ଇସ୍ରାଏଲ୍ ପାର୍ମେଶ୍ୱାର୍ଆଃ ସାଲାକାନ୍ନିଃ
1 ପ୍ରାଭୁ କାଜିତାନାଏ, ହେ ଆଇଁୟାଃ ଦାସି ଯାକୁବ୍
ଓଡ଼ୋଃ ଆଇଁୟାଃ ସାଲାକାନ୍ ଇସ୍ରାଏଲ୍, ନାହାଁଃ ଆୟୁମେମେ,
2 ଆଇଙ୍ଗ୍ ପ୍ରାଭୁ ତାନିଙ୍ଗ୍, ଅକଏ ଚି ଆପେକେ ବାଇକାଦ୍ ପେୟା,
ଆପେକେ ଅକଏ ଏଙ୍ଗା ରେୟାଃ ହଡ଼୍ମ ଏତେ ସାଲାକାଦ୍ ପେୟା, ଅକଏ ଆପେକେ ଦେଙ୍ଗାପେୟା,
ଏନ୍ ପ୍ରାଭୁ ନେ କାଜି କାଜିତାନା,
"ହେ ଆଇଁୟାଃ ସାଲାକାନ୍ ଦାସି ଯାକୁବ୍, ହେ ଆଇଁୟାଃ ସାଲାକାନ୍ ଯିଶୁରୁନ୍44:2 ସିଧାସାଧା ହଡ଼, ମେନ୍ଲେରେ ଇସ୍ରାଏଲ୍ କେ କାଜିୟଃତାନା ଆଲମ୍ ବରୟା,
ଆଇଙ୍ଗ୍ ଆପେକେ ଦୁଲାଡ଼୍ପେ ତାନାଇଙ୍ଗ୍।
3 ତେତାଙ୍ଗ୍ତାନ୍ ହଡ଼କଆଃ ଚେତାନ୍ରେ ଦାଆଃ
ଓଡ଼ୋଃ ରହଡ଼୍ ଅତେ ଚେତାନ୍ରେ ଦାଆଃ ଲିଙ୍ଗିୟାଇଙ୍ଗ୍,
ଆଇଙ୍ଗ୍ ଆମାଃ କିଲିକଆଃ ଚେତାନ୍ରେ ଆଇଁୟାଃ ଆତ୍ମା
ଓଡ଼ୋଃ ଆମାଃ ହନ୍କଆଃ ଚେତାନ୍ରେ ଆଇଁୟାଃ ଆଶିଷ୍ ଦୁଲେୟାଇଙ୍ଗ୍।
4 ଏନାରେ ଦାଆଃ ଲିଙ୍ଗିତାନ୍ ହେପାଦ୍ରେ ତାଇକାନ୍
ବାଇସି ନୁତୁମ୍ ତାସାଦ୍ ଦାରୁ ଲେକା ସୁଗାଡ଼ାନ୍ଗି ଅମନଃଆ।
5 ମିଆଦ୍ନିଃ କାଜିୟାଏ, ‘ଆଲେ ପ୍ରାଭୁଆଃ ତାନ୍ଲେ,’
ଏଟାଃ ମିଆଦ୍ନିଃ ଯାକୁବ୍ଆଃ ନୁତୁମ୍ତେ ଆପାନ୍କେ ମାରାଙ୍ଗ୍ ଉଦୁବ୍ ରିକାନାଏ,
ଓଡ଼ୋଃ ଏଟାଃ ମିଆଦ୍ନିଃ ପ୍ରାଭୁଆଃ ନାଗେନ୍ତେ ଆପ୍ନାଃ ତିଃଇରେ ଠେପା ରିକାୟାଏ
ଓଡ଼ୋଃ ଇସ୍ରାଏଲ୍ରେନ୍ କିଲି ମେନ୍ତେ ଆପାନ୍କେ ମାରାଙ୍ଗ୍ୟେଁନ୍ ରିକାନାଏ।"
6 ପ୍ରାଭୁ ଇସ୍ରାଏଲ୍ରେନ୍ ରାଜା ଓଡ଼ୋଃ ଇନିୟାଃ ପାରିତ୍ରାଣ୍ ଏମ୍ତାନ୍ ସାଲାଙ୍ଗିଉତାର୍ ପାର୍ମେଶ୍ୱାର୍ ନେ କାଜି କାଜିତାନା,
"ଆଇଙ୍ଗ୍ ମୁନୁ ଓଡ଼ୋଃ ଟୁଣ୍ଡୁ ତାନିଙ୍ଗ୍, ଆଇଙ୍ଗ୍କେ ବାଗିକେଦ୍ତେ ଏଟାଃ ପାର୍ମେଶ୍ୱାର୍ ବାଙ୍ଗାଇୟା।
7 ଆଇଙ୍ଗ୍ ଏନ୍ ସିଦାରେନ୍ ମାରି ହଡ଼କକେ ବାଇକେଦ୍କ ଦିପିଲିଏତେ
ଆଇଁୟାଃ ଲେକା ଅକଏ ଇନ୍କୁକେ କେଡ଼ାକଆ, ଏନା ଉଦୁବେକାକ।
ଓଡ଼ୋଃ ପାନ୍ତି ପାନ୍ତି ବୁଗିଲେକାତେ ଏନାକେ ବାଇୟେକା ?
ଓଡ଼ୋଃ ଅକଆଃକ ହେପାଦ୍ରେ ମେନାଃ ଅକଆଃକ ହବାଅଃଆ, ଏନ୍ ସବେନାଃକକେ ଉଦୁବେକା।
8 ହେ ଆଇଁୟାଃ ହଡ଼କ, ଆପେ ଆଲପେ ବରୟା ଚାଏ ଆଲପେ ଥାର୍ଥାରାଅଃଆ।
ଆଇଙ୍ଗ୍ ଚିନାଃ ସିଦାରେ ଆପେତାଃରେ କାଇଙ୍ଗ୍ ଉଦୁବାକାଦା
ଚାଏ ଅକଆଃ ହବାକାନ୍ ତେୟାଃ ଆପେତାଃରେ କା ଉଦୁବାକାନା ?
ଆପେ ଆଇଁୟାଃ ଗାୱାକ ତାନ୍ପେ, ଆଇଙ୍ଗ୍କେ ବାଗିକେଦ୍ତେ ଏଟାଃ ପାର୍ମେଶ୍ୱାର୍ ବାଙ୍ଗାଇୟା ଚି।
ଚିୟାଃ, ଆଇଙ୍ଗ୍କେ ବାଗିକେଦ୍ତେ ଏଟାଃ ପାର୍ମେଶ୍ୱାର୍ ମେନାଇୟା ଚି ?
ଏଟାଃ ଜେତାନ୍ କେଟେୟାନ୍ ସେରେଙ୍ଗ୍ ବାନଃଆ, ଓଡ଼ୋଃ ଆଇଁୟାଃ ସାରିଲେକାତେ ଜେତାଏ ବାଙ୍କଆ।"
ମୁରୁତ୍ ସେୱା ଲାନ୍ଦାଇ ଲେକାନ୍ କାଜି
9 ଅକନ୍କ ଖୋଦାକେଦ୍ତେ ମୁରୁତ୍ ବାଇୟାଃକ, ଇନ୍କୁ ସବେନ୍ ସାମାତାନ୍କ ଓଡ଼ୋଃ ଇନ୍କୁଆଃ ବୁଗିନାଃ ସିଙ୍ଗାରାକାନ୍ ତେୟାଃ ଜେତାନ୍ ଦେଙ୍ଗାରେ କା ହିଜୁଆଃ। ଇନ୍କୁ ଚିଲ୍କା ଗିହୁଗଃଆକ, ଏନାମେନ୍ତେ ଇନ୍କୁଆଃ ଆପ୍ନାଃ ଗାୱାକ କାକ ନେଲାଃ ଚାଏ କାକ ସାରିୟାଃ। 10 ଅକଆଃ ଜେତାନ୍ କାମିରେ ଲାଭ୍ ବାନଃଆ, ଏନ୍ ଲେକାନ୍ ମାହାପୁରୁକକେ ଚାଏ ମୁରୁତ୍କକେ ଛାଞ୍ଚ୍ରେ ଅକଏ ବାଇକାଦ୍ କଆ ? 11 ନେଲେପେ, ଇନିଃକେ ସୁନୁସାର୍ତାନ୍ ସବେନ୍କ ଗିହୁଗଃଆକ ଓଡ଼ୋଃ ଖୋଦାକାମିନିଃ ହଡ଼ଗି ତାନିଃ, ଏନ୍ ସବେନ୍କ ମିଦ୍ତାଃରେ ହୁଣ୍ଡିକେଦ୍ତେ ତିଙ୍ଗୁନ୍କାକ, ଇନ୍କୁ ଥାର୍ଥାରାଅଃଆକ ଓଡ଼ୋଃ ମିସାତେ ଏନ୍ ସବେନ୍କ ଗିହୁଗଃଆକ।
12 ମିଆଦ୍ ବାଡାଏ ମେଡ଼େଦ୍ରାଃ ହାଁତେୟାର୍ ବାଇନାଙ୍ଗ୍ ସେଙ୍ଗେଲ୍ ଆଙ୍ଗରାରେ କାମି ରିକାଃଏ, ଏନାକେ ମାର୍ତୁଲ୍ଲଃ ହୁମାଃକେଦ୍ତେ ଆୟାଃ ଆପ୍ନାଃ ପେଡ଼େୟାନ୍ ତିଃଇଲଃ ବାଇୟାଃଏ, ଇନିଃ ରେଙ୍ଗେଜଃଆଏ, ନାରାଦୁରା କଆଃଏ ଓଡ଼ୋଃ ଦାଆଃ କାଏ ନୁଏଁ ହରାତେ ଲାଗାକଆଃଏ।
13 ବାଢ଼ାଇ ସଙ୍ଗ୍ ରିକାତାନ୍ ବାଏହାର୍ ଟାନାଅକେଦ୍ତେ ରାଙ୍ଗ୍ ରିକାଃଏ, ଏନାକେ ବୁଗିଲେକା ବାଇକେଦ୍ତେ ରାକାମ୍ ରାକାମ୍ ଚିହ୍ନାକ ଏମାଃ ଓଡ଼ୋଃ ଇନିଃ ରାନ୍ଦା ହୁମାଃକେଦ୍ତେ ନାପାଅତେୟାଃଲ ଦାରୁରେୟାଃ ତାକ୍ତାକଲଃ ଅଡ଼ାଃ ରେୟାଃ ଲାଗାତିଙ୍ଗ୍ ସୁଗାଡ଼ାନ୍ ତେୟାଃ ସବେନାଃ ବାଇୟାଃଏ। 14 ଇନିଃ ଆୟାଃ ନାଗେନ୍ତେ ଏରସ୍ ଦାରୁ, ତର୍ସା ଓଡ଼ୋଃ ଅଲୋନ୍ ଦାରୁ ମାଆଃ ଇଦିୟାଏ, ଓଡ଼ୋଃ ଇନିଃ ଏନ୍ ବୁରୁ ଦାରୁଏତେ ମିଆଦ୍ ଦାରୁ ଆପ୍ନାଃ ନାଙ୍ଗ୍ ସାଲାୟାଏ। ଇନିଃ ମିଆଦ୍ ଦେବ୍ଦାରୁ ରଏୟାଏ ଓଡ଼ୋଃ ଏନା ଗାମା ଦାଆଃଲଃ ହାରା ଇଦିୟଃଆ। 15 ଚିମିନ୍ ମାହା ତାୟମ୍ତେ ଏନା ହଡ଼କଆଃ ନାଗେନ୍ତେ ସାହାନ୍ ହବାଅଃଆ ଓଡ଼ୋଃ ଏନାକେ ଜୁଲ୍କେଦ୍ତେ ଏନାତେ ହଲଙ୍ଗ୍ ଲାଦେୟାଏ ଓଡ଼ୋଃ ସେଙ୍ଗେଲ୍ ଜୁରୁବାଃଏ। ଆଡଃଗି ଏନାଏତେ ମୁରୁତ୍କ ବାଇୟା ଓଡ଼ୋଃ ଅମ୍ବାଃକେଦ୍ତେ ଜହାର୍ତାନ୍ଲଃ ସେୱା ରିକାଃଏ। 16 ଇନିଃ ଏନ୍ ସାହାନ୍ ଏତେଗି ଜିଲୁ ରାପାଃକେଦ୍ତେ ଓଡ଼ୋଃ ଆନ୍ଦାଃ ଇସିନ୍କେଦ୍ତେ ଜମେୟାଁ ଓଡ଼ୋଃ ବି’ୟାନ୍ଲଃ ଜୀଉସୁକୁରେ ତାଇନାଃଏ। ଆଡଃଗି ଇନିଃ ସେଙ୍ଗେଲ୍କେ ନେଲ୍କେଦ୍ତେ କାଜିୟା, "ଆହା, ଆଇଙ୍ଗ୍ ସେଙ୍ଗେଲ୍ ଜୁରୁବ୍ୟାନାଇଙ୍ଗ୍ ଓଡ଼ୋଃ ସେଙ୍ଗେଲ୍ ନେଲ୍କେଦାଇଙ୍ଗ୍।" 17 ଓଡ଼ୋଃ ସାରେୟାକାନ୍ ଦାରୁକ ଏତେ ଇନିଃ ଆୟାଃ ତିଃଇତେ ମୁରୁତ୍କ ବାଇୟା ଓଡ଼ୋଃ ଏନ୍ ଆୟାର୍ରେ ଇନିଃ ଅମ୍ବାକେଦ୍ତେ ଜହାର୍କ ତାନା ଓଡ଼ୋଃ ଇନିଃତାଃରେ ବିନ୍ତିକେଦ୍ତେ କାଜିୟା, "ଆଇଙ୍ଗ୍କେ ବାଞ୍ଚାଅଇଙ୍ଗ୍ମେ, ଚିୟାଃଚି ଆମ୍ ଆଇଁୟାଃ ମାହାପୁରୁ ତାନ୍ମେ।"
18 ଚିମିନ୍ ଡଣ୍ଡ ହଡ଼କ ମେନାକଆ ଇନ୍କୁ ଅକ କାମିକ ରିକାଃ ଏନା ଆକଗି କାକ ସାରିୟାଃ ଚାଏ କାକ ଆଟ୍କାର୍ ଉରୁମ୍ ରିକାଃ, ଚିୟାଃଚି ଇନ୍କୁଆଃ ମେଦ୍ ସାର୍ତି ରେୟାଃ ସେଣାଁତେ ହାରୁବ୍କାନା। 19 ଜେତାଏ ନେଆଁକେ କାଏ ଆଟ୍କାର୍ ରିକାଃ, ଚାଏ କାଜି ନାଗେନ୍ତେ ଜେତାଏୟାଃ ସେଣାଁ ଚାଏ ବୁଦ୍ଧି ବାନଆଃ, "ଅକ ଦାରୁରାଃ ସାହାନ୍ ଜୁଲ୍କେଦ୍ତେ ମାସ୍ ଆନ୍ଦାଗଃତାନା ଓଡ଼ୋଃ ଆଙ୍ଗରାଲଃ ହଲଙ୍ଗ୍ ଲାଦଃତାନା, ଜିଲୁ ରାପାଃକେଦ୍ତେ ଜମଃତାନା, ଓଡ଼ୋଃ ଏନ୍ ସାରେୟାକାନ୍ ସାହାନ୍ ଏତେଗି ଚିନାଃ ହିଲାଙ୍ଗ୍ ଲେକାନ୍ ଜିନିଷ୍କ ବାଇୟଃଆ ? ଆବୁ ଚିନାଃ ଦାରୁରାଃ ମିଦ୍ ଟୁକ୍ଡ଼ା ସାହାନ୍ ଆୟାର୍ରେ ଅମ୍ବାଗଃଆବୁ ?"
20 ଇନିଃ ତରେକ୍ ଜମାଃଏ, ଇନିୟାଃ ଆଡ଼ାଃଉଡ଼ୁଃ ସେଣାଁ ହରାତେ ଏତ୍କାନ୍ ହରାତେ ସେନଃକାନା। ଏନାତେ ଇନିଃ ଆୟାଃ ଆପ୍ନାଃ ଜୀଉ ବାଞ୍ଚାଅ କାଏ ଦାଡ଼ିତାନା, ଚାଏ ଆଇଁୟାଃ ଜମ୍ ତିଃଇରେ ଚି ହସଡ଼ କାଜି ବାନଃଆ ମେନ୍ତେ କାଜି କାଏ ଦାଡ଼ିତାନା ?
ଇସ୍ରାଏଲ୍ରେନ୍ ବାବାଇନିଃ ଓଡ଼ୋଃ ବାଞ୍ଚାଅନିଃ ପାର୍ମେଶ୍ୱାର୍
21 ହେ ଯାକୁବ୍, ହେ ଇସ୍ରାଏଲ୍, ଆପେ ନେ ସବେନ୍ କାଜିକ ପାହାମେପେ,
ଚିୟାଃଚି ଆପେ ଆଇଁୟାଃ ଦାସିକ ତାନ୍ପେ।
ଆଇଙ୍ଗ୍ ଆପେକେ ବାଇୟା କାଦ୍ପେୟା, ଆପେ ଆଇଁୟାଃ ଦାସିକ,
ହେ ଇସ୍ରାଏଲ୍ ଆପେକେ କାଇଙ୍ଗ୍ ରିଡ଼ିଙ୍ଗ୍ପେୟା।
22 ଆଇଙ୍ଗ୍ ଆପେୟାଃ କା ଧାର୍ମାନ୍ କାଜିକ ରିମିଲ୍ ଲେକା
ଓଡ଼ୋଃ ଆପେୟାଃ ସବେନ୍ ପାପ୍କ ଛାମାକେଦ୍ତେ ସେତାଃରେୟାଃ ଅସ୍ଦାଆଃ ଲେକା ଅଟାଙ୍ଗ୍ କାଦାଇଙ୍ଗ୍,
ଆଇଁୟାଃତାଃତେ ରୁହାଡ଼୍ ହିଜୁଃପେ, ଆଇଙ୍ଗ୍ ଆପେକେ ରାଡ଼ାକାଦ୍ ପେୟାଇଙ୍ଗ୍।
23 ହେ ସିର୍ମାରେୟାଃ ସବେନାଃ, ରାସ୍କାତେ ଦୁରାଙ୍ଗେପେ, ଚିୟାଃଚି ନେ କାଜିଦ ପ୍ରାଭୁ ରିକାକାଦାଏ।
ହେ ଅତେ ଲାତାର୍, ପୁରାଃଗି କାଉରିପେ,
ହେ ବୁରୁ ସବେନ୍, ହେ ଟନାଙ୍ଗ୍ ଓଡ଼ୋଃ ଏନା ରେୟାଃ ମାରାଙ୍ଗ୍ ଦାରୁ ସବେନ୍, ରାସ୍କାତାନ୍ଲଃ ଦୁରାଙ୍ଗେପେ,
ଚିୟାଃଚି ପ୍ରାଭୁ ଯାକୁବ୍ଆଃ କିଲିକେ ରାଡ଼ା କାଇଜା।
ଓଡ଼ୋଃ ଇସ୍ରାଏଲ୍ରେ ଆୟାଃ ମାନାରାଙ୍ଗ୍କେ ଉଦୁବାକାଦା।
24 ଅକଏ ଆମ୍କେ ବାଇ କେଦ୍ମେଁୟାଇଙ୍ଗ୍, ଆମାଃ ଏନ୍ ବାଞ୍ଚାଅନିଃ କାଜିତାନାଏ,
"ଆଇଙ୍ଗ୍ଦ ପ୍ରାଭୁ ତାନିଙ୍ଗ୍, ଆଇଙ୍ଗ୍ ସବେନାଃ ବାଇୟା କାଦାଇଙ୍ଗ୍,
ଆଇଙ୍ଗ୍ ଏସ୍କାର୍ ସିର୍ମାରେୟାଃ ସବେନାଃ ପାସ୍ରାଅ କାଦାଇଙ୍ଗ୍ ଅତେକେ ନିତିର୍ କାଦାଇଙ୍ଗ୍।
ଆଇଙ୍ଗ୍କେ ଦେଙ୍ଗାନିଃ ଅକଏ ତାନିଃ ?
25 ଆଇଙ୍ଗ୍ ହସଡ଼ ନାବିକଆଃ ରାକାମ୍ ରାକାମ୍ ଚିହ୍ନାକ
ଓଡ଼ୋଃ ଆୟାର୍କାଜି ଉଦୁବ୍ତେୟାଃ କାଇଙ୍ଗ୍ ପୁରାଏୟା, ଦେଅଁଣାକକେ ମୁରୁଖ୍ ମେନ୍ତେ କାଜିକୱାଇଙ୍ଗ୍
ଓଡ଼ୋଃ ସେଣାଁଁନ୍କଆଃ ସେଣାଁକେ ଦୟାକୁଣ୍ଡାମ୍ ରିକାୟାଇଙ୍ଗ୍
ଓଡ଼ୋଃ ଇନ୍କୁ ସେଣାଁ ଡଣ୍ଡ ତାନାଃ ମେନ୍ତେଇଙ୍ଗ୍ କାଜିୟା।
26 ଆଇଙ୍ଗ୍ ଆଇଁୟାଃ ଦାସିକଆଃ ଉହାଟ୍ କାଜିକେ ପୁରାଏୟାଇଙ୍ଗ୍
ଓଡ଼ୋଃ ଆଇଙ୍ଗ୍ ଆଇଁୟାଃ ଦାସିକଆଃ ଆୟାର୍କାଜିକେ ପକ୍ତା ରିକାୟାଇଙ୍ଗ୍।
ଆଇଙ୍ଗ୍ ଯୀରୁଶାଲେମ୍ ବିଷାଏରେ କାଜିତାନାଇଙ୍ଗ୍,
ନେ ଠାୟାଦ୍ ପୁରାଃଗି ହଡ଼ତେ ତାଇନଃ ନାଗାର୍ ହବାଅଃଆ,
ଯିହୁଦା ରେୟାଃ ନାଗାର୍ ବିଷାଏରେ କାଜିତାନାଇଙ୍ଗ୍,
‘ଏନ୍ ସବେନାଃ ଆଡଃମିସା ବାଇରୁହାଡ଼ଃଆ’
ଓଡ଼ୋଃ ହାଦୁଡ଼ାକାନ୍ ଠାୟାଦ୍ ବିଷାଏରେ କାଜିୟଃତାନା,
ଏନ୍ ଠାୟାଦ୍କେ ଆଡଃମିସା ବାଇ ରୁହାଡ଼ଃଆ।
27 ଆଇଙ୍ଗ୍ ଇକିର୍ ଦାଆଃକେ କାଜିତାନାଇଙ୍ଗ୍, ଆଞ୍ଜେଦ୍ ରିକାଅଃକା ଓଡ଼ୋଃ ଆଇଙ୍ଗ୍ ଆମାଃ ଗାଡା
ଓଡ଼ୋଃ ନାହିଁରାଃ ସବେନ୍ ଦାଆଃ ଆଞ୍ଜେଦ୍ ରିକାୟାଇଙ୍ଗ୍।
28 ଆଇଙ୍ଗ୍ କୋରସ୍ ବିଷାଏରେ କାଜିତାନାଇଙ୍ଗ୍, ‘ହେ ଆଇଁୟାଃ ଗୋଟ୍ରେନ୍ ଗୁପିନିଃ, ଆମ୍ ଆଇଁୟାଃ ସାନାଙ୍ଗ୍କେ ପୁରାଏୟାମ୍,’
ଓଡ଼ୋଃ ଇନିଃ ଯୀରୁଶାଲେମ୍ ବିଷାଏରେ କାଜିତାନାଇଙ୍ଗ୍, ‘ଏନା ଆଡଃମିସା ବାଇୟଃଆ,’
ଓଡ଼ୋଃ ପାର୍ମେଶ୍ୱାର୍ଆଃ ମାନ୍ଦିର୍ଅଡ଼ାଃ ବିଷାଏରେ କାଜିତାନାଇଙ୍ଗ୍,
‘ନେଆଁରାଃ ନିହିଁଗାଡା ଆଡଃମିସା ବାଇୟଃଆ।’"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)