1 ଆୟୁମେପେ, ପ୍ରାଭୁଆଃ ତିଃଇ କା ହୁଡିଙ୍ଗ୍‌ କାନା ଯେ, ଇନିଃ ବାଞ୍ଚାଅ କାଏ ଦାଡ଼ିୟା ଚାଏ ଇନିୟାଃ ଲୁତୁର୍ କା ଭାଏଁରାକାନା ଯେ, ଇନିଃ ଆୟୁମ୍‌ କାଏ ଦାଡ଼ିୟା। 2 ମେନ୍‌ଦ ଆପେୟାଃ ଗୁହ୍ନାଁ ହରାତେ ଆପେ ପାର୍‌ମେଶ୍ୱାର୍‌ତାଃଏତେ ବିନ୍‌ଗାଅ କାନାପେ ଓଡ଼ୋଃ ଆପେୟାଃ ପାପ୍‌କ ଆପେତାଃଏତେ ଇନିଃ ଆୟାଃ ମେଦ୍‌ ମୁହାଁଡ଼୍‌କେ ଉକୁକାଦାପେ। ଏନାମେନ୍ତେ ଇନିଃ କାଏ ଆୟୁମେୟା। 3 ଚିୟାଃଚି ଆପେୟାଃ ତିଃଇ ମାୟୋମ୍‌ତେ ଓଡ଼ୋଃ ହସଡ଼ କାଜିକ କାଜିକେଦ୍‌ତେ ପାପ୍‌ ରିକାକାଦା ଓଡ଼ୋଃ ଆପେୟାଃ ମଚାରାଃ ଆଲାଙ୍ଗ୍ ପୁରାଃଗି ସତ୍‌ରା କାଜିକ କାଜିତାନାଏ।

4 ଜେତାଏ ନ୍ୟାୟ କାକ ରିକାଏତାନା, ଜେତାଏ ହଁ ପାତିୟାର୍‌ କାଜିକେ ଅତଙ୍ଗ୍‌ କେଦ୍‌ତେ କାଚାଇରିରେ କାକ ବିଚାର୍ ରିକାଏତାନା। ଇନ୍‌କୁ ହସଡ଼ କାଜିକରେ ଆସ୍ରାଏତାନା ଓଡ଼ୋଃ ସାର୍‌ତି କାକ କାଜିତାନା। ଇନ୍‌କୁ ଜିୟନ୍‌ କାଜିକକେ ଲାହିଦ୍‌ରେ ଦହାକାଦା ଓଡ଼ୋଃ କା ଧାର୍‌ମାନ୍‌ କାଜିକ ଜାନାମ୍ ରିକା। 5 ଇନ୍‌କୁ ମାହୁରାଃତେ ପେରେୟାକାନ୍ ବିଙ୍ଗ୍‌ ଲେକା ଜାରମ୍‌କ ରାପୁଦ୍‌ତାନା ଓଡ଼ୋଃ ବିନ୍ଦ୍‌ରାମ୍‌ ଜାଲମ୍‌ ଲେକା ଜାଲମ୍‌କ ବାଇୟେତାନା। ଅକଏ ଇନ୍‌କୁଆଃ ଜାରମ୍‌କ ଜମାଃଏ, ଇନିଃ ଗଜଃଆଏ। ଏନ୍ ଜାରମ୍‌ ରାପୁଦ୍‌ୟାନ୍‌ରେ ଏନା ଏତେ ମିଆଦ୍ ବିଷାନ୍‌ ବିଙ୍ଗ୍ ଜାନାମଃଆ। 6 ଇନ୍‌କୁଆଃ ବିନ୍ଦ୍‌ରାମ୍‌ ଜାଲମ୍‌ତେ ଲିଜାଃ କା ବାଇୟଃଆ ଚାଏ ଇନ୍‌କୁ ଏନାତେ ବାଇୟାକାଦ୍‌ ଲିଜାଃ ତୁସିଙ୍ଗ୍‌ କାକ ଦାଡ଼ିୟାଃ। ଇନ୍‌କୁଆଃ କାମିକ କା ଧାର୍‌ମାନ୍‌ କାମିକ ତାନା ଓଡ଼ୋଃ ଇନ୍‌କୁଆଃ ତିଃଇରେ ଏତ୍‌କାନ୍‌ତେ ପେରେୟାକାନ୍ କାମିକ ତାଇନ୍‌ତାନା। 7 ଏତ୍‌କାନ୍‌କାମିକ ରିକାଏ ନାଗେନ୍ତେ ଇନ୍‌କୁଆଃ କାଟା ନିର୍‌ବାଡ଼ାଏ ତାନା ଗୁହ୍ନାଁ କା ରିକାକାଦ୍‌ ହଡ଼କକେ ଗଗଏଃ ନାଗେନ୍ତେ ତାର୍‌ତାରାଅଃ ତାନା। ଇନ୍‌କୁଆଃ କା ଧାର୍‌ମାନ୍‌ ପାହାମ୍ କାଜିକ ଏତ୍‌କାନ୍‌ତେ ପେରେୟାଃକାନା, ଇନ୍‌କୁଆଃ ହରାରେ ଗଗଏଃ ଓଡ଼ୋଃ ଜିୟନଃ କାଜିକ ତାଇନ୍‌ତାନା। 8 ଇନ୍‌କୁ ଜୀଉସୁକୁରାଃ ହରାକେ କାକ ସାରିୟା ଓଡ଼ୋଃ ଇନ୍‌କୁଆଃ ହରାରେ ଜେତାନ୍ ବିଚାର୍ ପାହାମ୍ ବାନଃଆ। ଇନ୍‌କୁ ଆପାନ୍ ନାଗେନ୍ତେ ଏଙ୍କବେଙ୍କ ହରାକ ସାଲାକାଦା, ଅକଏ ଏନ୍ ହରାରେ ସେସେନ୍ ରିକାୟା ଇନିଃ ସୁକୁ ରେୟା କାଜିକେ କାଏ ସାରିୟାଃ।

9 ଏନାମେନ୍ତେ ବିଚାର୍ ରେୟାଃ କାଜି ଆବୁତାଃଏତେ ସାଙ୍ଗିନ୍‌ରେ ତାଇନ୍‌ତାନା, ଧାର୍‌ମାନ୍ କାଜି ସାଙ୍ଗାତିରେ କାଏ ସେସେନ୍ ତାନା। ଆବୁଦ ମାସ୍କାଲ୍‌କେ ତାଙ୍ଗିତାନାବୁ, ମେନ୍‌ଦ ନେଲେପେ, ନୁବାଃ ମାସ୍କାଲ୍‌କେ ତାଙ୍ଗିୟାଃ, ମେନ୍‌ଦ ଆବୁ ନୁବାଃରେ ସେସେନ୍‌ତାନାବୁ। 10 ଆବୁ ମେଦ୍‌ କା ନେଲ୍‌ ଦାଡ଼ିତାନ୍ ହଡ଼ ଲେକା ଭିତ୍‌କେ ସାବ୍‌କେଦ୍‌ତେ ନେତେ ହାନ୍‌ତେୟଃ ତାନା, ହେଗି ଆବୁ ମେଦ୍‌ କା ତାଇନ୍ ହଡ଼ ଲେକା ହରା ଦାଣାଁବାଡ଼ା ତାନାବୁ। ନୁବାଃରେ ତହଦଃ ଲେକା ତିକିନ୍‌ ସିଙ୍ଗି ଆବୁ ତହଦଃ ତାନାବୁ। ପେଡ଼େୟାନ୍‌ ହଡ଼କ ଥାଲାରେ ଗଏଃକାନ୍‌ ହଡ଼ ଲେକା ହବାକାନାବୁ। 11 ଆବୁ ସବେନ୍‌କ ଭାଲୁ ଲେକା କାଉରିତାନା ଓଡ଼ୋଃ ଦୁଦୁମୁଲ୍‌ ଅଡ଼େ ଲେକା ରାଆଃଏ ତାନାବୁ। ଆବୁ ବିଚାର୍‌କେ ତାଙ୍ଗିତାନା, ମେନ୍‌ଦ ବିଚାର୍ କାବୁ ନାମ୍ ଦାଡ଼ିତାନା, ପାରିତ୍ରାଣ୍‌କେ ତାଙ୍ଗିତାନାବୁ, ମେନ୍‌ଦ ଏନା ଆବୁତାଃଏତେ ସାଙ୍ଗିନ୍‌ରେ ମେନାଃ।

12 ଆଲେୟାଃ ପାପ୍‌କ ଆମାଃ ଆୟାର୍‌ରେ ପୁରାଃଗି ହବାକାନା ଓଡ଼ୋଃ ଆଲେୟାଃ ପାପ୍ ରେୟାଃ କାଜିକାମିକ ଆଲେୟାଃ ବିରୁଧ୍‌ରେ ଗାୱା ଏମେତାନାଏ। ଚିୟାଃଚି ଆବୁଆଃ କା ଧାର୍‌ମାନ୍ କାଜିକ ଆବୁଲଃ ଗାତିରେ ମେନାଃ ଓଡ଼ୋଃ ଆବୁଆଃ ଗୁହ୍ନା ରେୟାଃ କାଜିକ ଆବୁ ସାରିକାଦା। 13 ପ୍ରାଭୁଆଃ ଆୟାର୍‌ରେ ଆବୁ ଗୁହ୍ନାଁକାଦାବୁ, ଆବୁ ପାର୍‌ମେଶ୍ୱାର୍‌କେ କାବୁ ମାନାତିଙ୍ଗ୍‌କିୟା ଓଡ଼ୋଃ ଇନିୟାଃ ଦୟା ଦୟା ସେସେନ୍ ନାଗେନ୍ତେ ବାଗିକେଦାବୁ। ଆବୁ ପୁରାଃଗି ସିଗିଦ୍ କାମିକ ରିକାକେଦାବୁ ଓଡ଼ୋଃ କା ଠାଉକାନ୍‌ କାଜିକ କାଜିକେଦାବୁ। ଆବୁ ହସଡ଼ କାଜିକ ମନ୍‌ରେ ଉଡ଼ୁଃକେଦ୍‌ତେ କାଜିକେଦାବୁ। 14 ଏନାମେନ୍ତେ ବିଚାର୍ ଦୟାକୁଣ୍ଡାମ୍‌ କାନା ଓଡ଼ୋଃ ଧାରାମ୍ ରେୟାଃ କାଜି ସାଙ୍ଗିନ୍‌ରେ ତିଙ୍ଗୁଆକାନା। ଛାଉର୍‌ ଠାୟାଦ୍‌ରେ ସାର୍‌ତିରେୟାଃ ଜିୟନ୍‌ ହବାକାନା ଓଡ଼ୋଃ ସାର୍‌ତି କାଜି କା ବଲ ଦାଡ଼ିତାନା। 15 ସାର୍‌ତି ରେୟାଃ କାଜି ଜାଞ୍ଜିକାନା। ଅକଏ ଏତ୍‌କାନ୍ କାମି ଏତେ ସାଙ୍ଗିନ୍‌ତେ ନିରାଃ, ଇନିଃ ଆପାନ୍‌କେ ରେଃକ୍‌ ଲେକା ରିକାଏ ତାନା। ପ୍ରାଭୁ ନେ କାଜି ନେଲ୍‌କେଦାଏ ଓଡ଼ୋଃ ନ୍ୟାୟ ବିଚାର୍ କା ତାଇନ୍ ହରାତେ କା ସୁକୁୟାନା।

16 ଆଡଃଗି ଇନିଃ ନେଲ୍‌କେଦା,ଜେତାଏ ହଡ଼ ବାଙ୍ଗାଇୟାଃ, ଇନିଃ ଆକ୍‌ଦାନ୍ଦାଅୟାନା, ଜେତାଏ ବିନ୍ତି ରିକାତାନ୍‌ ହଡ଼ ବାଙ୍ଗାଇୟାଃ। ଏନାତେ ଇନିଃ ଆୟାଃ ତିଃଇରେୟାଃ ସୁପୁତେ ଇନ୍‌କୁକେ ବାଞ୍ଚାଅକଆ। ଓଡ଼ୋଃ ଇନିୟାଃ ଧାର୍‌ମାନ୍‌ଗି ଇନିଃକେ ତିଙ୍ଗୁ କେଟେଦ୍ କେଦ୍‌ତେ ଦହକିୟା। 17 ଓଡ଼ୋଃ ଧାର୍‌ମାନ୍‌ ରେୟାଃ ବୁକୁପାଟା ଓଡ଼ୋଃ ପାରିତ୍ରାଣ୍‌ରେୟାଃ ଟୁପୁରି ଲେକା ବହଃରେ ତୁସିଙ୍ଗ୍‌ୟାନାଏ। ଓଡ଼ୋଃ ଇନିଃ ବାଦ୍‌ଲା ଇଦିରେୟାଃ ଲିଜାଃ ତୁସିଙ୍ଗ୍‌ୟାନାଏ ଓଡ଼ୋଃ ଚିହୁଲ୍‌ ରିକାଃଅ ଲେକାନ୍‌ ଲିଜାଃ ତୁସିଙ୍ଗ୍‌ୟାନାଏ। 18 ଇନ୍‌କୁଆଃ କାମି ଲେକାତେ ଇନିଃ ଆୟାଃ ବାଇରିକକେ ପୁରାଃ ଖିସ୍‌ତେ ଧାମ୍‌କାଅକଆଏ ଓଡ଼ୋଃ ଟାପୁରେ ତାଇନ୍‌ତାନ୍‌ ହଡ଼କକେ ନାଲା ଏମାକଆଏ। 19 ଏନ୍ତେ ହଡ଼କ ସିଙ୍ଗି ହାସୁର୍‌ ସାଃଏତେ ପ୍ରାଭୁଆଃ ନୁତୁମ୍‌କେ ଓଡ଼ୋଃ ସିଙ୍ଗିତୁରଃ ସାଃରେୟାଃ ଠାୟାଦ୍‌ଏତେ ଆୟାଃ ମାନାରାଙ୍ଗ୍‌କେ ବରଏୟାକ, ଚିୟାଃଚି ପ୍ରାଭୁଆଃ ସାହେଁଦ୍‌ରେ ସେସେନ୍‌ତାନ୍‌ ପୁରାଃ ଟୁଡା ଦାଆଃ ଲେକା ବାଇରିକ ସେଟେର୍‌ ହିଜୁଆଃ।

20 ଆଡଃଗି ପ୍ରାଭୁ କାଜିତାନାଏ, "ସିୟୋନ୍‌ ଓଡ଼ୋଃ ଯାକୁବ୍‌ଆଃ ଥାଲାରେ ଅକନ୍‌କ କା ଧାରାମାନ୍‌ ହରାଏତେ ରୁହାଡ଼ାଃକ, ଇନ୍‌କୁତାଃରେ ମିଆଦ୍ ପାପ୍‌ ଏତେ ବାଞ୍ଚାଅନିଃ ହିଜୁଃଆଏ।" 21 ପ୍ରାଭୁ ଆୟାଃ ବିଷାଏରେ କାଜିତାନାଏ, "ଇନ୍‌କୁଲଃ ନେ ରାଜିନାମାଃ ବାଇୟା, ଆଇଁୟାଃ ଅକନ୍‌ ଆତ୍ମା ଆପେତାଃରେ ତାଇନ୍‌ତାନା ଓଡ଼ୋଃ ଅକନ୍‌ ସବେନ୍ ବାଚାନ୍‌କ ଆପେୟାଃ ମଚାରେ ଏମାକାଦା, ଏନା ଆପେୟାଃ ମଚାଏତେ, ଆପେୟାଃ କିଲିକଆଃ ମଚାଏତେ ଓଡ଼ୋଃ ଆପେୟାଃ ଜାଇହନ୍‌କଆଃ ମଚାଏତେ ତିସିଙ୍ଗ୍‌ ଏତେ ଜାନାଅ ଜାକେଦ୍‌ ସାଙ୍ଗିନ୍‌ କା ରିକାନାଃ," ନେଆଁ ପ୍ରାଭୁ କାଜିତାନାଏ।