1 ଆମାଃ ପାର୍‌ମେଶ୍ୱାର୍‌ କାଜିତାନାଏ, "ଆଇଁୟାଃ ହଡ଼କକେ ଜୀଉରାଡ଼େଃ ଏମାକପେ," ଜୀଉରାଡ଼େଃ ଏମାକପେ।

2 ଯୀରୁଶାଲେମ୍‌ରେନ୍‌ ହଡ଼କକେ ଜୀଉରାଡ଼େଃରାଃ କାଜିତେ କାଜିୟାକପେ,

ଇନିୟାଃ ଦୁକୁ ରେୟାଃ ସବେନ୍‌ ବିଷାଏ ଟୁଣ୍ଡୁକାନା।

ନାହାଁଃଦ ଇନିୟାଃ ସବେନ୍‌ ପାପ୍‌କ ଛାମାୟାନା।

ଇନିୟାଃ ସବେନ୍‌ ପାପ୍‌ ନାଗେନ୍ତେ, ପ୍ରାଭୁ ଇନିଃକେ ବାର୍‌ ଗୁନା ସାଜାଇ ଏମାକାଇଜାଏ ମେନ୍ତେ ଉଦ୍‌ବେପେ।

3 ମିଆଦ୍‌ ରାଆଃ ରେୟାଃ ସାଡ଼ି ଆୟୁମଃତାନା,

"ପ୍ରାଭୁଆଃ ନାଗେନ୍ତେ ବିର୍‌ରେ ଆପେ ସବେନ୍‌କ ମିଆଦ୍‌ ହରା ବାଇୟେପେ।

ପାର୍‌ମେଶ୍ୱାର୍‌ଆଃ ନାଗେନ୍ତେ ଗିତିଲ୍‌ତେ ପେରେୟାକାନ୍‌ ହରାରେ ଚାକାର୍‌ ହରା ବାଇୟେପେ।

4 ସବେନ୍‌ ଗାଡ଼ା ପେରେଜଃଆଃ,

ସବେନ୍‌ ବୁରୁ ଓଡ଼ୋଃ ଗୁଟୁ ଲାତାରଆଃ,

ବେଙ୍କଆକାନ୍ ହରାକ ସିଧାଅଃଆ,

ଓଡ଼ୋଃ ଗାଡା ଡିପା ହରାକ ସବେନ୍‌ ସାମ୍‌ବାଇୟଆଃ।

5 ଏନ୍ତେ ପ୍ରାଭୁଆଃ ମାନାରାଙ୍ଗ୍‌ ଉଦୁବଃଆ,

ଓଡ଼ୋଃ ଅତେଦିଶୁମ୍‌ରେନ୍‌ ସବେନ୍‌ ହଡ଼କ ଏନା ନେଲେୟାକ।

ଚିୟାଃଚି ପ୍ରାଭୁ ନେ କାଜି କାଜିକାଦା।"

6 ମିଆଦ୍‌ ରାଆଃ ରେୟାଃ ସାଡ଼ି ଆୟୁମଃତାନା, "ଦୁଲାଡ଼୍‌ ରେୟାଃ ପ୍ରାଚାର୍‌ ରିକାଏପେ,"

ଏନ୍ତେ ମିହୁଡ଼୍‌ କୁଲିକିୟାଏ, "ଅକ କାନାଜିକେ ପ୍ରାଚାର୍‌ ରିକାଅଃଆ ?"

"ସବେନ୍‌ ହଡ଼କଆଃ ଜୀୱାନ୍‌ ତାସାଦ୍‌ ଲେକ୍‌ନାଃ ତାନାଃ,

ଇନ୍‌କୁ ଜାନାଅ ଜାନାଅ ଜାକେଦ୍‌ ଜିନିଦ୍‌ କାକ ତାଇନାଃ, ମେନ୍‌ଦ ବିର୍‌ ରେୟାଃ ବାହା ଲେକା ଇନ୍‌କୁଆଃ ଜୀୱାନ୍‌ ହବାଅଃଆ।

7 ତାସାଦ୍‌ ରହଡ଼୍‌କଆଃ ଓଡ଼ୋଃ ବାହା ଗସ କଆଃ।

ଚିୟାଃଚି ଏନାରେ ପ୍ରାଭୁଆଃ ଜୀଉ ଏମେତାନ୍‌ ସାହେଁଦ୍‌ ହୟ ହିଜୁଃଆ।

ଏନ୍‌ଲେକାଗି ସବେନ୍‌ ହଡ଼କ ତାସାଦ୍‌ ଲେକା ତାନ୍‌କ।

8 ତାସାଦ୍‌ ରହଡ଼୍‌କଆଃ, ବାହା ଗସ କଆଃ,

ମେନ୍‌ଦ ଆବୁଆଃ ପାର୍‌ମେଶ୍ୱାର୍‌ଆଃ ବାଚାନ୍‌ ଜାନାଅ ଜାନାଅ ଜାକେଦ୍‌ ତାଇନାଃ।"

9 ହେ ଯୀରୁଶାଲେମ୍‌, ସାଲାଙ୍ଗି ବୁରୁତେ ସେନଃମେ,

ଓଡ଼ୋଃ ସୁକୁକାଜି ଉଦୁବାକମେ,

ପୁରାଃ କାଉରିକେଦ୍‌ତେ କାଜିମେ, ହେ ସିୟୋନ୍‌,

ସୁକୁକାଜି ଉଦୁବେମେ,

ଆଲପେ ବରୟା ଓଡ଼ୋଃ କାଉରିକେଦ୍‌ତେ କାଜିପେ,

ଯିହୁଦାରେୟାଃ ନାଗାର୍‌କେ କାଜିୟାଇପେ,

"ନେଲିପେ, ଆପେୟାଃ ପାର୍‌ମେଶ୍ୱାର୍‌ ହିଜୁଃତାନାଏ।"

10 ନେଲେପେ, ପ୍ରାଭୁ ପୁରାଃ ପେଡ଼େୟାନ୍‌ତେ ହିଜୁଃତାନାଏ, ଇନିୟାଃ ସୁପୁ ରାଇଜ୍‌ ରିକାୟା।

ବେଭାର୍‌ ଏମଃ ନାଗେନ୍ତେ ଓଡ଼ୋଃ କାମି ରେୟାଃ ନାଲା ଏମ୍‌ ନାଗେନ୍ତେ ଇନିଃତାଃରେ ମେନାଃ।

11 ଇନିଃ ମିଣ୍ଡିଗୁପିନିଃ ଲେକା ଆୟାଃ ଗୋଟ୍‌ରେନ୍‌ ମିଣ୍ଡିକକେ ଗୁପିକଆ,

ଇନିଃ ମିଣ୍ଡି ହନ୍‌କକେ ମିଦ୍‌ତାଃରେ ହୁଣ୍ଡିକେଦ୍‌ତେ ଆୟାଃ ସୁପୁରେ ସାବ୍‌କଆ,

ଇନିଃ ଆୟାଃ କୟଙ୍ଗ୍‌ରେ ଇଦିକଆ ଓଡ଼ୋଃ ତଆ ଆନୁକତାନ୍‌ ମିଣ୍ଡି ହନ୍‌କକେ ମାଡ଼ି ମାଡ଼ିତେ ଇଦିକଆ।

12 ଅକଏ ଦରେୟା ରେୟାଃ ଦାଆଃକେ ଆଞ୍ଜୁଲାତେ ସଙ୍ଗ୍‌ କାଦା,

ଚାଏ ରିମିଲ୍‌କେ ଅକଏ ଆୟାଃ ତିଃଇତେ ସଙ୍ଗ୍‌ କାଦା ?

ଚାଏ ଅକଏ ଅତେରେୟାଃ ହାଁସାକେ ତାମ୍ବିଲଃ ସଙ୍ଗ୍‌ କାଦାଏ,

ବୁରୁ ଚାଏ ଟନାଙ୍ଗ୍‌କେ ଅକଏ ତାରାଜୁତେ ତାଉଲାଅ କାଦା ?

13 ଅକଏ ପ୍ରାଭୁଆଃ ଆତ୍ମାକେ ଉହାଟ୍‌ ନାଗେନ୍ତେ ଆଚୁ ଦାଡ଼ିୟା ?

ଚାଏ ପ୍ରାଭୁକେ ହୁକୁମ୍‌ ଓଡ଼ୋଃ ଇନିତୁ ଏମ୍‌ନାଙ୍ଗ୍‌ ଅକଏ ଇତୁ ଏମ୍‌ ଦାଡ଼ିୟାଏ ?

14 ପ୍ରାଭୁ ସେଣାଁ ନାମ୍‌ ନାଗେନ୍ତେ ଅକଏତାଃରେ ଦେଙ୍ଗା ଆସିକାଦାଏ,

ଓଡ଼ୋଃ ଅକଏ ଇନିଃକେ ନ୍ୟାୟ ହରାରେ ସେସେନ୍‌ ନାଗେନ୍ତେ ଆଚୁ କାଇଜା ?

ସେଣାଁ ନାମ୍‌ ନାଗେନ୍ତେ ଅକଏ ଇନିଃକେ ଇତୁ ଏମ୍‌କିୟା,

ଆଟ୍‌କାର୍‌ଉରୁମ୍‌ ନାଗେନ୍ତେ ଅକଏ ଇନିଃକେ ହରା ଉଦୁବ୍‌କିୟା ?

15 ନେଲେପେ, ଅତେରେୟାଃ ସବେନ୍‌ କିଲିକ ମିଆଦ୍‌ ଚାଟୁରାଃ ମିଦ୍‌ଟିପାଃ ଦାଆଃ ଲେକା ତାନ୍‌କ,

ତାରାଜୁରେ ଲାଟ୍‌କାଅକାନ୍‌ ଧୁଡ଼ି ଲେକାନ୍‌କ ତାନ୍‌କ,

ମେନ୍‌ଦ ଇନିଃ ପୁରାଃ ଚାକାର୍‌ ଟାପୁକକେ ହୁଡିଙ୍ଗ୍‌ ଜିନିଷ୍‌ ଲେକା ରିମ୍‌ତାଃ।

16 ଲିବାନୋନ୍‌ ଦାରୁ ଜୁଲ୍‌ ନାଙ୍ଗ୍‌ ଓଡ଼ୋଃ ବିର୍‌ ରେନ୍‌ ଜାଁତୁ,

ଆବୁଆଃ ପାର୍‌ମେଶ୍ୱାର୍‌ଆଃ ବେଦିରେ ଉରୁବ୍‌ଦାଣେଁ ଏମ୍‌ ନାଗେନ୍ତେ ପୁରାଃ ଜାଁତୁ ବାନ୍‌କଆ,

ଚାଏ ସେଙ୍ଗେଲ୍‌ ଜୁଲ୍‌ ନାଗେନ୍ତେ କାଟିକାନ୍‌ ଦାରୁ ମେନାଃ।

17 ଦିଶୁମ୍‌ରେନ୍‌ ସବେନ୍‌ ହଡ଼କ ଇନିୟାଃ ଆୟାର୍‌ରେ ଜେତାନିଃ ନାହାଁଲାକ।

ଇନ୍‌କୁ ଇନିୟାଃ ଆୟାର୍‌ରେ ବେଗାର୍‌ ଗନଙ୍ଗ୍‌ତେ

ପୁରା ସାମା ତାନ୍‌କ।

18 ତାବ୍‌ଦ ପାର୍‌ମେଶ୍ୱାର୍‌କେ ଆପେ ଅକଏଲଃ ଜକାଇୟାପେ ?

ଅକନ୍‌ ମୁରୁତ୍‌ଲଃ ଇନିଃକେ ମିଦ୍‌ ଲେକା ଜକାଇୟାପେ ?

19 ମୁରୁତ୍‌ ବାବାଇନିଃ ଖୋଦାକାମିକେଦ୍‌ଲଃ ଛାଞ୍ଚ୍‌ରେ ଦୁଲ୍‌କେଦ୍‌ତେ ମୁରୁତ୍‌ ବାଇୟାଏ,

ସୋନା ବାବାଇନିଃ ଏନାରେ ସୋନାକେ ଜଲମ୍‌ ରିକାଃଏ,

ଓଡ଼ୋଃ ଇନିୟାଃ ନାଗେନ୍ତେ ରୁପାରେୟାଃ ଇସିର୍‌ ବାଇୟାଏ।

20 ଅକନ୍‌ ହଡ଼ ଦାନ୍‌ ଏମ୍‌ ନାଗେନ୍ତେ ସୋନା ଓଡ଼ୋଃ ରୁପାତେ ବାଇ କାଏ ଦାଡ଼ିୟା,

ଇନିଃ ବୁଗିନ୍‌ ଦାରୁ ସାଲାଃଏ ଅକଆଃଚି କା ସୟାଅଃଆ,

ଇନିଃ ଖୋଦାକେଦ୍‌ତେ ବୁଗିନ୍‌ ମୁରୁତ୍‌ ବାଇନାଙ୍ଗ୍‌ ମିଆଁଦ୍‌ ଖୋଦାକାମିନିଃକେ ଦାଣାଁଏ।

21 ଆପେ ଚି କାପେ ସାରିୟା ?

ପୁରାଃ ଦିପିଲି ସିଦାରେ କା ଚି କାଜିୟାନା ?

ଆପେ କାପେଚି ଆୟୁମ୍‌ ଅତେଦିଶୁମ୍‌ ଚିଲ୍‌କା ବାଇକାନା ?

22 ଅକଏଚି ଅତେଦିଶୁମ୍‌ରେୟାଃ ରାଜ୍‌ଗାଦି ଚେତାନ୍‌ରେ ଦୁବାକାନାଏ,

ସବେନ୍‌ ଅତେ ଓଡ଼ୋଃ ସିର୍ମାରେନ୍‌ ଆକ୍‌ତେୟାର୍‌ନିଃ ତାନିଃ,

ଇନିୟାଃ ଆୟାର୍‌ରେ ଅତେରେନ୍‌ ହଡ଼କ ହୁଡିଙ୍ଗ୍‌ ସନ୍‌ସରେଦ୍‌ ଲେକାନିଃ ତାନ୍‌କ।

ଇନିଃ ରିମିଲ୍‌କେ ଲିଜାଃ ପାସ୍‌ରାଅ ଲେକା ପାସ୍‌ରାଅ କାଦା।

ଓଡ଼ୋଃ ଏନ୍‌ ରିମିଲ୍‌ ଲାତାର୍‌ରେ ଦୁବ୍‌ ନାଗେନ୍ତେ କୁମ୍ବା ଲେକା ଏନାକେ ବାଇୟାକାଦା।

23 ଇନିଃ ପେଡ଼େୟାନ୍‌ ରାଇଜ୍ ଚାଲାଅତାନ୍‌ କକେ ଲାତାର୍‌କଆ,

ଅତେ ଦିଶୁମ୍‌ରେନ୍ ବିଚାର୍‌ ରିକାତାନ୍‌ କକେ କା ଗନଙ୍ଗ୍‌ଆଁନ୍‌ ରିକାକଆଏ।

24 ଇନ୍‌କୁ ଇମ୍‌ତାଗି ହାରାତାନ୍‌ ତାସାଦ୍‌, ସାକାମ୍‌ ଲେକାନ୍‌କ ତାନ୍‌କ,

ହେର୍‌ତାନ୍‌ଲଃ ଇମ୍‌ତାଗି ଇନ୍‌କୁଆଃ ରେହେଦ୍ ଅମନ୍‌ଧାବ୍‌କଆଃ,

ଚିମ୍‌ତା ଇନ୍‌କୁ ଚେତାନ୍‌ରେ ହୟ ଅମଃଆ, ଇମ୍‌ତା ଇନ୍‌କୁ ରହଡ଼୍‌କଆଃକ

ଓଡ଼ୋଃ ହୁର୍‌ଲାସି ହୟ ଇନ୍‌କୁକେ ରହଡ଼ାକାନ୍‌ ପେଟେଃ ଲେକା ଅଟାଙ୍ଗ୍‌କଆଃ।

25 ଏନାମେନ୍ତେ ଏନ୍‌ ପାବିତାର୍‌ ପାର୍‌ମେଶ୍ୱାର୍‌ କାଜିତାନାଏ, ଆଇଁୟାଃଲଃ ଅକଏକେ ଜକାଇୟାପେ ?

ଚାଏ ଅକଏ ଆଇଁୟାଃଲଃ ମିଦ୍‌ସାମାନ୍‌ ହବାଅଃଆଏ ?

26 ଚେତାନ୍‌ ଆରିଦ୍‌ କେଦ୍‌ତେ ସିର୍ମାତେ ନେଲେପେ,

ଆପେ ଅକ ଇପିଲ୍‌କକେ ନେଲ୍‌କତାନା, ଇନ୍‌କୁକେ ଅକଏ ବାଇକେଦ୍‌କଆ ?

ଇନିଃ ସବେନ୍‌ ଇପିଲ୍‌କଆଃ ଝୁଣ୍ଡ୍‌ କଏତେ ମିମିଆଦ୍‌ କେଦ୍‌ତେ ସିପାଇକଆଃ ଲେକା ଅଡଙ୍ଗ୍‌ ଆଉକଆ,

ଓଡ଼ୋଃ ସବେନ୍‌କକେ ନୁତୁମ୍‌ ସାବ୍‌କେଦ୍‌ତେ ହାକାଅ ଆଉକଆ,

ଇନିୟାଃ ପୁରାଃଗି ପେଡ଼େଃ ମେନାଃ,

ଓଡ଼ୋଃ ଏନ୍‌ ପେଡ଼େଃ ହରାତେ ଏନାକଏତେ ମିଆଦ୍‌ ହଁ କା ଉକୁକାନା।

27 ହେ ଇସ୍ରାଏଲ୍‌, ଚିନାଃମେନ୍ତେ କାଜିତାନାମ୍‌,

ହେ, ଯାକୁବ୍‌ ଚିନାଃମେନ୍ତେ କାଜିତାନାମ୍‌,

ପ୍ରାଭୁ ଆଲେୟାଃ ସେସେନ୍‌ ହରା କାଏ ସାରିୟା,

ଆଲେୟାଃ ପାର୍‌ମେଶ୍ୱାର୍‌ ଆଲେୟାଃ ନ୍ୟାୟ ବିଚାର୍‌ କାଏ ରିକାଃ, ଚିନାଃମେନ୍ତେ ନେ କାଜିକମ୍‌ କାଜିତାନା ?

28 ଚିୟାଃ ଆପେ କାପେ ସାରି ? ଚାଏ କାପେଚି ଆୟୁମ୍‌ ?

ପ୍ରାଭୁ ଜାନାଅ ଜୀଦାନ୍‌ ପାର୍‌ମେଶ୍ୱାର୍‌ ତାନିଃ,

ଇନିଃ ସବେନ୍‌ ଅତେଦିଶୁମ୍‌କେ ବାଇକେଦା।

ଇନିଃ ଚିଉଲା ହଁଗି କାଏ ଲାଗାଅଃଆ ଚାଏ ଆଡ଼ାଃଉଡ଼ୁଗଃଆ।

ଇନିୟାଃ ଉଡ଼ୁଃ ପାହାମ୍‌କେ ଜେତାଏ କାଏ ଆଟ୍‌କାର୍‌ଉରୁମ୍‌ ଦାଡ଼ିୟା।

29 ଲାଗାଉତାର୍‌କାନ୍‌ ହଡ଼କେ ଇନିଃ ପେଡ଼େଃ ଏମାଃଏ ଓଡ଼ୋଃ ବାହାରମ୍‌ତେ ହାମ୍ବାଲାକାନ୍‌ ହଡ଼କେ ଜୀଉରାଡ଼େଃ ରେୟାଃ ପେଡ଼େଃ ଏମାଃଏ।

30 ଅକନ୍‌କ ସେପେଡ଼େଦ୍‌ ତାନ୍‌କ ଇନ୍‌କୁ ଲାଗାଅଃଆ,

ଧାଙ୍ଗ୍‌ଡ଼ା କଡ଼ାକ ତହଦ୍‌କେଦ୍‌ତେ ଉୟୁଗଃଆକ।

31 ମେନ୍‌ଦ ଅକଏ ପ୍ରାଭୁତାଃରେ ଆସ୍ରା ଦହୟାକ,

ଇନ୍‌କୁ ନାୱା ନାୱା ପେଡ଼େଃକ ନାମେୟା।

ବାଜ୍‌ ଅଡ଼େ ଚେତାନ୍‌ତେ ଆଫିର୍‌ ଲେକା ଇନ୍‌କୁ ଚେତାନ୍‌ତେ ରାକାବାଃକ,

ଇନ୍‌କୁ ନିର୍‌ ବାଡ଼ାଏୟା ଓଡ଼ୋଃ କାକ ଲାଗାଅଃଆ,

ନେତେହେନ୍ତେ ଇନ୍‌କୁ ସେସେନ୍‌ ବାଡ଼ାଏୟା ମେନ୍‌ଦ ଇନ୍‌କୁ କାକ ଲାଗାଅଃଆ।