିସାତେ ତାଇନାଃକ, ଜେତାଏ ବିନ୍ଗାଅ କେଦ୍ତେ କାକ ତାଇନାଃ। ଚିୟାଃଚି ନେ କାଜି ପ୍ରାଭୁ କାଜିକାଦା ଓଡ଼ୋଃ ଇନିୟାଃ ଆତ୍ମା ଇନ୍କୁକେ ମିଦ୍ତାଃରେ ହୁଣ୍ଡିକାଦ୍କଆ। 17 ଇନିଃ ଇନ୍କୁ ନାଗେନ୍ତେ ଚିଠା ଉୟୁଃକାଦାଏ ଓଡ଼ୋଃ ଇନିୟାଃ ତିଃଇ ସଙ୍ଗ୍ ରିକାତାନ୍ ବାଏହାର୍ ହରାତେ ଏନା ହାଟିଙ୍ଗ୍ କେଦ୍ତେ ଏମାକାଦ୍କଆ। ଇନ୍କୁ ଏନା ଜାନାଅଗି ଆକ୍ତେୟାର୍ ରିକାୟାକ, ଇନ୍କୁ ପିଢ଼ି ପିଢ଼ି ଜାକେଦ୍ ଏନ୍ତାଃରେ ତାଇନାଃକ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)