ପାର୍ମେଶ୍ୱାର୍ ଯୀରୁଶାଲେମ୍କେ ବାଞ୍ଚାଅଇୟା
1 ଅକନ୍କ ଦେଙ୍ଗା ନାମ୍ ନାଗେନ୍ତେ ମିସାର୍ ଦିଶୁମ୍ତେ ସେନାଃକ, ସାଦମ୍କଆଃ ଚେତାନ୍ରେ ଆସ୍ରାତାନାକ ଓଡ଼ୋଃ ସାଦମ୍ଗାଡ଼ି ପୁରାଃ ହବାଅଃ ହରାତେ ଓଡ଼ୋଃ ପେଡ଼େୟାନ୍ ସାଦମ୍କଆଃ ଚେତାନ୍ରେ ଆସ୍ରାଏ ତାନାକ, ଚିଆଃଚି ଇନ୍କୁ ପୁରାଃଗି ମେନାକଆ, ମେନ୍ଦ ଇସ୍ରାଏଲ୍ରେନ୍ ପାବିତାର୍ନିୟାଃ ଚେତାନ୍ରେ ଆସ୍ରା କାକ ଦହେତାନା ଚାଏ ପ୍ରାଭୁତାଃରେ ଦାୟା ଦେଙ୍ଗା କାକ ଆସିତାନା, ଇନ୍କୁ ସାର୍ପାଅଃକାକ। 2 ମେନ୍ଦ ଇନିଃ ସେଣାଁନ୍ନିଃ ତାନିଃ, ଇନିଃ ହାନି କାଜିକ ରିକାୟା ଓଡ଼ୋଃ ଇନିଃ ଆୟାଃ କାଜିକେ ଅତେରେ କାଏ ଉୟୁଃ ରିକାୟା। ମେନ୍ଦ ଇନିଃ ଏତ୍କାନ୍ କାମି ରିକାତାନ୍ କିଲିକଆଃ ବିରୁଧ୍ରେ ଓଡ଼ୋଃ କା ଧାର୍ମାନ୍ ହଡ଼କକେ ଦେଙ୍ଗାତାନ୍କଆଃ ବିରୁଧ୍ରେ ବିରିଦା। 3 ମିସାର୍ରେ ତାଇନ୍ତାନ୍କ ପାର୍ମେଶ୍ୱାର୍ ନାହାଁଲାକ, ମେନ୍ଦ ହଡ଼କ ଏସ୍କାର୍ ତାନ୍କ। ଇନ୍କୁଆଃ ସାଦମ୍କ ମାସ୍ ମାୟୋମ୍ତେ ପେରେୟାକାନ୍ ଜାଁତୁକ ତାନ୍କ, ଆତ୍ମା ନାହାଁଲାକ। ପ୍ରାଭୁ ଚିମ୍ତା ତିଃଇ ଜିଲିଙ୍ଗ୍ ରିକାୟା, ଇମ୍ତା ଅକଏ ଦେଙ୍ଗାକାଦ୍କ ତାଇକେନାଏ ଇନିଃ ତହଦ୍କେଦ୍ତେ ଉୟୁଗଃଆଏ ଓଡ଼ୋଃ ଅକଏ ଦେଙ୍ଗା ନାମାକାଦ୍ ତାଇକେନାଏ, ଇନିଃ ହଁ ତହଦ୍କେଦ୍ତେ ଉୟୁଗଃଆ। ବାରାନ୍କିନ୍ ମିସାତେ ଜିୟନ୍ ରିକାନାଃ।
4 ଚିୟାଃଚି ପ୍ରାଭୁ ଆଇଙ୍ଗ୍କେ ନେ କାଜି କାଜିତାନା, "ଚିମ୍ତା ଜାୱାନ୍ ଟେଡ଼ଃ ସାଙ୍ଗାର୍କେଦ୍ତେ ଜାଁତୁକେ ସାବାଃଏ ଓଡ଼ୋଃ ଜାୱାନ୍ କୁଲା ଲେକା କାଉରି ରିକାଃଏ, ଇମ୍ତା ପୁରାଃଗି ମିଣ୍ଡି ଗୁପିତାନ୍କ ଇନିୟାଃ ବିରୁଧ୍ରେ ତିଙ୍ଗୁନ୍ ରେହ କାଏ ଆକ୍ଚାକାଅଃଆ ଚାଏ ଇନ୍କୁଆଃ କାଉରିରେୟାଃ ସାଡ଼ିରେ ଆପାନ୍କେ କାଏ ଅମ୍ବା ରିକାନାଃ। ଏନ୍ଲେକା ସବେନାଃତେ ପେଡ଼େୟାନ୍ ପ୍ରାଭୁ ସିୟୋନ୍ ବୁରୁ ଓଡ଼ୋଃ ଏନାରେୟାଃ ମାରାଙ୍ଗ୍ ବୁରୁକରେ ଲାଡ଼ାଇ ନାଙ୍ଗ୍ ହିଜୁଃଆ। 5 ଚେଣେଁ ଆୟାଃ ହନ୍କକେ ଆଫିର୍ତାନ୍ଲଃ ବାଞ୍ଚାଅକଆଏ, ଏନ୍ଲେକାଗି ସବେନାଃତେ ପେଡ଼େୟାନ୍ ପ୍ରାଭୁ ଯୀରୁଶାଲେମ୍କେ ବାଞ୍ଚାଅୟା। ଇନିଃ ଏନାକେ ବାଞ୍ଚାଅକେଦ୍ତେ ବାଞ୍ଚାଅ ରିକାୟା ଓଡ଼ୋଃ ଇନିଃକେ ପୁରାଃଗି ସବେନାଃ ଏତେ ବାଞ୍ଚାଅ କେଦ୍ତେ ଇନିୟାଃ ସୁସାର୍ ରିକାୟା।"
6 ପ୍ରାଭୁ କାଜିକେଦା, "ହେ ଇସ୍ରାଏଲ୍ରେନ୍ ସବେନ୍ ହଡ଼କ, ଆପେ ଅକେୟାଃ ବିରୁଧ୍ରେ ପୁରାଃଗି ଏତ୍କାନ୍ କାମିକ ରିକାକାଦାପେ, ଇନିଃତାଃ ହିଜୁଃ ରୁହାଡ଼୍ପେ। 7 ଚିୟାଃଚି ଏନ୍ ହୁଲାଙ୍ଗ୍ ଆପେ ସବେନ୍କ ଆପେୟାଃ ହୁମୁଆକାନ୍ ପାପ୍ ସବେନାଃ ଓଡ଼ୋଃ ତିଃଇତେ ବାଇୟାକାଦ୍ ସୋନାରେୟାଃ ଓଡ଼ୋଃ ରୁପାରେୟାଃ ସବେନ୍ ମୁରୁତ୍କକେ ହୁରାଙ୍ଗ୍କଆପେ। 8 ଆସେରିୟାରେନ୍ ହଡ଼କ ତାରାଉଡ଼ିତେ ମାଆଃ ଗଜଃଆକ। ମେନ୍ଦ ଏନା ହଡ଼ରାଃ ତାରାଉଡ଼ି ନାହାଁଲାଃ। ଅକ ତାରାଉଡ଼ି ହଡ଼ତେ କା ବାଇୟାକାନା, ଏନାତେ ଇନ୍କୁ ମାଆଃ ଗଜଃଆକ। ଇନ୍କୁ ତାରାଉଡ଼ିରେୟାଃ ହେପାଦ୍ଏତେ ନିରାଃକ ଓଡ଼ୋଃ ଇନ୍କୁଆଃ ସେପେଡ଼େଦ୍କ କିରିଙ୍ଗ୍ ଦାସି ଲେକା କାମିକ ରିକାୟା। 9 ବରତେ ଇନ୍କୁଆଃ ଗାଡ଼୍ ସବେନ୍ ହାଦୁଡ଼ଃଆ, ଇନ୍କୁଆଃ ସିପାଇକଆଃ ଆଗୁଆଇକ ଝାଣ୍ଡା ନେଲ୍କେଦ୍ତେ ବରତେ ନିରାଃକ। ସିୟୋନ୍ରେ ଅକେୟାଃ ସେଙ୍ଗେଲ୍ ଓଡ଼ୋଃ ଯୀରୁଶାଲେମ୍ରେ ଅକେୟାଃ ସେଙ୍ଗେଲ୍ରାଃ ଗାଡା ମେନାଃ, ଏନ୍ ପ୍ରାଭୁ ନେ ସବେନାଃ କାଜିତାନାଏ।"
/images/a/b7d72741-6189-4a89-94c2-43952d9f2700)
/images/a/6c03efee-c76a-4ab8-fe2e-555683f90900)