ମୋୟାବ୍ ନାଗେନ୍ତେ ଆୟାର୍କାଜି
1 ମୋୟାବ୍ ନାଗେନ୍ତେ ଆୟାର୍କାଜି। ମୋୟାବ୍ ରେୟାଃ ଆର୍ ନାଗାର୍ ମିଦ୍ ନୁବାଃରେ ହାଦୁଡ଼୍କେଦ୍ତେ ଜିୟନ୍ୟାନା, ଓଡ଼ୋଃ ଏନ୍ ମିଦ୍ ନୁବାଃରେ କିର୍ ନାଗାର୍ ହଁଗି ହାଦୁଡ଼୍କେଦ୍ତେ ଜିୟନ୍ୟାନା। 2 ଦିବୋନ୍ ନାଗାର୍ରେନ୍ ହଡ଼କ ଏୟମ୍ ନାଗେନ୍ତେ ଆକଆଃ ମାନ୍ଦିର୍ ଅଡ଼ାଃ ଓଡ଼ୋଃ ବୁରୁ ଚେତାନ୍ତେ ଆକଆଃ ପୁଜା ରିକାତାନ୍ ଠାୟାଦ୍ତେକ ସେନଃତାନାଃ। ନବୋ ସାହାର୍ ଓଡ଼ୋଃ ମେଦ୍ବାର୍ ନାଗେନ୍ତେ ମୋୟାବ୍ ହାଏ ହାଏ ରିକାତାନାଏ, ଲାନ୍ଦାଇ ଓଡ଼ୋଃ ଦୁକୁରେୟାଃ ଚିହ୍ନାଁ ଲେକାତେ ଇନ୍କୁଆଃ ବହଃ ଠାଟୁକାନା, ସବେନ୍କଆଃ ଦାଢ଼ି ଖୁରାଅକାନା। 3 ହରା ଗେନାକରେ ହଡ଼କ ବାସ୍ତା ଲିଜାଃ ତୁସିଙ୍ଗ୍କାନାକ, ଅଡ଼ାଃରେୟାଃ ଛାତ୍ ଚେତାନ୍କରେ ଓଡ଼ୋଃ ସାହାର୍ରାଃ ଛାକ୍ ଜାଗାରେ ହଡ଼କ ପୁରାଃଗି ଏୟମ୍ ରିକାଏତାନାକ ଓଡ଼ୋଃ ସବେନ୍ ଇମ୍ତା ଇନ୍କୁଆଃ ମେଦ୍ଦାଆଃ ଲିଙ୍ଗିତାନା। 4 ହିଷ୍ବୋନ୍ ଓଡ଼ୋଃ ଏଲିୟାଲି ରାଆଃଏ ତାନାକିନ୍ ଓଡ଼ୋଃ ଏନ୍ ରାନାଃ ରେୟାଃ ସାଡ଼ି ଯହସ୍ ସାହାର୍ ଜାକେଦ୍ ଆୟୁମଃତାନା। ଏନାମେନ୍ତେ ମୋୟାବ୍ରେନ୍ ପୁରାଃ ସିପାଇକ ରାଆଃ ତାନା, ଇନ୍କୁଆଃ ଜୀଉ ବରତେ ଥାର୍ଥାରାଅଃ ତାନା। 5 ମୋୟାବ୍ ନାଗେନ୍ତେ ଆଇଁୟାଃ ଜୀଉ ରାଆଃ ତାନାଏ, ଇନିଃତାଃଏତେ ଉକୁକେଦ୍ତେ ନିର୍ତାନ୍ ହଡ଼କ ସୋୟର୍ ଓଡ଼ୋଃ ଇଗ୍ଲତ୍ଶଲିଶିୟାତେ ନିର୍ତାନାକ। ଇନ୍କୁ ରାଆଃତାନ୍ଲଃ ଲୁହିତ୍ ଘାଟି ଚେତାନ୍ତେ ସେନଃତାନାକ। ଇନ୍କୁ ଆକଆଃ ଜିୟନଃରେୟାଃ କାଜିକେ ପାହାମ୍କେଦ୍ତେ ଏୟମ୍ତାନ୍ଲଃ ହରୋନିୟମ୍ ହରାରେ ସେନଃତାନାକ। 6 ନିମ୍ରିମ୍ ଗାଡ଼ାରେୟାଃ ଦାଆଃ ଆଞ୍ଜେଦ୍କାନା, ଏନାତେ ଏନ୍ ନାହିଁ ଗେନାରାଃ ତାସାଦ୍ ରହଡ଼୍କାନା, ନାୱା ତାସାଦ୍ କା ଅମନଃତାନା, ହାରିୟାର୍ ବିଷାଏ ଜେତ୍ନାଃ ବାନଃଆ। 7 ଉକୁକେଦ୍ତେ ନିର୍ତାନ୍ ହଡ଼କ ଆକଆଃ କାମିକାଦ୍ ଖୁର୍ଜିକେ ଓଡ଼ୋଃ ଦହକାଦ୍ ଟାକାପାଏସା ସବେନାଃକେ ଗଅଃକେଦ୍ତେ ବାଇସି ନୁତୁମ୍ ଦାରୁରାଃ ସେତେଙ୍ଗ୍ ହେପାଦ୍ତେ ଇଦିୟାକ। 8 ଚିୟାଃଚି ଇନ୍କୁଆଃ ରାନାଃରେୟାଃ ସାଡ଼ି ମୋୟାବ୍ରାଃ ଚାରିଓସାଃ ଜାକେଦ୍ ଆୟୁମ୍ୟାନା। ଇଗ୍ଲିୟମ୍ ଜାକେଦ୍ ଏନାରେୟାଃ ରାନାଃ ଓଡ଼ୋଃ ବେରେଲିମ୍ ସାହାର୍ ଜାକେଦ୍ ଇନ୍କୁଆଃ ରାନାଃ ଆୟୁମ୍ୟାନା। 9 ଚିୟାଃଚି ଦିମୋନ୍ ସାହାର୍ରାଃ ଦାଆଃ ସବେନାଃ ମାୟୋମ୍ୟାନା। ଆଡଃଗି ଦିମୋନ୍ ସାହାର୍ ଚେତାନ୍ରେ ପୁରାଃ ଦୁକୁ ଓଡ଼ୋଃ ମୋୟାବ୍ରେନ୍ ଉକୁକେଦ୍ତେ ନିର୍ତାନ୍ ହଡ଼କ ଚେତାନ୍ରେ ଓଡ଼ୋଃ ଦିଶୁମ୍ରେ ସାରେୟାକାନ୍ ହଡ଼କ ଚେତାନ୍ରେ ମିଆଦ୍ ଟେଡ଼ଃ ଆଉଃଆ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)