1 ବିର୍‌ ଓଡ଼ୋଃ ସିଃସଏଃ ଠାୟାଦ୍‌ ରାସ୍‌କା ରିକାୟା

ଓଡ଼ୋଃ ବିର୍‌ ରାସ୍‌କାତାନ୍‌ଲଃ ଗୁଲାବ୍‌ ବାହା ହବାକାନ୍‌ ଲେକା ନେଲଃଆ।

2 ଏନା ପୁରାଃଗି ଫୁଟାଅକାନ୍‌ ଗୁଲାବ୍‌ ବାହା ଲେକାଗି ନେଲଃଆ।

ଦୁରାଙ୍ଗ୍‌ ଓଡ଼ୋଃ ରାସ୍‌କା କାଜିତେ ପୁରାଃଗି ହବାଅଃଆ,

ଲିବାନୋନ୍‌ ରେୟାଃ ପେଡ଼େଃ, କାର୍ମେଲ୍‌

ଓଡ଼ୋଃ ଶାରୋନ୍‌ ରେୟାଃ ସୁଗାଡ଼ାନ୍‌ ଇନିଃକେ ଏମଃଆ।

ଇନ୍‌କୁ ପ୍ରାଭୁଆଃ ପେଡ଼େଃ ଓଡ଼ୋଃ ପାର୍‌ମେଶ୍ୱାର୍‌ଆଃ ସୁଗାଡ଼ାନ୍‌କେ ନେଲେୟାକ।

3 ନାରାଦୁରା ତିଃଇକେ ପେଡ଼େୟାନ୍‌ ରିକାଏପେ

ଓଡ଼ୋଃ ଥାର୍‌ଥାରାଅଃତାନ୍‌ କାଟାରାଃ ମୁକ୍‌ଡ଼ିକେ କେଟେଃ ରିକାଏପେ।

4 ବରତେ ପେରେୟାକାନ୍‌ ହଡ଼କକେ କାଜିୟାକପେ,

"ଜୀଉ କେଟେଃଦ୍‌ ରିକାଏପେ, ଆଲପେ ବରୟା,

ନେଲେପେ ଆପେୟାଃ ପାର୍‌ମେଶ୍ୱାର୍‌ ବାଦ୍‌ଲା ଇଦି ନାଗେନ୍ତେ

ଓଡ଼ୋଃ ଇନ୍‌କୁକେ ନାଲା ଏମ୍‌ ନାଙ୍ଗ୍‌ ହିଜୁଃଆ, ଇନିଃ ଆପେକେ ବାଞ୍ଚାଅପେୟା।"

5 ଇମ୍‌ତା ମେଦ୍‌ କା ନେଲ୍‌ତାନ୍‌କ ନେଲେୟା

ଓଡ଼ୋଃ ଲୁତୁର୍‌ କା ଆୟୁମ୍‌ତାନ୍‌କ ଆୟୁମ୍‌ ଦାଡ଼ିୟା।

6 ଇମ୍‌ତା କାଟା ଟୁଣ୍ଟାକାନ୍‌ନିଃ ମିରିକ୍‌ ଲେକା ଦନେୟାଏ

ଓଡ଼ୋଃ କାଜି କା ଦାଡ଼ିତାନ୍‌ ଆଲାଙ୍ଗ୍‌ ଦୁରାଙ୍ଗ୍ ରିକାୟା।

ଚିୟାଃଚି ବିର୍‌ରେ ଦାଆଃ ଓଡ଼ୋଃ ଗିତିଲ୍‌ ପିଡ଼ିରେ ସେତେଙ୍ଗ୍‌ ଲିଙ୍ଗିୟଃଆ।

7 ଓଡ଼ୋଃ ଲଲ ଗିତିଲ୍‌ତେ ପେରେୟାକାନ୍‌ ଠାୟାଦ୍‌ରେ ଦାଆଃ ପୁରାଃଗି ହବାଅଃଆ

ଓଡ଼ୋଃ ରହଡ଼ାକାନ୍‌ ଅତେ ସେତେଙ୍ଗ୍‌ ଦାଆଃ ଲେକା ଲିଙ୍ଗିୟଃଆ।

ତୁୟୁକ ତାଇନ୍‌ ଠାୟାଦ୍‌ ତାସାଦ୍, ମାପ୍‌ରାଙ୍ଗ୍‌ ସାଉଁଣି ଲେକା ହବାଅଃଆ।

8 ଏନ୍ତାଃରେ ମିଆଦ୍ ମାରାଙ୍ଗ୍‌ ହରା ବାଇୟଃଆ,

ଏନା ପାବିତାର୍‌ ହରା ମେନ୍ତେ କାଜିୟଃଆ, ଏନା ଏସ୍‌କାର୍‌ ଇନ୍‌କୁ ନାଗେନ୍ତେ ହବାଅଃଆ।

ଏନାରେ ଜେତା ସତ୍‌ରା ହଡ଼କ ଲେକା ସେସେନ୍‌ କାଏ ଦାଡ଼ିୟା।

ହରା ସେସେନ୍‌ତାନ୍‌କ ଓଡ଼ୋଃ ଡଣ୍ଡ ହଡ଼କ ଏନାରେ ନେତେହେନ୍ତେ କାକ ରିକାନାଃ।

9 ଏନ୍ତାଃରେ ଜେତାନ୍‌ ଟେଡ଼ଃ କାକ ତାଇନାଃ

ଚାଏ ଜେତା ବରୱାନ୍‌ ଜାଁତୁକ ଏନ୍‌ ଚେତାନ୍‌ରେ କାକ ସେନେୟା, ଇନ୍‌କୁ ଏନ୍ତାଃରେ କାକ ନେଲଃଆ।

ମେନ୍‌ଦ ପାରିତ୍ରାଣ୍ ନାମାକାଦ୍ ହଡ଼କ ଏନ୍ତାଃରେ ହିଜୁଃସେନଃ ରିକାୟାକ।

10 ଓଡ଼ୋଃ ପ୍ରାଭୁରେ ବାଞ୍ଚାଅ ନାମାକାଦ୍ ହଡ଼କ ଏନ୍ତାଃଏତେ ରୁହାଡ଼୍‌ ହିଜୁଆଃ

ଓଡ଼ୋଃ ଦୁରାଙ୍ଗ୍‌ତାନ୍‌ଲଃ ସିୟୋନ୍‌ରେ ସେଟେରାକ।

ଜାନାଅ ରେୟାଃ ରାସ୍‌କା ଇନ୍‌କୁଆଃ ବହଃରାଃ ମୁକୁଟ୍‌ ହବାଅଃଆ।

ଇନ୍‌କୁ ସୁକୁ ଓଡ଼ୋଃ ରାସ୍‌କା ନାମେୟାଁକ ଓଡ଼ୋଃ ଦୁକୁ ହାସୁ ଇନ୍‌କୁତାଃଏତେ ସାଙ୍ଗିନ୍‌ତେ ଆତମ୍‌କଆ।