କୁଶ୍ ଦିଶୁମ୍ ନାଗେନ୍ତେ ଆୟାର୍କାଜି
1 ଆହା ! କୁଶ୍ ଦିଶୁମ୍ରାଃ ଗାଡ଼ା ହାନ୍ ପାରମ୍ରେ ନେ’ଲେକାନ୍ ଦିଶୁମ୍ ମେନାଃ, ଏନ୍ତାଃରେ ସନ୍ସରେଦ୍ ଆଫିର୍ତାନ୍ ଆଫ୍ଡ଼ବ୍ରାଃ ସାଡ଼ି ଲେକା ଆୟୁମଃତାନା। 2 ଏନ୍ ଦିଶୁମ୍ରେନ୍ କାଜି ଇଦିସେଟେର୍ ହଡ଼କକେ ମାପ୍ରାଙ୍ଗ୍ ସାଉଁଣିତେ ବାଇୟାକାନ୍ ଲାଉକାରେ ଦରେୟା ହରାତେ କୁଲ୍କତାନାଏ। ମେନ୍ଦ ଜାଲ୍ଦି କାଜି ଇଦି ସେଟେରେତାନ୍ ହଡ଼କ ଆପେ ରୁହାଡ଼୍ପେ। ଅକନ୍ କିଲିକ ସାଲାଙ୍ଗି ଓଡ଼ୋଃ ଚିକାନ୍ଗି ମେନାକଆ, ଅକନ୍କକେ ଚାରିଓସାଃ ବରୱାକ ତାନାକ, ଅକନ୍କ ଚି ପେଡ଼େୟାନ୍ ଓଡ଼ୋଃ ଜିନିତାଅ ହଡ଼କ ତାନ୍କ, ଅକେୟାଃ ଦିଶୁମ୍ ଚି ଗାଡାକଲଃ ହାଟିଙ୍ଗ୍ୟାଁକାନା, ଇନ୍କୁତାଃତେ ନେ କାଜି ଇଦି ସେଟେରେପେ।
3 ହେ ଗଟା ଦିଶୁମ୍ରେନ୍ ହଡ଼କ, ହେ ଅତେଦିଶୁମ୍ରେନ୍ ହଡ଼କ, ବୁରୁ ଚେତାନ୍ରେ ଝାଣ୍ଡାକ ଅଟାଙ୍ଗ୍ ଇମ୍ତା, ଆପେ ଏନାକେ ନେଲେପେ ଓଡ଼ୋଃ ବିଙ୍ଗୁଲ୍ବାଜା ସାଡ଼ି ଇମ୍ତା ଏନା ଆୟୁମେପେ। 4 ଚିୟାଃଚି ପ୍ରାଭୁ ଆଇଙ୍ଗ୍କେ କାଜିକେଦିୟାଁ, "ସେତାଃରାଃ ସିତୁଙ୍ଗ୍ ଜେ’ଲେକା ଲେବେଃ ଆଟ୍କାରାଃ, ଓଡ଼ୋଃ ଜଅ ଇରଃତାନ୍ ଇମ୍ତା ସିଙ୍ଗିରାଃ ରାଁପ୍ ଓଡ଼ୋଃ ଅସ୍ଦାଆଃ ଉୟୁଗଃ ଇମ୍ତାରେୟାଃ ରିମିଲ୍ ଜେ’ଲେକା, ଏନ୍ଲେକାଗି ଆଇଙ୍ଗ୍ ରୁଡ଼ୁୟାନ୍ଲଃ ଆଇଁୟାଃ ଠାୟାଦ୍ଏତେ ନେଲେୟାଇଙ୍ଗ୍। 5 ଚିୟାଃଚି ଦାଖ୍ ଜ ହୁଣ୍ଡି ସିଦାରେ, ଦାଖ୍ନାଡ଼ିରେ ଡେମ୍ୱୟାନ୍ ଟୁଣ୍ଡୁ ତାୟମ୍ତେ ଏନାରେ ବାହା କେଦ୍ତେ ଏନାରେ ଜ ବିଲି ଇମ୍ତା, ଇନିଃ ନାୱା ସାକାମ୍କେ ଓଡ଼ୋଃ ନେତେହେନ୍ତେ ପାସ୍ରାଅକାନ୍ ନାଡ଼ିକକେ ଦାତ୍ରମ୍ଲଃ ମାଆଃଏୟା। 6 ଏନ୍ ସବେନାଃ ବୁରୁରେନ୍ ମାସ୍ ଜମ୍ ଅଡ଼େକ ଓଡ଼ୋଃ ବିର୍ରେନ୍ ଜାଁତୁକ ନାଗେନ୍ତେ ବାଗିୟଃଆ। ଗଟା ସିତୁଙ୍ଗ୍ ସାହା ବିର୍ରେନ୍ ମାସ୍ ଜମ୍ ଅଡ଼େକ ଏନାକେ ଜମେୟାଁକ ଓଡ଼ୋଃ ଗଟା ରାବାଙ୍ଗ୍ ସାହା ଜାକେଦ୍ ବିର୍ରେନ୍ ଜାଁତୁକ ଏନାକେ ଜମେୟାଁକ।"
7 ଏନ୍ ଦିପିଲିରେ ପୁରାଃ ପେଡ଼େୟାନ୍, ସାଲାଙ୍ଗି ଓଡ଼ୋଃ ଚିକାନ୍ଗି ମେନାକଆ, ଅକନ୍କକେ ଚାରିଓସାଃରେନ୍ ହଡ଼କ ବରୱାକ ତାନାକ, ଅକ କିଲିକଆଃ ଦିଶୁମ୍ ଗାଡାକଲଃ ହାଟିଙ୍ଗ୍ୟାଁକାନା, ଇନିଃ ପେଡ଼େୟାନ୍ ପ୍ରାଭୁଆଃ ନୁତୁମ୍ତେ ସାରିୟଃତାନ୍ ସିୟୋନ୍ ବୁରୁକେ ପେଡ଼େୟାନ୍ ପ୍ରାଭୁଆଃ ନୁତୁମ୍ତେ ଦାନ୍ ଲେକା ଆଉ ସେଟେରେୟା।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)