1 ହେ ଯାକୁବ୍‌ ଅକଏ ଆମ୍‌କେ ଉନୁଦୁବ୍‌ କେଦ୍‌ମେୟାଁ, ହେ ଇସ୍ରାଏଲ୍‌ ଅକଏ ଆମ୍‌କେ ବାଇକେଦ୍‌ମେୟାଁ, ଏନ୍‌ ପ୍ରାଭୁ ନାହାଁଃଦ ନେ କାଜି କାଜିତାନାଏ,

"ଆଲମ୍ ବରୟା, ଚିୟାଃଚି ଆଇଙ୍ଗ୍‌ ଆମ୍‌କେ ରାଡ଼ାକାଦ୍‌ମେୟାଁ,

ଆମ୍‌କେ ଆମାଃ ନୁତୁମ୍ ସାବ୍‌କେଦ୍‌ତେ କେଡ଼ାକାଦ୍‌ମେୟାଁ, ଆମ୍ ଆଇଁୟାଃ ତାନ୍‌ମେ।

2 ଚିମ୍‌ତା ଦାଆଃ ରେୟାଃ ହରାରେ ସେସେନ୍ ରିକାୟା, ଇମ୍‌ତା ଆଇଙ୍ଗ୍‌ ଆମାଃଲଃ ତାଇନାଃ।

ଗାଡ଼ା ଚାଏ ମାରାଙ୍ଗ୍ ଗାଡା ଥାଲାରେ ସେସେନ୍ ରେୟ ଏନା କାଏ ଆତୁ ପେୟା।

ସେଙ୍ଗେଲ୍‌ରାଃ ଥାଲାରେ ସେସେନ୍ ରେୟ ଏନା ଆପେକେ କା ଝାଲ୍‌ସାଅପେୟା

ଚାଏ ଏନା ଆମ୍‌କେ କାଏ ଅଣ୍ଡର୍‌ ଦାଡ଼ିୟାଃ।

3 ଚିୟାଃଚି ଆଇଙ୍ଗ୍‌ ଆପେୟାଃ ପ୍ରାଭୁ ପାର୍‌ମେଶ୍ୱାର୍‌

ଇସ୍ରାଏଲ୍‌ରେନ୍ ପାବିତାର୍‌ନିଃ ତାନିଙ୍ଗ୍‌, ଆମାଃ ପାରିତ୍ରାଣ୍‌ ଏମଃନିଃ ତାନିଙ୍ଗ୍‌।

ଆମାଃ ମୁକ୍ତିରାଃ ଗନଙ୍ଗ୍ ଲେକାତେ ମିସାର୍‌, କୁଶ୍‌

ଓଡ଼ୋଃ ଶିବା ଦିଶୁମ୍ ଏମାକାଦା।

4 ଆମ୍ ଆଇଁୟାଃ ଆୟାର୍‌ରେ ପୁରାଃଗି ଗନଙ୍ଗ୍‌ଆଁନ୍‌

ଓଡ଼ୋଃ ମାଇନାନ୍‌ ହଡ଼ ହବାକାନାମ୍‌, ଆଇଙ୍ଗ୍‌ ଆମ୍‌କେ ଦୁଲାଡ଼୍‌ କେଦ୍‌ମେୟାଁ।

ଏନାମେନ୍ତେ ଆମାଃ ବାଦ୍‌ଲାରେ ହଡ଼କକେ ଓଡ଼ୋଃ ଆମାଃ ଜୀଉରେୟାଃ ବାଦ୍‌ଲାରେ ସବେନ୍‌ କିଲିକକେ ଏମାମେୟା।

5 ଆଲମ୍ ବରୟା, ଚିୟାଃଚି ଆଇଙ୍ଗ୍‌ ଆମାଃଲଃ ମେନାଇଁୟାଃ।

"ଆଇଙ୍ଗ୍‌ ପୁରାବ୍‌ ସାଃଏତେ ଆମାଃ କିଲିକକେ ଆଉକଆ

ଓଡ଼ୋଃ ସିଙ୍ଗି ହାସୁର୍ ସାଃଏତେ ସବେନ୍‌କକେ ଦାଣାଁ ହୁଣ୍ଡି ପେୟା।

6 ଦାକ୍ଷିଣ୍‌ସାଃକେ କାଜିୟା, ଆଇଁୟାଃ କଡ଼ା ହନ୍‌କକେ ସାଙ୍ଗିନ୍‌ ଏତେ

ଓଡ଼ୋଃ କୁଡ଼ି ହନ୍‌କକେ ଅତେରେୟାଃ ଟୁଣ୍ଡୁ ବିର୍‌ ଏତେ ଆଉକମେ।

7 ଆଇଁୟାଃ ନୁତୁମ୍‌ତେ ସାରିୟଃତାନ୍ ଓଡ଼ୋଃ ଆଇଁୟାଃ ମାନାରାଙ୍ଗ୍‌ ନାଗେନ୍ତେ ଅକଏକେ ବାଇୟାକାଇଜା,

ନେ'ଲେକାନ୍ ସବେନ୍ ହଡ଼କକେ ଆଉକପେ। ଆଇଙ୍ଗ୍‌ ଇନିଃକେ ବାଇୟାକାଜାଇଙ୍ଗ୍‌ ହେଗି ଆଇଙ୍ଗ୍‌ ଇନିଃକେ ବାଇୟାକାଜାଇଙ୍ଗ୍‌।"

8 ମେଦ୍‌ ତାଇକେଦ୍‌ତେ କାଣାଁ ଓଡ଼ୋଃ ଲୁତୁର୍ ତାଇକେଦ୍‌ତେ ଭାଏଁରା,

ନେ'ଲେକାନ୍ ହଡ଼କକେ ବାହାରିତେ ଅଡଙ୍ଗ୍‌ ଆଉକପେ।

9 ସବେନ୍ ଦିଶୁମ୍‌ରେନ୍‌କ ମିଦ୍‌ତାଃରେ ହୁଣ୍ଡିନ୍‌ପେ ଓଡ଼ୋଃ ସବେନ୍ କିଲିକ ମିଦଃପେ,

ଇନ୍‌କୁଏତେ ଅକଏ ନେଆଁ ଉଦୁବେୟା ଓଡ଼ୋଃ ସିଦାରେୟାଃ କାଜିକ ଉଦୁବ୍ ଦାଡ଼ିୟା ?

ଇନ୍‌କୁ ଆପାନ୍‌କେ ବେଗାର୍ ଚିଟା ନାଗେନ୍ତେ ଆପାନ୍ ଆପାନ୍ ଗାୱାକକେ ଆଉକପେ

ଚାଏ ଇନ୍‌କୁ ନେଆଁ ଆୟୁମ୍‌କେଦ୍‌ତେ ନେ ବୁଗିନ୍‌ କାଜି ସାର୍‌ତି ତାନାଃ ମେନ୍ତେ କାଜିକାକ।

10 "ପ୍ରାଭୁ ପାର୍‌ମେଶ୍ୱାର୍ କାଜିତାନାଏ,

‘ଆପେ ସାରିକେଦ୍‌ତେ ଆଇଁୟାଃତାଃରେ ବିଶ୍ୱାସ୍‌ ଓଡ଼ୋଃ ଆଇଙ୍ଗ୍‌ ଇନିଃଗି ମେନ୍ତେପେ ଆଟ୍‌କାର୍‌ ଉରୁମ୍‌ ରିକାୟା।

ଏନାମେନ୍ତେ ଆପେ ଆଇଁୟାଃ ଗାୱାକ ଓଡ଼ୋଃ ସାଲାକାନ୍ ଦାସିକ ତାନ୍‌ପେ।’

ଆଇଁୟାଃ ସିଦାରେ ଜେତାନ୍ ପାର୍‌ମେଶ୍ୱାର୍ କା ବାଇୟାନା ଚାଏ ଆଇଁୟାଃ ତାୟମ୍‌ତେ ଜେତାଏ କା ହୁଇନାଃ।

11 "ଆଇଙ୍ଗ୍‌ଗି, ସାର୍‌ତି ପ୍ରାଭୁ ତାନିଙ୍ଗ୍‌

ଓଡ଼ୋଃ ଆଇଙ୍ଗ୍‌କେ ବାଗିକେଦ୍‌ତେ ଜେତାଏ ବାଞ୍ଚାଅନିଃ ବାଙ୍ଗାଇୟା।

12 ଅକଆଃ ହବାକାନ୍ ତାଇକେନା ଏନା ଆଇଙ୍ଗ୍‌ ଉନୁଦୁବ୍‌ କେଦା, ଆଇଙ୍ଗ୍‌ ବାଞ୍ଚାଅ କେଦ୍‌କଆ ଓଡ଼ୋଃ ଉଦୁବ୍‌କେଦା।

ଓଡ଼ୋଃ ଆପେ ଥାଲାରେ ଜେତାନ୍ ଏଟାଃ ବାହାରି ଦିଶୁମ୍‌ରେନ୍ ମାହାପୁରୁକ କାକ ତାଇକେନା।

ଆପେ ସବେନ୍‌କ ଆଇଁୟାଃ ଗାୱାକ ତାନ୍‌ପେ, ଆଇଙ୍ଗ୍‌ ଆପେୟାଃ ପ୍ରାଭୁ ପାର୍‌ମେଶ୍ୱାର୍‌ ତାନିଙ୍ଗ୍‌।

13 ଆଇଙ୍ଗ୍‌ ପାର୍‌ମେଶ୍ୱାର୍ ତାନିଙ୍ଗ୍‌ ଓଡ଼ୋଃ ମାସ୍କାଲ୍‌ରେୟାଃ ସିଦା ଏତେଗି ମେନାଇୟାଁଃ

ଓଡ଼ୋଃ ଆଇଁୟାଃ ତିଃଇ ଏତେ ବାଞ୍ଚାଅନିଃ ଜେତାଏ ପେଡ଼େୟାନ୍‌ନିଃ ବାଙ୍ଗାଇୟା,

ଆଇଁୟାଃ କାମିତେୟାଃ ଜେତାଏ କାଏ ବାଦ୍‌ଲାଅ ଦାଡ଼ିୟା।"

14 ଇସ୍ରାଏଲ୍‌ରେନ୍ ପାବିତାର୍‌ ପ୍ରାଭୁ ପାର୍‌ମେଶ୍ୱାର୍ ବାଞ୍ଚାଅନିଃ, ନେ କାଜି କାଜିତାନାଏ,

"ଆପେକେ ବାଞ୍ଚାଅ ନାଗେନ୍ତେ, ଆଇଙ୍ଗ୍‌ ଆଇଁୟାଃ ପାଲ୍‌ଟାନ୍‌କକେ ବାବିଲ୍‌ ବିରୁଧ୍‌ରେ କୁଲା କାଦ୍‌କଆଇଙ୍ଗ୍‌

ଓଡ଼ୋଃ ଆଇଙ୍ଗ୍‌ ଏନ୍ ନାଗାର୍‌ରେୟାଃ ଦୁଆର୍‌କେ ଜିୟନେୟାଇଙ୍ଗ୍‌,

ଓଡ଼ୋଃ ଏନ୍ କଲ୍‌ଦିୟ ହଡ଼କ କାଉରି କେଦ୍‌ତେ ରାଆଃତାନ୍‌ଲଃ ରୁହାଡ଼୍ ହିଜୁଃଆକ।

15 ଆଇଙ୍ଗ୍‌ ଆପେୟାଃ ପ୍ରାଭୁ ପାର୍‌ମେଶ୍ୱାର୍, ପାବିତାର୍‌ ପାର୍‌ମେଶ୍ୱାର୍ ତାନିଙ୍ଗ୍‌।

ଇସ୍ରାଏଲ୍‌, ଆଇଙ୍ଗ୍‌ ଆମ୍‌କେ ବାଇୟା କାଦ୍‌ମେୟାଁ ଓଡ଼ୋଃ ଆଇଙ୍ଗ୍‌ ଆମାଃ ରାଜା ତାନିଙ୍ଗ୍‌।"

16 ପ୍ରାଭୁ ନେ କାଜି କାଜିତାନା,ପୁରାଃ ସିଦାରେ ଅକଏ ଦରେୟାରେ

ଓଡ଼ୋଃ ଇକିର୍‌ ଦାଆଃ ରେୟା ଚେତାନ୍‌ରେ ହରା ବାଇୟାକାଦା,

17 ଇନିଃ ପୁରାଃ ପେଡ଼େୟାନ୍ ସିପାଇକକେ ଜିୟନ୍‌ ନାଗେନ୍ତେ,

ସାଦମ୍‌ଗାଡ଼ିକ ଓଡ଼ୋଃ ସାଦମ୍‌ କକେ ଓଡ଼ୋଃ ମାପ୍‌ରାଙ୍ଗ୍ ପାଲ୍‌ଟାନ୍‌କକେ ଅଡଙ୍ଗ୍ ଆଉକତାନା,

ଇନ୍‌କୁ ଲାତାର୍‌ରେ ଉୟୁଃ ୟାନ୍ତେ ଓଡ଼ୋଃ ବିରିଦ୍ କାକ ଦାଡ଼ିୟା,

ଇନ୍‌କୁ ଦିଆ ଜୁଲାକାନ୍‌ ସୁତାମ୍‌ରାଃ ତରେକ୍‌ ଲେକା ଜିୟନାକାନା, ପ୍ରାଭୁ ନେ କାଜି କାଜିତାନାଏ।

18 "ଆପେ ଏନେଟେଦ୍‌ କାଜିକ ଆଲପେ ପାହାମେୟା,

ଚାଏ ସିଦାରେ ହବାକାନ୍ ତେୟାଃ ଆଲପେ ଆଟ୍‌କାର୍‌ଉରୁମ୍‌ ରିକାୟା।

19 ନେଲେପେ, ନାହାଁଦ ଆଇଙ୍ଗ୍‌ ମିଆଦ୍ ନାୱା କାମି ଏଟେଦ୍‌ ରିକାୟା,

ଏନାଦ ନାହାଁ ନାଗ୍‌ଜା ହବାଅଃଆ ଓଡ଼ୋଃ ଆପେ ଏନା କାପେ ଚି ସାରିୟା ?

ଆଡଃଗି ଆଇଙ୍ଗ୍‌ ବିର୍‌ରେ ହରାକ ବାଇୟା

ଓଡ଼ୋଃ ପୁରାଃଗି ଗିତିଲ୍ ପିଡ଼ି ତାଇନ୍ ଠାୟାଦ୍‌ରେ ଗାଡ଼ାକ ଲିଙ୍ଗିୟଃଆ।

20 ପିଡ଼ିରେନ୍‌ ଜାଁତୁକ, ତୁୟୁ ଓଡ଼ୋଃ ପେଚା ଅଡ଼େକ ଆଇଁୟାଃ ମାଇନାନ୍‌ ରିକାୟା।

ଚିୟାଃଚି ଆଇଁୟାଃ ସାଲାକାନ୍ ହଡ଼କଆଃ ବାଞ୍ଚାଅ ନାଗେନ୍ତେ ବିର୍‌ରେ ଦାଆଃ

ଓଡ଼ୋଃ ଗିତିଲ୍‌ ପିଡ଼ିରେ ଗାଡ଼ା ଏମାକଆଇଙ୍ଗ୍‌।

21 ଇନ୍‌କୁକେ ଆଇଁୟାଃ ମାଇନାନ୍‌କେ ଉଦୁବ୍ ନାଗେନ୍ତେ ବାଇୟାକାଦ୍‌କଆ।"

22 ପ୍ରାଭୁ କାଜିତାନାଏ,

"ହେ ଯାକୁବ୍‌, ଆପେ ଆଇଁୟାଃତାଃରେ କାପେ ବିନ୍ତିକାଦା,

ହେ ଇସ୍ରାଏଲ୍‌ ଆଇଁୟାଃ ନାଙ୍ଗ୍‌ ଲାଗାଉତାର୍‌ କାନା।

23 ଆପେ ଆପେୟାଃ ଉରୁବ୍‌ଦାଣେଁ ରାକାବ୍‌ ରେୟାଃ ମିଣ୍ଡିକକେ ଆଇଁୟାଃତାଃତେ କାପେ ଆଉକାଦ୍‌କଆ,

ଚାଏ ଆପେୟାଃ ଦାନ୍‌ ଏମଃ ହରାତେ କାପେ ମାଇନ୍‌କାଦିୟାଁ।

ଦାଣେଁ ଏମଃ ନାଗେନ୍ତେ ଦାସି କାମି ରିକା ନାଙ୍ଗ୍‌ କାଇଙ୍ଗ୍ ଆଚୁ,

ଚାଏ ବୁଗିନ୍‌ସହାନ୍‌ ଧୁଆନ୍ ରାକାବ୍‌ ନାଗେନ୍ତେ ଆପେକେ ପୁରାଃଗି ହାମ୍ବାଲ୍‌ କାମି କାଇଙ୍ଗ୍ ଏମାକାଦ୍‌ପେୟା।

24 ଆପେ ଆଇଁୟାଃ ନାଗେନ୍ତେ ରୁପା ସିକା ଏମ୍‌କେଦ୍‌ତେ ବୁଗିନ୍‌ ସହାନ୍‌ ଧୁଆନ୍‌ କାପେ କିରିଙ୍ଗ୍,

ଚାଏ ଆପେୟାଃ ଦାଣେଁ ରେୟାଃ ଇତିଲ୍‌ ଆଇଙ୍ଗ୍‌କେ ସୁକୁ କାଏ ଏମ୍‌।

ମେନ୍‌ଦ ଆପେ ଆପେୟାଃ ପାପ୍‌କାମି ହରାତେ ଦାସି କାମି ନାଗେନ୍ତେ ଜିମାୟାନାପେ।

ଆପେୟାଃ ରାକାମ୍ ରାକାମ୍ କା ଧାର୍‌ମାନ୍ କାମିକ ହରାତେ ଆଇଙ୍ଗ୍‌କେ ପୁରାଃଗି ହାମ୍ବାଲ୍‌ ଲାଦିକାଦିୟାଁପେ।

25 ଓଡ଼ୋଃ ଆଇଙ୍ଗ୍‌ଗି ଆପେୟାଃ କା ଧାର୍‌ମାନ୍ କାମିକରାଃ ପାପ୍ ନାଗେନ୍ତେ ଛାମାପେ ତାନାଇଙ୍ଗ୍

ଓଡ଼ୋଃ ଆପେୟାଃ ପାପ୍‌କ କାଇଙ୍ଗ୍ ପାହାମେ ତାନା।

26 "ଆଇଙ୍ଗ୍‌କେ ପାହାମ୍‌ ରିକାଇଙ୍ଗ୍‌ପେ, ଆବୁ ସବେନ୍‌କ ମିହୁଡ଼୍‌ ଆଡଃମିହୁଡ଼୍‌ଲଃ ବିଚାର୍ ରିକାଅଃତାନାବୁ।

ଆପେ କା ଚିଟାଃଅ ନାଗେନ୍ତେ ଆପ୍‌ନାଃ ବୁଗିନ୍‌ କାଜିକ କାଜିପେ।

27 ଆପେୟାଃ ପୁର୍‌ଖା ଆପୁ ପାପ୍ ରିକାକେଦାଏ

ଓଡ଼ୋଃ ଆପେୟାଃ ଆଗୁଆଇକ ଆଇଁୟାଃ ବିରୁଧ୍‌ରେ ପାପ୍‌ ରିକାକେଦାକ।

28 ଏନାମେନ୍ତେ ପାବିତାର୍‌ ଠାୟାଦ୍‌ରେ ହାକିମ୍‌କକେ କାଇଙ୍ଗ୍‌ ଫାର୍‌ଚିକଆ,

ଆଇଙ୍ଗ୍‌ ଯାକୁବ୍‌କେ ସାର୍‌ପାଅ ରିକାୟା

ଓଡ଼ୋଃ ଆଇଁୟାଃ ଆପାନ୍ ଇସ୍ରାଏଲ୍‌ରେନ୍‌ ହଡ଼କଆଃ ନିନ୍ଦା ରିକାୟା।"