ଯିଶାୟ 36

ଯିହୁଦା ଚେତାନ୍‌ରେ ଆସେରିୟା ରାଜାରାଃ ଆକ୍‌ତେୟାର୍‌

1 ରାଜା ହିଜିକିୟରାଃ ରାଇଜ୍‌ତାନ୍‌ ଦିପିଲିରେୟାଃ ଗେଲ୍‌ ଉପୁନିୟା ବାରାଷ୍‌ରେ ଆସେରିୟା ରେନ୍‌ ରାଜା ସନ୍‌ହେରିବ୍‌ ଯିହୁଦା ରାଇଜ୍‌ରାଃ କେସେଦ୍‌ ବିୟୁର୍‌କାନ୍‌ ସବେନ୍‌ ନାଗାର୍‌କେ ଆକ୍‌ତେୟାର୍‌ କେଦା। 2 ଏନ୍‌ ତାୟମ୍‌ତେ ଆସେରିୟା ରେନ୍‌ ରାଜା ମାରାଙ୍ଗ୍‌ ପାଲ୍‌ଟାନ୍‌କଆଃ ଝୁଣ୍ଡ୍‌ଲଃ ମାରାଙ୍ଗ୍‌ ହାକିମ୍‌ ରବ୍‌ଶାକିକେ ଲାଖିଶ୍‍ ସାହାର୍‌ଏତେ ଯୀରୁଶାଲେମ୍‌ତେ ହିଜିକିୟ ରାଜାତାଃ କୁଲ୍‌କିୟା। ଓଡ଼ୋଃ ଇନିଃ ଧୋବିକଆଃ ପିଡ଼ି ହେପାଦ୍‌ରେ ତାଇନ୍‌ତାନ୍‌ ହରାଗେନା ରେୟାଃ ଚେତାନ୍‌ରେ ମିଆଦ୍‌ ବାନ୍ଦା ରାଃ ଆଡ଼ି ହେପାଦ୍‌ରେ ତିଙ୍ଗୁୟାନା। 3 ଏନ୍ତେ ହିଲ୍‌କିୟରାଃ ହନ୍ତେକଡ଼ା ଇଲିୟାକିମ୍‍ ଅକଏଚି ରାଜ୍‌ମାହାଲ୍‌ରେନ୍‌ ଗୁସିୟାଁ ତାଇନ୍‌କେନା, ଶିବ୍‌ନ ନୁତୁମ୍‌ ଅନଲ୍‌ନିଃ ଓଡ଼ୋଃ ଆସଫ୍‌ରାଃ ହନ୍ତେକଡ଼ା ଯୋୟାହ ନୁତୁମ୍‌ ଇତିହାସ୍‌ ଅନଲ୍‌ନିଃ, ନେ ସବେନ୍‌କ ନେପେଲ୍‌ ନାଗେନ୍ତେ ଅଡଙ୍ଗ୍‌ୟାନାକ। 4 ଏନ୍ତେ ମାରାଙ୍ଗ୍‌ ହାକିମ୍‌ ରବ୍‌ଶାକି ଇନ୍‌କୁକେ କାଜିକେଦ୍‌କଆ, "ନାହାଁଃଦ ଆପେ ହିଜିକିୟକେ କାଜିପେ, ଆସେରିୟାରେନ୍‌ ରାଜା ନେ' କାଜି କାଜିତାନାଏ, ଆପେ ଅକେୟାଃ ଚେତାନ୍‌ରେ ନିମିନ୍‌ ଆସ୍ରା ଦହାକାଦାପେ ?" 5 ଆଇଙ୍ଗ୍‌ କାଜିତାନାଇଙ୍ଗ୍‌, ଲାଡ଼ାଇ ନାଗେନ୍ତେ ଆଲେତାଃରେ ସେଣାଁ ଓଡ଼ୋଃ ପେଡ଼େଃ ମେନାଃ ମେନ୍ତେ ଆପେ ଉହାଟ୍‌ ରିକାଏତାନା, ମେନ୍‌ଦ ନେ ସବେନାଃ ଆପେ ନାଗେନ୍ତେ ସାମାକାଜି ତାନାଃ। ଆପେ ଅକେୟାଃ ଚେତାନ୍‌ରେ ଆସ୍ରା କେଦ୍‌ତେ ଆଇଁୟାଃ ବିରୁଧ୍‌ରେ ଲାଡ଼ାଇ ସାନାଙ୍ଗ୍‌ତାନାପେ ? 6 ନେଲେପେ, ଆପେଦ ମିସାର୍‌ ଦିଶୁମ୍‌ ଚେତାନ୍‌ରେ ଆସ୍ରାଏ ତାନାପେ, ଏନାଦ ଟୁକ୍‌ଡ଼ା ଟୁକ୍‌ଡ଼ା କାନ୍‌ ସାଉଁଣି ଲେକା କାନା। ଏନାରାଃ ଚେତାନ୍‌ରେ ତିଃଇ ଦହ ରେଦ ତିଃଇକେ ଏନା ହଟର୍‌ତାଃଏ। ମିସାର୍‌ରେନ୍‌ ଫାରୋ ରାଜା ଚେତାନ୍‌ରେ ଆସ୍ରା ରିକାତାନ୍‌କ ଏନ୍‌ଲେକା ହବାଅଃଆକ।

7 ମେନ୍‌ଦ,ଆମ୍‌ ଆଲେକେ କାଜିରେଦ, "ଆଲେ ଆଲେୟାଃ ପ୍ରାଭୁ ପାର୍‌ମେଶ୍ୱାର୍‌ତାଃରେ ଆସ୍ରାଏ ତାନାଲେ," ତାବ୍‌ଦ ହିଜିକିୟ ଚିୟାଃ ନିକୁଆଃ ସାଲାଙ୍ଗି ଠାୟାଦ୍‌ରେ ତାଇନ୍‌ତାନ୍‌ ଦାଣେଁରାକାବ୍‌ ବେଦି ଓଡ଼ୋଃ ସେୱା ରିକାତାନ୍‌ ଠାୟାଦ୍‌କେ ସାଙ୍ଗିନ୍‌ କେଦ୍‌ତେ, ଯିହୁଦା ଓଡ଼ୋଃ ଯୀରୁଶାଲେମ୍‌ରେନ୍‌ ହଡ଼କକେ କାଜିକାଦ୍‌କ ତାଇକେନା, "ଆପେ ନେ ଦାଣେଁରାକାବ୍‌ ବେଦି ଆୟାର୍‌ରେ ସେୱା ରିକାୟାଏ, ଇନିଃ ଚିନାଃ ଇନିଃଗି ନାହାଁଲିଃ ?" 8 ନାହାଁଃଦ ଆପେକେ କାଜିତାନାଇଙ୍ଗ୍‌, ଆଇଁୟାଃ ଗମ୍‌କେ ଆସେରିୟାରେନ୍‌ ରାଜାଲଃ ମିଆଦ୍‌ ରାଜିନାମା ରିକାଏପେ। ଆପେକେ ବାର୍‌ ହାଜାର୍‌ ସାଦମ୍‌ ଏମାପେୟାଇଙ୍ଗ୍‌, ଓଡ଼ୋଃ ଦାଡ଼ିୟଃ ରେଦ, ଆପେ ଇନ୍‌କୁ ଚେତାନ୍‌ରେ ଦୁବ୍‌ ନାଗେନ୍ତେ ହଡ଼ ସାଲା ଆଉକପେ। 9 ଆପେ ସାଦମ୍‌ ଓଡ଼ୋଃ ଇନ୍‌କୁଆଃ ଚେତାନ୍‌ରେ ଦୁବ୍‌ ନାଗେନ୍ତେ ହଡ଼ ସାଲା ଆଉ ନାଗେନ୍ତେ ମିସାର୍‌ ଦିଶୁମ୍‌ ଚେତାନ୍‌ରେ ଆସ୍ରାଏ ତାନ୍‌ ରେଦ ଚିୟାଃ ଆଇଁୟାଃ ଗମ୍‌କେଆଃ ଲାଟ୍‌ସାହେବ୍‌କ ଏତେ ଜେତାଏ ମିହୁଡ଼୍‌କେ ଆତମ୍‌ ଦାଡ଼ିୟାଃପେ ? 10 ଆଇଙ୍ଗ୍‌ ଚିୟାଃ ନେ ଠାୟାଦ୍‌କେ ପ୍ରାଭୁଆଃ ବେଗାର୍‌ ହୁକୁମ୍‌ତେ ଜିୟନ୍‌ ନାଗେନ୍ତେ ହିଜୁଃଆ କାନା ? ପ୍ରାଭୁ ଆଇଙ୍ଗ୍‌କେ କାଜିକେଦା, "ନେ ଦିଶୁମ୍‌ ବିରୁଧ୍‌ରେ ସେନ୍‌କେଦ୍‌ତେ ଜିୟନ୍‌ ରିକାଏମେ।"

11 ଏନ୍ତେ ଇଲିୟାକିମ୍‍, ଶିବ୍‌ନ ଓଡ଼ୋଃ ଯୋୟାହ ମାରାଙ୍ଗ୍‌ ହାକିମ୍‌ ରବ୍‌ଶାକିକେ କାଜିକିୟା, "ବିନ୍ତିମେ ତାନାଲେ, ଆମାଃ ନେ ଦାସିକଲଃ ଅରାମିୟ ଜାଗାର୍‌ତେ ଜାଗାର୍‌ ରିକାଏମେ, ଚିୟାଃଚି ଆଲେ ଏନ୍‌ ଜାଗାର୍‌ ଆଟ୍‌କାର୍‌ଉରୁମ୍‌ ଦାଡ଼ିୟାଲେ। ପାଚ୍‌ରି ଚେତାନ୍‌ରେ ଦୁବାକାନ୍‌ ହଡ଼କଆଃ ଆୟାର୍‌ରେ ଆଲେଲଃ ଯିହୁଦି ହଡ଼କଆଃ ଜାଗାର୍‌ତେ ଆଲମ୍‌ ଜାଗାର୍‌ ରିକାୟା।"

12 ମେନ୍‌ଦ ମାରାଙ୍ଗ୍‌ ହାକିମ୍‌ ରବ୍‌ଶାକି କାଜିରୁହାଡ଼୍‌ କେଦ୍‌କଆଏ, "ଚିୟାଃ ଆଇଁୟାଃ ଗମ୍‌କେ ଏସ୍‌କାର୍‌ ଆପେୟାଃ ଗମ୍‌କେ ତାନିଃ ଓଡ଼ୋଃ ଆପେକେ ନେ କାଜି କାଜିନାଙ୍ଗ୍‌ ଆଇଙ୍ଗ୍‌କେ ଆପେତାଃତେ କୁଲାକାଦିୟାଁ ? ଚିୟାଃ ଇନିଃ ପାଚ୍‌ରି ଚେତାନ୍‌ରେ ଦୁବାକାନ୍‌ ହଡ଼କକେ ହଁଗି ଜାଗାର୍‌ ନାଗେନ୍ତେ ଚିୟାଃ କାଏ କୁଲ୍‌ କାଦ୍‌କଆ ? ଚିୟାଃଚି କେସେଦ୍‌ ହବାକାନ୍‌ ନାଗାର୍‌ରେ ଜଜମାଃ ରେୟାଃ ହାନାଟିଙ୍ଗ୍‌ ହବାଅଃ ରେଦ ଇନ୍‌କୁ ଆପେ ଲେକା ମାଇଲା ତେୟାଃ ଜଜମ୍‌ ରିକାୟାକ ଓଡ଼ୋଃ ଆପ୍‌ନାଃ ପେଶାବ୍‌ ଦାଆଃ ନୁଏଁୟାକ ?" 13 ଏନ୍ତେ ମାରାଙ୍ଗ୍‌ ହାକିମ୍‌ ରବ୍‌ଶାକି ତିଙ୍ଗୁୟାନା ଓଡ଼ୋଃ କାଉରି କେଦ୍‌ତେ ଯିହୁଦି ହଡ଼କଆଃ ଜାଗାର୍‌ତେ ନେ କାଜି କାଜିକେଦା, "ଆପେ ସବେନ୍‌କ, ଆସେରିୟା ରେନ୍‌ ରାଜା ଅକ କାଜି କାଜିତାନାଏ, ଏନ୍‌ କାଜି ଆୟୁମେପେ। 14 ରାଜା ନେ କାଜି କାଜିତାନାଏ, ହିଜିକିୟ ଆପେକେ ଆଲକାଏ ବେଦାପେକା। ଚିଆଃଚି ଇନିଃ ଆପେକେ ବାଞ୍ଚାଅ କାଏ ଦାଡ଼ିୟା ? 15 ଓଡ଼ୋଃ ପ୍ରାଭୁ ଆଲେକେ ବାଞ୍ଚାଅ ରିକାଲେୟା ଓଡ଼ୋଃ ନେ ନାଗାର୍‌ ଆସେରିୟା ରାଜାରାଃ ଆକ୍‌ତେୟାର୍‌ କା ହବାଅଃଆ, ହିଜିକିୟ ପ୍ରାଭୁତାଃରେ ଆସ୍ରା ଦହ ନାଗେନ୍ତେ ଆଲକାଏ କାଜିକା। 16 ହିଜିକିୟରାଃ କାଜି ଆଲପେ ଆୟୁମାଃ, ଆସେରିୟା ରେନ୍‌ ରାଜା ନେ କାଜି କାଜିତାନାଏ, ଆଇଁୟାଃଲଃ ମିଦ୍‌ ରିକାଅଃପେ, ଆଇଁୟାଃତାଃ ହିଜୁଃ ରୁହାଡ଼୍‌ପେ। ଏନ୍‌ରେଦ ଆପେ ସବେନ୍‌କ ଆଶିଷ୍‌ ନାମେୟାଃ ଓଡ଼ୋଃ ଆପାନ୍‌ ଆପାନ୍‌ ଦାଖ୍‌ନାଡ଼ି ରେୟାଃ ଜ ଓଡ଼ୋଃ ଲଆ ଜ ଜମ୍‌ ଦାଡ଼ିୟାଃପେ ଓଡ଼ୋଃ ଆପ୍‌ନାଃ ଆପ୍‌ନାଃ କୁଆଁ ଏତେ ଦାଆଃ ନୁଁ ଦାଡ଼ିୟାଃପେ। 17 ତାୟମ୍‌ତେ ଆଇଙ୍ଗ୍‌ ହିଜୁଃକେଦ୍‌ତେ ଆପେକେ ଆପେୟାଃ ଦିଶୁମ୍‌ ଲେକା ମିଆଦ୍‌ ଦିଶୁମ୍‌ତେ ଇଦିପେୟାଇଙ୍ଗ୍‌। ଏନ୍‌ ଦିଶୁମ୍‌ରେ ହିତା ଜ, ନାୱା ଦାଖ୍‌ରାସି ଓଡ଼ୋଃ ହଲଙ୍ଗ୍‌ ଓଡ଼ୋଃ ଦାଖ୍‌ବାକ୍‌ଡ଼ିତେ ପେରେୟାକାନ୍‌ ତାଇନାଃ। 18 ପ୍ରାଭୁ ଆବୁକେ ବାଞ୍ଚାଅବୁଆଏ, ନେ କାଜି ହିଜିକିୟ କାଜିକେଦ୍‌ତେ ଆପେକେ ଆଲକାଏ ବେଦାପେକା। ଆସେରିୟା ରେନ୍‌ ରାଜାରାଃ ତିଃଇ ଏତେ ଜେତା ମାହାପୁରୁ ଚି ଆପାନ୍‌ କିଲିକକେ ବାଞ୍ଚାଅ ଦାଡ଼ିକାଦା ? 19 ହମାତ୍‌ ଓଡ଼ୋଃ ଅର୍ପଦ୍‌ରାଃ ମାହାପୁରୁକ କତାଃରେ ମେନାକଆ ? ସଫର୍ବୟିମ୍‌ରାଃ ମାହାପୁରୁକ କତାଃରେ ମେନାକଆ ? ଚିୟାଃ ଇନ୍‌କୁ ଆଇଁୟାଃ ତିଃଇ ଏତେ ଶାମରିୟାକେ ବାଞ୍ଚାଅ ଦାଡ଼ିକାଦାକ ? 20 ନେ ଦିଶୁମ୍‌ରେନ୍‌ ମାହାପୁରୁକ ଏତେ ଅକନ୍‌ ମାହାପୁରୁ ଆପାନ୍‌ ଦିଶୁମ୍‌କେ ବାଞ୍ଚାଅ ଦାଡ଼ିକାଦା ଚି ? ତାବ୍‌ଦ ପ୍ରାଭୁ ଆଇଁୟାଃ ତିଃଇ ଏତେ ଚିଲ୍‌କା କେଦ୍‌ତେ ଯୀରୁଶାଲେମ୍‌କେ ବାଞ୍ଚାଅୟା ?"

21 ମେନ୍‌ଦ ହଡ଼କ ଚୁପ୍‌ଚାପ୍‌ ତାଇନ୍‌ୟାନାକ, ଇନିଃକେ ଜେତ୍‌ନାଃ କାକ କାଜିରୁହାଡ଼୍‌କିୟା। ଚିୟାଃଚି ରାଜା ହିଜିକିୟ ଇନ୍‌କୁକେ କାଜିୟାକାଦ୍‌କ ତାଇକେନା, "ଇନିଃକେ ଜେତ୍‌ନାଃ ଆଲପେ କାଜିରୁହାଡ଼ିୟା।" 22 ଏନ୍ତେ ହିଲ୍‌କିୟରାଃ ହନ୍ତେକଡ଼ା ଇଲିୟାକିମ୍‍, ଶିବ୍‌ନ ନୁତୁମ୍‌ ଅନଲ୍‌ନିଃ ଅଡ଼ାଃରେନ୍‌ ଗମ୍‌କେ ଓଡ଼ୋଃ ଆସଫ୍‌ରାଃ ହନ୍ତେକଡ଼ା ଯୋୟାହ ନୁତୁମ୍‌ ଇତିହାସ୍‌ ଅନଲ୍‌କ ଆପାନ୍‌ ଆପାନ୍‌ ଲିଜାଃ ଚେଚାଃ କେଦ୍‌ତେ ରାଜା ହିଜିକିୟତାଃତେ ସେନଃୟାନାକ ଓଡ଼ୋଃ ମାରାଙ୍ଗ୍‌ ହାକିମ୍‌ ରବ୍‌ଶାକିରାଃ କାଜିକ ଇନିଃକେ ଉଦୁବ୍‌କିୟାକ।