1 ଆଇଙ୍ଗ୍‌ ଆଇଁୟାଃ ଦୁଲାଡ଼୍‌ନିଃ ନାଙ୍ଗ୍‌

ଓଡ଼ୋଃ ଆୟାଃ ଦାଖ୍‌ବାକ୍‌ଡ଼ି ବିଷାଏରେ ମିଆଦ୍‌ ଦୁରାଙ୍ଗ୍‌ ଦୁରାଙ୍ଗ୍‌ୟେଁଇଙ୍ଗ୍‌।

ମିଆଦ୍‌ ବୁରୁରାଃ ପୁରାଃ ବୁଗିନ୍‌ ହାଁସାରେ

ଆଇଁୟାଃ ଦୁଲାଡ଼୍‌ରାଃ ମିଆଦ୍‌ ବୁଗିନ୍‌ ଦାଖ୍‌ବାକ୍‌ଡ଼ି ତାଇକେନା।

2 ଇନିଃ ହାଁସା ଉର୍‌କେଦ୍‌ତେ ଏନାରେୟାଃ ଦିରିକକେ ଗେନାକେଦା

ଓଡ଼ୋଃ ପୁରାଃ ବୁଗିନ୍‌ ଦାଖ୍‌ନାଡ଼ି ରଏକେଦାଏ।

ଏନ୍‌ ଦାଖ୍‌ବାକ୍‌ଡ଼ି ଥାଲାରେ ମିଆଦ୍‌ ଗାଡ଼୍‌ ବାଇକେଦାଏ

ଓଡ଼ୋଃ ମିଆଦ୍‌ ଦାଖ୍‌ରାସି ଅଡଙ୍ଗ୍‌ ନାଗେନ୍ତେ ଘାନା ହଁଗି ବାଇକେଦାଏ।

ଏନ୍ତେ ଇନିଃ ବୁଗିନ୍‌ ଦାଖ୍‌ଜ ନାମ୍‌ ନାଗେନ୍ତେ ତାଙ୍ଗିକେଦା।

ମେନ୍‌ଦ ଏନାରେ ବୁଗିନ୍‌ ଦାଖ୍‌ଜ, କା ଜ' ୟାନା।

3 ହେ ଯୀରୁଶାଲେମ୍‌ରେନ୍‌ ଓଡ଼ୋଃ ଯିହୁଦାରେନ୍‌ ହଡ଼କ, ଆଇଙ୍ଗ୍‌ ଆପେକେ ବିନ୍ତିପେ ତାନାଇଙ୍ଗ୍‌, ନାହାଁଃଦ ଆପେ ଆଇଁୟାଃ ଓଡ଼ୋଃ ରୟାକାନ୍‌ ଦାଖ୍‌ବାକ୍‌ଡ଼ି ବିଷାଏରେ ବିଚାରେପେ। 4 ଆଇଙ୍ଗ୍‌ ଆଇଁୟାଃ ଦାଖ୍‌ବାକ୍‌ଡ଼ି ନାଗେନ୍ତେ ଅକଆଃ ରିକାକେଦାଇଙ୍ଗ୍‌, ଏନାଏତେ ଆଦ୍‌କା ଚିନାଃ ରିକାକାଦ୍‌ ତେୟାଃଇଙ୍ଗ୍‌ ? ଆଇଙ୍ଗ୍‌ ବୁଗିନ୍‌ ଦାଖ୍‌ଜ ନାମ୍‌ ନାଗେନ୍ତେ ତାଙ୍ଗିତାନ୍‌ ଇମ୍‌ତା, ଏନାରେ ବୁଗିନ୍‌ ଜ ଚିନାଃମେନ୍ତେ କା ଜ'ୟାନା ?

5 ମେନ୍‌ଦ ନାହାଁଃ ଆୟୁମେପେ, "ଆଇଙ୍ଗ୍‌ ଆଇଁୟାଃ ଦାଖ୍‌ବାକ୍‌ଡ଼ିକେ ଚିନାଃ ଚିକାଏୟାଇଙ୍ଗ୍‌, ଏନା ନାହାଁଃ ଆପେକେ ଉଦୁବାପେୟାଇଙ୍ଗ୍‌, ଆଇଙ୍ଗ୍‌ ଏନାରାଃ ଚାରିୟସାଃ କେସେଦ୍‌ ବିୟୁର୍‌କାନ୍‌ ତେୟାଃକେ ଆତମ୍‌ତାଃଇଙ୍ଗ୍‌ ଓଡ଼ୋଃ ଏନା ଜିଅନ୍‌କଆଃ। ଏନାରାଃ ଭିତ୍‌କକେ ହାଦୁଡ଼୍‌ ରିକାୟା, ଏନ୍ତେ ଏନା କାଟାଲଃ ତିକା ରେସେଦଃଆ। 6 ଆଇଙ୍ଗ୍‌ ଏନାକେ ଉଜ୍‌ଡ଼ାଅତାଃଇଙ୍ଗ୍‌, ଏନାରାଃ କତକ କା ମାଆଃ ସାଫାଅଃଆ ଚାଏ ଏନାରାଃ ହାଁସା କା ଉର୍‌ କଡାଅଃଆ। ଏନାରେ ଦଧାଡ଼ି ଜାନୁମ୍‌ ଚୁପାଦ୍‌ତେ ପେରେଜଃଆ। ଆଇଙ୍ଗ୍‌ ରିମିଲ୍‌କେ ହୁକୁମ୍‌ ଏମାଇୟାଇଙ୍ଗ୍‌, ଏନ୍‌ ଚେତାନ୍‌ ଦାଆଃ ଆଲକାଏ ଗାମାଏକା।"

7 ପେଡ଼େୟାନ୍‌ ପ୍ରାଭୁଆଃ ଦାଖ୍‌ବାକ୍‌ଡ଼ି,

ଇସ୍ରାଏଲ୍‌ କିଲିକ ତାନ୍‌କ,

ଯିହୁଦାରେନ୍‌ ହଡ଼କ

ଆୟାଃ ରୟାକାନ୍‌ ସୁଗାଡ଼ାନ୍‌ ହିତା ଲେକାନ୍‌କ ତାନ୍‌କ।

ଇନିଃ ଇନ୍‌କୁତାଃଏତେ ବୁଗିନାଃରାଃ ଜ ନାମ୍‌ ନାଙ୍ଗ୍‌ ଆସ୍ରାକାଦ୍‌ ତାଇକେନାଏ, ମେନ୍‌ଦ ଏତ୍‌କାନାଃ ନେଲ୍‌କେଦାଏ।

ଇନିଃ ଧାର୍‌ମାନ୍‌ରାଃ କାଜିକ ଆୟୁମ୍‌ ନାଙ୍ଗ୍‌ ଆସ୍ରାକାଦ୍‌ ତାଇକେନାଏ, ମେନ୍‌ଦ ରାନାଃ ଆୟୁମ୍‌କେଦାଏ।

8 ଆପେଏତେ ଅକନ୍‌କ ଅଡ଼ାଃ ଚେତାନ୍‌ରେ ଆଡଃଗି ଅଡ଼ାଃକ ବାଇତାନାକ ଓଡ଼ୋଃ ପିଡ଼ିଏତେ ପିଡ଼ି ମେସା ଇଦିତାନାକ। ଏନ୍‌ ସବେନ୍‌କଆଃ ଚିମିନ୍‌ ବରୱାନ୍‌ଗି ହବାଅଃଆ, ଚିୟାଃଚି ନେ ଲେକାତେ ଓଡ଼ୋଃ ଜେତା ଠାୟାଦ୍‌ କା ତାଇନାଃ। ଏନ୍‌ ଠାୟାଦ୍‌ରେ ଆପେ ଏସ୍‌କାର୍‌ଗି ତାଇନାଃପେ। 9 ପେଡ଼େୟାନ୍‌ ପ୍ରାଭୁ ଆଇଁୟାଃ ଲୁତୁର୍‌ରେ କାଜିତାନାଏ, "ସାର୍‌ତିଗି ପୁରାଃ ମାପ୍‌ରାଙ୍ଗ୍‌ ଅଡ଼ାଃକ ହାଦୁଡ଼୍‌ କେଦ୍‌ତେ ହାଁସାରେ ମେସାଅଃଆ, ହଡ଼କ ତାହିନଃ ତାନ୍‌ ସୁଗାଡ଼ାନ୍‌ ଅଡ଼ାଃକ ସିଃସଏଃ ଠାୟାଦ୍‌ ହବାଅଃଆ। 10 ଗେଲ୍‌ ଏକଡ଼୍‌ ଦାଖ୍‌ବାକ୍‌ଡ଼ିଏତେ ହିସିବାର୍‌ ଲିଟର୍‌ ଦାଖ୍‌ରାସି ଅଡଙ୍ଗ୍‌ଅଃଆ। ମିଦ୍‌ କୁଣ୍ଟାଲ୍‌ ହିତାଏତେ ଗେଲ୍‌ କେଜି ଏସ୍‌କାର୍‌ ଜ ହବାଅଃଆ।"

11 ଅକନ୍‌କ ଇଲିଆର୍‌ଖି ନୁଏଁ ନାଗେନ୍ତେ ସେତାଃ ଇଦାନ୍‌ରେ ବିରିଦାକ ଓଡ଼ୋଃ ନୁଁ ବୁଲ୍‌କେଦ୍‌ତେ ପୁରାଃ ନୁବାଃ ଜାକେଦ୍‌ ଏୟନ୍‌ଗି ତାଇନାକ, ଇନ୍‌କୁଆଃ ଚିମିନ୍‌ ବରୱାନ୍‌ଗି ହବାଅଃଆ। 12 ଇନ୍‌କୁଆଃ ଭୋଜିରେ ବାନାମ୍‌, ସାରାଙ୍ଗି, ମୁର୍‌ଲି, ଡିବିତାବ୍‌ଲା ଓଡ଼ୋଃ ଇଲିଆର୍‌ଖି, ନେ ସବେନାଃ ତାଇନାଃ। ମେନ୍‌ଦ ଇନ୍‌କୁ ପ୍ରାଭୁଆଃ କାଜିକାମିରେ ମନ୍‌ କାକ ଏମାଃ ଚାଏ ଆକଆଃ ତିଃଇରେୟାଃ କାମିକ ବୁଗିନାଃ ଚି ଏତ୍‌କାନାଃ ଏନା କାକ ନେଲାଃ। 13 ଏନାତେ ଆଇଁୟାଃ ହଡ଼କ ସେଣାଁ କା ହବାଅଃ ହରାତେ ତଲଃଆକ। ମାଇନାନ୍‌ ହଡ଼କ ରେଙ୍ଗେଃତେ ଗଜଃଆକ ଓଡ଼ୋଃ ଇନ୍‌କୁଆଃ ହଡ଼କଆଃ ହଟଃ ତେତାଙ୍ଗ୍‌ତେ ରହଡ଼ଃଆ। 14 ଏନାମେନ୍ତେ ହୁଆଙ୍ଗ୍‌ଗାଡ଼ା ଆୟାଃ ଲାହିଦ୍‌କେ ପାସ୍‌ରାଅ କାଦା ଓଡ଼ୋଃ ମଚା ତାୟାଃକେ ପୁରାଃଗି ଚାହାବାକାଦା। ଓଡ଼ୋଃ ଏନାରେ ଇନ୍‌କୁଆଃ ମାନାରାଙ୍ଗ୍‌, ଇନ୍‌କୁଆଃ ହଡ଼କ, ଲାଡ଼ାଇତାନ୍‌ ହଡ଼କ, ଓଡ଼ୋଃ ରିଜ୍‌ରାଙ୍ଗ୍‌ ରିକାତାନ୍‌ ହଡ଼କ ନିୟାମ୍‌ ଲେକାତେ ଏନ୍‌ ଭିତାର୍‌ରେ ଉୟୁଗଃଆକ।

15 ଏନାମେନ୍ତେ ସବେନ୍‌ ହଡ଼କକେ ହୁଡିଙ୍ଗ୍‌ ରିକାଅଃଆ ଓଡ଼ୋଃ ଅକନ୍‌କ ଆପାନ୍‌କେ ମାରାଙ୍ଗ୍‌ୟେଁନ୍‌ ରିକାନ୍‌ତାନାକ, ଇନ୍‌କୁକେ ଲେବେଃ ରିକାଅଃଆ। 16 ମେନ୍‌ଦ ପେଡ଼େୟାନ୍‌ ପ୍ରାଭୁ ଆୟାଃ ନ୍ୟାୟ ହରାତେ ମାରାଙ୍ଗ୍‌ ହବାଅଃଆଏ ଓଡ଼ୋଃ ପାବିତାର୍‌ ପାର୍‌ମେଶ୍ୱାର୍‌ ଆୟାଃ ଧାର୍‌ମାନ୍‌ ହରାତେ ଆପାନ୍‌କେ ପାବିତାର୍‌ ଲେକା ଉଦୁବେନାଏ। 17 ଏନ୍‌ ଦିପିଲିରେ ମିଣ୍ଡିକ ଆପାନ୍‌ ଆତିଙ୍ଗ୍‌ ଠାୟାଦ୍‌ରେ ଆତିଙ୍ଗ୍‌ୟାଁଃକ ଓଡ଼ୋଃ ମିଣ୍ଡିହନ୍‌କ କିସାଁଣ୍‌ ହଡ଼କଆଃ ହାଦୁଡ଼୍‌ ଅଡ଼ାଃରାଃ ଠାୟାଦ୍‌ରେ ଆତିଙ୍ଗ୍‌ୟାଁଃକ।

18 ଅକନ୍‌କ ବେଦା ଲେକାନ୍‌ ବାହେର୍‌ରେ ପାପ୍‌ କାଜିକେ ଓଡ଼ୋଃ ଉରିକ୍‌ ଗାଡ଼ି ତନଲ୍‌ ବାହେର୍‌ରେ କା ଧାର୍‌ମାନ୍‌ କାଜିକେ ସାବ୍‌କେଦ୍‌ତେ ତାହିଜ୍‌ ଆଉୱେୟାକ, ଇନ୍‌କୁ ସାର୍‌ପାଅଃକାକ। 19 ଇନ୍‌କୁ କାଜିୟାଃକ, "ପ୍ରାଭୁ ଇମ୍‌ତାଗି ରିକାଏମେ, ଜାଲ୍‌ଦି ଇନିୟାଃ କାମିକେ ରିକାଏମେ, ତାବ୍‌ଦ ଆଲେ ନେଲେୟାଲେ। ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌ ଅକଆଃ ରିକା ନାଗେନ୍ତେ ଉହାଟ୍‌ କାଦା, ଏନା ଜାଲ୍‌ଦି ହବାଅଃକା, ତାବ୍‌ଦ ଆଲେ ସାରି ଦାଡ଼ିୟାଲେ।"

20 ଅକନ୍‌କ ଏତ୍‌କାନ୍‌ କାଜିକେ ବୁଗିନ୍‌ ଓଡ଼ୋଃ ବୁଗିନାଃ ତେୟାଃକେ ଏତ୍‌କାନାଃ ମେନ୍ତେ କାଜିୟାଃକ, ନୁବାଃକେ ମାସ୍କାଲ୍‌ ଓଡ଼ୋଃ ମାସ୍କାଲ୍‌କେ ନୁବାଃ, ସିବିଲ୍ ତେୟାଃକେ ମେହେର୍‌ ଓଡ଼ୋଃ ମେହେର୍‌ ତେୟାଃକେ ସିବିଲ୍ ମେନ୍ତେ କାଜିୟାଃକ, ଇନ୍‌କୁ ସାର୍‌ପାଅଃକାକ।

21 ଅକନ୍‌କ ଆପ୍‌ନାଃ ଆପ୍‌ନାଃ ନାଜେର୍‌ରେ ସେଣାଁନ୍‌ ଓଡ଼ୋଃ ଚାତୁର୍‌ ଆଟ୍‌କାର୍‌ରେନ୍‌ ହଡ଼କ, ସାର୍‌ପାଅଃକାକ।

22 ଅକନ୍‌କ ଇଲିଆର୍‌ଖି ନୁଁ ନାଗେନ୍ତେ ଓଡ଼ୋଃ ରାକାମ୍‌ ରାକାମ୍‌ ଇଲିଆର୍‌ଖି ମେସା ନାଗେନ୍ତେ କାକ ବରୟା, 23 ଓଡ଼ୋଃ ଅକନ୍‌କ ଲାଁଚ୍‌ ଇଦିକେଦ୍‌ତେ ଏତ୍‌କାନ୍‌ ହଡ଼କେ ବେଗାର୍‌ ଚିଟାନିଃ ମେନ୍ତେ କାଜିତାନ୍‌ଲଃ ଧାର୍‌ମାନ୍‌ ହଡ଼ରାଃ ଧାରାମ୍‌ ଇନିଃତାଃଏତେ ସାଙ୍ଗିନ୍‌ ରିକାଃକ, ଇନ୍‌କୁ ସାର୍‌ପାଅଃକାକ। 24 ଏନାମେନ୍ତେ ସେଙ୍ଗେଲ୍‌ରେୟାଃ ଲୁଠି ଜେ'ଲେକା ବୁସୁଃକେ ଅଣ୍ଡର୍‌ ରିକାଏୟା ଓଡ଼ୋଃ ରହଡ଼୍‌ ତାସାଦ୍‌ ଜେ'ଲେକା ସେଙ୍ଗେଲ୍‌ତେ ଅଣ୍ଡର୍‌କେନଃଆ, ଏନ୍‌ଲେକାଗି ଇନ୍‌କୁଆଃ ରେହେଦ୍‌ ଜିୟନ୍‌କଆଃ ଓଡ଼ୋଃ ଇନ୍‌କୁଆଃ ବାହା ଧୁଡ଼ି ଲେକା ଅଟାଙ୍ଗ୍‌କଆଃ। ଚିୟାଃଚି ଇନ୍‌କୁ ପେଡ଼େୟାନ୍‌ ପ୍ରାଭୁଆଃ ଆନ୍‌ଚୁକେ କାକ ମାନାତିଙ୍ଗ୍‌କାଦା ଓଡ଼ୋଃ ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌ଆଃ ବାଚାନ୍‌କେ କାକ ଆୟୁମ୍‌କେଦା। 25 ଏନାମେନ୍ତେ ପ୍ରାଭୁଆଃ ଖିସ୍‌ ଆୟାଃ ହଡ଼କଆଃ ବିରୁଧ୍‌ରେ ବିରିଦ୍‌କାନା ଓଡ଼ୋଃ ଇନ୍‌କୁକେ ସାଜାଇ ଏମ୍‌ ନାଗେନ୍ତେ ଆୟାଃ ତିଃଇ ଜିଲିଙ୍ଗ୍‌ କାନା। ବୁରୁକ ଏକ୍‌ଲାଅଃ ୟାନା, ଗୟାକାନ୍‌ ହଡ଼୍‌ମ ହରାକରେ ମାଇଲା ଲେକା ଉୟୁଗାକାନା। ନେ ସବେନ୍‌ ହବାଅଃତାନ୍‌ ରେୟଗି, ଇନିୟାଃ ଖିସ୍‌ କା ରୁଡୁଃତାନା, ଇନିୟାଃ ତିଃଇ ଆଡଃଗି ଜିଲିଙ୍ଗ୍‌ କାନା।

26 ପ୍ରାଭୁ ସବେନ୍‌ ସାଙ୍ଗିନ୍‌ ଦିଶୁମ୍‌ରେନ୍‌ ଜାତିକ ନାଗେନ୍ତେ ମିଆଦ୍‌ ଝାଣ୍ଡା ବିଦେୟାଏ। ଇନିଃ ଅତେ ଦିଶୁମ୍‌ରେୟାଃ ଟୁଣ୍ଡୁଏତେ ସବେନ୍‌କକେ ମିଆଦ୍ ସୁଗାଡ଼ାନ୍‌ ସିସ୍‌କାର୍‌ ସାଡ଼ି ହରାତେ କେଡ଼ାକଆ, ଏନ୍ତେ ଇନ୍‌କୁ ଆୟୁମ୍‌କେଦ୍‌ତେ ଇମ୍‌ତାଗି ଓଡ଼ୋଃ ଜାଲ୍‌ଦିଗି ହିଜୁଃଆକ। 27 ଇନ୍‌କୁଏତେ ଜେତାଏ କାକ ଲାଗାଅଃଆ ଚାଏ କାକ ତହଦଃଆ। ଜେତାଏ କାକ ଝୁପାଅଃଆ ଚାଏ କାକ ଦୁଡ଼ୁମାଃ, ଜେତାଏୟାଃ ମାୟାଙ୍ଗ୍‌ରାଃ ତନଲ୍‌ତେୟାଃ କା ରାଡ଼ାଅଃଆ ଚାଏ ଖାର୍‌ପାରେୟାଃ ତନଲ୍‌ କା ରାଡ଼ାଅଃଆ। 28 ଇନ୍‌କୁଆଃ ଧାନୁ ଚିଆରି ଲେସେର୍‌ଗିଆ ଓଡ଼ୋଃ ଆକଆଃ ଧାନୁ ସୁପାଟ୍‌ ରିକାନାଙ୍ଗ୍‌ ସେକାଡ଼୍‌କାନା। ଇନ୍‌କୁଆଃ ସାଦମ୍‌କଆଃ ଖୁରା ଚାକ୍‌ମାକ୍‌ ଦିରି ଲେକା ନେଲଃତାନା ଓଡ଼ୋଃ ଆକଆଃ ସାଦମ୍‌ ଗାଡ଼ିରାଃ ଚାକାକ ହୁର୍‌ଲାସି ହୟ ଲେକା, 29 ଇନ୍‌କୁଆଃ କାଉରି, ଜାୱାନ୍‌ ଟେଡ଼ଃ କାଉରିତାନ୍‌ ଲେକା, ଇନ୍‌କୁଆଃ ହୁଁକ୍‌ରାଅ ଜାୱାନ୍‌ ଟେଡ଼ଃ ହୁଁକ୍‌ରାଅ ଲେକା ରିକାତାନାକ। ଇନ୍‌କୁ ପୁରାଃ କାଉରିତାନ୍‌ଲଃ ଜାଁତୁକେ ହାବ୍‌ ଗଏଃକେଦ୍‌ତେ ବୁଗି ମାଜା ଲେକା ଗଅଃ ଇଦିୟାକ। ଜେତାଏ ଏନାକେ ରେଃକ୍‌ ଇଦି ନାଙ୍ଗ୍‌ କାକ ତାଇନାଃ।

30 ଏନ୍‌ ହୁଲାଙ୍ଗ୍‌ ଇନ୍‌କୁ ଇସ୍ରାଏଲ୍‌ ହଡ଼କଆଃ ଚେତାନ୍‌ରେ ଦରେୟାରାଃ ସାଡ଼ି ଲେକା ଇନ୍‌କୁ ଚେତାନ୍‌ରେ କାଉରି ରିକାୟାକ। ଜେତାଏ ଅତେଦିଶୁମ୍‌କେ ନେଲେ ରେଦ, ନୁବାଃ ଓଡ଼ୋଃ ସାଙ୍କାଟ୍‌ ନେଲଃଆ। ଏନ୍‌ ଠାୟାଦ୍‌ରାଃ ମାସ୍କାଲ୍‌ ରିମିଲ୍‌ ହରାତେ ଉକୁକେନଃଆ।