1 ମେନ୍‌ଦ ଅକନ୍‌କ ସିଦା ଦୁକୁହାସୁରେ ତାଇକେନାକ, ଇନ୍‌କୁ ନାଗେନ୍ତେ ନୁବାଃ ଓଡ଼ୋଃ କା ତାଇନାଃ। ସିଦା ଦିପିଲିରେ ଇନିଃ ସବ୍‌ଲୁନ୍‌ ଓଡ଼ୋଃ ନପ୍ତାଲି ପାର୍‌ଗାନ୍‌କେ ହିଲାଙ୍ଗ୍‌କାଦ୍‌ ତାଇନ୍‌କେନାଏ। ମେନ୍‌ଦ ଟୁଣ୍ଡୁ ଦିପିଲିରେ ଇନିଃ ଦରେୟାତେ ସେନ୍‌ ହରାରେୟାଃ ହେପାଦ୍‌ ଯାର୍ଦାନ୍‌ ଗାଡ଼ା ହାନ୍‌ ପାରମ୍‌ରାଃ ପାର୍‌ଗାନ୍‌, ସାଅଁସାର୍‌କ ତାଇନ୍‌ତାନ୍‌ ଗାଲିଲ୍‌ ଦିଶୁମ୍‌କେ ମାଇନ୍‌ ରିକାୟା।

2 ନୁବାଃରେ ତାଇନ୍‌କାନ୍‌ ହଡ଼କ ମାରାଙ୍ଗ୍‌ ମାର୍ସାଲ୍‌କ ନେଲାକାଦା,

ଓଡ଼ୋଃ ଗନଏଃରେୟାଃ ଉମ୍ବୁଲ୍‌ରେ ତାଇନ୍‌କାନ୍‌ ହଡ଼କ ନାଙ୍ଗ୍‌ ମାର୍ସାଲ୍‌ ତୁରାକାନା।

3 ହେ ପ୍ରାଭୁ, ଏନ୍‌ ଦିଶୁମ୍‌ରେନ୍‌ ହଡ଼କକେ

ପୁରାଃଗି ପସାକେଦ୍‌ତେ ରାସ୍‌କା ଏମାକାଦ୍‌କଆମ୍‌।

ଜ ଇର୍‌ତାନ୍‌ ଇମ୍‌ତା

ଓଡ଼ୋଃ ରେଃକ୍‌ ଇଦିକାଦ୍‌ ଜିନିଷ୍‌କ

ହାଟିଙ୍ଗ୍‌ତାନ୍‌ ଇମ୍‌ତାରାଃ ରାସ୍‌କା ଲେକା

ଇନ୍‌କୁ ଆମାଃ ସାମ୍‌ନାଙ୍ଗ୍‌ରେ ରାସ୍‌କାଅଃଆକ।

4 ଚିୟାଃଚି ମିଦିୟନ୍‌ରେନ୍‌ ହଡ଼କ ଜେ'ଲେକା ଲାଡ଼ାଇରେ ହାରାଅୟାନାକ,

ଏନ୍‌ଲେକାଗି ଆମ୍‌ ଇନ୍‌କୁଆଃ ହାମ୍ବାଲ୍‌ ଆଡ଼୍‌ନାକେ,

ତାରାନ୍‌ରେ ଲାଦିକାନ୍‌ ବାହାରମ୍‌କେ

ଓଡ଼ୋଃ ସିଗିଦ୍‌କତାନ୍‌ ସଟାକେ ଟହେଜ୍‌ କାଦାମ୍‌।

5 ଚିୟାଃଚି ଲାଡ଼ାଇରେ ସିପାଇକ ତୁସିଙ୍ଗ୍‌ଅଃତାନ୍‌ ଖାର୍‌ପା

ଓଡ଼ୋଃ ମାୟୋମ୍‌ରେୟାଃ ଲିଜାଃ

ସେଙ୍ଗେଲ୍‌ରେ ଜୁଲେ ନାଗେନ୍ତେ

ସାହାନ୍‌ ଲେକା ହବାଅଃଆ।

6 ଚିୟାଃଚି ଆବୁ ନାଗେନ୍ତେ ମିଆଦ୍‌ ବାଲେଃହନ୍‌ ଜାନାମ୍‌କାନାଏ,

ଆବୁକେ ମିଆଦ୍ କଡ଼ାହନ୍‌ ଏମାକାନା।

ଇନିୟାଃ ତାରାନ୍‌ରେ ରାଇଜ୍‌ ରେୟାଃ ବାହାରମ୍‌ ଲାଦିୟଃଆ

ଓଡ଼ୋଃ ଇନିୟାଃ ନୁତୁମ୍‌ ହବାଅଃଆ,

ଆକ୍‌ଦାନ୍ଦାଅ, ବୁଗିନ୍‌ ହରା ଉଦୁବ୍‌ନିଃ, ପେଡ଼େୟାନ୍‌ ପାର୍‌ମେଶ୍ୱାର୍‌,

ଜାନାଅ ଜାନାଅରେନ୍‌ ଆପୁ, ଓଡ଼ୋଃ ଜୀଉସୁକୁ ଏମ୍‌ତାନ୍‌ ରାଜା।

7 ଇନିୟାଃ ଆକ୍‌ତେୟାର୍‌ ଓଡ଼ୋଃ ଜୀଉସୁକୁରାଃ

ଟୁଣ୍ଡୁ କା ହବାଅଃଆ।

ଇନିଃ ଦାଉଦ୍‌ଆଃ ରାଜ୍‌ଗାଦିରେ ଦୁବ୍‌କେଦ୍‌ତେ

ଇନିୟାଃ ରାଇଜ୍‌କେ ଆୟାର୍‌ତେ ଚାଲାଅ ଇଦିୟା

ଏନ୍ତେ ନ୍ୟାୟ ଓଡ଼ୋଃ ଧାର୍‌ମାନ୍‌ ହରାରେ

ନେ ଦିପିଲିଏତେ ଟୁଣ୍ଡୁ ଦିପିଲି ଜାକେଦ୍‌ ଏନା ଠାହାରାଅ କେଦ୍‌ତେ ପୁରାଃ କେଟେଦ୍‌ ରିକାଏୟାଏ।

ସବେନାଃତେ ପେଡ଼େୟାନ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ଚିହୁଲ୍‌

ନେ ସବେନାଃକେ ପୁରାଏୟା।

8 ପ୍ରାଭୁ ଯାକୁବ୍‌ଆଃ କିଲିକଆଃ ବିରୁଧ୍‌ରେ ମିଆଦ୍‌ କାଜି କୁଲ୍‌କେଦା, ନେଆଁ ଇସ୍ରାଏଲ୍‌ ଚେତାନ୍‌ରେ ହବାଅଃଆ। 9 ଇଫ୍ରାଇମ୍‌ ଓଡ଼ୋଃ ଶାମରିୟାରେନ୍‌ ସବେନ୍‌ ହଡ଼କ ନେଆଁ ସାରିୟାକ। ଚିଆଃଚି ଇନ୍‌କୁ ହିସିଙ୍ଗାତେ ଓଡ଼ୋଃ ଆପାନ୍‌କେ ମାରାଙ୍ଗ୍‌ ମେନ୍ତେ କାଜିନ୍‌ତାନ୍‌ଲଃ କାଜିୟାକ, 10 "ସବେନ୍‌ ଇଟା ହାଦୁଡ଼ାକାନା ସାର୍‌ତିଗି, ମେନ୍‌ଦ ଆଲେ ଏନାକେ ହାଦାକାନ୍‌ ଦିରିଲଃ ବାଇୟାଲେ। ଲଆ ଦାରୁକ ମାଆଃକାନା ସାର୍‌ତିଗି, ମେନ୍‌ଦ ଆଲେ ଏନାରାଃ ବାଦ୍‌ଲାରେ ଏରସ୍‌ ଦାରୁକ ହାରା ଇଦିୟାଲେ।"

11 ମେନ୍‌ଦ ପ୍ରାଭୁ ଇନ୍‌କୁଆଃ ବିରୁଧ୍‌ରେ ରେଜିନ୍‌ରେନ୍‌ ବାଇରିକକେ ବିରିଦ୍‌କଆ ଓଡ଼ୋଃ ଇନ୍‌କୁଆଃ ବାଇରିକକେ ଲାଡ଼ାଇ ନାଙ୍ଗ୍‌ ଉସ୍‌କୁର୍‌କଆ। 12 ସିଙ୍ଗିତୁର୍‌ ସାଃଏତେ ଅରାମ୍‌ରେନ୍‌ ହଡ଼କ ଓଡ଼ୋଃ ସିଙ୍ଗିହାସୁର୍‌ ସାଃଏତେ ପାଲେଷ୍ଟାଇନ୍‌ ହଡ଼କ ସେକାଡ଼୍‌ୟାନ୍‌ଲଃ ହିଜୁଃକେଦ୍‌ତେ ଇସ୍ରାଏଲ୍‌ ହଡ଼କକେ ହାରାଅକଆକ। ଏନ୍‌ରେୟ ପ୍ରାଭୁଆଃ ଖିସ୍‌ କା ହକାଅଃଆ, ଓଡ଼ୋଃ ଆୟାଃ ତିଃଇ ସାଜାଇ ଏମ୍‌ ନାଙ୍ଗ୍‌ ଆଡଃଗି ଜିଲିଙ୍ଗ୍‌ କାନା।

13 ଏନ୍‌ରେୟ ଅକଏ ହଡ଼କକେ ସାଜାଇ ଏମାଦ୍‌କଆଏ, ଏନ୍‌ ପେଡ଼େୟାନ୍‌ ପ୍ରାଭୁସାଃତେ କାକ ରୁହାଡ଼୍‌ ଚାଏ ଇନିଃକେ କାକ ଦାଣାଁ। 14 ଏନାମେନ୍ତେ ପ୍ରାଭୁ ଇସ୍ରାଏଲ୍‌ ଏତେ ବହଃ ଓଡ଼ୋଃ ଚାଆଃଲମ୍‌, କିତା ଦାରୁରେୟାଃ କତ ଓଡ଼ୋଃ ସବେନ୍‌ ଜିଲିଙ୍ଗ୍‌ ତାସାଦ୍‌ ମୁସିଙ୍ଗ୍‌ ତେଗି ଜିୟନ୍‌ ରିକାୟା। 15 ପୁର୍‌ଖା ହାଡ଼ାମ୍‌ ଓଡ଼ୋଃ ମାଇନ୍‌ ନାମେ ହଡ଼କ ହବାଅଃତାନାକ ବହଃ ଓଡ଼ୋଃ ହସଡ଼ ଇନିତୁ ଏମ୍‌ତାନ୍‌ ନାବୀକ ହବାଅଃତାନା ଚାଆଃଲମ୍‌। 16 ଏନ୍‌ ହଡ଼କଆଃ ହରା ଉଦୁବ୍‌ ତାନ୍‌କ ଇନ୍‌କୁକେ ଏତ୍‌କାନ୍‌ ହରା ଉଦୁବ୍‌କ ତାନାକ ଓଡ଼ୋଃ ଇନ୍‌କୁଆଃ ଉଦୁବ୍‌ ହରାରେ ସେନ୍‌ତାନ୍‌କ ଜିୟନ୍‌ ରିକାଅଃଆ। 17 ଏନାମେନ୍ତେ ପ୍ରାଭୁ ଇନ୍‌କୁଆଃ ସେପେଡ଼େଦ୍ କତାଃରେ କାଏ ସୁକୁଃଆ ଚାଏ ଇନ୍‌କୁଆଃ ଟୁଆର୍‌ ହନ୍‌କକେ ଓଡ଼ୋଃ ରାଣ୍ଡିକାନ୍‌କକେ କାଏ ଦାୟାକଆ। ଚିୟାଃଚି ସବେନ୍‌ ହଡ଼କ କା ଧାର୍‌ମାନ୍‌, ଏତ୍‌କାନ୍‌ ଓଡ଼ୋଃ ଇନ୍‌କୁ ଜାଗାର୍‌ତେୟାଃ ସବେନାଃ ଏତ୍‌କାନାଃ ତାନାଃ। ନେଆଁ ନାଗେନ୍ତେ ପ୍ରାଭୁଆଃ ଖିସ୍‌ କା ଟୁଣ୍ଡୁକାନା ଓଡ଼ୋଃ ଇନ୍‌କୁକେ ସାଜାଇ ଏମ୍‌ ନାଗେନ୍ତେ ତିଃଇ ଜିଲିଙ୍ଗ୍‌ କାନା।

18 ହଡ଼କଆଃ ଏତ୍‌କାନ୍‌ କାମି ସେଙ୍ଗେଲ୍‌ ଲେକା ଜୁଲଃତାନା, ନେଆଁ ଜାନୁମ୍‌ ଚୁପାଦ୍‌ ଓଡ଼ୋଃ ଦଧାଡ଼ି ଚୁପାଦ୍‌କେ ଅଣ୍ଡର୍‌ତାଃଏ। ଓଡ଼ୋଃ ପୁରାଃ ଟନାଙ୍ଗ୍‌କେ ଜୁଲ୍‌କେଦ୍‌ତେ ରିମିଲ୍‌ ଲେକା ସୁକୁଲ୍‌ ଚେତାନ୍‌ତେ ବିରିଦାଃ। 19 ସବେନାଃତେ ପେଡ଼େୟାନ୍‌ ପ୍ରାଭୁଆଃ ଖିସ୍‌ ହରାତେ ଗଟା ଦିଶୁମ୍‌ ଜୁଲ୍‌କେନଃଆ, ଓଡ଼ୋଃ ହଡ଼କ ସେଙ୍ଗେଲ୍‌ ନାଗେନ୍ତେ ସାହାନ୍‌ ଲେକା ହବାଅଃଆକ। ଜେତାଏ ଆୟାଃ ଆପ୍‌ନାଃ ହାଗାକେ ହଗି ଦାୟା କାଏ ରିକାଇୟା। 20 ଇନ୍‌କୁ ଜମ୍‌ତିଃଇ ସାଃଏତେ ରେଃକ୍‌ ଇଦିୟାକ, ଏନ୍‌ରେହ ଇନ୍‌କୁ ରେଙ୍ଗେଃ ତାଇନାଃକ, ଲେଙ୍ଗାତିଃଇ ସାଃଏତେ କାଟିଃଲେକା ଜମେୟାଁ ନାମେୟାଁକ, ଏନା କାକ ବିୟଃଆ। ଇନ୍‌କୁ ଆପ୍‌ନାଃ ହନ୍‌କଆଃ ମାସ୍‌ ଜମେୟାଁକ। 21 ମନଶି, ଇଫ୍ରାଇମ୍‌ଲଃ ଓଡ଼ୋଃ ଇଫ୍ରାଇମ୍‌, ମନଶିଲଃ ଲାପ୍‌ଡ଼ାଇୟାଃକ। ଏନ୍ତେ ବାରାନ୍‌କିନ୍‌ ମେସାକେଦ୍‌ତେ ଯିହୁଦାରାଃ ବିରୁଧ୍‌ରେ ଲାଡ଼ାଇନାଃକିନ୍‌। ଏନ୍‌ରେୟ ପ୍ରାଭୁଆଃ ଖିସ୍‌ କା ହକାଅଃଆ, ମେନ୍‌ଦ ଇନିୟାଃ ତିଃଇ ସିଦା ଲେକାଗି ସାଜାଇ ଏମ୍‌ ନାଙ୍ଗ୍‌ ଜିଲିଙ୍ଗ୍‌ କାନ୍‌ଗିତାଇନାଃ।