1 ପ୍ରାଭୁ କାଜିତାନାଏ, "ଅକନ୍‌କ ବାଇରିକଆଃ ହନ୍‌କ ତାନ୍‌କ, ଇନ୍‌କୁ ସାର୍‌ପାଅଃ କାକ। ଇନ୍‌କୁ ଆଇଁୟାଃ ରଜୋଟ ଲେକାତେ କାମିକ କାକ ରିକାତାନା। ଇନ୍‌କୁ ଏତ୍‌କାନ୍‌ ପାପ୍‌ କାମିକ ରିକାତାନାକ, ମେନ୍‌ଦ ଆଇଁୟାଃ ଆତ୍ମାରାଃ ଉହାଟ୍‌ ଲେକାତେ କାହାଗି। ଇନ୍‌କୁ ସାର୍‌ପାଅଃକାକ 2 ଆଇଙ୍ଗ୍‌କେ ବେଗାର୍‌ କୁଲିକେଦ୍‌ତେ, ଇନ୍‌କୁ ଫାରୋରାଃ ଗୁମାଟ୍‌ରେ ଆସ୍ରା ଇଦି ନାଗେନ୍ତେ ଦାୟା ଦେଙ୍ଗା ଆସିତାନାକ ଓଡ଼ୋଃ ମିସାର୍‌ ଦିଶୁମ୍‌ରେ ଆସ୍ରା ରେୟାଃ ଉମ୍ବୁଲ୍‌ରେ ତାଇନ୍‌ ନାଗେନ୍ତେ ମିସାର୍‌ତେ ସେନଃତାନାକ। 3 ମେନ୍‌ଦ ମିସାର୍‌ରେନ୍‌ ରାଜା ଫାରୋତାଃଏତେ ଦେଙ୍ଗା ନାମ୍‌ରେୟାଃ କାଜି ଆପେ ନାଗେନ୍ତେ ଗିହୁଃ ଲେକାନ୍‌ କାଜି ହବାଅଃଆ ଓଡ଼ୋଃ ମିସାର୍‌ରାଃ ଗୁମାଟ୍‌ରେୟାଃ ଉମ୍ବୁଲ୍‌ରେ ଆସ୍ରା ରିକାତେୟାଃ ଆପେ ନାଗେନ୍ତେ ହିନିସ୍ତା ଲେକାନ୍‌ କାଜି ହବାଅଃଆ। 4 ସୋୟନ୍‌ରେ ଇନିୟାଃ ହାକିମ୍‌କ ମେନାକଆ ଓଡ଼ୋଃ ହାନେସ୍‌ତେ ଇନିୟାଃ କାଜି ଇଦି ସେଟେର୍‌କ ହିଜୁଃକାନା। 5 ଅକନ୍‌ କିଲିକ ଇନିୟାଃ ବୁଗିନ୍‌ ବିଷାଏ କାକ ରିକା ଦାଡ଼ିୟା, ଇନ୍‌କୁଆଃ ଦେଙ୍ଗା ଜେତାନ୍‌ କାମିରେ କା ହିଜୁଃଆ, ଏନା ଇନ୍‌କୁ ନାଗେନ୍ତେ ଗିହୁଃ ଓଡ଼ୋଃ ହିନିସ୍ତା ରେୟାଃ କାଜି ହବାଅଃଆ। ଏନ୍‌ ହରାତେ ଇନ୍‌କୁ ସବେନ୍‌କ ଗିହୁଗଃଆକ।"

6 ଦାକ୍ଷିଣ୍‌ ସାଃରେ ତାଇନ୍‌ତାନ୍ ଜାଁତୁକ ନାଗେନ୍ତେ ଆୟାର୍‌କାଜି। ଅକନ୍‌ ପାର୍‌ଗାନ୍‌ ଜାୱାନ୍‌ ଟେଡ଼ଃ ଓଡ଼ୋଃ କୁଲା ଜାଁତୁତେ, ଅକନ୍‌ ଠାୟାଦ୍ ବିସାନ୍‌ ବିଙ୍ଗ୍‌ ଓଡ଼ୋଃ ଅଟାଙ୍ଗ୍‌ଅଃ ସେଙ୍ଗେଲ୍‌ ଲେକାନ୍‌ ବିଙ୍ଗ୍‌କଲଃ ପେରେୟାକାନା, ନେ' ଲେକାନ୍‌ ବରୱାନ୍‌ ଓଡ଼ୋଃ ସାଙ୍କାଟ୍‌ରାଃ ଦିଶୁମ୍‌ ହରାତେ ଏନ୍‌ ରାଜ୍‌ଦୁଁତ୍‌ ହଡ଼କ ଆକଆଃ ଖୁର୍ଜି ସବେନାଃକେ ଗାଧା ଓଡ଼ୋଃ ଉଁଟ୍‌ରାଃ ହଡ଼୍‌ମରେ ଲାଦିକେଦ୍‌ତେ ମିଆଦ୍ କିଲିକତାଃତେ ସେନଃତାନାକ। ଅକନ୍‌ କିଲିକଚି ଇନ୍‌କୁଆଃ ଜେତ୍‌ନାଃ ଦେଙ୍ଗାରେ କାକ ହିଜୁଆଃ। 7 ଚିୟାଃଚି ଏନ୍‌ ମିସାର୍‌ ଦିଶୁମ୍‌ରାଃ ଦେଙ୍ଗା ସାମା ତାନାଃ। ଏନାମେନ୍ତେ ଇନିଃକେ ଆଇଙ୍ଗ୍‌ ପାପ୍‌କାମି ରିକାତାନ୍‌ ରାହାବ୍‌ ମେନ୍ତେ ନୁତୁମ୍‌ ଏମାକାଜାଇଙ୍ଗ୍‌।

8 ହେ ଯିଶାୟ ନାହାଁଃଦ ଜୁ, ସେନଃମେ, ଇନ୍‌କୁଆଃ ଆୟାର୍‌ରେ ମିଆଦ୍ ଦିରି ପାଟାରେ ଅଲେମେ। ଜେ'ଲେକା ଚି ଏନା ହିଜୁଃ ଦିପିଲି ନାଗେନ୍ତେ ଜାଉଜରଙ୍ଗ୍‌ ତାଇନାଃ। 9 ଚିୟାଃଚି ଇନ୍‌କୁଦ ପାର୍‌ମେଶ୍ୱାର୍‌ଆଃ ବିରୁଧ୍‌ ରିକାତାନ୍‌ ହଡ଼କ, ହସଡ଼ ଜାଗାର୍‌ତାନ୍‌ ହନ୍‌କ, ପ୍ରାଭୁଆଃ ଇନିତୁକେ କା ଆୟୁମ୍‌ତାନ୍‌ ଲେକାନ୍‌କ ତାନ୍‌କ। 10 ଇନ୍‌କୁ ଦାର୍‌ଶାନ୍‌ ନେଲ୍‌ତାନ୍‌ ହଡ଼କକେ କାଜିକତାନାକ, "ଦାର୍‌ଶାନ୍‌ ଓଡ଼ୋଃ ଆଲପେ ନେଲେୟା। ଆୟାର୍‌କାଜି କାଜିତାନ୍‌କକେ କାଜିକତାନାକ, ସାର୍‌ତି ଆୟାର୍‌କାଜି ଆଲେତାଃରେ ଆଲପେ ଜାଗାର୍‌ ରିକାଏ। ଆଲେତାଃରେ ଲେବେଜାନ୍‌ କାଜି ଜାଗାରେପେ ଓଡ଼ୋଃ ହସଡ଼ କାଜିକ ପାର୍‌ଚାର୍‌ ରିକାଏପେ। 11 ଆପେ ହରା ବାଗିପେ, ଆଲେୟାଃ ସେସେନ୍‌ ହରା ଆଲପେ କେସେଦେଆ। ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌କେ ଆଲେତାଃଏତେ ସାଙ୍ଗିନ୍‌ ରିକାଇପେ।"

12 ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌ ନେ କାଜି କାଜିତାନାଏ, "ଆପେ ସବେନ୍‌କ ନେ ବାଚାନ୍‌କେ କାପେ ମାନାତିଙ୍ଗ୍‌ ତାନା ଓଡ଼ୋଃ ଏତ୍‌କାନ୍‌ ଓଡ଼ୋଃ ହସଡ଼ କାଜିରେ ବିଶ୍ୱାସ୍‌ କେଦ୍‌ତେ ଏନାରେ ଆସ୍ରା ତାନାପେ। 13 ଏନାମେନ୍ତେ ଫାଡ଼ାଃକାନ୍‌ ସାଲାଙ୍ଗି ଭିତ୍‌ ଚିଲ୍‌କା ଇମ୍‌ତାଗି ହାଦୁଡ଼୍‌ କେଦ୍‌ତେ ଉୟୁଃକଆଃ, ଏନ୍‌ ପାପ୍‌ ରେୟାଃ ସାଜାଇ ଏନ୍‌ଲେକାଗି ଇନ୍‌କୁଆଃ ଚେତାନ୍‌ରେ ଇମ୍‌ତାଗି ଉୟୁଗଃଆ।" 14 ହାଁସାତେ ବାଇୟାକାନ୍‌ କୁମ୍ଭାର୍‌ ଜିନିଷ୍‌ ଲେକା ଏନା ଟୁକ୍‌ଡ଼ା ଟୁକ୍‌ଡ଼ା ହବାଅଃଆ, ଏନା ନେ'ଲେକା ଟୁକ୍‌ଡ଼ା ହବାଅଃଆ ଯେ, ଏନାରେ ସେଙ୍ଗେଲ୍‌ରାଃ ଆଙ୍ଗରା ଚାଏ ଡାଡ୍‌କା ଏତେ ଦାଆଃ କାଟିକାନ୍‌ ଇଦି ନାଗେନ୍ତେ ମିଆଦ୍ ଖାପ୍‌ରା ହଁଗି କା ନାମଃଆ।

15 ପେଡ଼େୟାନ୍‌ ପାବିତାର୍‌ ପ୍ରାଭୁ, ଇସ୍ରାଏଲ୍‌ରେନ୍‌ ପ୍ରାଭୁ କାଜିତାନାଏ, "ହେୟାତିଙ୍ଗ୍‌ କେଦ୍‌ତେ ମନ୍‌ରୁହାଡ଼୍‌ ରେଦ ଓଡ଼ୋଃ ରୁଡ଼ୁନ୍‌ ରେଦ ବାଞ୍ଚାଅପେ ନାମେୟା। ରୁଡ଼ୁନ୍‌ରେ ଓଡ଼ୋଃ ବିଶ୍ୱାସ୍‌ରେ ତାଇନଃତେୟାଃଗି ଆପେୟାଃ ପେଡ଼େଃ ତାନାଃ। ମେନ୍‌ଦ ଏନାରେ ଆପେ କାପେ ରାଜିୟାନା।" 16 ମେନ୍‌ଦ ଆପେ କାଜିକେଦାପେ, କାହାଗି, ଆଲେ ସାଦମ୍‌ରେ ଦୁବ୍‌କେଦ୍‌ତେ ଇମ୍‌ତାଗି ସେନାଃଲେ, ଏନାମେନ୍ତେ ଆପେ ବାଇରିକଆଃ ଆୟାର୍‌ଏତେ ଇମ୍‌ତାଗି ସବେନ୍‌କ ନିର୍‌କଆଃପେ। ଆପେ କାଜିକେଦାପେ, "ସାଦମ୍‌ରେ ଦୁବ୍‌କେଦ୍‌ତେ ଇମ୍‌ତାଗି ସେନାଃଲେ।" ମେନ୍‌ଦ ଆପେୟାଃ ବାଇରିକ, ଇମ୍‌ତାଗି ଆପେକେ ଦୟା ଦୟା ଅତଙ୍ଗ୍‌ ଇଦିପେୟାକ। 17 ମିହୁଡ଼୍‌ରାଃ କାଉରିତେ ମିଦ୍‌ ହାଜାର୍‌ ହଡ଼ ନିରାଃକ, ମଣେୟାଁ ଝାନ୍‌ ହଡ଼କଆଃ କାଉରିତେ ଆପେ ସବେନ୍‌ ହଡ଼କ ନିରାଃପେ, ଏନ୍ତେ ଆପେ ବୁରୁ ଚୁଟିରେ ମିଆଦ୍‌ ଚିହ୍ନା ଲେକା ଓଡ଼ୋଃ ବୁରୁରେୟାଃ ସାଲାଙ୍ଗି ଠାୟାଦ୍‌ରେ ମିଆଦ୍‌ ସଟାରାଃ ଝାଣ୍ଡା ଲେକା ହବାକେଦ୍‌ତେ ସାରେଜାକାନ୍‌ ତାଇନାଃପେ। 18 ଏନ୍‌ରେହ, ପ୍ରାଭୁ ଆପେକେ ସାୟାଦ୍‌ ଏମ୍‌ ନାଗେନ୍ତେ ସାନାଙ୍ଗ୍‌ତାନାଏ ଓଡ଼ୋଃ ଆପେକେ ଦାୟା ନେଣ୍ଡା ଏମ୍‌ ନାଗେନ୍ତେ ସେକାଡ଼୍‌କାନା। ଚିୟାଃଚି ପ୍ରାଭୁଦ, ନ୍ୟାୟ ଏମଃନିଃ ପାର୍‌ମେଶ୍ୱାର୍‌ ତାନିଃ। ଅକଏକ ଇନିଃତାଃରେ ଆସ୍ରାଏ ତାନାକ, ଇନ୍‌କୁ ସୁକୁକ ନାମେୟା।

19 ହେ ଯୀରୁଶାଲେମ୍‌ ତାଇନ୍‌ତାନ୍, ସିୟୋନ୍‌ରେନ୍‌ ହଡ଼କ ଆପେ ଓଡ଼ୋଃ କାପେ ରାଆଃଏୟା। ଆପେ ଦାୟା ଦେଙ୍ଗା ନାମ୍‌ ନାଗେନ୍ତେ ରାଆଃଏ ରେଦ ଇନିଃ ଆପେୟାଃ ଚେତାନ୍‌ରେ ସାୟାଦ୍‌ ରିକାୟା। ଇନିଃ ଆୟୁମ୍‌ ତର୍‌ସା ଆପେକେ କାଜିରୁହାଡ଼୍‌ ପେୟା। 20 ପ୍ରାଭୁ ଦୁକୁ ଲେକାନ୍‌ ଜଜମାଃ ଓଡ଼ୋଃ ସିଗିଦ୍‌ ଲେକାନ୍‌ ଦାଆଃ ଏମାକାଦ୍‌ ରେୟଗି, ଆପେକେ ଇତୁ ଏମ୍‌ତାନ୍‌କ ଉକୁକେଦ୍‌ତେ କାକ ତାଇନ୍‌ ଦାଡ଼ିୟାଃ, ମେନ୍‌ଦ ଆପେ ଇନ୍‌କୁକେ ଆପେୟାଃ ମେଦ୍‌ତେ ନେଲ୍‌କଆପେ। 21 ଓଡ଼ୋଃ ହରା ବାଗିକେଦ୍‌ତେ ଲେଙ୍ଗାସାଃ ଚାଏ ଜମ୍‌ସାଃତେ ସେସେନ୍‌ ରେଦ ଦୟା ସାଃତେ ମିଆଦ୍‌ ସାଡ଼ି ଆୟୁମଃଆ, "ନେଆଁଗି ହରା ତାନାଃ, ନେ ହରାରେଗି ସେନ୍‌ପେ।" 22 ଇମ୍‌ତାଦ ଆପେ ରୁପାତେ ଜଲମ୍‌କାନ୍‌ ମୁରୁତ୍‌ ଓଡ଼ୋଃ ଛାଞ୍ଚ୍‌ରେ ବାଇୟାକାନ୍‌ ସୋନାରେନ୍‌ ମୁରୁତ୍‌କକେ ସତ୍‌ରାକାନ୍‌ କା ଫାର୍‌ଚିକାନ୍‌ ଜିନିଷ୍‌ ଲେକା ହୁରାଙ୍ଗ୍‌କେଦ୍‌ତେ କାଜିପେ, "ନେ ଠାୟାଦ୍‌ ଏତେ ଅଡଙ୍ଗ୍‌ଅଃପେ।" 23 ଅତେରେ ହିତା ହେର୍‌ ନାଗେନ୍ତେ ଇନିଃ ଆପେକେ ଗାମା ଦାଆଃ ଏମାପେୟା ଓଡ଼ୋଃ ଅତେହେତେ ଅମନଃତାନ୍‌ ଜ ଏମାପେୟାଏ, ଏନା ବୁଗିନ୍‌ ଓଡ଼ୋଃ ପୁରାଃଗି ହବାଅଃଆ। ଏନ୍‌ ହୁଲାଙ୍ଗ୍‌ ଆପେୟାଃ ଆସୁଲ୍‌ ଜାଁତୁକ ଚାକାର୍‌ ପିଡ଼ିରେୟାଃ ତାସାଦ୍‌ରେ ଆତିଙ୍ଗ୍‌ୟାଁଃକ। 24 ଲୟଙ୍ଗ୍‌ ସିହୁଃ କାମି ରିକାତାନ୍‌ ଉରିକ୍‌ ଓଡ଼ୋଃ ଗାଧା ଚାଲ୍‌ନିରେ ସାଲାକାନ୍‌ ଓଡ଼ୋଃ ହାଟାଃଲଃ ଗୁମ୍‌କେଦ୍‌ତେ ତାଇନଃ ବୁଗିନ୍‌ ଜମେୟାଁ ଜମେୟାଁକ। 25 ଓଡ଼ୋଃ ମାପାଃତୁପୁଇଙ୍ଗ୍‌ ହୁଲାଙ୍ଗ୍‌ କରେ ସବେନ୍‌ ଗାଡ଼୍‌ ହାଦୁଡ଼୍‌ଅଃଆ, ଏନ୍‌ ହୁଲାଙ୍ଗ୍‌ ସବେନ୍‌ ସାଲାଙ୍ଗି ବୁରୁରେ, ସବେନ୍‌ ହୁଡିଙ୍ଗ୍‌ ବୁରୁରାଃ ସେତେଙ୍ଗ୍‌ ଗାଡ଼ାରାଃ ଦାଆଃ ଲିଙ୍ଗିୟଃଆ। 26 ଚିମ୍‌ତା ପ୍ରାଭୁ ଆୟାଃ ହଡ଼କକେ ଏମାକାଦ୍ ଘାଅକରେ ଲିଜାଃ ତଲେୟାଏ ଓଡ଼ୋଃ ଇନ୍‌କୁଆଃ ମାଆଃକାନ୍‌ ଘାଅକେ ବୁଗିୟା, ଇମ୍‌ତା ଚାଣ୍ଡୁଃରାଃ ମାସ୍କାଲ୍‌ ସିଙ୍ଗିରେୟାଃ ମାସ୍କାଲ୍‌ ଲେକା ହବାଅଃଆ ଓଡ଼ୋଃ ସିଙ୍ଗିରାଃ ମାସ୍କାଲ୍‌, ଏୟା ହୁଲାଙ୍ଗ୍‌ରାଃ ମାସ୍କାଲ୍‌ ଲେକା ଏୟା ଗୁନା ମାସ୍କାଲ୍‌ ହବାଅଃଆ।

27 ନେଲେପେ, ପ୍ରାଭୁଆଃ ନୁତୁମ୍‌ ଆୟାଃ ଖିସ୍‌ରେୟାଃ ସେଙ୍ଗେଲ୍‌ ଓଡ଼ୋଃ ପୁରାଃ ସୁକୁଲ୍‌ତେ ସାଙ୍ଗିନ୍‌ଏତେ ହିଜୁଃତାନା। ଇନିୟାଃ ମଚାରେ ଖିସ୍‌ତେ ପେରେୟାକାନ୍‌ ଲେକା ଓଡ଼ୋଃ ଆଲାଙ୍ଗ୍‌ ଖିସ୍‌ରେୟାଃ ସେଙ୍ଗେଲ୍‌ତେ ପେରେଜାକାନ୍‌ ଲେକା ମେନାଃ। 28 ଇନିୟାଃ ସାହେଁଦ୍‌ ଟୁଡା ଦାଆଃ ଲିଙ୍ଗିୟଃତାନ୍‌ ଲେକା ଆତୁ ଇଦିୟଃତାନା। ଜିୟନଃରେୟାଃ ଚାଲ୍‌ନିରେ ଏନ୍ କିଲିକକେ ଆୟାର୍‌ ଇଦିକଆ ଓଡ଼ୋଃ ହସଡ଼ରେୟାଃ ହରାରେ ଆୟାର୍‌ ଇଦି ନାଗେନ୍ତେ ଇନ୍‌କୁଆଃ ମଚାରେ ଲାଗାମ୍‌ ଏମଃଆ। 29 ପାବିତାର୍‌ ପାରାବ୍‌ରେ ନୁବାଃ ଇମ୍‌ତା ଚିଲ୍‌କା ଦୁରାଙ୍ଗ୍‌ ତାନାପେ, ଏନ୍‌ ଲେକା ଦୁରାଙ୍ଗ୍‌ୟେଁପେ, ଓଡ଼ୋଃ ହଡ଼କ ଚିଲ୍‌କା ପ୍ରାଭୁଆଃ ମାନ୍ଦିର୍‌ତେ ଓଡ଼ୋଃ ଇସ୍ରାଏଲ୍‌ରାଃ ସେରେଙ୍ଗ୍‌ତାଃତେ ମୁର୍‌ଲି ସାଡ଼ିକେଦ୍‌ତେ ସେନ୍‌ତାନାକ, ଏନ୍‌ଲେକା ଆପେୟାଃ ମନ୍‌ସୁରୁଦ୍‌ ରାସ୍‌କାଅଃଆ।

30 ପ୍ରାଭୁଆଃ ମାନାରାଙ୍ଗ୍‌ ରେୟାଃ ସାଡ଼ି ଇନ୍‌କୁ ଆୟୁମେୟା। ଓଡ଼ୋଃ ପୁରାଃ ଖିସ୍‌, ଅଣ୍ଡର୍‌ ରିକାତାନ୍‌ ସେଙ୍ଗେଲ୍‌ ହୁକା, ଦୁଦ୍‌ଗାର୍‌ ହୟ, ଦାଆଃ ଗାମା ଓଡ଼ୋଃ ଆରିଲ୍‌ ଦିରି ଗାମା ତାନ୍‌ଲଃ ଆୟାଃ ତିଃଇ ପାସ୍‌ରାଅ କେଦ୍‌ତେ ହିଜୁଃ ତାନ୍‌ତେୟାଃ ଉଦୁବାକଆ। 31 ଚିୟାଃଚି ପ୍ରାଭୁଆଃ ସାଡ଼ିତେ ଆସେରିୟାରେନ୍‌ ହଡ଼କକେ ନେତେ ହାନ୍ତେକଆ ଓଡ଼ୋଃ ଇନିଃ ଆୟାଃ ରାଇଜ୍‌ ଚାଲାଅତାନ୍‌ ସଟାତେ ଇନ୍‌କୁକେ ଦାଲ୍‌କଆ। 32 ଚିମ୍‌ତା ପ୍ରାଭୁ ଆସେରିୟା ହଡ଼କକେ ଆୟାଃ ତିଃଇତେ ଦାଲ୍‌କଆ, ଓଡ଼ୋଃ ସଟାଲଃ ସବେନ୍‌କକେ ସାଜାଇ ଏମାକଆ ଇମ୍‌ତାଙ୍ଗ୍‌ ଡାପ୍‌ଲି ବାଜା ଓଡ଼ୋଃ ବାନାମ୍‌ ବାଜା ସାଡ଼ିୟା। 33 ସିଦା ଦିପିଲିତେଗି ସେଙ୍ଗେଲ୍‌ ଜୁଲଃତାନ୍‌ ଭାଟି ସେକାଡ଼ାକାନା। ଏନା ଆସେରିୟା ରାଜା ନାଗେନ୍ତେ ସେକାଡ଼ାକାନା। ଇନିୟାଃ ନାଗେନ୍ତେ ମିଆଦ୍‌ ପୁରାଃ ଇକିର୍‌ ଓଡ଼ୋଃ ଚାକାର୍‌ଗି ଗାଡା ଉରାକାନା ଓଡ଼ୋଃ ଇନିଃକେ ଅଣ୍ଡର୍‌ ନାଗେନ୍ତେ ସେଙ୍ଗେଲ୍‌ ଓଡ଼ୋଃ ସାହାନ୍‌ ହୁଣ୍ଡିକେଦ୍‌ତେ ଦହାକାନା। ପ୍ରାଭୁଆଃ ସାହେଁଦ୍‌ ଜୁଲ୍‌ତାନ୍‌ ଗାନ୍ଧାକ୍‌ ଲିଙ୍ଗିୟଃତାନ୍‌ ଲେକା ସେଙ୍ଗେଲ୍‌ ଫୁର୍‌କାଅୟାଏ।