1 ଏନ୍‌ ହୁଲାଙ୍ଗ୍‌ ଏୟା ଝାନ୍‌ କୁଡ଼ିକ, ମିଆଦ୍‌ କଡ଼ାକେ ସାବ୍‌କେଦ୍‌ତେ କାଜିୟାକ, "ଆଲେ ଆଲେୟାଃ ଜଜମାଃ ଜମେୟାଁଲେ, ଆପ୍‌ନାଃ ଲିଜାଃ ତୁସିଙ୍ଗ୍‌ୟଁଆଲେ ଓଡ଼ୋଃ ଆମାଃ ନୁତୁମ୍‌ତେ ଏସ୍‌କାର୍‌ ସାରିୟଃଆଲେ। ଆମ୍‌ ଆଲେୟାଃ ଗିହୁଃ ସାଙ୍ଗିନେମେ।"

2 ଏନ୍‌ ଦିପିଲିରେ ପ୍ରାଭୁଆଃ କତ* ନେଲଃ ନାଗେନ୍ତେ ସୁଗାଡ଼ାନ୍‌ ଓଡ଼ୋଃ ମାଇନାନ୍‌ ହବାଅଃଆ। ଇସ୍ରାଏଲ୍‌ରେ ଜୀଉବାଞ୍ଚାଅ ନାମାକାଦ୍‌ ହଡ଼କ ନାଗେନ୍ତେ ଦିଶୁମ୍‌ରାଃ ଜ ପୁରାଃ ବୁଗିନ୍‌ ଓଡ଼ୋଃ ମାନାରାଙ୍ଗ୍‌ ହବାଅଃଆ। 3 ଅକନ୍‌କ ସିୟୋନ୍‌ରେ ଚାଏ ଯୀରୁଶାଲେମ୍‌ରେ ତାଇନାଃକ ଓଡ଼ୋଃ ଅକନ୍‌କଆଃ ନୁତୁମ୍‌ ଜୀନିଦ୍‌ ହଡ଼କଆଃ ଥାଲାରେ ନୁତୁମ୍‌ ତାଇନାଃ, ଇନ୍‌କୁ ପାବିତାର୍‌ ହଡ଼ ମେନ୍ତେକ କାଜିଅଃଆ। 4 ପ୍ରାଭୁ ସିୟୋନ୍‌ରେନ୍‌ କୁଡ଼ିକଆଃ ଗୁହ୍ନା ଫାର୍‌ଚି ରିକାୟା। ବିଚାର୍‌ ରିକା ଆତ୍ମା ଓଡ଼ୋଃ ଜୁନୁଲ୍‌ ଆତ୍ମା ହରାତେ ଯୀରୁଶାଲେମ୍‌ଏତେ ମାୟୋମ୍‌ରେୟାଃ ଚିହ୍ନାକେ ଫାର୍‌ଚି ରିକାୟା। 5 ଇମ୍‌ତା ପ୍ରାଭୁ ଗଟା ସିୟୋନ୍‌ ବୁରୁ ଚେତାନ୍‌ରେ ଓଡ଼ୋଃ ଏନ୍ତାଃରେ ହୁଣ୍ଡିକାନ୍‌ ସବେନ୍‌କଆଃ ଚେତାନ୍‌ରେ ସିଙ୍ଗି ଇମ୍‌ତା ରିମିଲ୍‌ ଓଡ଼ୋଃ ସୁକୁଲ୍‌ ଏନ୍ତେ ନୁବାଃ ଇମ୍‌ତା ଜୁଲଃତାନ୍‌ ସେଙ୍ଗେଲ୍‌ରାଃ ମାସ୍କାଲ୍‌ ରିକାଏୟା। ଓଡ଼ୋଃ ପ୍ରାଭୁଆଃ ମାନାରାଙ୍ଗ୍‌ ସବେନ୍‌ସାଃ ଚାପ୍‌ରାଅ କେଦ୍‌ତେ ହାରୁବ୍‌କଆଃ ଓଡ଼ୋଃ ଗଟା ସାହାର୍‌କେ ବାଞ୍ଚାଅୟା। 6 ନେଆଁ ସିଙ୍ଗିରାଃ ତେଜ୍‌ ରାଁପ୍‌ଏତେ ବାଞ୍ଚାଅଃ ନାଙ୍ଗ୍‌ ମିଆଦ୍‌ ଉମ୍ବୁଲ୍‌ ଲେକା ଆସ୍ରା ହବାଅଃଆ। ଦୁଦ୍‌ଗାର୍‌ ହୟ ଓଡ଼ୋଃ ଗାମା ଦାଆଃଏତେ ବାଞ୍ଚାଅ ନାମେ ନାଙ୍ଗ୍‌ ମିଆଦ୍‌ କା ବର ଲେକାନ୍‌ ତାଇନଃ ଠାୟାଦ୍‌ ହବାଅଃଆ।