1 ପାର୍‌ମେଶ୍ୱାର୍‌ କାଜିତାନା,

"ହେ ସବେନ୍‌ ଟାପୁକ, ଆଇଁୟାଃ ଆୟାର୍‌ରେ ସବେନ୍‌କ ହାପାକେଦ୍‌ତେ ତାଇନ୍‌ପେ,

ହଡ଼କ ନାୱା ନାୱା ପେଡ଼େଃ ନାମେକାକ,

ଇନ୍‌କୁ ହେପାଦ୍‌ତେ ହିଜୁଃୟାନ୍‌ଲଃ କାଜିକାକ,

ଏଲା ଆବୁ ବିଚାର୍‌ ଠାୟାଦ୍‌ରେ ହୁଣ୍ଡିନାଃବୁ ଓଡ଼ୋଃ ଅକଏ ଠାଉକାନିଃ ତାନିଃ ଏନାବୁ ନେଲେୟା।

2 "ଇନିଃ ଧାର୍‌ମାନ୍‌ତେ ଅକଏକେଚି ଆପାନାଃ ହେପାଦ୍‌ତେ କେଡ଼ା ଆଉଇୟା, ନେ’ଲେକାନ୍‌ ମିହୁଡ଼୍‌କେ ପୁରାବ୍‌ ସାଃରେ ଅକଏ ଅଡଙ୍ଗ୍‌ କାଇଜାଏ ?

ପ୍ରାଭୁ ଇନିୟାଃ ତିଃଇରେ ଦିଶୁମ୍‌ରେନ୍‌ ହଡ଼କକେ ଆୟାଃ ଆୟାର୍‌ରେ ଜିମାକଆ ଓଡ଼ୋଃ ରାଜାକଆଃ ଚେତାନ୍‌ରେ ରାଇଜ୍‌ ନାଗେନ୍ତେ ଆକ୍‌ତେୟାର୍‌ ଏମାଇୟାଏ,

ଇନିଃ ଆୟାଃ ତାରାଉଡ଼ି ଆୟାର୍‌ରେ ଇନ୍‌କୁକେ ଧୁଡ଼ି ଲେକା ରିକାକଆଏ,

ଓଡ଼ୋଃ ଇନିୟାଃ ଧାନୁ ଇନ୍‌କୁକେ ପେଟେଃ ଲେକା ଅଟାଙ୍ଗ୍‌ ଇଦିକଆ।

3 ଇନିଃ ଇନ୍‌କୁକେ ସୁକୁତେ ଦୟା ଦୟା ଅତଙ୍ଗ୍‌କଆ ଓଡ଼ୋଃ ଅକନ୍‌ ହରାରେ ଇନିଃ ଚିଉଲାହ କା ସେସେନ୍‌,

ଏନ୍‌ ହରାରେ ବେଗାର୍‌ ବରତେ ଆୟାର୍‌ତେ ସେନ୍‌ ଇଦିନା।

4 ମୁନୁ ଏତେ ସବେନ୍‌ ହଡ଼କକେ କେଡ଼ାକେଦ୍‌ତେ

ଅକଏ ନେ ସବେନ୍‌ କାମିକେ ରିକାକାଦା ଓଡ଼ୋଃ ପୁରାକାଦା ?

ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌, ମୁନୁରେ ଇନ୍‌କୁଲଃ ତାଇକେନାଇଙ୍ଗ୍‌,

ଓଡ଼ୋଃ ଆଇଙ୍ଗ୍‌ଦ ପ୍ରାଭୁ ତାନିଙ୍ଗ୍‌, ଟୁଣ୍ଡୁ ଦିପିଲି ଜାକେଦ୍‌ ଇନ୍‌କୁଲଃ ତାଇନାଇଙ୍ଗ୍‌।

5 "ଆଇଙ୍ଗ୍‌ ଅକ ସବେନ୍‌ ଟାପୁକ ବାଇୟାକାଦା ଏନାକେ ହଡ଼କ ନେଲ୍‌କେଦ୍‌ତେ ଆକ୍‌ଦାନ୍ଦାଅୟାନା।

ଦିଶୁମ୍‌ ରେୟା ଟୁଣ୍ଡୁ ଜାକେଦ୍‌ ଅକ ସବେନାଃ ବାଇୟାକାଦା ଏନାକେ ନେଲ୍‌କେଦ୍‌ତେ ଇନ୍‌କୁ ବରତେ ଥାର୍‌ଥାରାଅଃତାନା।

ଏନାମେନ୍ତେ ଏନ୍‌ ସବେନ୍‌କ ମିଦ୍‌ତାଃରେ ହୁଣ୍ଡିକେଦ୍‌ତେ ମିଆଦ୍‌ ଝୁଣ୍ଡ୍‌ ହବାୟାନା।

6 ସବେନ୍‌କ ଆପାନ୍‌ ହପୋର୍‌ଜାପାଃରେନ୍‌ କକେ ଦେଙ୍ଗା କେଦ୍‌କଆ ଓଡ଼ୋଃ ସବେନ୍‌ ହାଗାକକେ ଜୀଉକେଟେଦ୍‌ ରିକାଏପେ ମେନ୍ତେ କାଜିକେଦ୍‌କଆ।

7 ବାଢ଼ାଇ ସୋନାରିକେ କାଜିକିୟା, ‘ବୁଗିନ୍‌ଗି ହବାକାନା’,

ଅକଏ ମାର୍‌ତୁଲ୍‌ଲଃ ଏନ୍‌ ଖଦାକାମି ରିକାତାନା, ଇନିଃକେ ଜୀଉକେଟେଦ୍‌ ଏମାଇତାନାଏ।

କାଣ୍ଟିଲଃ ଅକଏ ଏନାକେ କାମିକେଦା ଇନିଃକେ ଜୀଉକେଟେଦ୍‌ ଏମାଇତାନାଏ।

ଓଡ଼ୋଃ ଏନ୍‌ ମୁରୁତ୍‌ ଚିଲ୍‌କା କା ଟାଲ୍‌ମାଲ୍‌ ରିକାନାଃ ଏନାମେନ୍ତେ କାଣ୍ଟିତେ ମୁରୁତ୍‌କେ ବୁଗିନ୍‌ଗି ବାଇ କେଟେଦ୍ କେଦା।

ଏନ୍ତେ ଇନିଃ କାଜିକେଦା, ‘ଖଦାକାମି ବୁଗିନ୍‌ଗି ହବାକାନା।’

8 "ମେନ୍‌ଦ ହେ ଆଇଁୟାଃ ଦୁଲାଡ଼୍‌ ଦାସି ଇସ୍ରାଏଲ୍‌,

ଆଇଁୟାଃ ସାଲାକାନ୍‌ ଯାକୁବ୍‌,

ଆପେ ଆଇଁୟାଃ ସାଙ୍ଗି ଆବ୍ରାହାମ୍‌ଆଃ କିଲିକ।

9 ଅତେ ଦିଶୁମ୍‌ରେୟାଃ ଟୁଣ୍ଡୁ ଏତେ ଆପେକେ ଆଉକେଦ୍‌ପେୟା,

ଅତେରେୟା କଚା ଏତେ ଆପେକେ ହାକାଅ ଆଉକେଦ୍‌ପେୟା

ଓଡ଼ୋଃ ଆପେକେ, ‘ଆପେ ସବେନ୍‌କ ଆଇଁୟାଃ ଦାସିକ ମେନ୍ତେ କାଜିକେଦ୍‌ପେୟା,’

ଆଇଙ୍ଗ୍‌ ଆପେକେ ସାଲାକାଦ୍‌ପେୟା ମେନ୍‌ଦ କାଇଙ୍ଗ୍‌ ବାଗିପେୟା।

10 ଆଇଙ୍ଗ୍‌ ଆପେଲଃ ମେନାଇଁୟାଃ ମେନ୍‌ଦ ଆପେ ଆଲପେ ବରୟା,

ଆଇଙ୍ଗ୍‌ ଆପେୟା ପାର୍‌ମେଶ୍ୱାର୍‌, ଆଲପେ ଆଡ଼ାଃଉଡ଼ୁଃ ରିକାନାଃ,

ଆଇଙ୍ଗ୍‌ ଆପେକେ ପେଡ଼େଃ ପେୟା ଓଡ଼ୋଃ ଦେଙ୍ଗା ପେୟା,

ଆଇଙ୍ଗ୍‌ ଆପେକେ ଆଇଁୟାଃ ଧାର୍‌ମାନ୍‌ ରେୟା ତିଃଇତେ ବାଞ୍ଚାଅ ପେୟା।

11 "ଅକଏ ଆପେକେ ଖିସ୍‌ ରିକାଏତାନା,

ଇନ୍‌କୁ ନାହାଁଦ ଗିହୁଃ ଓଡ଼ୋଃ ସାର୍‌ପାଅ ରିକାନାଃ।

ଆମାଃଲଃ ଅକଏକ ବାଇରି କେଦ୍‌ତେ ବିରୁଧ୍‌ ରିକାୟା, ଇନ୍‌କୁ ସବେନ୍‌କ ଗଜଆଃ।

12 ଅକଏକ ଆମାଃଲଃ ବିରୁଧ୍‌ ରିକାୟା, ଆମ୍‌ ଇନ୍‌କୁକେ ଦାଣାଁକଆମ୍‌ ମେନ୍‌ଦ ଇନ୍‌କୁଆଃ ସାନାଙ୍ଗ୍‌ ଚିନାଃ କାମ୍‌ ନାମେୟା, ଅକନ୍‌କ ଆମାଃଲଃ ଲାଡ଼ାଇ ରିକାଃ, ଇନ୍‌କୁ କାକ ନେଲଃଆ।

13 ଆଇଙ୍ଗ୍‌ଦ ଆପେୟାଃ ପ୍ରାଭୁ ପାର୍‌ମେଶ୍ୱାର୍‌ ତାନିଙ୍ଗ୍‌,

ଆଇଙ୍ଗ୍‌ ଆପେୟାଃ ଜମ୍‌ତିଃଇ ସାବ୍‌କେଦ୍‌ତେ କାଜିପେତାନାଇଙ୍ଗ୍‌,

‘ଆଲପେ ବରୟା, ଆଇଙ୍ଗ୍‌ ଆପେକେ ଦେଙ୍ଗାପେୟାଇଙ୍ଗ୍‌।’"

14 ପ୍ରାଭୁ କାଜିତାନାଏ,

"ହେ ତିଜୁ ଲେକାନ୍‌ ଯାକୁବ୍‌ ଓଡ଼ୋଃ ନାରାଦୁରା ଇସ୍ରାଏଲ୍‌ ହଡ଼କ,

ଆଲପେ ବରୟା, ଆଇଙ୍ଗ୍‌ ଆପେକେ ଦେଙ୍ଗାପେୟା।

ଆଇଙ୍ଗ୍‌ ଆପେୟାଃ ବାଞ୍ଚାଅନିଃ, ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌ ତାନିଙ୍ଗ୍‌।

15 ନେଲେପେ, ଆଇଙ୍ଗ୍‌ ଆପେୟାଃ ଗମ୍‌କେକ ନାଗେନ୍ତେ,

ମିଆଦ୍ ନାୱା ମେଡ଼େଦ୍‌ରାଃ ଲେସେର୍‌ ହାଁତେୟାର୍‌ ଲେକା ବାଇପେୟା।

ଏନାରେ ଆପେ ଟୁଙ୍ଗୁରିକକେ ହାସୁର୍‌ କେଦ୍‌ତେ ଜିୟନ୍‌ ରିକାୟା,

ଓଡ଼ୋଃ ବୁରୁକେ ଲେକା ରିକାୟା।

16 ଆମ୍‌ ଇନ୍‌କୁକେ ହାଟାଃରେ ଗୁମ୍‌କରେ,

ହୟ ଇନ୍‌କୁକେ ଅଟାଙ୍ଗ୍‌ ଇଦିକଆଏ

ଓଡ଼ୋଃ ଆନ୍ଧିହୟ ଇନ୍‌କୁକେ ଛିତିବିତି ରିକାକଆ

ଓଡ଼ୋଃ ଆପେ ସବେନ୍‌କ ପ୍ରାଭୁତାଃରେ ରାସ୍‌କା ରିକାୟା

ଓଡ଼ୋଃ ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌ତାଃରେ ମାଇନ୍‌ ରିକାୟା।

17 "ନାରାଦୁରା ଓଡ଼ୋଃ କଏଁ ହଡ଼କ ଦାଆଃ ଦାଣାଁଃକ ମେନ୍‌ଦ ଏନ୍ତାଃରେ ଦାଆଃ ବାନଆଃ।

ତେତାଙ୍ଗ୍‌ତେ ଇନ୍‌କୁଆଃ ଆଲାଙ୍ଗ୍‌କ ରହଡ଼ଃଆ।

ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌, ଇନ୍‌କୁକେ କାଜିରୁହାଡ଼୍‌ କଆ।

ଆଇଙ୍ଗ୍‌ ଇସ୍ରାଏଲ୍‌ରେନ୍‌ ପାର୍‌ମେଶ୍ୱାର୍‌ ଇନ୍‌କୁକେ କାଇଙ୍ଗ୍‌ ବାଗିକଆ।

18 ଦାରୁ କା ତାଇନ୍‌ ସାଲାଙ୍ଗି ଠାୟାଦ୍‌ରେ ଗାଡ଼ା ଲିଙ୍ଗିୟଃଆ

ଓଡ଼ୋଃ ଢିପା ତାଇନ୍‌ ଠାୟାଦ୍‌ରେ ଝାରେନ୍‌ ଦାଆଃ ଲିଙ୍ଗିୟଃଆ।

ବିର୍‌କେ ଦାଆଃତେ ଓଡ଼ୋଃ ରହଡ଼ାକାନ୍‌ ଅତେରେ ଝାରେନ୍‌ ଦାଆଃ ଲିଙ୍ଗିୟଃଆ।

19 ପୁରାଃ ବିର୍‌ ପାର୍‌ଗାନ୍‌କରେ ଏରସ୍‌ ଦାରୁ, ବାବୁଲ୍‌ ଦାରୁ, ମେହେନ୍ଦି ଓଡ଼ୋଃ ଅଲିଭ୍‌ ଦାରୁକ ରଏୟା।

ଟନାଙ୍ଗ୍‌ରେ ଦେବ୍‌ଦାରୁ, ତିଧର୍‌ ଓଡ଼ୋଃ ତାଶୁର୍‌ ଦାରୁକ ମିଦ୍‌ତାଃରେ ରଏୟା।

20 ଏନ୍ତେଦ ପ୍ରାଭୁଆଃ ତିଃଇ ନେଆଁ ରିକାକାଦା,

ଇସ୍ରାଏଲ୍‌ରେନ୍‌ ପାବିତାର୍‌ ପାର୍‌ମେଶ୍ୱାର୍‌ ନେ ସବେନାଃ ବାଇୟାକାଦା,

ଏନା ସବେନ୍‌ ହଡ଼କ ନେଲେୟା ଓଡ଼ୋଃ ଆଟ୍‌କାର୍‌ଉରୁମ୍‌ ରିକାୟା।"

21 ପ୍ରାଭୁ କାଜିତାନା, "ଆପେୟାଃ ବିରୁଧ୍‌ରେୟାଃ କୁନୁଲି କାଜିକ କାଜିପେ,

"ଯାକୁବ୍‌ଆଃ ରାଜା କାଜିତାନାଏ, ଆପେୟାଃ ପକ୍‌ତା ସାବୁତ୍‌ କାଜିକକେ ଉଦୁବେପେ।

22 ହିଜୁଃ ଦିପିଲିରେ ଚିନାଃ ହବାଅଃଆ ? ଏନାକ ଉଦୁବେ ନାଗେନ୍ତେ ଏନ୍‌ ମୁରୁତ୍‌କକେ ବାହାରିତେ ଅଡଙ୍ଗ୍‌ ଆଉକପେ।

ସିଦା ଦିପିଲିରେ ଚିନାଃ ହବାକାନ୍‌ ତାଇକେନା, ଏନା ଇନ୍‌କୁ କାଜିକାକ।

ଏନ୍‌ରେଦ ଆଲେ ଆଟ୍‌କାର୍‌ ଉରୁମ୍‌ ଦାଡ଼ିୟା ଓଡ଼ୋଃ ଟୁଣ୍ଡୁ ଦିପିଲିରେ ଚିନାଃ ହବାଅଃଆ ଏନା ସାରିନାମ୍‌ ଦାଡ଼ିୟଃଆ।

ଚାଏ ହିଜୁଃ ଦିପିଲିରେ ହବାଅଃତାନ୍‌ କାଜିକ ଉଦୁବ୍‌ ରିକାଏକା।

23 ହିଜୁଃ ଦିପିଲିରେ ଚିନାଃ ହବାଅଃଆ ଏନା କାଜିକାକ,

ଏନ୍‌ରେଦ ଆଲେ ସାରିୟା ଯେ, ଇନ୍‌କୁ ମାହାପୁରୁକ ତାନ୍‌କ।

ଏତ୍‌କାନ୍‌ ଚାଏ ବୁଗିନ୍‌ ଜେତ୍‌ନାଃ ରିକା ଦାଡ଼ିରେଦ ଆଲେ ହାଏକାଟ୍‌ କେଦ୍‌ତେ ବରୟା।

24 ମେନ୍‌ଦ ଆପେ ସବେନ୍‌ ଜେତ୍‌ନାଃ ନାହାଁଲାପେ, ଆପେଲଃ ଜେତାନ୍‌ କାଜି କା ହବାଅଃଆ,

ଅକଏ ଆପେତାଃରେ ଆସ୍ରାଏତାନା ଇନିଃ ହିଲାଙ୍ଗ୍‌ଅଃନିଃ ତାନିଃ।

25 "ଆଇଙ୍ଗ୍‌ ଉତ୍ତାର୍‌ ସାଃଏତେ ମିହୁଡ଼୍‌କେ ବିରିଦ୍‌ କାଇୟାଃ,

ଓଡ଼ୋଃ ଇନିଃ ସେଟେର୍‌ ତାନାଏ, ଇନିଃ ସିଙ୍ଗିତୁର୍‌ ସାଃ ଏତେ ଆଇଁୟାଃ ନୁତୁମ୍‌କେ ସାବ୍‌ତାନା,

ଇନିଃ ଭିତ୍‌ ବାଇତାନ୍‌ ମାସ୍‌ଲାକେ ସିପୁଦ୍‌ ରିକାତାନ୍‌ ଲେକା

ଓଡ଼ୋଃ କୁମ୍ଭାର୍‌ ହାଁସା ସିପୁଦ୍‌ ରିକାତାନ୍‌ ଲେକା ରାଇଜ୍‌ତାନ୍‌କକେ କାଟାଲଃ ତିକା ସେରେଦ୍‌କଆ।

26 ଆଇଙ୍ଗ୍‌ ଚିଲ୍‌କା ସାରି ଦାଡ଼ିୟାଇଙ୍ଗ୍‌, ଏନାମେନ୍ତେ ମୁନୁଏତେ ଅକଏ ନେଆଁ ଉଦୁବ୍‌କାଦା ?

ଓଡ଼ୋଃ ଇନିଃ ଧାର୍‌ମାନ୍‌ ମେନ୍ତେ ଜେ’ଲେକା ଆବୁ କାଜି ଦାଡ଼ିୟାବୁ,

ଏନାମେନ୍ତେ ଅକଏ ନେ କାଜିକେ ସିଦାରେ କାଜିକାଦ୍ ତାଇକେନା ? ହେଗି, କାଜି ଉଦୁବ୍‌ ହଡ଼ ଜେତାଏ ବାଙ୍ଗ୍‌କଆ, ହେଗି, ଦେଖାଅ ହଡ଼ ଜେତାଏ ବାଙ୍ଗ୍‌କଆ,

ହେଗି ଆମାଃ କାଜିକେ ଆୟୁମ୍‌ ହଡ଼ ଜେତାଏ ବାଙ୍ଗ୍‌କଆ।

27 ଆଇଙ୍ଗ୍‌ ପ୍ରାଭୁ, ନେ କାଜି ସିଦାରେ ସିୟୋନ୍‌କେ କାଜିକାଦ୍ ତାଇକେନା,

‘ନେଲେମେ ଆମାଃ ହଡ଼କ ରୁହାଡ଼୍‌ ହିଜୁଃତାନା’

ଓଡ଼ୋଃ ଆଇଙ୍ଗ୍‌ ମିହୁଡ଼୍‌କେ ନେ ସୁକୁ କାନାଜି ଯୀରୁଶାଲେମ୍‌ରେ କାଜିମେ ମେନ୍ତେ କୁଲ୍‌କିୟା।

28 ଓଡ଼ୋଃ ଆଇଙ୍ଗ୍‌ ଏନ୍ତାଃରେ ଜେତାଏକେ କାଇଙ୍ଗ୍‌ ନେଲ୍‌ ନାମ୍‌କେଦ୍‌କଆ,

ଆଇଙ୍ଗ୍‌ କୁଲିତାନ୍ କାଜିରେୟାଃ କାଜିରୁହାଡ଼୍‌ ଏମ୍‌ ନାଗେନ୍ତେ

ଜେତାଏ ଏନ୍ତାଃରେ ଗମ୍‌କେ କାକ ତାଇନାଃ।

29 ଇନ୍‌କୁଆଃ ସବେର୍‌ କାମିକ କା ଧାର୍‌ମାନ୍‌ ଲେକ୍‌ନାଃ ତାଇକେନା, ସାମାଗି ତାଇକେନା

ଓଡ଼ୋଃ ଇନ୍‌କୁଆଃ ମୁରୁତ୍‌ ସବେନ୍‌ ହୟ ଲେକା ସାମାଗି ତାଇକେନାକ।"