1 ବିରିଦ୍‌ପେ, ମାସ୍କାଲଃପେ, ଚିୟାଃଚି ଆପେୟାଃ ମାସ୍କାଲ୍ ସେଟେରାକାନା

ଓଡ଼ୋଃ ପ୍ରାଭୁଆଃ ମାନାରାଙ୍ଗ୍‌ ଆପେୟାଃ ଚେତାନ୍‌ରେ ତୁରାକାନା।

2 ନେଲେପେ, ନୁବାଃ ଅତେଦିଶୁମ୍‌କେ ଓଡ଼ୋଃ ପୁରାଃ ନୁବାଃ ହଡ଼କଆଃ ଚେତାନ୍‌ରେ ଦାପାଲ୍‌କଆ।

ମେନ୍‌ଦ ଆପେୟାଃ ଚେତାନ୍‌ରେ ପ୍ରାଭୁଆଃ ମାସ୍କାଲ୍ ତୁରଃଆ

ଓଡ଼ୋଃ ଆୟାଃ ମାନାରାଙ୍ଗ୍‌ ଆପେୟାଃ ଚେତାନ୍‌ରେ ନେଲଃଆ।

3 ଏଟାଃ ଦିଶୁମ୍‌ରେନ୍ କିଲିକ ଆମାଃ ମାସ୍କାଲ୍ ହେପାଦ୍‌ତେ

ଓଡ଼ୋଃ ରାଜାକ ଆମାଃ ସିଙ୍ଗି ତୁରଃରେୟାଃ ମାସ୍କାଲ୍‌ ହେପାଦ୍‌ତେକ ହିଜୁଃଆ।

4 ଆପେ ଚାରିଓସାଃ ଆରିଦ୍‌ ବିୟୁର୍‌ କେଦ୍‌ତେ ନେଲେପେ,

ଇନ୍‌କୁ ସବେନ୍‌କ ମିଦ୍‌ତାଃରେ ହୁଣ୍ଡିୟଃତାନାକ, ଇନ୍‌କୁ ଆପେତାଃତେ ହିଜୁଃତାନାକ।

ଆମାଃ ହନ୍‌କ ସାଙ୍ଗିନ୍‌ଏତେ ହିଜୁଃଆକ

ଓଡ଼ୋଃ ଆପେୟାଃ କୁଡ଼ିହନ୍‌କକେ ହାତାର୍‌କେଦ୍‌ତେ ଆଉଲେକା ଇନ୍‌କୁ ସାର୍‌ତିଗି ଆଉକଆକ।

5 ଇମ୍‌ତା ଆମ୍ ଏନା ନେଲେୟା ଓଡ଼ୋଃ ଆମାଃ ମେଦ୍‌ମୁହାଁଡ଼୍‌ ମାସ୍କାଲ୍‌ତେ ଝାକ୍‌ମାକାଅଃଆ

ଓଡ଼ୋଃ ଆମାଃ ମନ୍‌ସୁରୁଦ୍‌ ଧାକ୍‌ ଧାକାଅଃଆ ଓଡ଼ୋଃ ପୁରାଃ ରାସ୍‌କାତେ ପେରେଜଃଆ।

ଚିୟାଃଚି ଦରେୟାରେୟାଃ ସବେନାଃ ଆପେତାଃତେ ରୁହାଡ଼ାଃ

ଓଡ଼ୋଃ ଏଟାଃ କିଲିକଆଃ ଖୁର୍ଜିକ ଆପେତାଃ ସେଟେରାଃ।

6 ପୁରାଃ ଉଁଟ୍‌କଆଃ ଝୁଣ୍ଡ୍‌ତେ ଆପେୟାଃ ଦିଶୁମ୍‌ ପେରେଜଃଆ,

ପୁରାଃ ଜାଲ୍‌ଦିଗି ସେସେନ୍‌ତାନ୍ ଉଁଟ୍‌କ ମିଦିୟନ୍‌ ଓଡ଼ୋଃ ଏଫା ଦିଶୁମ୍ଏତେ ହିଜୁଃଆକ।

ସେବା ଦିଶୁମ୍ଏତେ ଇନ୍‌କୁ ସୋନା ଓଡ଼ୋଃ ବୁଗିନ୍‌ସହାନ୍‌ ଧୁଆନ୍‌ ଆଉକେଦ୍‌ତେ ହିଜୁଃଆ

ଓଡ଼ୋଃ ନେଆଁତେ ପ୍ରାଭୁଆଃ ମାଇନାନ୍ ହୁଇନାଃ।

7 କେଦାର୍‌ରେନ୍ ସବେନ୍ ମିଣ୍ଡି ଗୋଟ୍‌ ଆମାଃତାଃ ମିଦ୍‌ତାଃରେ ହୁଣ୍ଡିୟଃଆକ।

ଓଡ଼ୋଃ ନବାୟୋତ୍‌ରେନ୍ ପେଠା ମିଣ୍ଡିକ ଆମାଃ ସେୱା ରିକାୟା,

ଇନ୍‌କୁ ସୁକୁଆନ୍‌ ଲେକା ଆଇଁୟାଃ ବେଦି ଚେତାନ୍‌ରେ ପାବିତାର୍ ବେଦି ଚେତାନ୍‌ତେ ହିଜୁଃଆକ।

ଓଡ଼ୋଃ ଆଇଙ୍ଗ୍‌ ଆଇଁୟାଃ ମାଇନାନ୍‌ତେ ମାନ୍ଦିର୍‌କେ ସିଙ୍ଗାରେୟା।

8 ରିମିଲ୍‌ ଲେକା ଓଡ଼ୋଃ ଆପ୍‌ନାଃ ତୁକାତେ ଆଫିର୍‌ ରୁହାଡ଼୍‌ତାନ୍‌ ଦୁଦୁମୁଲ୍‌କ ଲେକା, ନିକୁ ଅକଏକ ତାନ୍‌କୁ ?

9 ସାର୍‌ତିଗି ଟାପୁ ସବେନାଃ ଆଇଙ୍ଗ୍‌କେ ତାଙ୍ଗିୟାଁ

ଓଡ଼ୋଃ ତର୍ଶିଶ୍‌ରେନ୍‌ ଜାହାଜ୍‌କ ଆୟୁର୍‌ କେଦ୍‌ତେ ପୁରାଃ ସାଙ୍ଗିନ୍‌ ଏତେ ଆମାଃ ହନ୍‌କକେ ସାବ୍‌କେଦ୍‌ତେ ହିଜୁଃଆ।

ଇନ୍‌କୁ ଆମାଃ ପ୍ରାଭୁ ପାର୍‌ମେଶ୍ୱାର୍‌ଆଃ,

ମେନ୍‌ଦ ଇସ୍ରାଏଲ୍‌ରେନ୍ ପାବିତାର୍‌ ପାର୍‌ମେଶ୍ୱାର୍‌ ମାଇନାନ୍ ନାଗେନ୍ତେ ସୋନା ଓଡ଼ୋଃ ରୁପା ସାବ୍‌କେଦ୍‌ତେ ରୁହାଡ଼ା।

ଚିୟାଃଚି ଇନିଃ ଆମ୍‌କେ ମାଇନାନ୍ ରିକାକାଦା।

10 ଏଟାଃ ଦିଶୁମ୍‌ରେନ୍‌ ହଡ଼କ ଆମାଃ ପାଚ୍‌ରି ବାଇରୁହାଡ଼େୟାକ

ଓଡ଼ୋଃ ଇନ୍‌କୁଆଃ ରାଜାକ ଆମାଃ ସେୱା ରିକାୟାକ।

ଆଇଙ୍ଗ୍‌ ଖିସ୍‌କେଦ୍‌ତେ ଆମ୍‌କେ ଦାଲ୍‌କାଦ୍‌ମେ ରେୟ

ନାହାଁଃ ଆମାଃ ଚେତାନ୍‌ରେ ସୁକୁୟାନ୍‌ଲଃ ଆମ୍‌କେ ଦାୟାକାଦ୍‌ ମେୟାଁଇଙ୍ଗ୍‌।

11 ଏଟାଃ ଦିଶୁମ୍‌ରେନ୍‌ କିଲିକଆଃ ଖୁର୍ଜିକ

ଓଡ଼ୋଃ ଏନ୍ତାଃରେନ୍ ରାଜାକ ତଲ୍‌କେଦ୍‌ତେ ଚିଲ୍‌କା ଆମାଃତାଃ ହିଜୁଃ ରୁହାଡ଼ାଃ।

ଏନାମେନ୍ତେ ଆମାଃ ନାଗାର୍‌ରେୟାଃ ଦୁହାର୍‌ ସବେନ୍ ଇମ୍‌ତା ନିଃଇକେଦ୍‌ତେ ତାଇନାଃ।

ନିଦା ସିଙ୍ଗି ଚିଉଲାହ କା ହାଣ୍ଡେଦଃଆ।

12 ଚିୟାଃଚି ଅକ ରାଇଜ୍ ଚାଏ କିଲିକ ଆମାଃ ସେୱା କାକ ରିକାୟା ଏନା ଜିୟନଃଆ।

ହାଁ ସାର୍‌ତିଗି, ଏନ୍ ଦିଶୁମ୍‌କ ଜିୟନଃଆ।

13 ଲିବାନୋନ୍‌ରେୟାଃ ମାଇନାନ୍‌ ଆମାଃତାଃ ରୁହାଡ଼୍‌ ହିଜୁଃଆ,

ଦେବ୍‌ଦାରୁ ଓଡ଼ୋଃ ସାଇପ୍ରସ୍‌ ଦାରୁ ଆଇଁୟାଃ ପାବିତାର୍ ମାନ୍ଦିର୍‌ ଅଡ଼ାଃରାଃ ସିଙ୍ଗାର୍‌ ନାଗେନ୍ତେ ଏନା ବାଉରାଅଃଆ।

ଓଡ଼ୋଃ ଆଇଙ୍ଗ୍‌ ଆଇଁୟାଃ କାଟାସୁବାରାଃ ଠାୟାଦ୍‌କେ ମାଇନାନ୍‌ ରିକାୟା।

14 ଅକନ୍‌କ ଆମ୍‌କେ ସିଗିଦ୍‌କାଦ୍‌ମାକ, ଇନ୍‌କୁଆଃ ହନ୍‌କ ଅମ୍ବାକେଦ୍‌ତେ ଆମାଃତାଃ ହିଜୁଃଆକ।

ଓଡ଼ୋଃ ଅକନ୍‌କ ଆମ୍‌କେ ମାଇନ୍‌ କାକ ରିକା, ଇନ୍‌କୁ ଆମାଃ କାଟାସୁବାରେ ଜହାର୍‌ମେୟାଁକ।

ଇନ୍‌କୁ ଆମ୍‌କେ, "ପ୍ରାଭୁଆଃ ନାଗାର୍"

ଓଡ଼ୋଃ "ଇସ୍ରାଏଲ୍‌ରେନ୍ ପାବିତାର୍‌ ପାର୍‌ମେଶ୍ୱାର୍‌ ସିୟୋନ୍‌" ମେନ୍ତେ କାଜିମାକ।

15 ଆମ୍ ବାଗିୟାକାନ୍‌ ଓଡ଼ୋଃ ସାଙ୍ଗିନାକାନ୍‌ ତାଇକେନା

ଓଡ଼ୋଃ ଜେତାଏ ଆମାଃ ହରାରେ କାକ ସେନ୍‌।

ଏନ୍‌ରେହ ଆଇଙ୍ଗ୍‌ ଆମ୍‌କେ ଜାନାଅରେୟାଃ ମାଇନାନ୍ ଠାୟାଦ୍

ଓଡ଼ୋଃ ଆମାଃ ହିଜୁଃ କିଲିକଆଃ ପିଢି ଜାକେଦ୍ ରାସ୍‌କାରେୟାଃ ସୁକୁ ଏମାମେୟା।

16 ଏଟାଃ ଦିଶୁମ୍‌ରେନ୍ କିଲିକ ଓଡ଼ୋଃ ରାଜାକ ଆମ୍‌କେ ଆସୁଲ୍‌ମେୟାଁ ଓଡ଼ୋଃ ଆମାଃ ଯାତାନ୍ ଇଦିୟା।

ଯେ ଲେକାଚି ଏଙ୍ଗା ଆୟାଃ ହନ୍‌ରାଃ ଯାତାନ୍ ଇଦିୟା।

ଏନାତେ ଆମ୍ ସାରି ଦାଡ଼ିୟାଃ ଆଇଙ୍ଗ୍‌ ପ୍ରାଭୁ ଆମାଃ ବାଞ୍ଚାଅନିଃ

ଓଡ଼ୋଃ ଆମ୍‌କେ ତନଲ୍ ଏତେ ରାଡ଼ାନିଃ ଓଡ଼ୋଃ ଯାକୁବ୍‌ଆଃ ପେଡ଼େୟାନ୍‌ନିଃ ତାନିଙ୍ଗ୍।

17 ଆଇଙ୍ଗ୍‌ ଆପେୟାଃ ନାଗେନ୍ତେ ମେଡ଼େଦ୍‌ ବାଦ୍‌ଲାରେ ରୁପା

ଓଡ଼ୋଃ ପିତ୍ତାଲ୍‌ ବାଦ୍‌ଲାରେ ସୋନା ଏମାପେୟା।

ସାହାନ୍‌ରେୟାଃ ବାଦ୍‌ଲାରେ ପିତ୍ତାଲ୍‌ ଓଡ଼ୋଃ ଦିରିରାଃ ବାଦ୍‌ଲାରେ ମେଡ଼େଦ୍‌ ଏମାପେୟା।

ଆଡଃଗି ଆମାଃ ଆଗୁଆଇ କାମିରେ ସୁକୁ

ଓଡ଼ୋଃ ଗମ୍‌କେ ଲେକା କାମିତାନ୍ ତେୟାଃରେ ଧାର୍‌ମାନ୍‌ରେୟାଃ ଆକ୍‌ତେୟାର୍‌କେ ଏମାମେୟା।

18 ଆମାଃ ଦିଶୁମ୍‌ରେ ମାପାଃତୁପୁଇଙ୍ଗ୍‌, ଆମାଃ ପାର୍‌ଗାନ୍‌ରେ ହାସୁର୍‌ କାଜି

ଚାଏ ଜିୟନଃରେୟାଃ କାଜିକ କା ଆୟୁମଃଆ।

ମେନ୍‌ଦ ଆମାଃ ପାଚ୍‌ରିରେୟାଃ ନୁତୁମ୍ ପାରିତ୍ରାଣ୍‌

ଓଡ଼ୋଃ ଆମାଃ ମାଇନାନ୍ ରେୟାଃ ନୁତୁମ୍‌ ନାଗାର୍‌ରେ ଦହେୟା।

19 ମାସ୍କାଲ୍ ଦିପିଲିରେ ସିଙ୍ଗି ଆପେୟାଃ ମାସ୍କାଲ୍‌ ଏମଃନିଃ କା ହୁଇନାଃ,

ଚାଏ ନୁବାଃରେ ମାସ୍କାଲ୍ ନାଗେନ୍ତେ ଚାଣ୍ଡୁଃ ଆୟାଃ ରାଁପ୍‌ କାଏ ଏମେୟା।

ମେନ୍‌ଦ ପ୍ରାଭୁ ଆପେୟାଃ ନାଗେନ୍ତେ ଜାନାଅଗି ମାସ୍କାଲ୍‌ନିଃ

ଓଡ଼ୋଃ ପାର୍‌ମେଶ୍ୱାର୍‌ ଆପେୟାଃ ମାନାରାଙ୍ଗ୍‌ ହୁଇନାଃ।

20 ସିଙ୍ଗି ଓଡ଼ୋଃ କାଏ ଡୁବିଜଃଆ ଚାଏ ଚାଣ୍ଡୁଃରାଃ ମାସ୍କାଲ୍ ମାଇଲା କା ହୁଇନାଃ।

ଚିୟାଃଚି ପ୍ରାଭୁ ଆପେୟାଃ ଜାନାଅ ଜାନାଅରେନ୍‌ ମାସ୍କାଲ୍‌ନିଃ ହୁଇନାଃ

ଓଡ଼ୋଃ ଆମାଃ ଏୟମ୍‌ରେୟାଃ ମାହା ଟୁଣ୍ଡୁନାଃ।

21 ମେନ୍‌ଦ ଆମାଃ ସବେନ୍ ହଡ଼କ ଧାର୍‌ମାନ୍‌ ହବାଅଃଆକ,

ଇନ୍‌କୁ ଜାନାଅ ଜାନାଅ ନାଗେନ୍ତେ ଦିଶୁମ୍ ଆକ୍‌ତେୟାର୍‌ ରିକାୟାକ।

ଇନ୍‌କୁ ଆଇଁୟାଃ ମାଇନ୍‌କେ ଉଦୁବେତାନ୍ ରୟାକାନ୍‌ ଦାରୁ ଓଡ଼ୋଃ ତିଃଇରେୟାଃ କାମିତାନ୍‌କ ହବାଅଃଆ।

22 ହୁଡିଙ୍ଗ୍‌ ଝୁଣ୍ଡ୍‌ ପୁରାଃ ମାରାଙ୍ଗ୍ କିଲି ହୁଇନାଃ

ଓଡ଼ୋଃ ନାରାଦୁରାନିଃ ପେଡ଼େୟାନ୍‌ କିଲି ହୁଇନାଃ।

ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌, ଠାଉକା ଦିପିଲିରେ ନେ କାମିକ ରିକାୟା।